تحميل رواية «الوصية» PDF

° هتتجوز واحدة مشلولة! عادي؟؟

_ أنا لازم ألاقي واحدة مناسبة في خلال تلت شهور ، لازم

° طيب يا احمد اصبر وهندور تاني

_ انتي عارفة أنا قعدت مع كام واحدة الاسبوع الي فات ؟

° الي أنا مش متخيلاه انك ممكن تتجوز عشان تنفذ وصية!

_ ساعات بنتحط في حاجات مش بنكون راضيين عنها بس لازم نعملها عشان مصلحتنا

° وانت بالنسبالك الورث كل حاجة ؟

_ ليلي انتي اكتر واحدة عارفة أنا عملت ايه عشان الشركة دي تكبر فيه ليالي لا كنت باكل ولا بنام عشان بس اشتغل ، دا حقي ، انا مستعد اعمل اي حاجة عشان تعب السنين الي فاتت دي كله ميروحش في الفاضي

° عمو كان عارفك كويس عشان كده كتب الوصية انك تلاقي بنت ميهماش الفلوس كان عارف أن أي بنت كانت مكملة عشان فلوسك

سكتت ، عندها حق! حتي لما قولت إني اخيراً لقيت البنت الي بحبها لما عرفت اني أعلنت افلاسي من تلت سنين سابتني! ، صعب ان انسان يفقد إيمانه ب الحب ، والاصعب ان الشخص الي راهنت عليه قدام الكل يبقي هو نفس الشخص الي بتحاول تداري سيرته ، يمكن كان عندها حق؟ ، اصل هنعيش فين بالحب؟ لا هعرف ادفع ايجار شقة بالحب ولا هنعرف ندفع فاتورة الكهربا حب ولا هأكلها وأشربها حب! ، مع ذلك ومع تصالحك الشديد مع الحقيقة ، كنت تتمني ولو مرة واحدة حد يمسك فيك عشانك ، عشانك انت .

° أحمد أنا مش قصدي ، متزعلش مني

_ لاء مفيش حاجة ، قولتيلي اسمها ايه؟

° مريم ، خدت منها ميعاد كمان ساعتين

_ تمام ، هروح الشركة اخلص شغل واطلع علي هناك

وصلت المطعم ملقتوش ، المفروض اجي ألاقيه هو الي مستنيني! هو دا العريس اللقطة الي ميتفوتش؟ ، طلعت كتاب أقرأ فيه وطلبت قهوة ، القهوة خلصت وكان لسه مجاش! ، حركت الكرسي المتحرك بتاعي وانا منفعلة وبكلم نفسي من الغيظ

= دي قلة ذوق متناهية دي..

وقف قدامي شاب بينهج ، خد نفس وبصلي

_ انتي مريم؟

= افندم؟

_ أنا بجد اسف اتسحلت في الشغل ، حقك عليا

= الميعاد كان من ساعة ، والميعاد دلوقتي خلص ، ممكن تعديني؟

_ لاء مش هينفع ، بجد أنا متأسف ، مش هتكرر تاني

= مش هيبقي فيه تاني ، انت مش واخد بالك من حاجة؟

_ حاجة ايه؟

بصتله ب استغراب = الكرسي !!

_ عارف

= وجيت؟؟

_ هو انتي فاكرة اني مكنتش جاي عشان كده ؟ لاء والله ابدا ، زحمة شغل زي ما قولتلك ، تسمحي؟

مسك الكرسي ورجعني مكاني وقعد قدامي

_ تحبي تشربي ايه؟

= شربت قهوة

_ ممكن تشربي تاني معايا؟

هزيت راسي ب الموافقة ف نده علي الويتر وطلبلنا اتنين

= طيب ، أنا عشان حالتي مثلاً ف اسمي عند الخاطبة ، شاب زيك اسمه بيعمل ايه؟

_ يمكن عشان حالتي المادية متواضعة شوية

رفعت حاجبي وانا ببصله من فوق ل تحت

= بدلة فورمال ، جذمة مفيش عليها نقطة تراب ، ساعة ماركة ، وحالتك المادية قولتلي مالها؟

_ اه دول.. مستلفهم عشان انزل معاكي

= الاحسن انك تبقي علي طبيعتك مش لازم كل دا

_ بجد ؟؟ ، هو انتي بتشتغلي ايه؟

= الصبح في المكتبة الي هنا في البلد وبليل في مطعم

_ شيف؟

= أيوة ، وأنت ؟

_ موظف في شركة

= باين عليك انك راجل عملي أوي ، يمكن الشغل رقم واحد في حياتك؟

_ بالظبط ، بحاول

= كويس انك تكون عاوز تحقق حاجة

_ انتي عاوزة تحققي ايه؟

= اكيد هيبقي اهم حاجة بالنسبالي اني اسيب الكرسي دا

_ إن شاء الله تبقي كويسة في اقرب وقت

= متشكرة اوي ، أنا لازم استأذن عشان شغلي

_ اه ، حاضر

طلع المحفظة وبعدين بصلي

_ معلش انا نسيت الفلوس و..

= عادي مفيش مشكلة

طلعت فلوس من شنطتي وحطيتها قدامه بسرعة

_ بتعملي ايه!

= عشان لما الويتر يجي تحسابه انت

_ أنا متشكر اوي

= ولا يهمك كلنا بننسي

حاسب وطلعنا من المطعم واتمشينا _ هو شغلك في انهي مطعم؟

= مطعم الليل

_ دا مطعم تحفه ، انتي شيف في الاول لسه ؟

= لاء الحمد لله أنا الريسة

_ يبقي لازم أكلك محصلش

= لازم تدوق وتحكم

_ هو ينفع؟

= يعني ، ممكن بكرة في المكتبة إن شاء الله

_ تسمحيلي اوصلك ؟

= أنا بعرف احرك الكرسي كويس ف أنا تمام ، شوف شغلك انت عشان متتعطلش

_ أنا بجد مبسوط اني اتعرفت عليكي يمريم

= وأنا كمان ، فرصة سعيدة

بدأت اتحرك ب الكرسي ومشي هو في الناحية المعاكسة ، أخيراً ميعاد كويس! كنت لما بقعد مع أي راجل لما يلاقي الكرسي ويدرك الحقيقة الي بتبقي واضحة لينا احنا الاتنين ، ساعتها بينسحب فوراً من غير اي كلام ، احساس قاسي لما يتحكم عليك لمجرد صورة خارجية انت ملكش أي ذنب فيها! ، عشان زن ماما روحت ل الخاطبة المعروفة في المنطقة ، كنت عارفة إن محدش هيرضي بس كنت علي الاقل برضي ماما ، كنت كل عريس بقعد معاه اشوف ف عينه يا نظره استنكار يا شفقة ، مكنتش عاوزة احس ب كده ، كنت عاوزة احس اني زي اي بنت طبيعية حتي لو لمرة واحدة من بعد الحادثة .

° ها اي الأخبار ؟

_ طلعت مختلفة عن كل الي كل قعدت معاهم

° ازاي؟

_ محجبة ، رقيقة ، أنا كل الي نزلت معاهم يا يطفشوا اول ما يعرفوا اني علي الحديدة ، يا اما تتكلم عن قد ايه هي مفيش منها ، هي بسيطة وطبيعية مكنتش حاطة نقطة ميكب حتي

° امممم ، هتقابلها تاني ؟

_ بكرة في المكتبة بتاعتها

° معندكش اي مشكلة أنها قعيدة بجد؟

_ بصراحة ؟ كنت عامل حسابي اني رايح اترفض وش أو يمكن أنا الي مرتاحش ، بس طلعت لذيذة و..

° وايه؟

_ هي الي حاسبت علي الشيك

° بجد!! طب كويس انها مفرجتش عليك المكان زي البنات الي فاتت

_ ابقي فكريني محكيش قدامك حاجة تاني ، أنا رايح اتابع شغل في الشركة ضروري

____

_ فاضية؟

= اه اتفضل ، نورت

_ المكتبة حلوة اوي ، بتاعتك؟

= بتاعت والدي الله يرحمه وانا رجعت فتحتها تاني ، اتفضل

شد كرسي وقعد قدامي ، طلعت من شنطتي علبة

كان فيها مكرونة بالبشاميل = بتحبها؟ ، نسيت اسألك امبارح اعملك ايه بالظبط

_ بحبها ، تعبتك معايا

فتح العلبة وبدأ ياكل ف بصلي _ حلوة اوي ، تسلم ايدك ، مدوقتش اكل بالحلاوة دي من ايام وفاة والدتي

= الله يرحمها

° ازيك يا مريم يا بنتي؟

= ازيك يا عم ابراهيم ، ثواني يا احمد رجعالك تاني

فتحت الدرج وخدت كيس واتحركت بالكرسي بتاعي ، طلعت الشارع ووقفت قدام عم إبراهيم = ازيك يا عمو عامل ايه؟ وازي طنط احسن دلوقتي ؟

° الحمد لله يبنتي ، مش عارف اقولك ايه والله علي الي بتعمليه معانا

= متقولش كده انا زي بنتكم ، اتفضل العلاج ، وسلامي ليها وإن شاء الله اجي ازورها قريب

° إن شاء الله ، منتحرمش منك ابدا

مشي ف رجعت دخلت ووقفت الكرسي قدامه

_ متشكر اوي ، ليهم حق تبقي انتي الريسة في المطعم

= الف هنا ، متشكرة اوي

_ ممكن اسألك سؤال؟ هو مش من باب التطفل والله بس انا سمعت وانتي بتقولي للحاج الي كان هنا علي كيس علاج؟

= اه ، دا لمراته ، كانت بتبيع قدام المكتبة خضار وللاسف جالها سكر ف أنا اتكفلت بعلاجها

_ غريبة

= اي الغريب ؟

_ اصل يعني انتي بتشتغلي شغلانتين ، يعني اكيد محتاجة الفلوس دي؟

= أنا فعلا بحوش عشان اجمع تمن العملية بتاعت رجلي ، بس بحاول أساعد

_ انتي طيبة اوي يا مريم ، إن شاء الله تعملي العملية

= يارب

_ أنا لازم امشي عشان الشغل بس لازم اعزمك في مكان ، اكيد مش هيبقي زي أكلك بس هكون مبسوط اوي لو قبلتي

= تيجي المطعم الي بشتغل فيه؟

_ وهو كذلك ، بكرة الساعة تمانية هكون عندك

مشي وانا جزء فيا مبسوط وجزء مستغرب ، ايه يخليه يخرج معايا مرتين وانا ب حالتي دي؟ هو لسه فيه رجالة ميهماش الست من برا؟

الشفت بتاع المطعم كان زحمة النهارده ، حاولت اساعد علي قد ما اقدر الشيف الجداد الي لسه بتمرنوا تحت ايدي ، الساعة جت تمانية ف استأذنت أخلص ورديتي بدري، طلعت واستنيه يجي

= متأخر عشر دقايق ، أنا مواعيدي وحشة اوي ، انا بجد آسف

_ ممكن بوكيه الورد الي في ايدك الي يخليني أسامحك

ابتسملي وقدمهولي _ شكرا ، شكله حلو اوي

قعد = العفو ولا اي حاجة

طلبنا الأكل = ايه رأيك في البدلة؟ احسن من القميص والبنطلون المهلوكين بتوع امبارح

_ مختلفتش كتير ، لو هتأجر كل مرة بدلة ف بلاش نخرج تاني اكيد ، بلاش تصرف الفلوس علي مظاهر ، اصرفها في ضروريات

نزل الاكل وبدأنا ناكل وندردش ، راجل عملي دمه خفيف مستمع جيد ، أظن أنه شاب كويس غير أي حد قابلته قبل كده ، عقليته جذابه وفكره ناضج ، الست هتحتاج ايه في الراجل اكتر من كده ؟

_ انتي بتعملي ايه؟

= هشوف الحساب كام!

_ ليه؟ أنا الي هدفع

= انا نسيت خالص إن المنيو هنا غالي والله ، لو كنت افتكرت مكنتش قولتلك ناكل هنا

_ أنا قابض يستي ، هاتي الشيك

خد الشيك وحاسب ، طلعنا برا بس لقيت عبده في وشي

° مريم ، كنت جاي عشان تروحي معايا

= اه ازيك يا عبدالله ، احمد ، عبدالله ابن عمي

_ أهلا وسهلاً تشرفنا

° أهلا بيك ، احمد طباخ جديد معاكي في المطعم؟

= لاء

° امال مين سيادته؟

= عريس

° نعم؟؟

= ممكن توفر النقاش دا لما نرجع البيت؟

° طيب اتفضلي معايا

= لاء أنا هروح لوحدي ، ممكن انت تمشي ؟

° حاضر يا مريم الي يريحك

ركب عربيته ومشي ، كنت لسه ببص ل طيفه بس فوقني صوت أحمد _ هو اتضايق ليه؟

= مفيش

حركت الكرسي بتاعي بس بعدها وقفت ، مسك الكرسي

_ تسمحيلي؟

هزيت راسي ب الموافقة ف حركه هو ، فضلنا ماشيين واحنا ساكتين ، غمضت عيني وفتحتها وانا بجمع الكلام الي المفروض اقوله = عبدالله ابن عمي وعاوز يتجوزني

_ وانتي موافقة؟

=..

_ راكب عربية اخر موديل وشكله ابن ناس اوي ، ايه يخليكي متتجوزهوش ؟

= كان هو السبب في الي حصلي ، كنت معاه وقت الحادثة الي أثرت علي رجلي ومعرفتش امشي بعدها ، تقدر تقول حاسس بالذنب ف عاوز يعوضني

_ بس هو هيعرف يوفرلك كل حاجة!

= بس انا مش هتجوز واحد عارفة ومتاكدة أنه متجوزني عشان ضميره يهدي من نحيتي ، ولو علي هيوفرلي كل حاجة ف أنا عندي اتجوز واحد علي قده بس يجي آخر كل يوم يحسسني اني عمري ما كنت حمل عليه ، ممكن الفلوس تجيب كل حاجة إلا أني أكون مبسوطة معاه

_ واحدة غيرك مكنتش فكرت بالطريقة دي

= عارفة ، ويمكن العيلة كلها شيفاني عبيطة اني رافضة اتجوز عبدالله ، ومفيش تجمع بينا غير وهما بيقنعوني بيه ، بس انا مينفعش اوافق علي واحد عمري ما هحبه

_..

= معلش اتكلمت كتير

_ بالعكس ، أنا مبسوط انك بتتكلمي معايا

ابتسمتله وبصيت علي السما = الدنيا شكلها هتمطر

_ قوليلي بيتك فين وانا هوصلك

وصلني البيت ، محستش ب لحظة ملل واحدة ، كنا بنتكلم عن شغلنا ونفسنا وأحلامنا ، المسافة للبيت بالرغم أنها المفروض طويلة بس حاسة اني وصلت بسرعة ، مع راجل جنتل مان كان بيزقلي الكرسي طول الطريق .

= شكراً علي العزومة واليوم ، تصبح علي خير

_ وانتي من أهله

جيت اطلع وقف قدامي _ هو انتي راحة فين ؟

= يا عم ساكنة في الارضي

_ مش قصدي ، قصدي اني مش عاوزك تمشي دلوقتي ، عاوز اقولك حاجة

= حاجة ايه ؟

_ هو انا ينفع اخطبك؟

= ها؟؟

_ عاوز اقولك حاجة

= حاجة ايه ؟

_ هو انا ينفع اخطبك؟

= ها؟؟

_ مش إحنا نازلين مع بعض عشان ناخد الخطوة دي ؟

= أيوة بس.. ، انت متأكد؟ ايه يخليك تعمل كده؟

_ يمكن مرتاحلك

= ممكن ترتاح مع اي بنت تانية سليمة!

_ قعدت مع كتير بس صدقيني مرتاحتش مع أي واحدة فيهم ، هو ينفع نتكلم ؟

بصيت علي ساعتي = ممكن ، بس بالكتير اوي نص ساعة مش هعرف اتأخر عن كده

_ حلو ، كفاية اوي

زقلي الكرسي وقعدنا علي الكورنيش الي جمب بيتنا

_ أنا كنت بحب ، زمان

= وايه الي حصل ؟

_ كنت بشتغل واجي علي نفسي عشان شهد ، بس لما فلست وروحتلها لقيتها بتسيبني كأني معملتلهاش أي حاجة ، انا كنت هشتغل تاني واعوض الي خسرته لو كانت فضلت معايا بس محصلش ، ف بقيت احسبها بالعقل

= أنا فهماك ، ويمكن فهماك اوي والله بس انت كده بتظلم نفسك للمرة التانية

_ معتقدش ، دا انا قعدت معاكي مرتين حسيت قد ايه انتي طيبة وجدعة و..

= هنتكلم بالعقل زي ما بتقول ، تعمل كده ليه ؟ انت متعرفنيش!

_ انتي مش عاوزة؟

= أنا عاوزة محسش اني مع واحد عشان صعبانة عليه

_ والله انتي مش صعبانة عليا ، أنا عاوز اعمل كده فعلاً

= أنا عاوزة امشي دلوقتي

رجعنا تاني للبيت وقبل ما ادخل بصيتله = احمد ؟

_ نعم

= بكرة الساعة تمانية ، متتأخرش تاني

_ بتقولي ايه!!!!

= تمانية وعشرة هخلي بابا يدخل ينام

دخلت وانا مش مصدقة كل الي حصل ، دخلت حكيت لماما كل حاجة ، عمري ما شوفتها مبسوطة كده ، كانت حياتنا بسيطة وهادية لحد ما عملت الحادثة وكل حاجة اتحولت ، من عيلة مبتبطلش ضحك وسهر وتجمع ل أدوية وعلاج طبيعي ومراهم ومحاولات يأسة اني ارجع اقف علي رجلي تاني ، ومن بعد ما كانت عتبة بيتنا مش بتفضي من العرسان بقت فاضية ومركونة ، مكنش ينفع اتحاسب علي حاجة مليش ذنب فيها ، هو ينفع الواحد يتحاسب علي قدره ؟ ، يمكن أحمد الراجل المناسب ؟ يمكن استنيت كل دا لحد ما يجي هو؟

° احمد انت بجد هتخطبها؟

_ أيوة امال أنا بعمل كل دا عشان ايه ؟

° وهي تعرف حاجة عن حوار الوصية؟

_ أكيد لاء ، مجتش مناسبة اقولها

° ولا انت الي مش عاوز تقولها اصلا ؟ احنا كده بنخدعها

_ هتكبري الموضوع ليه يا ليلي؟ ، عادي خطوبة صالونات

° لاء انتي بتخطبها عشان الورث مش عشان عاوز تخطب

_ مش مهم السبب ، المهم اني هروح اكلم باباها بكرة واكيد هتبقي معايا أنا مليش غيرك

° طب توعدني انك هتقولها الحقيقة؟

_ أكيد هقولها في الوقت المناسب ، واكيد هتعرف اني مش زي ما هي فاكرة

° قصدك أنها فكراك مش لاقي تاكل وانت اصلا مدير شركة؟ لاء لاء بسيطة

_ بقولك ايه اجهزي عشان هتيجي معايا ، نوفر النقاش دا لما نرجع بكرة

___

_ انا يسعدني ويشرفني يا فندم اني اطلب ايدك بنتك مريم

° أهلاً وسهلاً يا ابني ، الشرف لينا كفاية اسم العيلة

_ متشكر جدا يا عمي ، هو بس الظروف حالياً مش احسن حاجة ف..

° هي الدنيا مرة كده ومرة كده ، متقلقش انا معود بنتي ترضي وتحسن الظن بالله

_ ونعم بالله يا عمي شرف ليا والله

° ادينا بس كام يوم كده ونرد عليك إن شاء الله

_ أكيد خد وقتك طبعاً

فات كام يوم وبابا سأل عليه ، شاب مجتهد ، ناجح ، طموح ، سمعته طيبة ، هيعوز ايه اكتر من كده لبنته؟ ، وافق بابا ومعاها دخلت الفرحة بيتنا تاني ، زغاريط في كل مكان من الجيران والمعارف وبنات العيلة ، مريم عروسة؟ أخيراً .

= دي شبكة كبيرة اوي يا احمد! ، انت لسه في الاول ليه جبت كل دا ؟

_ دي الشبكة الي والدتي الله يرحمها جبتهالي عشان لما اجي اتجوز ، لو مش عاجبك أي حاجة فيها ممكن نغيرها

= الله يرحمها ، سيبها ب تنقيها احسن ، مش عاوزة اغير حاجة

ابتسملي _ نروح نجيب الدبل؟

هزيت راسي ب الموافقة ، روحنا محل الدهب وجيبنا دبلة ليا وليه ، عملنا خطوبة فيها كل الحارة ، خطوبة كبيرة فيها كل قرايبنا

° ارقص يحبيب اخوك

_ انت مين ؟ وايه الموتوسيكلات دي كلها؟

° بجاملك ، النهارده عندك بكرة عندي واهي ماشية

_ أيوة بس انا معرفكش! انت..

° لو مخمستش معايا وقتي ب زعلة

_ نعم؟ أنا مبركبش موتوسيكلات ، علي جثتي

° بقولك يا عريس ، اركب يا تبقي عريس الجنة وانت وشوقك

_ المفاتيح فين يا حبيب قلبي عشان اقلب الدنيا عليا ؟

ضحكت وانا ببصله ، يمكن الي حوالينا مش بنفس تفكرينا بس يكفي إن فرحتهم لينا فرحة حقيقية ، مش عاوزين حاجة غير انهم يبينولنا أنهم مبسوطين لينا ويشاركونا الوقت دا ،

كنت مجهزة العشا وطلعنا أنا وهو وأخته ، كلنا وشربنا شاي وفضلنا نحكي عن حاجات كتير وصوت ضحكنا يعلي مع كل موقف بيتحكي

° ساعتها بقي أيده اتكسرت وبطل الكورة

_ خلاص يا ليلي

° كان فاكر نفسه الشناوي لحد ما كابتن الفريق حلف بالله لو شافه في الملعب تاني لمقطع نفسه عليه

_ خلاص يحبيبتي

° اصل انتي مش فاهمة يا مريم دا المدرب اغمي عليه بتاع اربع مرات في ماتش النهائي بسبب احمد

_ يا دي النيلة ، قومي يا ليلي روحي

ضحكت ° انا همشي فعلاً عشان ورايا كذه حاجة اخلصها ، لو زعلك قوليلي انا عمتو طيبة علي فكرة

= الظاهر أننا هنبقي صحاب اوي

° أكيد ، تصبحوا علي خير

= وانتي من أهله

بصلي = يعني..

_ لو جبتي سيرة الي اتقال دا قدام حد هزعلك انتي وهي

= مهو..

_ لما اروحلها حاضر

ضحكت وبصيتله = تشرب شاي؟

_ ياريت

عملتلنا شاي بالنعناع وفضلنا نرغي في البلكونة ، جاله فون ف رد عليه _ اه اه جاي حالا ، سلام

= فيه ايه؟

_ شغل لازم اخلصه دلوقتي مينفعش يتأجل ل بكرة ، أنا مضطر استأذن ، هبقي اكلمك ، تصبحي علي خير

= وانت من أهله

مشي وفضلت باصة علي الفراغ الي قدامي ، مبسوطة بس جوايا حاجة مخوفاني ، مش قادرة اقتنع ب كل الي حصل أنه وافق يخطبني وصالونات! يعني مفيش حب بينا يخليه يعمل كده ، ياريت يطلع زي الي ظاهر عليه عشان عاوزة يجي تاني .

اتفقنا كل واحد يعرف التاني واحدة واحدة ، كان شغله رقم واحد في حياته زيي ، احنا الاتنين الي بيحركنا عقلنا ، علاقة ناضجة بالورقة والقلم ، محسوبة وعقلانية ، مكنش فينا أي حاجة من الي كنت بقرأه في الكتب عندي في المكتبة ، ولا الي كنت بشوفه في الافلام ، يمكن دا الصح؟ بس احنا ليه بنتصرف أننا معندناش قلب؟

_ انت جيت هنا ليه؟

= روحتلك البيت ومامتك قالتلي انك هنا عشان الجلسة ف جيت عشان أخدك

_ أنا لسه مبدأتش

= ماشي هفضل معاكي لحد ما تخلصي

_ أنا مبحبش حد يبقي موجود هنا ، أنا باجي لوحدي

= بس انا المفروض خطيبك ، يعني لازم ابقي معاكي هنا

_ ممكن تيجي كمان ساعة؟ معلش أرجوك تمشي

بصلي وسكتت = الي يريحك يا مريم ، رني عليا لما تخلصي

_ تمام

مبحبش أظهر ضعيفة قدام اي حد ، حتي ماما مبجبهاش معايا ، عاوزة افضل كويسة قدامهم علي طول وصورتي الثابتة متتهزش مهما حصل ، ومش عاوزة حد فيهم يشوفني وانا بتألم في جلسات العلاج الطبيعي ولا حد يعرف المعاناة الي بعيشها .

= خلصتي ؟

_ أيوة ، يلا بينا

= مريم هو انا ينفع اسألك سؤال؟

_ اسأل

= هو انتي مبتثقيش فيا ؟

_ هو انا اعرفك يا احمد ما تكن في جمب بقي!

= أنا بتكلم بجد

_ ليه بتقول كده؟ ، لو عشان الجلسات ف صدقني أنا مبحبش حد يفضل معايا جوا ، خليك انت برا احسن

= هيجي يوم وهبقي معاكي جوا وهتبقي انتي راضية

_ ب حالتنا دي؟ مظنش

= مالها حالتنا؟

_ يعني ، خطوبة تقليدية ، انت معندكش قلب ولا دم و..

= ها ؟؟ قولتي أيه؟

_ يعني دلوقتي الحقيقة بتزعل يجدعان؟

ضحك = أنا هحاول ، انتي بنت حلال خلي بالك ربنا يراضيكي

_ نسيت تكرمشلي خمسين جنيه في ايدي ، روحني بالله عليك ، دا أي الخطوبة الي انا فيها دي

زقلي الكرسي وفضلنا ماشيين ، سمعت صوت عبدالحليم حافظ بيتكلم في لقاء ليه في الراديو

_ استني ، العندليب حضر والله ما رايحين في مكان ، اقعد

قعد قدامي = بتحبي عبد الحليم ؟

_ ياه! انت تعرف إن كل ستات مصر زعلوا يوم ما مات؟ الشوارع كانت مقلوبة وكله كان ماشي في جنازته

= ليه!

_ عشان كل البنات كانوا شايفين أن هو الحب بالنسبالهم ، أنه يجي تحت البلكونة عشان بس يبعتلك جواب أو يديكي ورد ، ف لما البنت تيجي تحب اول حب في حياتها بتكون بتدور علي عبد الحليم جوا الراجل الي معاها

= وانتي عمرك حبيتي؟

_ عمري ، وشكلي كده مش هيحصل

= طب اقوم امشي طيب ولا ايه؟

ضحكت _ مش قصدي

= أنا عارف إن يمكن مش مديكي وقت كفاية واني ممكن يعني مثلا شغلي واخد شوية من وقتي

بصتله ب طرف عيني _ ماشي شغلي واخد معظم وقتي ، بس انا كل مرة بقعد معاكي فيها بكون مبسوط

فونه رن = اسمع صلاة النبي حلو ؟

_ عليه افضل الصلاه والسلام

= انت لو رديت الخطوبة دي اعتبرها اتفشكلت ، هو كل شوية ألو ألو تلتوميت ألو وعاملي فيها مدير الشركة امال لو مش موظف فقير كنت هتعمل فيا ايه؟

_ ايه الي وداني بتسمعه دا؟

= دا انا ارهقني الكتمان ، دا انا كل شوية بقول هيتلم وانت مفيش

_ وطي صوتك يا مريم يقولوا عليا ايه؟ خاطفك؟

= روحني يا احمد

_ مش مروحك يا مريم

وصلنا البيت وبصتله = مسدجات بقي ، مشوفش وشك قدامي تاني

_ لاء بس علي فكرة انتي اتغيرتي

= أيوة حصل أنا الي مش صبورة

_ حماتي ، تعالي عقلي بنتك

= انت لو جبتها وحكمت بينا هيطلع شكلك وحش!

_ طب تعالي يا ست الكل ، احضرينا

حكي ل ماما الي حصل ب أداء درامي مبتذل لدرجة اني صدقته!! _ عند ربنا كل دا ، عند ربنا هقول ايه بس؟

صقفت = ما شاء الله ، تمثيلك يقرف اكيد ماما عمرها ما هتصدقك

° مريم

= أيوة يا ماما قوليله بقي قوليله واديله

° منك لله يبنتي ليه كده؟

= ها؟؟؟؟؟

ضحك وماما سابتنا ودخلت المطبخ عشان تحضرلنا الأكل

= يعني ايه؟

_ أنا هقعد مظلوم احسن ما اقعد ظالم

= انت مصدق نفسك؟ وايه معلش الفقرة التمثيلية دي؟

_ ايه رأيك بجد؟

= اطلع من حياتي يا احمد

_ مش طالع يا مريم

= طب احترم نفسك يا احمد

_ محترم يا مريم

اتعشينا وقعدنا نتكلم شوية ، هو انا ظالمة بقي ولا ايه؟ ما الراجل دمه خفيف وطيب اهو ولا أنا غاوية نكد؟ مينفعش بردو الي بعمله دا كده هطفشه ، لازم اهدي شوية

= طب لو ممشيتش هلم عليك الشارع كله ، عشان انت محدش يتكلم معاك

_ حبيبت قلبي تصبحي علي خير

مشي ف دخلت نمت ، أنا بقي لازم اعرف الي شايل الشركة دي علي كتافه آخرته معايا ايه

= انت فين دلوقتي ؟

_ في الشغل ، اشمعنا ؟

= اصل انا برا الشركة الي بتشتغل فيها

_ نعم؟؟؟ ، طب قولي انك بتهزري بدل ما يفوقوني ب لمون

ضحكت = والله برا فعلاً ، ليلي اختك اديتني العنوان

_ كانت اختي ، كانت ، استني متدخليش أنا جايلك

نزلي ووقف قدامي _ ايه الي جابك؟

= أفندم ؟

_ قصدي يعني ، ليه ؟

= جاية اشوف مكتبك

_ هو انا بقولك هدهن جديد ؟ المدير لو لمحك هيرفدني

= بس انت قولت يارب ومتقاطعش ، سكة بقي لو سمحت

_ لاء مش هتدخلي يا مريم متهزريش

= متأكد؟

_ علي جثتي قولت

دخلت معاه ف كله قام اول ما شافه ف رفعت حاجبي وبصتله

= هو فيه ايه؟ واقفين وكأنك مدير الشركة!

_ دي تمارين بنعملها متاخديش في بالك، اقعدوا يجدعان فيه ايه ، محسستني إن دخل عليكم حد مهم يعني

قعدوا وهما بيبصوا لبعض = فين مكتبك؟

_ دي مكاتب عامة الشعب زي منتي شايفة

= أيوة منتا واحد منهم!

_ أيوة صح ، مكتبي الي هناك دا ، ولا دا؟

= انت بتسألني؟ مكتبك فين يا احمد؟

_ اه ، هناك اهو

روحنا وقفنا قدام المكتب الي شاور عليه ف لقيت واحد جاي يقعد علي الكرسي = دا مكتب أحمد!

_ خلاص يا مريم هو ديسك في مدرسة ابتدائي؟ ، روح يا عماد دلوقتي

° اروح فين يافندم؟

همسله _ روح في أي مكان ، اطلع مكتبي ، خد إجازة ، المهم امشي من قدام المكتب دا دلوقتي

مشي ف رجعت بصيت ل احمد الي بصلي وابتسم ف ضيقت عيني = مخلاص يا عم كونان ، يلا بينا؟

_ انت مش هتشتغل؟

= هوصلك الأول

_ ممكن اقضي اليوم معاك هنا ؟

= ليه هو انا في كيدز أريا ؟

_ لو فيه سبب واحد هيخليني اسيبك هو استخفاف دمك دا خلي بالك

= اصل اعقلوا الكلمة ، عندي شغل كتير يا مريم

_ طب ما تشتغل يا احمد!

= هتمشي وحالا يا مريم

بصيتله _ قهوة مظبوط

= عم ابرااااااهيم ، قهوة مظبوطة وحطلي فيها حباية غلة يا غالي

_ بتقول حاجة يا احمد؟

= بقول هشوف شغلي

قعد جمبي علي الكرسي بتاع المكتب وبدأ يشتغل

_ هو كله باصصلك ليه؟

= نسيت اقولك اني كاريزما

_ لاء بتكلم بجد فيه ايه مالهم؟

زعق = كله يبص علي شغله ، ملمحش حد باصصلي

الكل بص قدامه ومرفعش عينه تاني _ احمد ؟ انت ماسك عليهم ذلة؟ صور ؟ فيديوهات ؟

= فيه موضوع لازم اقولهولك

_ موضوع ايه؟

جت بنت من برا ووقفت قدامنا ° احمد ، وحشتني

_ شهد!!!!

° احمد ، وحشتني

_ شهد!!!!!

° محتاجة اتكلم معاك ضروري

جت وقفت قدامه ف رجع خطوتين ورا الكرسي بتاعي

° هي مين دي؟ موظفة جديدة ؟

_ لاء ، مريم ، خطيبتي

° نعم؟؟؟؟؟ خطيبتك ازاي يعني ؟

= متعرفيش يعني ايه خطيبته ؟

رفعت أيدي = يعني أيدي فيها دبلته وبعد فترة هبقي مراته ايه الي مش واضح؟

بصتلي ورجعت بصتله ° أنا لازم اتكلم معاك

= أكيد طبعاً ينفع ، يلا نتكلم

° أفندم ؟

= ما اكيد مش هسيبكم تتكلموا لوحدكم ، احنا فين هنا؟

_ أنا مش فاضي حالياً يا شهد ، مش هينفع خالص نتكلم دلوقتي

° هو انت ايه مقعدك هنا أصلا ؟ أنا سمعت انك..

_ احنا لازم نتكلم حالا ، اتفضلي

خدها ووقفوا بعيد شوية! ، حركت الكرسي بتاعي وطلعت من الشركة .

= عاوزة ايه يا شهد؟

° عوزاك ، عاوزة نرجع تاني سوا

= يا سلام! بالسهولة دي ؟ انتي فاكرة انك عشان سبتيني بسهولة هرجعي بسهولة؟ ليه الدنيا ماشية علي مزاجك ولا ايه مش فاهم؟

° أنا لسه بحبك

ضحك = طب قولي حاجة تتصدق

° أنا مش هعرف ألاقي راجل تاني زيك

= كان المفروض تعرفي دا من بدري ، لو كنتي استنيتي بس شوية! كان كل حاجة اتظبطت تاني ، كنت هرجع اقف علي رجلي تاني ، بس ربك! يمكن حصلي كده عشان اعرفك واشوفك علي حقيقتك من غير الغشاوة الي كانت علي عنيا ، انتي السبب في كل حاجة

° انت لسه بتحبني ، انت مستحيل تكون كرهتني

= أنا فعلاً مش بكرهك ، انتي متفرقليش اصلا يا شهد عشان اكرهك

بص جمبه = مريم!!!! ، هي مشيت؟؟

° انت رايح فين ؟ ، وايه صحيح الي عملته دا؟ خاطب مشلولة؟ ، انت اتجننت ؟

= الي بتتكلمي عليها دي انضف واحدة أنا قابلتها في حياتي ، لما تيجي تتكلمي عن خطيبة احمد عاصم تتكلمي عليها كويس

ضحكت ° دا علي أساس انك خاطبها حب فيها؟ اكيد فيه سبب تاني

= بقولك ايه يا شهد ، خليكي في حالك ، جاية بعد تلت سنين ومتوقعة ايه؟ يجرالي حاجة لما اشوفك؟ ، لو سمحتي متدخليش الشركة دي تاني ، كده ملوش اي لازمة الكلام تاني ، بعد اذنك

____

= يعني ايه يا طنط؟

° قالتلي انها مش عاوزة تقابلك ولا تخرج من اوضتها ، انتوا متخانفين خناقة كبيرة؟

= لاء والله ابدا ، دا سوء تفاهم وانا عاوز اتكلم معاها عشان أوضحه

خرجت بالكرسي بتاعي قدامه ° طيب انا هروح اعمل شاي

ماما مشيت ف بصتله = مريم الي شوفتيه دا..

_ أنا ميخصنيش انك تبررلي

= ميخصكيش ازاي!

_ أنا مش عاوزة اكمل يا احمد ، ارجوك تحترم رغبتي

= مش عاوزة تكملي؟ ، والله ما حصل حاجة دا كل الموضوع إن..

_ مش عاوزة اسمع حاجة ، لما اكون معاك وتاخدها وتتكلموا وانا موجودة ولا كأني خطيبتك أو حد في حياتك ف دا مستحيل اسمح بيه ، احنا الاتنين متفقين نمشيها بالعقل ، الي حصل النهارده مفهوش أي ذرة عقل ، زي ما دخلنا بالمعروف نخرج بالمعروف يا احمد لو سمحت

انتي معاكي حق بس انا والله مش قاصد اوصلك دا ، مكنتش عاوزها تتكلم قدامك في أي حاجة ل سبب

وانا مش عاوزة اعرف السبب ، والي فهماه أن حبيبتك رجعتلك ، ارجع معاها انت كمان ، أنا مليش مكان

=..

سيبته ودخلت اوضتي تاني ، عيطت! ، أنا زعلانة ليه اني مش هشوفه تاني؟ ، كانت كل حاجة ماشية كويسة ، يمكن كل حاجة مكنش فيها مشاعر بس كانت ماشية زي اي خطوبة ، بس مع ظهورها تاني مكنش ينفع افضل موجودة ، يمكن لسه بيحبها هي ، منكرش أنه فعلاً هيوحشني ومنكرش اني حاسة احساس وحش اوي دلوقتي .

بليل طلعت البلكونة وانا ببص علي ناصية الشارع

= الله يكرمك والله انك ساكنة في الارضي ، أنا مش حمل اني اطلع علي مواسير

_ أحمد!!! انت ايه الي جابك ؟

= مش قولتي ان كل بنت بتدور علي عبدالحليم في أول راجل يبقي معاها؟

_ هو دا وقته ؟؟؟

مد أيده بالورد الي معاه _ انت فاكر انك عشان جبت ورد خلاص كده الموضوع خلص؟

= دا الواد بتاع الورد مأكدلي انك اول ما تشوفيه هيغمي عليكي

_ أنا مش بهزر ، انت جاي ليه؟

طلع جواب من جيبه وادهولي ، رفعت حاجبي وفتحته وبصتله _ ايه القرف الي عيني بتشوفه دا؟

= خط الناس المهمة دايما كده

_ أنا مش فاهمة انت كاتب ايه

خد الورقة وبصلها وبعدها بصلي

= والله ولا أنا فاهم أنا كاتب ايه ، قدري مجهودي طيب

_ انت عاوز ايه؟

= أنا مش هسيبك يا مريم ، أنا.. انتي بتعملي ايه؟

_ داخلة جوا

= طب اقسم بالله لو ما وقفتي مكانك لأعدمك العافية مدام بقي الذوق والتربية مش جايب همه

_..

أ= نا عاوزك مش عاوز حد تاني ، ومش هسيبك لمجرد أنها رجعت ، هي مش فرقالي دلوقتي ، أنا محستش ب كل حاجة حلوة غير معاكي يا مريم ، لاء عمرك حسستيني إن فيه مشكلة ولا عمري حسيت معاكي إن الدنيا تقيلة ، أنا عمري ما هلاقي الي جواكي في أي واحدة تانية

_..

= أنا كنت بقولها أنها خلاص معتتش فرقالي وأنها متجيش مكان الشغل تاني

_ محستش ب أي حاجة لما شوفتها ؟

= والله أبدا ، حقك عليا

خدت منه الورد ف ابتسملي = بس ايه رأيك في الحركة ؟

_ الصراحة عجبتني ، وعجبني انك مركز في الكلام الي بقوله

= يعني هبقي عبدالحليم؟

_ عيبة في حق المرحوم والله

= طب اتمسي وقولي يا مسا

فضلنا يومها نرغي كتير ، كنت مبسوطة اوي وانا معاه المرادي ، لما حد يحاول عشانك! بتهيقلي دا ألذ احساس ممكن الواحد يحسه .

= يلا عشان منتأخرش

_ مش هتيجي معايا يا أحمد

= طب يلا عشان ميعادك قرب

_ مش هروح معاك ، ممكن تيجي تاخدي بعد ما اخلص ، مش هتفضل معايا جوا

= بقولك انا راكن شغل قد كده عشان اجي معاكي

_ وانا مطلبتش منك دا

= يستي أنا الي عاوز ابقي معاكي هناك

_ أنا مش عاوزة حد يبقي معايا ، افهمني يا احمد

= افهمي انتي ، انتي ليه عاوزة تشيلي كل دا لوحدك؟ ، أنا معاكي

_ أنا هبقي كويسة

= أنا مش عاوز ابقي معاكي الوقت الحلو بس يا مريم ، احنا بعد كده هنتجوز ف دا واجب عليا

بعد محاولات كتير منه وافقت ، دخل معايا الجلسة وحاول يساعدني ويضحكني ويخليني منتبهش للألم الي بحس بيه كل مرة ، كانت اخف جلسة عملتها من اول ما بدأت علاج طبيعي .

= انتي كويسة؟

_ أنا مش هنسي الي عملته معايا النهارده

= يعني هتسبيني اجي معاكي تاني؟

_ لو شوفتك جوا تاني هزعلك

كانت نقطة تحول ل نظرتي عن أحمد ، شوفته اكتر مش بس ك راجل عملي وعقلاني ، شوفته ك راجل طيب ، حنين ، مستمع ، مهتم ، والأهم اني بحس معاه ان مفيش فيا حاجة ناقصة وان الكرسي الي قاعدة عليه كأنه مش موجود ، عمري ما حسيت دا غير وانا معاه ، ولا شوفت نظرات الخوف والمساندة غير منه .

بقينا صحاب جدا ، كنت فاكرة اني مش هعرف أعمل صحاب تاني! ،

_ غمض عينك

= بصي يا مريم أنا هفهمك لو عملت حاجة قولي؟

_ غمض عينك!

= مهو مش طبيعي تجبيني المطعم الي بتشتغلي فيه وتقولي غمض عينك ، متفقة مع مين يغتالني يا مريم ؟

_ طب ولما ألم عليك الناس الي قاعده يا احمد؟ غمض عينك

غمض عنيه ف شاورت للويتر _ فتح

= عرفتي منين إن عيد ميلادي النهارده!

_ عمري ما هقول طبعاً

= ليلي؟ دا مثلاً يعني ؟

_..

= شكراً يا مريم ، مش عارف اقولك ايه

_ كل سنه وانت طيب ، مش عارفة وافقت اتخطب لواحد كبير زيك ليه ، انت بقي عندك ٢٧ سنة دا انا اقولك يا عمو!

= مريم انتي عندي ٢٣ !!!

_ متدخلنيش في تفاصيل دلوقتي لو سمحت

احتفلنا ب عيد ميلاده واتمشينا الي الكورنيش

= مريم..

_ دي عاشر مرة تندهلي وأبصلك تسكت ، بتتعرف عليا جديد ؟

=..

_ هو انت بتسبلي ليه يا احمد ؟ خير ؟

= بس دي حاجات بتتحس مبتتقالش يجدعان

ضحكت _ طب عاوز تقول ايه؟

طلع جواب من جيبه وادهولي ، مسكته ومفتحتوش ورميته في البحر = ايه الي هببتيه دا يا مريم ؟

_ أنا مش هشوف تلوث بصري تاني ، الي عندك قوله كرهتني في الجوابات

= طب ليه كده ؟ دا انا ملون ومسطر الورقة

_ هو امتحان تربية فنية؟ ما تخلص يا احمد

= شكراً علي الي عملتيه النهارده

_ خامس مرة تشكرني ، معملتش حاجة يا احمد دي حاجة بسيطة

= أنا..

_ تاني هترجع تقطع؟ ، لاء روحني يا احمد

= مش مروحك يمريم

_ طب اخلص يا احمد

= انا بحبك يمريم

_ ها؟؟؟؟

= بحبك اوي والله

_..

= كنت راسملك قلب في الورقة طالع منها سهم

ضحكت _ انت طيب اوي

= بجد والله؟ يعني بحبك الرد بتاعها انت طيب؟

_ طب ايه؟ روحني؟

زقلي الكرسي ومشينا _ انت متعصب ليه ؟

= انتي بجحة ليه؟

وصلنا البيت _ تصبح على خير

= لاء استني ، كنت عاوز اقولك حاجة

_ حاجة ايه؟

مد أيده في جيبه _ احمد اقسم بالله لو جواب هفرج عليك الشارع

طلع ورقة ف خدتها منه وقرأتها _ ايه دا!!!!

= دا ميعاد العملية بتاعتك

_ عملية؟ عملية ايه؟

= الدكتور بتاع العلاج الطبيعي حددت معاه ميعاد عمليتك وقالي إن شاء الله احتمال كبير ترجعي تمشي تاني ، هو بعد العملية في الاول هتحتاجي علاج طبيعي بس بعد كده هتمشي عادي من غير اي حاجة

_ انت دفعت تمن العملية!!!

= أيوة ، انتي بتعيطي ليه؟

_ ايه يخليك تعمل كده؟ ، العملية غالية اوي وانت محتاج الفلوس دي ، أنا بحوش يا احمد زي ما قولتلك وهعملها

نزل ل مستوايا وبصلي = أنا بشتغل عشانك انتي ، والله فلوس الدنيا كلها تحت رجلك

_ أنا مش هعرف أقبل الفلوس دي كلها

= أنا حجزت والفلوس ادفعت خلاص ، العملية بعد اسبوع

حط أيده في جيبه _ يادي النيلة ، انت ليه مصر تبوظ اللحظة؟

ضحك = مش جواب والله دا منديل

خدته منه ومسحت وشي وبصتله

_ أنا مش عارفة اقولك ايه

= الي عملته ميجيش حاجة جمب الي بتعمليه من ساعة ما عرفتك ، عاوز اقولك علي حاجة تانية بس خايف تزعلي مني

_ أنا مستحيل ازعل منك يا احمد

=..

_ قول ، أنا هفهم أي حاجة هتقولها

ماما ندهت _ حاضر يا ماما جاية

= طيب ادخلي دلوقتي ، هقولك بعدين اهو اكون رتبت الكلام ، تصبحي علي خير

_ وانت من أهله

مشي وانا دخلت البيت ، هعمل العملية؟ همشي تاني؟ معتش فيه جلسات ولا كرسي تاني؟ ، قال أنه بيحبني بس اثبتلي مع كل حاجة بيعملها أن بقي عندي احسن قصة حب في الدنيا ، احسن من أي رواية قريتها واتمنيت اعيش زيها .

____

_ بس انت قولتلي أنه ورث عمه خلاص!

° مهو دا المفروض يا ست هانم ، بس الوصية لو متنفذتش هيروح عليه كل دا

_ وصيه ايه؟

° عمه كتب وصية أنه يلاقي بنت حلال وميهماش الفلوس ، ساعتها ياخد هو الورث دا كله

_ عشان كده خطبها!

° خطب مين يا ست هانم؟

_ ميخصكش ، امسك دي الفلوس الي اتفقنا عليها ، لو سمعت أي حاجة تانية تيجي تبلغني

° من عنيا

___

نمت وصحيت روحت المكتب ، كنت بنظم الكتب ب روقان وانا بشرب القهوة بتاعتي

° ازيك؟

برقت اول ما شوفتها! كانت هي ، شهد !!!!

_ انتي!

° كويس انك فكراني

_ محتاجة حاجة ؟

° اسمع إن فيه كتاب اسمه الجميلة والوحش؟

_ عوزاه؟

° لاء عاوزة المغفلة والوحش

بصتلها _ قصدك ايه؟

° قصدي إن يا حرام بالرغم انك علي نياتك بس اتضحك عليكي

_ اتضحك عليا! من مين؟

° أحمد

_ انتي جاية تقولي أي كلام ؟ ممكن تمشي من هنا لو سمحتي؟

° أنا مش بقول اي كلام ، انتي متعرفيش أنه عاوز يتجوزك عشان وصية عمه والورث؟

_ ايه؟؟؟؟؟

° انتي متعرفيش أنه عاوز يتجوزك عشان وصية عمه والورث؟

_ أيه ؟؟؟؟؟

° زي ما سمعتي ، احمد قرب منك بس عشان مصلحته

_ انتي كدابة ، مستحيل احمد يعمل كده

° هو مش قايلك إن عمو كان من أغني رجال الأعمال في مصر ؟ وإن الشركة الي كنتي فيها دي هو مديرها مش موظف فيها؟ ، وإنه غني مش علي الحديدة؟

_..

° يبقي مقالش ، يبقي هو الكداب مش أنا

_..

° وفري دموعك ، انا جيت اقولك الي فيها ، كل الي بينكم كدب ، احمد عمره ما حب حد غيري ، علي الاقل كان معايا زي ما هو مش واحد تاني!

سابتني ومشت وانا فى عقلي ميت سؤال ، اكيد كدابة ، اكيد احمد مكدبش عليا! ، قفلت المكتبة وروحت الشركة عنده ، دخلت وروحت عند المكتب بس لقيت واحد تاني قاعد فيه!

_ لو سمحت احمد عاصم فين ؟

° فوق يا فندم في مكتبه

طلعت بالاسانسير الدور التاني ، فتحت الباب ولقيته قاعد علي كرسي المكتب واول ما شافني قام مخضوض

= مريم؟؟؟ حصل حاجة ؟ ايه الي جابك هنا؟

_ انت بتعمل ايه علي الكرسي دا ؟ مش المفروض مكتبك تحت؟

= أنا..

سكت! _ لاء متسكتش ، اتكلم ، قول أي حاجة

= مريم أنا هفهمك كل حاجة

_ انت خطبتني عشان وصية عمك انك تلاقي بنت ميهماش الفلوس ؟

=..

_ كل دا مش صحيح صح ؟ انت خطبتني من غير اي سبب مش عشان ورث مش كده؟

=..

_ انت مستحيل تكون عملت فيا كده!! ، كان ممكن تقولي من الاول وانا يا اقبل يا ارفض ، علي الاقل مكنتش هحس معاك ب أي حاجة وهكون عارفة أنها جوازة مصلحة وساعتها أنا الي أقرر ، لكن كل الي بينا كان كدب؟ كنت بتعرف تمثل عليا كده ازاي؟ كنت بتكون مبسوط وانت شايفني مغفلة وانت بتعمل كل دا عشان معرفش؟ عشان تاخد فلوس عمك وساعتها يا تطلقني عشان عاجزة يا تستحملني عشان كنت السبب الي وصلك للي انت عاوزه؟ ، ليه يا احمد؟ دا انا عمري ما أذيتك!

= الي حسيته معاكي مكنش كدب ، أنا فعلاً..

_ كفاية بقي كفاية هتفضل تمثل لحد امتي؟ ، ياريتني ما شوفتك ولا عرفتك ، الوجع الي فيا دلوقتي بسببك اصعب من وجعي لما عملت الحادثة ، علي الأقل دا كان قدري لكن أنت؟ أنت دخلت حياتي ليه؟

حركت الكرسي بتاعي ف وقف قدامي

= مش هتمشي يا مريم ، عشان خاطري اسمعيني

_ انا معرفكش ، أنا أعرف الي كنت بتبينه قدامي ، لكن أنا بصالك دلوقتي ومعرفش انت مين ، لو سمحت أنا عاوزة امشي مش عاوزة مشاكل ، لاء تيجي ورايا ولا عاوزة اشوفك تاني أبدا

روحت البيت ، قلعت الدبلة وحطيتها في علبة الدهب ، كل الحكاية خلصت؟ خلصت ب اسوأ سيناريو ، والحلم الي كنت فيه قومت منه ب كابوس ، كانت مشكلتي الوحيدة اني صدقته .

كان بيبعتلي مسدجات ويرن عليا بس مكنتش برد ، بيجيلي في اليوم اكتر من تلت مرات مكنتش بقابله ، خمس ايام بين محاولات كتير وتصميم منه أنه يشوفني ف طلعت _ انت جاي هنا ليه؟

= العملية بتاعتك بكرة

_ يا سلام!!! انت فاكر اني هعمل عملية انت دافع فلوسها ؟ ، أنا وافقت قبل كده عشان كنت فاكرة انك دفعتلي يمكن اخر فلوس معاك عشاني ، لكن بعد ما عرفتك علي حقيقتك انت كنت عاوزني اعمل العملية عشان اقف علي رجلي تاني ف نسرع الجواز والورث ميروحش عليك مش كده؟

= أنا عملت كده عشان بحبك يا مريم ، أنا عارف إن مهما قولت مش هتصدقيني بس والله..

_ مبتشبعش كدب ؟ ، أنا مش هعمل عمليات ولا هخليك صاحب فضل عليا ، أنا عوزاك تطلع من حياتي ، ارجوك متعملش فيا اكتر من كده كفاية كل الي حصل ، أنا عاوزة ارجع حياتي القديمة

= أنا هعملك كل الي انتي عوزاه ، بس اعملي العملية ، أنا عاوزك تعمليها حتي لو مش هنبقي مع بعض ، دا رد واحد في المية من الي عملتيه معايا

_ أنا مش عاوزة منك حاجة وهعتبر كل الي حصل دا محصلش ، عمليتي أنا الي هعملها ب فلوسي وهرجع امشي تاني ، لكن انت؟ انت اشك انك ب كل الي فيك دا تلاقي حد جمبك

= للدرجاتي كرهتيني؟

_ وكرهت نفسي بسببك

دخلت اوضتي ، كرهت نفسي عشان مش عارفة أكرهه!

بليل ماما خبطت عليا ' مريم ، الدكتور بتاعك برا عاوزك

= اتفضل يا دكتور ، نورت

° ازيك عاملة ايه؟

= الحمد لله ، تشرب ايه؟

° ولا اي حاجة ، أنا جاي اتكلم معاكي بخصوص عملية بكرة

= انا مش هعمل العملية بكرة ، أنا هكمل العلاج الطبيعي لحد ما اكمل فلوس العملية بتاعتي واعملها

° بس احمد اتفق معايا وانا اتفقت مع دكتور شاطر جدا جاي من برا ويا عالم هيجي أمتي تاني ، وبعدين يا مريم مخبيش عليكي العلاج الطبيعي في حالتك صعب وهياخد وقت طويل جداً ، الحل بعد ربنا هي العملية

=..

° احمد قالي اجي اقنعك

= أنا مش هينفع اعملها ، مش عاوزة

° وانا مش هعرف اشوفك بترجعي ل ورا في خطة علاجك واسكت ، الخلافات ايا كان هي ايه لازم تركنيها في جمب عشان صحتك

=..

° بكرة من تسعة الصبح تكوني في المستشفى عشان هتابع حالتك ب نفسي ، هستناكي

= متشكرة يا دكتور انك جيت ، معلش تعبتك معايا

° يستي لا تعب ولا حاجة ، إن شاء الله العملية تنجح وترجعي تاني احسن من الاول

= يارب

مكنش قدامي حل تاني ، بس انا اكيد هرجعله فلوس العملية كلها المشكلة بس في الوقت ، روحت المستشفى ودخلت اوضة العمليات ، مش فاكرة حصل ايه من بعد حقنة البنج ، كل الي فكراه اني كنت خايفة ، خايفة العملية تفشل بعد ما بقي عندي امل حتي لو واحد في المية ، كنت بس عاوزة ابقي انا تاني .

فوقت من البنج وانا في أوضة في المستشفى

= ليلي!

° حمدالله على سلامتك

= الله يسلمك ، انتي هنا من بدري؟

° أنا وأحمد موجودين من وقت ما دخلتي العمليات ، هو مشي بعد ما اتأكد إن العملية نجحت الحمد لله وانك بقيتي كويسة ، قولتله يستني لما تفوقي بس هو قال انك هتضايقي ف مشي

= اه ، شكراً يا ليلي تسلمي انك كنتي موجودة

° متسبهوش يا مريم ، ارجوكٍ

= اخوكي كدب عليا وانتي كمان كنتي عارفة ومقولتليش! ، أنا كنت مجرد وسيلة عشان يوصل للي هو عاوزه

° احمد بيحبك بجد ، عمري ما شوفته حزين بالشكل دا ، احمد مش اخويا بس دا اخويا وابويا وامي وكل حاجة من وقت ما بابا وماما ماتوا وانا صغيرة ، هو مش قصده يحسسك أي حاجة وحشة ، انتي عرفتيه مستحيل يكون كل دا يبقي تمثيل زي ما بتقولي، خلينا نفترض أنه تمثيل هو يقولك ليه أنه بيحبك؟ ما كل حاجة كانت ماشية تمام ، ليه يكون عاوزك كويسة؟ مهو مكنش هيهمه غير الفلوس!

= أيوة بس شهد جتلي وقالتلي كل حاجة و..

° شهد؟؟ وصدقتيها؟

= اخوكي مأنكرش الحقيقة

° تلاقيها عرفت أنه هيورث ف رجعتله طمعانة فيه تاني ، هو بيحبك انتي مش هي ، مش هيحاول كل دا لو مش عاوزك ، اتكلمي معاه مرة واحدة بس واسمعيه ، احمد مش كويس ولا بيشتغل بعد ما كان الشغل اهم حاجة عنده ، دلوقتي لا يهمه ورث ولا وصية ولا فلوس ، كل الي عاوزه انك تسامحيه وتفضلي جمبه

منكرش أن كلامها فرحني بس مبينتش ، كنت كل ما افتكر معاملته ليا قلبي ينكر أنه كدب بس في نفس الوقت عقلي بيقول فوقي كل دا من الاول عشان وصية ، فضلت بين الصراع دا ومش عارفة احدد المفروض اعمل ايه ؟ ، فضلت اعمل جلسات بعد العملية لمدة شهر لحد ما بقيت امشي حتي من غير عصاية ، مفيش جلسات تاني ، مفيش ألم تاني ، مفيش علاج تاني ، ومفيش كرسي تاني .

كان لازم أشكره! ولا انا بتلكك عشان اشوفه؟ ، الحاجة الي كنت متأكدة منها أنه وحشني ، أنه الايام الي فاتت دي كلها مبطلش يحاول أنه يوصلي ، حتي الدكتور قالي أنه كان بيتأكد منه إن حالتي بقت احسن

روحت بيتهم وليلي فتحتلي ، سلمت عليا وشكرتني اني جيت ، طلعت معاها ل أوضته وخبطت عليه

° أحمد؟

_ من فضلك يا ليلي مش عاوز اتكلم دلوقتي

= احمد ؟

فتح الباب بسرعة اول ما سمع صوتي واول ما شافني ابتسم ° يا سلام! مش كنت فاقد الشغف من دقيقة؟

بصلي من فوق ل تحت وشافني وانا واقفة علي رجلي ، فرحته ذادت اكتر ، اكيد عنيه مبتكذبش ، مش هيعرف يظهر قدامي ب الوش دا لو مبيحبيش!!

_ انتي كويسة؟

= أنا كويسة

_ انتي وحشتيني اوي و.. ، فيه حاجة يا ليلي ؟

° ها؟

_ يعني كلك نظر ، شاي ، قهوة ، روحي مشوار ، يعني اي حاجة ، اتنين قهوة يا حبيبت قلبي وعدي يومك

ضحكت ودخلت المطبخ ف رجعت بصيتله

_ هو ايه الي في ايدك دا ؟

= دا الجزء الي حوشته من فلوس العملية ، هرجعلك الباقي في اقرب وقت

_ انتي جاية هنا عشان كده؟

= أيوة

_ أنا مش عاوز منك حاجة ومش واخد الفلوس دي ، أنا كنت فاكر انك جاية هنا عشان سامحتيني

=..

_ في الاول كنت فعلاً خاطبك عشان الورث ، لقيت بنت فيها كل المواصفات ف قولت هي دي ، كنتي بالنسبالي المناسبة والمطلوبة ، بس بعد ما عرفتك أنا والله نسيت موضوع الوصية دي خالص ، كنت عاوز اشوفك كل يوم وابقي معاكي دايما عشان عارف ومتأكد انك مش بس مناسبة ، انتي احلي حاجة حصلتلي في حياتي يا مريم ، أنا محبتش حد قدك ، عارف اني زعلتك وجرحتك بس والله غصب عني ، أنا اخر حاجة اقصدها اني ازعلك

=..

مد أيده في جيبه وطلعلي منديل ، خدته ومسحت وشي وبصيتله = يعني مش هتاخد الفلوس ؟

_ اصلا؟ طب اقتلها يجدعان ولا اعمل ايه ، انتي بتعيطي عشان كنتي فاكرة اني هاخد الفلوس؟

= دموع الفرحة انك مش هتاخدها

ضحك وبصلي = بطل تسبيل يا احمد!

_ بردو؟؟ يعني تاني؟؟؟

= انت كنت واحشني اوي

_ بجد ؟

° القهوة يا احمد

_ طب ليه يا ليلي كده هو دا وقته دا انا مصدقت تنطق!

ضحكت وخدت القهوة _ مريم

= نعم؟

_ أنا كاتب بتاع عشرين جواب جوا

= استغفر الله العظيم يا رب ، ولع فيهم يا احمد والله منا قارئة حاجة

_ حسنت خطي والله

= انسي ، وعدي يومك واتمسي وقول يا مسا

____

= نوح!!! تعالي هنا ، انت معمولك استدعاء ولي أمر ؟ ابني أنا يتعمله استدعاء ولي أمر وهو في الحضانة!

° يا مامي أنا معملتش حاجة

= اه ، احمد تعالي شوف ابنك

_ فيه ايه يا حبيبي جري ايه؟

° انا عملت ل صحبتي الي معايا في الفصل جواب

= هاااااا؟؟؟؟

° وعملت قلب طالع منه سهم ب حرفها ، ف المس شافتني وخدت الجواب مني

بصيت ل احمد وانا فاتحة بوقي = جواب؟؟؟ ، قلب وسهم؟

_ حبيب قلب بابا ، هذا الشبل من ذاك الأسد ، أنا امك دي كانت بتموت في جواباتي

= احمد!!!!! ، نوح حبيبي مين قالك تعمل كده؟

° بابا

= ايييييه؟؟

_ أنا ابني فتان؟ ليه معرفتش اربي؟

= دي مشكلتك دلوقتي؟؟؟ ، احمد هو انت الي كاتبله الجواب!!!!

_ مسطره وملونه ب أيدي

زعقت = نعم؟؟؟؟

_ نوح ، ادخل اوضتك حالا وانا جاي معاك بكرة نخلص الموضوع دا ونلمه

نوح دخل اوضته ف رجعت بصيت ل احمد

= احمد انت اتجننت؟

قرب مني _ مريم ، بما اننا في المطبخ والحلل محوطانا ، أنا جبتلك حاجة

= انت هتجبلي جلطة

_ أنا عملتلك جواب مع الجواب الي عملتله ل نوح امبارح وهتقرأيه

= احمد طلقني

تمت..