تحميل رواية «الموروث نصل حاد» PDF

________________الموروث

﷽

𓆩 اســاور حــسين 𓆪

بقلمي رواية : الموروث

‏ليش تحچيهن اذا تِندم عليهن

هنه ذَن اليوجعنك !

ياهو غَيرك حاسّ بيهن؟

لطفا لا تنسون التصويت والتفاعل بين الفقرات

⊰ غـاليـة ⊱

انگطع النفس واحس صرت

افقد بين ايده واسمع بس صوت شاهين يصيح

_ عووووفهااا راح تموووت بيدك بووووية .

أصواتهم أختفت من عافني وگعت لا من ايدي

ولا من رجلي حالي حال الجثه لا احس ولا اسمع

وعيت على ماي بارد وراسي على مخده

وحرمة خالهم تصيح عليهم ما راضيه

وشاهين يهدد بأبو يخابر على ضـلـيل

وگع على ابنه بوكسات مقهور لأن يدافع عني

وام ضـلـيل تتعارك هيَّ وأخوها ما قابل

على تمار يضربني بنص بيتهم وانا حرمة شيخ .

كعدت ونزلت رجلي من التخم الدنيا تفتر

غمضت ورجعت فتحتها شالي مشمور

ملابسي كلها ماي عباتي تراب على حالها

ايدي من الضرب والبرد يبست انقهرت على

روحي شلون وگعني بيد هل حيوانات .

وكفت وحرمة خالهم اجتني تركض ما تقبل

جريت روحي منها اسحب بشالي اعدل بي

سمعت ام ضـلـيل صوتها فاتت تضرب بعكازتها

_ شال ايده منچ ، اذا ما ادوس راسچ بالقندرة .

خليت عباتي على راسي أريد اطلع منا

انهضمت من كلامها وتجاهلتها

ركض شاهين يمسح بالدم من خشمه يجري

ودشداشته متلطخه دم عدل عباتي ويتعذر مني

_ فشلان من روحي ما گدرت احميچ شيخة

هذا ابوي صعبة ارفع ايدي وأضربة .

تمسكت بيده متفهمه موقفه

_ اخذني منا فدوة .

اعترض طلعتي خالهم مو خوفاً عليَّ

بس مرعوب وام ضـلـيل الوحيدة عينها ماتنكسر تصيح

_ عوفها تولي راح تخلي الإخوان تتذابح .

درت عليها صوتي حتى ما ينسمع رگبتي

مدري شصار بيها كسرها وجع يذبح بس احچي

غـاليـة : انتِ بايعتها بعتي ولدچ من وگفتي

وتشوفين ابنچ يريد يموتني .

ام ضـلـيل : خلي يموتچ ويدخل سجن زلمة .

غـاليـة : دخيل ربچ شنو من گلب عندچ

هم الجنة تصير تحت اقدامچ ؟ عادي عندچ ابنچ

ينشمر سجن عادي ؟ زين هسة انا ما متت ماتفكرين

ما تخافين يعني ضليل يخليها تمررر هيچ بسهولة .

ام ضـلـيل : خليتي راسچ براسي وتقارنين روحچ

بأمهم بشيخة ال ضـلـيل راح يحترك گلبي على ولدي

يتذابحون وأخسرهم ، بس والله يا غـاليـة ما تمر واردها

واحرك گلبچ على بناتچ كلهن .

عفتها وطلعت لو احجي منا لبعد سنة

ما تفهم والله ما اريدهم يتذابحون ما اريد احرك

گلبها على ولدها انا ام مثلها واعرف شكد إعزاز

صعدت بالسيارة منتهية وشاهين الدم اخذه

وكف السيارة بنص الطريق ورجع راسه

يمسح بالدم يمكن انكسر خشمه .

كمل على اعصابه نزل قبلي فتح

باب الكراج يريد يدخل السيارة

لمحت ضـلـيل طلع من شاف الدم مسبح شاهين

كل قوته اهتزت اجه يركض يلوي بيده

شاهين : فشلان منك وين اودي عيوني

عنك شتسوي بيه حقك .

ضـلـيل : غالية وينها ؟

شاهين : خصمي چان ابوي عمي خصمي ابوي .

دخلت جسمي من الوجع متخدر وجهي

يشرح كمية الضرب ، اريد أتعداهم طلعت نقش

تركض عيونها صارت بيني وبين شاهين

بقت تلطم على وجهه وتصرخ بعلو صوتها

حجيت بصوت متهالك متجرح ردتها تاخذني للغرفة

بهتت بدخلت ضـلـيل على بيت بعدني بنص

المطبخ وطلع بيده شايل اسلاحه وكفت بطريقة

امنعه وعيوني على ايده شلون شايل اسلاحه

_ ارجع ورجع سلاحك .

ضـلـيل : نقش اخذي امج .

_ متعمد تكبرها لو متقصد ؟

كضني من عباتي يدفع بيَّ يريد بس يطلع

وعفاف ودلال مرعوبات منه لزمت ايده وحجيت بتعب

_ ما گدرت تضربني وديتني

على اخوك يبرد گلبك بكتلتي .

جن جنونه من سمع كلامي طلع وشاهين

يتوسله مايضربه ركب السياره وشاهين ما گدر

يعوفه راح وياه كعدت بالگاع ونقش تناشغ

وتغسل بوجهي فتحت الشال من شافت ركبتي

تخبلت حتى تقدمت دلال بلا وعي حجت

_ صخام هذا رايد يموتها كبر حتى كبر شني مخبل .

طلعت عزيزة لابسة جادر صلاة من شافتني

عاطت بنقش تصعدني سندتني هي وياها

صعدوني للغرفة گعدت وركضت طلعت دشداشة

وفوتتني للحمام سبحت بماي حار بدلت

ونشفت شعري ما تحجي بس تبجي

ادري بيها تحب اخوانها وتخاف عليهم كلهم

عكس امها الشر عامي عيونها الله لا يوفقها

عزيزة : خليها تنام لا تبقين تنوحين فوك راسها

امشي اطلعي ويايَّ امشي اريدج .

اخذتها وراحت ومن الوجع غفيت وانا اتمنى الموت

مشلوع گلبي عشت وياهم وانا مشلوع گلبي

وما همني كلشي والله اتحمل هل ضرب والذل

بس اريد اخلص بنيتي من ايدهم لوو بس يعوفون

مرجانة خليهم يگطعون مني ألهوا ولا يأذون

بنيتي شسوي بعد بحياتي اذا مُـرجانـة توگع بيدهم .

نقش ..

بيت احتقره ، اصحابه حاقده عليهم

لو بيدي حكم اعدمهم واخلص منهم

لا انا ولا امي ولا اخواتي عشنا يوم طبيعي

بعد ما دخلنا هل مهجوم خسرت ابوية وخسرت

احلى ايام عمري بسببهم زواج فاشل طلاك

صرت اسمع كلمة مطلقة وانا بعمر المراهقة

الي المفروض أعيشها وأتصرف براحتي

جمدوا عقلي وكبروني احس شايلة عقل عجوز

وما يكتفون انحرمت من اختي واتمنى بس اتمنى

المح شكلها ، وكلها هسة شدت حيلها على امي

اذا اخسرها منوووو يخلصهم مني منوووو .

كعدتني عزيزة بالصالة وحضنتني خليت

راسي بحضنها تمسح بشعري محروك كلبي

اهز برجلي الحد سمعت الباب انفتح راحت عزيزة

وانا وراها دخل عمي ضـلـيل على ديوان كعد

مقابيل الباب وحط السلاح على ارض واكف

وايده اثنينهن عليه مستند عبالك مو سلاح عكازه .

دفع شاهين الباب عزيزة من شافته ركضت

حضنت وجهه وتتفحص بوجهه عافها وراح

على ضـلـيل ما نسمع شنو يحجي وياه

تريد عزيزة تروح عليهم ودخلت جدتي ام ضـلـيل

واخوانها ومقتدر بعدها ما خايفة تعدتني

ومن حجيت وكفت والتفتت تضرب بعكازتها بالگاع حيل

نقش : بيچ بخت امي تتنفس رجعت .

ام ضـلـيل : شتسوين بنت غـاليـة لو راجعه امچ بلا نفس .

رفعت ايدي اثنينهم وصرخت

_ بهاي وهاي ايدي اذبحچ .

دفعني شاهين منها لازمني من زندي منا ومنا

من تقدمت ورفعت العكازة تريد تضربني بيها

ام ضـلـيل : ما ذبحتي من حرك ايدچ اجيتي

ذبيحة مذبوحه تكمزين سحلچ مثل الزمايل .

نقش : لااا ما اذبح غيرررچ موتچ على ايدي

بعدها نار وشابه بگلبي من يوم ما خليني

مُـرجانـة تخرررس ويروووح صوتهاااا

وبيدچ كاعدة تخلين هل نار تلهب .

سد شاهين حلگي بيده بقيت ادفع بيها

وعزيزة تصرخ بوجهي حتى اسكت

هزت جدتي راسي تتوعد وفاتت على ديوان

وعمي مقتدر عيونه تبث حقد من كلامي بس

خايف يحجي يعرف بضليل متخبل عليهم

شاهين : راح اشيل ايدي تروحين

للبيت نقش بوجهچ للبيت .

دفعته من صدره اريد امشي اعترض طريقي

_ لا تعاندين .

_ معليك روح منا .

_ هو شني معليك عزيزة اخذيهااا .

_ اذا الزم ابوك لو انا لو هوَ خوش .

نظر نظره ضياع بوجهي وراح عليهم من احتدت اصواتهم

وكف بصف عمي ضـلـيل وانا وعزيزة بالباب نشوفهم

مقتدر : شرد غلط وشرد يا خوية خلي يولي .

ضـلـيل : ام تمـار ابنچ اذا مايجي

هين ما اضمن روحي بعد اذا خلص صبرري .

ام ضـلـيل : صرت ام تمار يا ابن بطني .

ماردها وثبت على حركته ما تحرك مستند على سلاحه

وخواله يتعذرون منه لان صارت بنص بيتهم

مقتدر وگع يتوسل بي وخواله عزيزة راحت

تمسح على ظهره تهدي بي بكلامها وهوَ

ولا عبالك من شافته امه قافل طلعت تلفونها

وخابرت على تمار تصيح عليه حتى يجي

ومن سدته گعدت تضرب بالگاع بالعكازة وتنتر

_ خلي يجي واذبح اخوك الخاطر النسوان .

طگطگ رگبته وظل بعدد ويسب بأخواله

جابهم كلهم بالسرة وگف دفر الباب

وامه تريده يحترمهم اتحزم عليهم احزام

ضـلـيل : احترمهم لو زلام خيرة بس بالمواقف يثبتوها

موو زلم عبن حرمة الشيخ تنضرب وتنهان بنص

بيتهم ولا واحد بيهم يصير زلمة ويدافع .

رفع ايده يأشر بيها ويطرد بيهم

_ بيتي يتعذر امثالكم لزموا شواربكم وزينوها

لو انا بمكانكم وحرمة غريبة دخلت بيتي وتنضرب

اطم رووووحي تعرف شني اطن روحي .

واحد من خواله نزل راسه ويتعذر

_ حگك وشني تحچي وتطرد حگك هذا

فشلانين منك شيخنا بس اخوك الله يهدي

فقد وگع على حرمة دك من صدمتنا وكفنا ايدنا مربطه .

طلعوا وروسهم بالأرض من فشلتهم

ركضت دخلت من شفت عمام واولاد عمهم دخلوا

واشوف شاهين فات بدل ونزل مستعجل

يريد يحاجيني وانا وياه سكتنا من سمعنا

صوت عمهم يصيح على عمي ضـلـيل

_ تمار بلغنه اخوووك صدك حرمتك هي شردت

بتها منكم على اولاد ساجر ؟

ضـلـيل : امها ماتدري البت وحدها شردت حتى ماتتزوج .

_ وكلام اخوك جذب ؟ حلف على قران حرمتك

بيدها شردتها وانتَ تعرف واطمطم على فعلتها .

اصر ضـلـيل يجذب كلامهم ويرفضه

_ انتَ شيخ والشيخ كلمة جانك تعرف بأمها

شردتها وبعدك ما جتلتها هاي طرگاعة ولفت على روسنا

واذا ما تعرف ارجع وحقق ويه اهل بيتك

البت بتنا وشرفنا نزلت روسنا وطش خبر شردتها

عد عشيرة معاديه لعشيرة اهلها موتتها گربت

نرجعها هسة لو اخسر ولدي سبعتهم ارجعها

واطمها هي وعارها .

واحد من أولاده اسمه مهند كمل على كلام ابو

_ هاي اذا ما طلعت عاشگه واحد بيهم وشردت وياه .

ابو مهند : تعشك من عدوان اهلها منين حصلته .

مهند : الفاس وگع بالراس بوية وصارت بنت

عابد بصمة عار ماتزول غير بموتها .

ضـلـيل : انطم انتَ لا اگوم اكسر سنونك بالقندرة

ولد ساجر وين ينطوها هسة لو مو تصير دم

دام دخلت عدهم ما يطلعوها .

ابو مهند : راح تمار ولدي وحركوا اراضيهم

لان خابرر شيخ فؤاد يگلي وارث يگول

خليهم يشوفوني بطولاتهم ال ضـلـيل .

سديت الباب من صوت عمي ضـلـيل تخبل

بس سمع حارگين أراضيهم وانوب صار يهدد

بيهم ويذكرهم بعشرة اهل ساجر شگد ملعبين

ويگلهم ساجر مربي أولاده على نمطه ما تعرف

ياهو بيهم الزين والشين وبعد هاي خطوتهم

لازم يتحملون المشاكل والمصايب ورد الموروثين عليهم

لأن عدهم اراضيهم اهم من حياتهم .

وبعدهم ما طالعين من الديوان واثبت

عمي ضـلـيل كلامه من خابر واحد من اخوان

مهند يبلغه اثنين من اخوانهم اخذوهم اولاد ساجر

وابوهم تخبل شلون وگعوا بأيدهم وشلون عرفوهم .

ظل ينتخي بعمي ضـلـيل تجاهله

وعبالك فاصل على صاير بين العشيرتين

شغل جگارة ورجع ظهره ويخلي عيونه بعيون امه

ضـلـيل : اريد تمار اكمل شغلي وياه ابرد كلبي

بي وبعدين اشتغل ذولاك الشياطين نسل ساجر .

طلع مهند وابو وشكو شيخ موجود باقي

بالديوان بس جدتي وضليل تحچي ما يحاجيها

ما طولوا ورجعوا داگين الناقصة بالحيوان تمار

دخل منزل راسه مكسوره عينه القذره بقت

عزيزة بصفي تناشغ وتبجي بصوت عالي من

شاهين عيونه تلمع عبالك يريد يبجي دخل

على عمي ضـلـيل بعد ما طلعهم كلهم ويريد

يظل بس هو وتمار بالديوان لزم ايده

باسها وما اسمع شنو يحاجي بس مبين يتوسله

حتى ما يأذي ابو ، هاي كلها وهوَ ضاربه ومخلي ينزف .

طلعه عمي ضـلـيل وهوَ يهز براسه دفعه برا الديوان

وقفل الباب ظل بس هو وتمار وحدهم ، دخل ابن

تمار الثاني اصغر من شاهين بسنتين يهدد

ويصيح خايف راح على باب يضرب بي

جدتي تلزم بي وتدفع بعمي مقتدر حتى يتدخل

كل احنا ترعبنا من ضج الديوان بصوت عمي ضـلـيل

_ جانك زلمة من اضربك مثل ما ضربتها لا تصرخ .

حجاها ومن بعدها بقينا نسمع صوت تكسير

على سب وأنواع الشتايم وصوت طلقتين ثارت

من سلاح وصوت تمار يترادد ويرجع يقنع

سمعوا صوت طلق نهض شاهين هو واخو

علاء يدگون بكل قوتهم على باب وياهم مقتدر

وجدتي بعدها ثابته يا جبل مايهزك ريح .

انفتح الباب طلع تمار وجهه ما يتفسر ولا ينشاف

من الورم علاء تحول اخرس عود جان يهدد

رفع تمار ورقة بوجه امه مقهور ميت من القهرر

_ اخوي ينطيني ورقتي ابنچ

بعد مايريد يعترف بيَّ يمه يگلي اذا يسألوني

كم اخ عندك اگلهم مات عابد وتمار وظل مقتدر .

هو يحچي وطلع عمي ضـلـيل من الديوان رافع

راسه ظهره مستقيم يمشي بدون ما يلتفت ويشوفهم

عبرهم كلهم وهوَ يفر سبحته يريد يدخل

وانا بالباب ضحكت بوجهه وسويت طريق

رفعت ايدي دگيت تحية احترام مر مني باقي ثابت .

دخل غرفته جدتي جرت الورقة من ايد تمار

هل ورقة نفسها اخذ ابوية منها سودة عليَّ

ام ضـلـيل : مقتدر غسل اخوك بساع خليني

اتگابل انا والشيخ وحدنا اليوم اريدن حل .

بعدني بمكاني رفعت عكازتها ودفعتني من اكتافي

وفاتت وقبل لا اركض وراها شفت شاهين وعلاء

يغسلون أبوهم ، مشيت لنص الصالة لحگت على

نص كلامهم والباب مفتوح نصه وعبالي

بس اني عندي فضول اسمعهم شو درت

واشوف نسوانه اثنينهن وعزيزة كلنا واكفات نتسمع .

ضـلـيل : لو ما محذرة اگول هاي اول مرة وحقه

بس قبل حذرته صحت بي خوووية تريد تأذيهااا

تررريد تمووتهااا موووتني انااااا قبلهاااا

تهينهاا تهين اخوك تضربها تضربني .

ام ضـلـيل : وروح ابوك هو ما راد يضربها بس هيَ لسان .

ضليل : وحگ الله ومحمددددددد من صارت جدامي

الضربات بوجهه كفخن كلبي معمي انعميت

الشيوخ عمامي يحجون ويايَّ مكفووخ

كفختوني على راسي هساع احس بدمي جامد .

ام ضـلـيل : هي راح تموتك مثل ما موتت اخوك وجلطته .

ضليل : تضربيني بيهاا يماا تضربيني بغالية .

ام ضـلـيل : كلبي محمل وما راضيه عليك خليها براسك .

ضليل : تنقهرين مني وتقهريني بيهااااا .

ام ضـلـيل : ول يمه شلعت گلبي ول ومحمد ما تستاهلك

انتَ وين وهل بغدادية المگطمه وين ، شيخنا وكلها

تريد خاطرك تخلي هل سگط تلعب عليك ما ارضاها .

ضليل : لوو تحبيني صدك لوو صدك تحسبين حساب

وتعتبريني شيخكم ما تتعاونين عليَّ

حتى تشرديهااا وتنزلين راسي .

ام ضـلـيل : اخلصك منها واحنا نخلص من شرها

تنساها جرب ول يمه بس جرب البعيد عن العين

بعيد على گلب اخذها مني .

ضليل : انتِ اخذيها مني بيوم ما تطلع اموتن وحگ ربچ

وغلاتچ بگلبي يمه ، صار ايام ميت انا والميت سوية

كاره روووحي هذا النوم شني النوم ما محصله

من رجعت ردت رررروحي .

ام ضـلـيل : وانا ما اريدهااااا بنت ذياب اكرهه .

ضـلـيل : لا تحبيها .

ام ضـلـيل : اريد حل شلون اكمل عمري وياهااا .

ضـلـيل : راسي راح ينفجررررر عرفيني دخيل ربچ .

ام ضـلـيل : مو اكلك راح تموتك .

ضـلـيل : فشلتوني وياها خجلان منهاااااااااا

شلوووون اخلي عيني بعد بعينهاااااا

انا دزيتهاااااا انوب تگلي متعمد تخلي اخوووك يضربني

نزلتووووا راسي والله نزلتوا راسي .

ام ضليل : من ايدك .

ضليل : استلممممم حرگان الگلب منين اتلگاهاااااااا

منچ يمه لو من اخوووووووي لووووو منهاااا .

ام ضـلـيل : وانا شبيدي عليك .

ضليل : لا انتِ تسنديني ودورين راحتي وگعدت وياچ

قبل وحجيت يمه حبيتها يمه كفي منهااا

يمه راح ندخل السنة السادسة وانا احاول وياها

متحمل اشكااااال تحملت اشكاااال

حتى تصير زينة وانتوووا تهجمون بكلشي ابني .

ام ضـلـيل : واخيك ما تعرفه بحاله .

ضليل : واخوي يركض بس يريد يهدم حيلي

وهذيچ عرفت احبهااا احتارت منين ترگعني

على راسي تعبت انا مليت هلكت هذا حدي وياكم .

ام ضـلـيل : انا رايحة يمه الحجي بعد وياك

ما يفيد عقلك وگلبك عند بنت ذياب عرفت

شلون تغسل عقلك بس خليها براسك موتك

على ايدها ، دفنت اخوك وراح تدفنك هاي ما تتعاشر

وراح تظل معلعل وياها ماتحبك اخذها مني غـاليـة

ما تحبك للموت ، اذا صار بيك شي يا ضـلـيل

غـاليـة ما ابقيها عايشة لا وحگ هذا ربك .

دفعت الباب وطلعت تهفي حيلها يعادل عشيرة

وعزيزة ركضت وراها تحجي وياها ، وانا طفرت

فوك اشوف امي فتحت الباب عليها نايمة بس تون

من الوجع ، رحت على ننوس غطيتها وبقيت كاعدة

يمهن قليل انزل على گد حاجتنا .

ومر اليوم واليومين والثالث بقيت اخدم بيهن

امي الحد ما وكفت على حيلها باليوم الرابع

متمدده بفراشي وامي بحضنها ننوس ونايمة

على سرير انفتح الباب ودخلت جدتي أم امي

نزلت امي ننوس تريد تركض تبوسها جدتي

ما قبلت وراحت هي باستها وكعدت يمها

شافت اثار اصابع تمار صايرات بلون اصفر

وحتى وجهه الكدمات بلشت تصير على صفار .

عفتهن ونزلت اركض على درج احضر الضيافة

شفت عمي ضـلـيل كاعد بمكانه بنص الصالة

يشرب جاي ومبدل مبين تعبان ، من شفته

نزلت بهدوء وهذا شاهين كاعد بصفه صاح

_ انزلي بهداي لا تتكربهين يول وين انطي وجهي .

ما اهتميت وشفت عمو ضـلـيل خزره

دخلت للمطبخ لگيت عفاف ودلال مجهزات

صينية اكل سمج والتمن ولبن وزلاطة تخوصرت وهمست

_ اخذيها خلي امچ المسعدة تاكل هي وامها .

نقش : اني مو مسعدة امي مسحولة مكتوله .

دلال : خلي يكتلوني ويدللوني .

عفاف : خيه هي كلمن وحظها مو بالكتل .

ضـلـيل : شكووووووو ؟

عفاف : ماكو شي عيوني .

اخذت الصينية اريد اصعد مريت من عمي همست بتردد

نقش : عمو .

_ ها .

نقش : عفاف ودلال بنفسهن تضربهن .

_ دمشي اصعدي كفينا شرچ وشر امچ لا اكتلچ وياهن .

صعدت اول بايتين والصينية جبيرة وكفت اريد

اشوف شلون اصعدها بدون ما توگع مني واتفشل

ما احس غير الصينية صارت عالية وشاهين

مر مني اخذها ويصعد وعيونه عليَّّ

_ امشي يول القزمة لا تتكربحين .

ضـلـيل : لا تتكربحين ويموت .

شاهين : اعمى يعاير بمگرم .

صعدت اركض وهذا طاير اخذتها منه بصف الباب

شاهين : ماكو شكراً ابن عمي .

نقش : بيك طفگه وحدك اجيت اخذتها .

شاهين : فوك ما انقهر عليچ .

نقش : لا تنقهر مرة ثانية .

شاهين : الصوچ مو بالصالنصة ، الصوچ صوچ الشاصي .

سلم الصينية وكشر وجهه يعيب وغمه من بعيد

وراح نزلت الصينية ما تحملت خليتها بالگاع

ورجعت الغمه رجع يصعد سريع يريد يلزمني

لان غميته فتحت الباب على حيله صارت جدتي

مقابيله ابتسم وكف يباع عليها وعليَّ

_ ها شبيكم .

شاهين : سلامتكم بس صعدت الصينية .

شلت الصينية ودخلتها للغرفة امي بقت كاعدة

على سرير ما نزلت بس جدتي اجت تاكل وتگول

_ وفتحت الباب وجه الفجر واشوف شيخ ضـلـيل

انا خرطت العافية گلت موتوها لغالية ردت اتخربط

وروح ابوچ يمه هو انوب خاف گال والله ما بيها شي

بس اجيت عندي سالفة وياچ .

اكلت شوية ورجعت تشرح لأمي لان مصدومة من جيتها

_ فات طلب جاي سويت وهو يشرب كعد هواي

ظل يحجيلي سوالف ما اكدر احجيها .

غـاليـة : شنو يشكي عود مني .

_ لا يمه يبووووو بعدد يبوووووو .

غـاليـة : اي لعد شنو غير يشكي ليش ما تحجين ؟

دنت جدتي الصينية زعلانة وصاحت بيها

_ عمي الله يساعدة عليچ ما تنحملين مفلفلة عصبية .

نقش : طبعاً هاي امي دائماً هيچ .

غـاليـة : انجبي لچ .

نقش : شوفي بيبي حسرة علينة نتفاهم وياها .

_ اي ماتشوفين شيخ عشيرة شرّدته بالفجر طر

مسافة شبعدها وفات بغداد يشكي منها .

اجت امي يمها رجعت الصينية وباست راسها

وذيچ الگرصه المحترمة گرصتني بيها

غـاليـة : بعد ما احچي عمي سكتت بس كملي اكل .

_ نقش بيبي عمچ اكل روحي شوفي خطية .

غـاليـة : اكلي يا عيوني شعليچ بي نسوانه يوكلنا.

_ ما توكلي انتِ شبيچ ناقصه ايد رجل .

نقش : تروح امي توكله يموت ينجلط هههههههه .

دفعتني بيدها وعاطت بيه

غالية : امشي اطلعي برا امشي لا بارك الله بيچ .

نقش : بعد ما احچي راح اسكت .

_ بنت ذياب عليمن رافعة خشمچ على زلمة .

غـاليـة : يا يمه شبيچ عليَّ يمتى رافعة خشمي .

_ بالله احجيلي اسمع منچ ومنه .

رادت امي تغير الموضوع بس جدتي بسرعة

خلصت وشبعت وراحت غسلت واجت ركضت

نزلت الصينية شفت ننوس گاعدة بحضن عمو

يبوس بيها وهيَّ تدلع وتلعب بلحيته وترمش

من يتغزل بيها ، دخلت للمطبخ اخذت جاي

بعدني بنص الدرج سألني

_ امچ اكلت .

نقش : لا ما رادت بس دا تحچي هي وبيبي .

هز راسه عفته ورجعت قدمت جاي لجدتي

وهي ترزل مدري تعاتب صايرة عصبية

_ يگلي تجي وكت مصلحتها تسليك

ضحكتها سوالفها تختمها اطلع روحي

تستفزني استفزاز شوية وتجلطني وتعوفني وتروح .

غـاليـة : اني .

نقش : صح كلامه .

_ وگال كلمة والثانية صاحت طلگني ما مجبور .

غـاليـة : لا بس من يقهرني لو يأذوني احجيها .

نقش : الصراحة حتى اذا طلب منها جاي تتنرفز .

امي شنو بقت تفور وجهه احتقن گامت تريد

تطلع وهي ادردم بصوت عالي

غـاليـة : بالله اروح اشوفه هذا كل عقله

شنو راح يشكي يمچ هي هاي حالة .

_ روحي تعاركي وانا هنا وراح ارجع هسة

لبغداد ويا غـاليـة با بنت بطني لا تشوفيني وجهچ بعد .

خلتها تتراجع وترجع وتكعد وتسكت تسمعها

_ هو لو ما يحبچ يا غبية يطر هل مسافة

ويجي يدخّل امچ واسطة بينه وبينچ ما دخل غريب

ولا يشكي منچ گدام غريب انا امچ سترچ وغطاچ .

غـاليـة : هسة هو شيريد .

_ انتِ شنو تريدين من الزلمة ؟ يگول شتريد انفذ .

غـاليـة : يمه شمرني بيدهم يكفخون بيَّ امه اول

ما شافتني عرفته شال ايده مني لزمني تمار

وروح ابوية ردت اموت بيده ، بسببه وسبب عناده .

ردتها جدتي ما راضيه على كلامها

_ وعنادچ ، طبعاً يعاند يگول فاتت هيَ غلطانه

ما تنكسر عينها وبالجذب تكسر عيني وتگول اسفة

اعتذر منك غلطت بعد ما تتكرر .

غـاليـة : ما حجيت لان عصبي وبس يغلط .

_ يغلط غير تتراددين وياه ويعرفچ اجيتي

بس على گد مصلحتچ هسة انتِ اذا تحبين

شخص بس هذا الشخص من تصير مصلحته

عندچ يجي ومن ما يحتاج منچ شي ما تشوفي

ولا يعبرچ تخدمي لوو تاخذين منه موقف .

غـاليـة : يمه ما أريده يعني شسوي ما اگدر أتقبله

من اتقرب منه والله كلبي ينقبض احس اخون بعابد .

_ والحل ؟

_ لا يشكي مني خلي يطلگني.

_ ما يطلگ وانا ما اقبل يطلگ .

_ ها يمه سالمين شبيچ .

_ شبت بيچ ، ليش يطلك شمسووووي .

غـاليـة : أشكال ألوان مسوي .

_ شمسوي يلة شمسوي حاجيني خاين .

غـاليـة : اي مو متزوج اثنين .

_ هم گال عبال يعرف سوالفچ

گال عفاف اول زواجاتي اختها بصغري

وردت منها الولد الله ما رزقني وتزوجت دلال

وصبرت عليهن لا من هاي ولا من هاي صار

عندي اطفال وما گدرت اكسر بيهن وخفت الله

بقيتهن عندي ، الحد ما اجت غـاليـة وبمعجزة

الله رزقني ببنية منها ، ومن بعد غـاليـة بعد

ما رف كلبي على خرمة ولا فكرت بغيرها .

غـاليـة : ولسانه والضرب .

_ بربوك مو تغير وهم گال بداية زواجنا

صار عدها حمل اذا اتگرب منها اطخ بطنها

فرحان واول حرمة حملت طفل مني تملخ روحها

تملخ لا تجي يمي يگول انا هم افقد اضربها من القهر

ومن ولدت اذا فتت اشوف البنية تنزلها تشمرها

عندي وتگلي والله لا تصعد يمي اخذها انت ربي بنتك

يگول صح اضربها بس عندي سبب وارجع

البنية عدها وايدي على گلبي وابتعد حتى من

البنية اخاف تكرهه وتأذيها لان من دمي .

غـاليـة : اي وهوَ صار نبي مو عاند وتوسلت

حتى امه الزينة ما تزوج نقش شال ايده

وما قبل يسمع مني وخلاهم يزوجوها .

_ وطلگها واخذ حقها صيري ادمية بنت ذياب .

غـاليـة : ما نتراهم يمه هو نار وانا نار .

_ كعدت وحجيت وياه اشوفه خوش زلمة

وعلي معدل هدوء ورزن واسلوبة حلو .

غـاليـة : ههههههههه هذا منو ؟

_ شيخ ضـلـيل .

غـاليـة : غير لسانه اطول من بغداد

يمتى هدوء شايفة صوته من يصيح يبوووو يبوووو .

نقش : انا اگلج السبب بيبي .

_ اعرفه بيبي قابل انا ثوله ما اعرررف

احنا زمان نعرف الزلمة يهجر فراش الحرمة

بنت ذياب عدها هي تهجر فراش زلمتها .

غـاليـة : حتى بهاي يحچي كل عقله .

_ لا ابد وروّح ابوچ بس انا من كلامه

وانا مو صغيرة اعرف الزلمة شيفكر .

نقش : بيبي انا صار فترة الملم بشملهم .

_ هم گال .

غـاليـة : كلشي حاجي ههههههه .

_ غير الزلمة طاگه حوصلته منچ .

ضحكت امي من كل گلبها بصوت عالي

وجدتي تخوزر بيها ما راضيه عليها

نقش : هسة عمو ضـلـيل سمع ضحكتچ لان كاعد جوا.

_ شوفي يمه غـاليـة تعرفين اذا الزلمة طلب

زوجته وهي تمتنع عن فراش زوجها

بلا عذر شرعي هذا نوعا من النشوز، وكبيرة من الكبائر ؟

غـاليـة : يمه هذا الموضوع ما اقبل احد يدخل بي .

_ لا انا امچ ادخل غصباً عليچ صار شگد هاجرة فراشچ ؟

غـاليـة : ما هاجرة .

_ لان بالأصل ما اقترب منچ بس مرة وحدة

وصارت بيها ننوس مووو ؟

غـاليـة : اي .

_ وجعي كون وجعي .

غـاليـة : سدي الموضوع .

_ انوب تريده يصير زين وياها عمي زين وصابر عليچ .

_ هاي هو طلب تـ..

_ يا مو اگول وروح ابوچ وحدي .

غـاليـة : يمه من الأخير هسه هوَ شنو يريد مني ؟

_ من الأخير ما طلب غير حقه گال أريدها تحترمني

ومني ألها كل الاحترام ، مـن ارجع من مكان تستقبلني

من كل گلبها لا تسلك بسوالفها والضحكة

لا تعاند ، وكل ليلة تجي عندي هاي يأكد عليها

وتبطل تستفزني وتعوف هاي مال شيخهم تاج راسهم .

غـاليـة : يتشرط ؟

_ هاي مو شروط هذا حقه مثل ما تريدين

يحميچ ويحمي بناتچ ، وما يقصر لا عليچ ولا عليهن

يحترمچ وتحترمي هم عوزه ما تحترمين زلمتچ

اگلچ جنت اطگطگ من ابوچ عليمن طالعة عرمة .

غـاليـة : هاي عرمة كلمته .

_ اي گال غـاليـة عرمة گال ما شفت مثل عرامتها .

غـاليـة : شوووف شووووف شلون ينرفزززز .

_ والله يمه ماكو غيرچ ينرفز هنا .

_ خوش مدفوعه عليَّ دفعه .

بقت تحجي جدتي وياها بالساعتين تاخذ وتنطي

وتنصح وتعلم وووووو هلكت هلكت خلصت مي

البيت بگد ما يبس حلگها من الحجي اشكال الوان

فحطت منها فحطت اخر شي عاطت بيها

_ ما منچ رجيه امشي لمي ملابسچ وتعالي ويايه .

غـاليـة : ليش اجي وانتِ هم باتي .

_ ما اگدر انام بفراش غير فراشي صار سنين

ابوچ علمني ما اعوف بيتي .