تحميل رواية «الكتيبة» PDF
بقلم مريم سمير
جارٍ تجهيز التحميل... برجاء الانتظار
سيظهر زر التحميل خلال 10 ثانية
جارٍ توليد الملف...
التحويل يتم بالكامل داخل متصفحك — لا يُرفع أي شيء للسيرفر.
عن الرواية
_ عاوز تدخل بتاعتنا بنت!! ، وسط كل الرجالة دي ؟ ° ب ميت راجل وانا واثق فيها _ يا فندم احنا في حرب ، وانا المسؤول عن بتاعتي ، وديها أي مكان تاني أنا مش حمل أشيل مسؤولية بنت علي كتافي ° انت بتديني تعليمات المفروض اعمل ايه؟ ال_ عفو يا فندم أنا مقصدش بس من أمتي الجيش بيدخله بنات أصلا ؟ ° البنت عنصر أساسي لإستدراجهم ، احنا بنهاجم يمكن اقوي عدو بس قدام الستات مظنش أنهم هيبقوا بالقوة دي ، هتستدرجهم وانتوا تقوموا بالواجب ، احنا راح مننا كتير في المواجهة ، عاوزك تتعاون معاها ، دي مفتاح نجاح العملية _ تما...
رواية الكتيبة الفصل الأول 1 - بقلم مريم سمير
_ عاوز تدخل الكتيبة بتاعتنا بنت!! ، وسط كل الرجالة دي ؟
° ب ميت راجل وانا واثق فيها
_ يا فندم احنا في حرب ، وانا المسؤول عن الكتيبة بتاعتي ، وديها أي مكان تاني أنا مش حمل أشيل مسؤولية بنت علي كتافي
° انت بتديني تعليمات المفروض اعمل ايه؟
ال_ عفو يا فندم أنا مقصدش بس من أمتي الجيش بيدخله بنات أصلا ؟
° البنت عنصر أساسي لإستدراجهم ، احنا بنهاجم يمكن اقوي عدو بس قدام الستات مظنش أنهم هيبقوا بالقوة دي ، هتستدرجهم وانتوا تقوموا بالواجب ، احنا راح مننا كتير في المواجهة ، عاوزك تتعاون معاها ، دي مفتاح نجاح العملية
_ تمام يا فندم الي تشوفه
دخلت المكتب بعد ما خبطت وانا شايلة الشنطة بتاعتي علي ضهري ولابسة لبس الجيش ، كنت متحمسة جدا ، حلم طفولتي وحياتي بتحقق! ، أنا البنت الوحيدة الي اتقبلت ، مينفعش الفرصة دي تروح من ايدي ابدا .
اول ما شافني ضحك = هو فيه ايه؟
_ انتي شارية الطقم دا مخصوص عشان تيجي بيه؟
= يا خفة! ، مش دا الطقم الي كلكم لابسينه هنا؟
_ خفة؟ ، هي دي الي المفروض اتعاون معاها؟ والي المفروض هتستدرج العدو ؟ دا صالح صاحبي الي برا يعرف يستدرجهم عنها!
= اه دا انت كوميدي بقي! ، هو فيه ايه يا فندم؟ مش المفروض جاية هنا عشان مهمة؟
° أيوة يا حضرت الظابط
_ هي ظابط !!!
° من اكفأ الظابطات الي ممكن تتعامل معاهم وشاطرة جدا وذكية ومحتاجنها معانا
= ربنا يخليك يا فندم ، إن شاء الله هبقي عند حسن ظن حضرتك
° طيب دلوقتي تقدروا تخرجوا تتدربوا وعندكم اجتماع النهارده بليل مع الكتيبة كلها عشان اشرحلكم الخطة
قولنا ب صوت واحد واحنا بنأدي التحية _ تمام يا فندم
خرجنا وروحنا الحوش ، كان التدريب لسه مبدأش ف قعدت في الاستراحة اشرب ميا
° ايه دا ، دا شكلها هتحلو
_ اتلم يا زميلي منك ليه احنا في مهمة خطرة
° ودي واحدة خطرة بردو ، مين القمر ؟
_ ظابط معانا هنا جديدة ، وياريت متنسوش اني القائد
° اركن علي جمب يا ابو القيادة دلوقتي
_ ما تثبتوا ، والله لو ما اتظبطوا لأديكم جزي
° انت صاحب انت؟ فين الاصول؟ فين الصحوبية ؟ فين رقمها ؟
_ يا عبده هحولك مجلس تأديب هيبقي شكلك وحش
° يعم خلاص علي راسي ، هي هتتدرب معانا؟
_ المفروض اه
° يا حبيبتي يا مصر
_ طب خد الاتنين الي معاك ولف المعسكر زي الشاطر كده وتعالالي
° انت هزارك تقيل النهارده علي فكرة
_ أنا مبهزرش ، ابدأ يا عسكري
° عسكري مين يا احمد أنا ظابط!
_ يلا يالا
التدريب جه ميعاده ف قومت من مكاني ووقفت قدامه
_ معانا النهارده عنصر جديد ، الظابط مريم
بدأ الكل يبصلي ف رفعت حاجبي = هو فيه ايه؟
_ معلش مش بيشوفوا الستات غير في الأعياد والإجازات متركزيش
_ وعاوزكم تعتبروها راجل زينا زيها
'..
_ واختكم ها اختكم
' لاء راجل زينا مزعلتناش ايه اختنا دي؟
ضحكت = اه انتوا ما شاء الله استخفاف الدم عندكم وراثة
_ مفيش مجال للهزار احنا شايلين مصر فوق كتافنا يا رجالة ، يلا نبدأ ، سفوا التراب
= افندم ؟
_ ازحفي تحت الاسلاك الشايكة يعني
= والله العظيم؟
_ أنا قولت مينفعش يبقي معانا بنت محدش صدقني
= أنا قصدي انكم قدام اوي ، التمارين دي بتاعت المبتدئين
_ طب ما تورينا حاجة كده
وقفنا كلنا وبدأنا تمرين ، خلصت اول واحدة وقومت نضفت بدلتي وبصتله ب ثقة = يا ولي النعم!!!!
ربعت أيدي _ التمرين الجاي ايه؟
= حماس بدايات شباب ما احنا كنا شباب ، هما شهرين وهتدهني فولتارين قبل النوم
خلصوا تمرين ووقفنا _ تعالي كده علي جمب
وقفت جمبه _ يلا يرجالة اطحنوا بعض ، أنا عاوز اسود ، عاوزكم بلا رحمة ، عاوز مصابين وجرحي قدامي
بدأوا تشابك ف بصتله = وأنا ؟؟؟
_ وانتي ايه بقي مفهمتش؟
= هتشابك مع مين؟
_ طب اركني في الاستراحة خلينا نشوف شغلنا الله يرضي عليكي
= نعم؟ أنا عاوزة اتدرب التدريب دا
_ معندناش رجالة بتضرب ستات والله
= هو انا في بيت العيلة؟ وبعدين محدش هيضربني أنا الي هضرب
ضحك بسخرية _ بجد والله؟ انتي الي هتضربي؟ أنا عندي رجالة تاكل الحديد تاكل الظلط
= طب ما تورينا حاجة كده
بصلي ب تحدي _ مازن ، تعالي
' تمام يا فندم
_ هتتشابك معاها ، بس خف ايدك عشان مينفعش
' مقدرش يا فندم
_ ليه يا مزونة ايه المشكلة؟
' عشان دي اهم عنصر في العملية
_ متجيش عليها أوي ، خبطتين وتعالي
وقفت قدامه ' ازيك عاملة ايه؟
= الحمد لله والله ، انت ايه الدنيا ؟
' الحمد لله ، مازن
= مريم ، لونك المفضل ايه ؟
' ها؟؟
= اصل احنا جايين نهزر ، يلا عشان نبدأ
جه يضربني ف لويت أيده وزقيته وقع علي الارض ، قام بسرعة ف ضربته في وشه ف وقع تاني
بصلته = اسهل مما كنت اتخيل
كان فاتح بوقه _ مازن؟؟؟ ، ازاي؟ دا احنا بنطلع الظباط من تحت ايدك بالعافية
' خدتني علي خوانة ، مقدرش ارفع أيدي عليها
_ بس انت رفعت وهي لويتها هو انا اعمي؟
' يفندم أنا..
_ انت عرتنا ، قوم لفلي المعسكر لحد ما يغمي عليك قوملي
قام ومشي ف بصلي _ امممم ، عفية وهتعبينا ، اجمعوا كلكم
وقفنا كلنا قدامه _ احنا خارجين بكرة منعرفش هنرجع ولا لاء
=..
_ بنضحي عشان اختارنا نبقي جنود الارض
=..
_ الي خايف ميجيش يجدعان وانا هقدر كل حاجة ، الي مش عاوز ينزل مأمورية بكرة يجي هنا ، الي عاوز يجي هنا
روحت الناحية الي شاور عليها وملقتش حد جمبي كان الكل في الناحية التانية!
_ طب ولما انزل فيكم ضرب واعدمكم في ميدان عام ايه الدنيا؟ ، ارجع منك ليه يالا الناحية التانية
في ثانية كانوا كلكم جمبي ف رجع هدي تاني
_ كنت عارف انكم هتختاروا البلد ب ارادتكم ، وأنكم قد اي حاجة يا رجالة ، الاستقلال التام أو الموت الزكام
= نعم؟؟؟ ، ليه عندك برد ؟؟؟
_ اسكتي انتي
همست ل مازن = انتوا متأكدين أن دا القائد بتاعكم؟
' متتكلميش معايا بعد اذنك
= احنا زمايل يعم وبعدين مكنتش ضاربة
' أنا عيني وارمة!
= اعتبرها فدا الوطن
جم الليل واتجمعنا كلنا قدام القائد الكبير ، بدأ يشرح ازاي هنستدرجهم من الnight club الي بيقعدوا فيه وإنهم مش كلهم بيبقوا متواجدين بس كل شوية بيروحوا في يوم مختلف .
بدأ يوزع كل فرقة علي مدخل وفرقة للمراقبة وفرقة للاستكشاف = طب وانا يا فندم ؟
رد احمد _ تقيسي الفستان
= افندم؟
_ دورك انك تستدرجيهم!
= أيوة عارفة ، ازاي بقي ؟
_ هو انت يا فندم مقولتلهاش أنها هتبقي زي الي شغالين في الديسكو ولا ايه؟
= نعم؟؟؟؟؟
رواية الكتيبة الفصل الثاني 2 - بقلم مريم سمير
_ دورك انك تستدرجيهم!!
= أيوة عارفة ، ازاي بقي؟
_ هو انت يا فندم مقولتلهاش أنها هتبقي زي الي شغالين في الديسكو ولا ايه؟
= نعم؟؟؟؟
_ هي جاية مش عارفة هتعمل ايه!!
= هو أنا مش المفروض اعمل زيكم؟ امسك سلاح وأهاجم؟
_ أيوة نستدرجهم احنا ولا ايه ؟ تروحي انتي تخلصي عليهم واحنا نستناكي تيجي بالسلامة ؟ تفتكري اننا محتاجين ست عشان تمسك سلاح ؟
= انت بتتكلم معايا كده ليييييه؟
_ انت بتعلي صوتك علي مين؟
الريس زعق ° انتباه انت وهي ، احنا في كارثة!
وقفنا نأدي التحية = عفواً يا فندم بس هو الي..
° خلاص يا مريم ، دلوقتي انتي هتستدرجي اكبر عدد فيهم ل مكان والرجالة بتاعتنا هتكون محوطاه ويهجموا عليهم ويسيبوا واحد بس ياخدوا منه المعلومات اللازمة ودا هيتكرر لحد ما نقضي علي عدد كبير منهم ، فهمتي؟
= اه يعني أنا هبقي زي الي شغالين هناك؟
قال بصوت واطي _ مع اني اشك
= افندم؟؟
_ اصل زي ما انتي شايفة يعني المفروض محتاجين ست ب معني الكلمة ف ربنا يستر
= انت انسان قليل الذوق
_ ايه انسان دي؟ أنا ظابط
° هو انا هفضل اقولكم تتعاونوا مع بعض كام مرة؟ انتوا ولا الأعداء
= هو الي مش قابل فكرة وجودي
_ دا لولا الحوجة
= حوجة؟ يا فندم هقتله!
_ بجد والله؟ ، طب متورينا حاجة كده
° مريم ، احمد كفايهههه
وقفنا واحنا باصين لبعض بعضب ° احمد خدها عشان تجهز نفسها وتعمل بروفة ل بكرة ، سمعت حد فيكم بتخانق مع التاني هضربكم ب النار انتوا سامعين؟
_ تمام يا فندم
خرجنا من اوضة الاجتماع _ تعالي ورايا
مشينا لحد ما وصلت ل أوضة تانية _ ادخلي شوفي هتعملي ايه ، فيه ميكاب جوا بردو غير الفستان
دخلت لقيت فستان محطوط علي سرير ، لونه اسود ، لبسته وحاولت احط ميكب ، هو انا هخرج كده؟ هبقي قدام العدو كدهههه؟؟؟؟
° ايه يصاحبي ، سيبتنا احنا مع القائد يدينا محاضرة عن ازاي نهجم ، محسسني أننا ساقطين
_ طب ما انت فعلا ساقط يا عبده من ايام الكلية!
° اخبار الستر عندك ايه يا دولي؟
' فيه ايه يا عم احمد ، احنا اه كنا مش قد كده في الامتحانات بس العملي كنا..
_ مبلاش انت يا مازن دا احنا مطلعينك من تحت أيدها وعينك لسه زرقا!
طلعت من الأوضة ووقفت قدامه = أنا جاهزة ، المفروض اعمل ايه بعد كده ؟
حط أيده علي وشه _ انتي ايه خرجك ، ايه الي خرجك؟
= ها؟؟؟
_ عندك يا جندي منك ليه ، لو حد جه جمبها هضربه بالرصاص ، علي اوضتكم عشان تناموا
° احمد متهزرش مش ماشيين دلوقتي
_ طب تمشوا احياء ولا تبقوا ضحايا قتل خطأ؟
° لو فدا الحلاوة ف معندناش مشاكل
_ اه منك انت يا الي مفيش منك اتنين
طلع مسدسه وضرب طلقة في الهوا ف كله طلع يجري ، فضلت اضحك ف قرب مني = فيه ايه؟
_ قولتلك قيسي الفستان مش اخرجي ، قايلك مش بيشوفوا ستات
= أيوة يعني المفروض اعمل ايه؟
_ فيه كيلو لبان جايبه ، هتاكلي كل مرة واحدة وتدلعي علي الزباين
= لبان؟ ادلع؟ علي الزباين؟
_ فدا الوطن
= اممممم ، بس انا لما استدرجهم عاوزة ابقي اهجم معاكم
_ اشوف ضفرك حتي جوا ساعتها ، انتي لو جرالك حاجة يا مريم..
= هو انت خايف يجرالي حاجة ؟
_ لاء انتي بالسلامة لو جرالك حاجة الخطة هتبوظ مش هنلحق نجيب غيرك
= انت قليل الذوق بجد ويارب نخلص من المهمة دي عشان مشوفكش تاني
_ يعني نتمني ، اقعدي عشان اشرحلك هتعملي ايه بالظبط
قعدت قدامه _ اتكلمي بقي علي اساس بنت وبتحاولي تجذبي انتباهي
= امممم ، ازيك ؟
_ الحمد لله ، انتي اي الدنيا ؟ انتي هتهزري؟
= هو فيه ايه؟
_ هتجذبي انتباهي ب ازيك؟ المفروض كده خلاص مقاومكيش؟ دا انتي لو سألتيني عامل ايه في الشغل اموت فيكي
= انت دمك تقيل اوي بجد مستحمل نفسك ازاي ؟
_ ايه انت دي؟ أنا ظابط
= الصبر من عندك يارب ، طب قولي المفروض اعمل ايه ؟
_ متفرجتيش علي اي فيلم اجنبي علي طريقة شقط عدو ؟
= بجد والله ؟ لاء متفرجتش معلش فاتتني دي
_ طيب المفروض تبقي رقيقة ، وصوتك دا يبقي رقيق شوية ، لاء صوتك لازم يبقي رقيق اوي
= وانا صوتي ماله ؟
_ انتي مش عارفة ماله؟ دا فيه صوت عساكر أرفع
= انت لو مبطلتش طريقتك معايا هزعلك
_ طب خلينا في المهمة، قولي كده هاي مارك؟
= هاي مارك
_ ايه الي ودني بتسمعه دا؟ احنا ندعي مفيش في أيدينا غير الدعاء ، يارب الستر يارب متفضحناش
بصتله ب غضب وقومت ولفيت المكان ورجعت وقفت قدامه = هاي ، ممكن اقعد؟
_..
قعدت وانا ببصله = ممكن نتعرف؟ نشرب Drink سوا ؟
_..
فضلنا باصيين لبعض ف ضحكت ب انتصار = شوفت؟ ، أنفع أهو
غمض عينه وفتحها بسرعة _ ماشي ، مش بطالة
= يا راجل! دا انت مشلتش عينك من عليا
_ انتي جايبة تون الصوت دا منين؟ ارجعي ل صوتك الحقيقي
= تمام يسطا خلاص أنجزنا الي عاوزينه
_ اه ، المفروض نروح هناك بكرة بليل ، حاولي تحفظي كام جملة كده ومتقلقيش احنا مظبطين مع انجي بتشتغل هناك هتعلمك تتكلمي ازاي بالظبط
= انجي مين؟
_ فدائية
= فدائية شغالة في ديسكو؟
_ متدخلنيش في تفاصيل دلوقتي لو سمحتي ، أنا طالع انام
= استني استني ، أنا المفروض انام فين؟ أنا مليش اوضة!
_ أيوة مش عاملين اوض للبنات
= انت ليك اوضة لوحدك؟
_ اكيد بقولك أنا القائد ، ليا اوضة ب مكيف كمان
= اه
_ الواحد عاوز يستريح ، اسيبك بقي دلوقتي اشوفك الصبح
= اه ، أحمد؟؟؟
_ افندم
= مفتاح اوضتك ، نام انت مع الظباط في الأوض الجماعية
_ انتي بتطلبي المستحيل ، على جثتي ، نجوم السما اقربلك
=..
..
_ بقولك يا عبده لو مبطلتش تتكلم وانت نايم هديك دماغ امددك
° يعني جاي اوضتنا واخد مكان وليك عين تتكلم؟
فتحت اوضته ودخلت قعدت علي السرير ، هعرف اعمل حاجة ؟ احقق إلى جاية عشانه؟ اثبتلهم كلهم إني اعرف اعمل الي بيعملوه؟
نمت وصحيت نزلت الحوش ، لقيت الرجالة بتسخن للتدريبات وهو واقف ماسك ضهره ورقبته
= صباح الخير
بصلي بطرف عينه _ اه ما طبعا خير ، منتي نايمة علي مرتبة فايبر
= ضهرك ماله؟
_ كنت متلقح علي الارض طول الليل ، أنا كنت نسيت النومة دي
= معلش ، اعتبرها فدا الوطن مش كل ما انطق تقولي كده؟
_ روحي افطري وتعاليلي
روحت فطرت بسرعة وعملنا تدريبات ، كلها كانت تجهيز للهجوم ورد الفعل والاشتباك ، وتمثيل اني اعمل ايه بالظبط ، كله بدأ يجهز ، جه وقف جمبي
_ خايفة؟
= أنا ؟ لاء ابداً
_ طب الحمد لله
= أنا مرعوبة
_ طب الحمد لله ، يلا اركبي عشان منتأخرش
= طب ما تحاول تطمني!
_ خلي بالك من الفستان عشان رهن
= أنت بجد مستفز اوي!
_ ايه انت دي؟ أنا ظابط
بدأنا نتحرك من المعسكر ووصلنا المكان الي المفروض هستدرجهم فيه ، بدأ الكل يحاوطه والباقي راح علي مخارج المكان التاني ، دخلت أنا وهو الديسكو وقعدنا علي طربيزة ، جت بنت قعدت معانا
° منورنا يا احمد باشا
_ الله يخليكي يجيجي ، ايه الدنيا وصلوا ولا لسه؟
° علي وصول ، تأمرني ب حاجة؟
_ مريم الي قولتلك عليها ، ظابط معانا وعاوزك تتعاوني معاها
° أهلاً وسهلاً يا حضرت الباشا ، محسوبك جمالات
= أهلا وسهلا ب حضرتك
_ حضرتك؟ طب متنطقيش تاني لحد ما هما يوصلوا
° هخلص الي في ايدي وارجعلك تاني يا احمد بيه
_ اه اكيد طبعاً
قومت من مكاني وقعدت في الكرسي الي جمبه
= هي بتتكلم كده ليه؟
_ اتكلمي زيها ، شوفتي بتتكلم ازاي باللبانة ب احترافية شديدة ؟
= أنا مستحيل اعمل كده
_ طب ومصر؟
= والله ؟ فدا الوطن ؟
_ طب منتي جدعة اهو ، وصلوا
دخل ست رجالة مرة واحدة لابسين نفس اللبس ، قعدوا علي طربيزة قدامنا _ مريم هو انتي بتهببي ايه ؟ انتي باصة في الأرض ليه هو احنا في رؤية شرعية؟
= اعمل ايه طيب؟
نده علي جمالات _ جيجي تعالي ، خديها ويلا
= ها؟؟؟
_ قومي معاها هي هتتصرف
قومت معاها وشدني علي الطربيزة بتاعتهم
° أهلا وسهلاً نورتونا يبشاوات
' هاي يجيجي ، مين الي معاكي دي؟
° دي واحدة جديدة هنا
' دي حلوة اوي ، ايه الجمال دا ، اقعدوا
قعدنا معاهم وطلبوا Drink ، كنت بمثل إني بشرب بس حد الله بيني وبين المنكر
' يلا بينا ؟
بصيت أنا وجيجي لبعض ف اتكلمت هي ° علي فين؟
' السهرة عندنا احنا ، في المعسكر بتاعنا
_ نعم؟؟؟؟؟؟
رواية الكتيبة الفصل الثالث 3 - بقلم مريم سمير
° السهرة عندنا احنا في المعسكر بتاعنا
_ نعم؟؟؟؟؟
° مالك يا حلوة فيه حاجة ؟
_ لاء مفيش ، قصدي يعني.. ليه متجوش انتوا شقتي أنا وجيجي؟ واخدين شقة حلوة وهادية وبعيد عن المعسكرات والكلام دا ، وبعدين بنتين زينا يروحوا معسكر ازاي ؟
° ماشي زي بعضه ، يلا بينا
طلعنا من ال night club وبدأت ضربات قلبي تزيد من الخوف ، يتري كمان خمس دقايق هيحصل ايه؟
وصلنا المكان ، الدنيا كانت ضلمة ف رجعوا خطوتين
° ايه المكان دا؟ شكله غريب اوي
الهجوم اشتغل ، طلقات النار بتعدي فوق راسنا! ، خمسة ماتوا بس شدني واحد منهم وحط سكينة علي رقبتي
° بس بس ، لو حد طلق طلقة واحدة كمان راس الحلوة هتتشال قدامكم
= لاء ارجوك!
_ احمد؟؟؟
= هنلف وسمي الله احنا منقدرش نشوف المنظر دا
_ انت هتهزر يا احمد؟ دا هيقتلنيييي!
= سلم نفسك ، مش هنقتلك زي الباقي بس سيبها
° أنا همشي دلوقتي وبيها ، لو حد جه ورايا أو حسيت ب أي غدر ساعتها انا مش هموت لوحدي
= مش هتعرف تخرج من هنا ، المكان كله محاصر ب قوي عسكرية
° يبقي مستغني عنها ، نزلوا السلاح
قرب السكينة من رقبتي اكتر ° بقولكم نزلوا السلاح
= نزلوا السلاح ، محدش هيجي جمبك بس شيل السكينة دي
بدأ يحركني معاه ل ورا ° محدش يجي ورايا ، ارجع منك ليه
مسكت أيده ولفيتها بسرعة ف وقعت منه السكينة ، فضلت اضربه وبعدها لفيت راسه ف وقع علي الارض
كانوا كلهم باصين ليا وفاتحين بوقهم
_ فيه ايه؟؟
= انتي عملتي كده ازاي ؟
_ ليه هو انا خريجة فنون جميله ؟ منا بعرف أهاجم
الجنود صقفولي ف ضحكت = ايه راحة تاخد جايزة اوسكار ولا ايه؟
قلع الجاكت وادهولي = إلبسي دا ، صحيح هي فين جمالات ؟
بصينا كلنا ورانا ف لقناها مغمي عليها
= جيجي قومي يجيجي
° ايه أنا متت؟ بقيت شهيدة ؟ ياااااارب
= بس يا اوفر ، قومي
ركبنا العربيات ورجعنا المعسكر تاني
_ قتلت الخمسة ؟ مش قولنا هنسيب واحد ناخد منه المعلومات؟
= منتي قاتلة واحد ، مسبتهوش ليه ؟
_ لاء مفيش شكله مكنش عاجبني ، احنا هنهزر؟ دا كان هيقتلني!
= ف..
_ لو قولت فدا الوطن دي تاني هخليك أنت شهيد الوطن وأظن انت شوفت أنا عملت ايه من شويه
= انتي بتهدديني؟
_ عشان انت بجد مستفز وقليل الذوق ومعندكش دم يا احمد ، لما تقوله استني نلف وشنا وأدبح ؟ ليه أضحية؟
= تعالي تعالي ، انتي قولتي كلام تتحاسبي عليه راحة فين ؟
_ عاوز ايه؟
= ايه انت دي؟ مش قولنا تقوليلي يا ظابط؟
_ انت دمك خفيف لوحدك ولا معاك شلة؟ يعني معندكش اي مشكلة في باقي الكلام والي مزعلك اني بقولك أنت ؟
= التلت نجوم الي علي البدلة دي بتاعت شرطة مدرسية ولا ايه مش فاهم؟
_ ماشي يا حضرت الظابط ، بعد كده يا ظابط تبطل استفزاز ، أنا مش هستحمل الشغل معاك كده ، ومتنساش اني اهم واحدة فيكم ، مفتاح الأوضة عشان هلكانة وعاوزة انام ؟
ضحك = أنا مش نايم علي الارض تاني يا مريم ، تولع دي مهمة ويولع المعسكر ب الجنود ، أنا مش نايم غير في اوضتي
_ حلو ، اتفقنا
..
= عبده هو الناموس دا بيتكاثر ؟ امبارح مكنش بالكمية دي
° انت هتفضل تنام معانا لحد أمتي ؟
= يعني يومين تلاتة كده ، يا نخلص المهمة يا اخلص عليها
° بس بجد بنت ب ميت راجل ، ذكية وشجاعة وحلوة
= ما دا الي ظاهرلكم ، أنا باخد كل يوم ربع مشكل ، دا طولها كله في لسانها
° بس والله مش بطالة ، فاكر البنات الي كانوا في المعسكر السنة الي فاتت؟ كلهم مستحملوش يوم ، لكن هي مختلفة
= انت هتفضل تشكر فيها طول الليل ولا ايه يا حبيب اخوك؟
° وانت ايه الي مضايقك؟
= وانا اتضايق ليه ؟ بس عاوز انام ، مفيش تكييف هنا؟
° عيش عيشتنا بقي ، دا يسلم القائد الي جابها عشان تقعد هنا وتحس بينا شوية ، يا ابو مرتبة فايبر
= طب نام بدل ما أديك رصاصتين يمددوك نام
صحيت الصبح فطرت ونزلت الحوش لقيته واقف مع الرجالة تحت = نوم العوافي
_ الله يعافيك ، الدنيا صعبة اوي يا احمد
= اه
_ الواحد حاسس أنه شايل مصر فوق كتافه
= اه
_ يعني أنا مثلا لو جرالي حاجة انتوا هتعملوا ايه ؟
= يوم الهنا
_ بتقول حاجة؟
= انتي نايمة فوق في تكييف واوضة خمس نجوم!
_ لاء بس اوضتك مش قد كده علي فكرة ، فعلاً الواحدة مبترتاحش الا في بيتها
= لاء مهو باين ، يلا عشان نبدأ تدريب
قعدنا ندرب لحد ما الشمس راحت ، قعدت علي شط البحر الي قدام المعسكر لحد ما يخلصوا
خلصنا وروحنا ال club وقعدت مع جيجي
= بقيتي عاملة ايه دلوقتي ؟
° والله يباشا شغلكم صعب أنا سمعت ضرب النار من هنا محستش ب نفسي
= معلش هانت ، انتي بتعملي حاجة عظيمة يجيجي
° الله يخليك يا باشا ، أنا كلي فدا البلد
= هو دا العشم ، ربنا يديكي علي قد نيتك
° ف لو مكافأة بعد ما نخلص العملية هكون ممنونة ليكم
= ربنا ينتقم منك
ضحكت _ قولتلي فدائية ؟
= يعني مش أوي ، عنينا ليكي يا جمالات بس نخلص
جه شوية وقعدوا علي طربيزات في المكان
_ بصي يا جيجي أنا شايفة أننا منروحش علي طول ، احنا نعزز نفسنا شوية
° معاكي حق ، قلبي يا مارك عامل ايه؟
شددني من ايدي وقعدنا علي الطربيزة معاهم
' دي جديدة هنا ولا ايه؟
° اه يباشا
' حلو اوي ، عاوز السهرة تبقي فردية النهارده يرجالة معلش
° ها؟ جري أيه يا باشا من أمتي يعني ؟
' من دلوقتي ، يلا؟
_ يلا ايه !!!!!
همست في ودنها _ اتصرفي ، أنا مش قايمة معاه ، هكسر عليكم المكان لو مشيت من هنا
° متكمل سهرتك معانا يباشا ونمشي كلنا
' أنا قولت الي عندي ، يلا؟
مسك أيدي ف برقت ، بصيت علي احمد الي كان بيعمر مسدسه ، جيجي صوتت ف كله بصلها
° يلا احتفال يلا هيصوا !!!!!
= سيبها يا عماد
° وانت مالك يا أحمد ؟ أنا قايل اني خلاص ماشي بيها
= وانا بقولك سيبها هي شكلها مش موافقة
° وانت المحامي عنها ؟
= وانت مش هتاخدها غصب عنها ، وبلاش أنا عشان انت عارفني كويس ، سيب أيدها
كانوا باصين لبعض بغضب * خلاص انت وهو ، عماد انت عارف إن احمد الي في دماغه بيمشيه ف خلاص
قعدت جمب جيجي تاني بس كانت عيني عليه ، واحد طيب من جيش العدو!!!!!! ، راح قعد لوحده علي البار ف قومت وقفت قدامه _ أنا متشكرة اوي
= العفو
_ تضايق لو قعدت معاك ؟
= لاء ابدا ، اتفضلي
_ مريم ، وانت؟
= احمد ، تشربي حاجة ؟
_..
= أنا هشرب لمون ، اطلبلك زيي ولا عاوزة حاجة تانية؟
_ لمون! غريبة
= مبشربش كحوليات
_ طيب ماشي هشرب لمون زيك
طلبلنا اتنين لمون = وانتي منين بقي؟
_ أصلي من القاهرة
= زيي ، بلدياتي يعني
_ انت مصري!!!
= أيوة ، مالك؟
_ يعني انت مش منهم؟
رفع حاجبه = من مين؟
_ قصدي انك مش تبع الي قاعد معاهم؟ من المعسكر الي بيجوا منه؟
= أيوة ، بتسألي ليه فيه حاجة ؟
_ لاء مفيش ، بسأل عادي
= وانتي بقالك قد ايه بتيجي هنا؟
_ من فترة قصيرة
= وايه جابك؟ شكلك مش مبسوطة أو مجبورة
_ ساعات الواحد بيعمل حاجات كتير غصب عنه
ابتسملي = معاكي حق
مش عارفة ليه مكنتش عاوزة الوقت يعدي ، مش عاوزة ناخده مع الي قاعدين ويبقي مصيره زي الي فاتوا ، ليه حاسة اني مش عاوزة اعمل كده؟ هو فيه حد من جيش العدو يبقي طيب؟
تليفون جاله ورد عليه = أيوة أيوة ، جايين حالا تمام
قفل الفون وبصلي = أنا لازم امشي دلوقتي ، فرصة سعيدة جدا يا مريم
_ شكراً مرة تانية علي الي عملته معايا
= متقلقيش أنا لما اجي هنا محدش هيعرف يعملك حاجة ، لو مش موجود ابقي قولي انك تبعي ، هشوفك تاني ؟
هزيت راسي ب اه ، مشي هو والي كانوا معاه ، احمد جه وقعد جمبي = طب ايه الأجهزة الكهربية علي مين؟
_ نعم؟؟؟
= انتي ناسية أننا في مهمة؟ المفروض اننا كنا نخلص عليهم النهارده ، المفروض انك كنتي تقوليله أنه يقنع الباقي يجي المكان الي اتفقنا عليه قبل ما يجيله تليفون وياخدهم ويمشي!
_ مينفعش نأذيه
= أفندم ؟
_ دا مصري مش زيهم
= كمان مصري؟ وانتي متعرفيش أنه لو مصري وفي جيش العدو يبقي اسمه عميل وخاين؟
_ بس انا حاسة أنه..
= حاسة؟؟ ، حاسة ايه يا مريم ، احنا في كارثة ولو حد حس فيهم ب حاجة مش هيسموا علينا وانتي تقولي حاسة؟ جاي بكرة؟
_ تقريباً
= طيب ، بكرة ننفذ ، قومي عشان نمشي
قومنا وركبنا العربيات ، فضلت افكر فيه طول الطريق ، مكنش وشه وش واحد وحش ، كل الي كان معاهم وشهم تخافي منهم ، هو الوحيد الي مش كده !
وصلنا المعسكر ووقفني صوته = مريم ؟
_ نعم
= المفتاح
_ كده من غير مناهدة؟ متشكرين يا سيدي
= استني ، هو.. يعني..
_ فيه ايه ؟
= هو الي كنتي قاعدة معاه دا اتكلموا في ايه ؟
_ مفيش ، اتعرفنا بس ، اسمه احمد بردو علي فكرة ، بس سبحان الله مختلف نهائي عنك
= ازاي؟
_ عنده ذوق وجنتل مان اوي ، انت مشوفتش لما اتخانق في الي معاه عشاني؟
= وانتي مشوفتيش وانا بطلع السلاح ؟
_ بقولك جنتل مان
= وانا ظابط
ضحكت _ فيه ايه يا احمد مالك؟
= لاء مفيش ، تصبحي علي خير
طلعت الأوضة وفضلت راحة جاية فيها ، فيه طريقة عشان اتكلم معاه بيها؟ اغير دماغه؟ اخليه يقتنع أنه مصري ف مصلحته يبقي في جيش بلده مش جيشهم هما ؟ ، ينفع منموتوش؟
صحيت الصبح ونزلت الحوش ، قعدت علي الاستراحة
= فيه ايه؟
_ مفيش ، مش قادرة علي التدريب بس النهارده
= صحيح انتي مبتاكليش لبان ليه في المهمة ؟ مش قولتلك اتعلمي من جيجي ؟
ضحكت _ انت صاحي فايق شكلك ، بقولك يا احمد ؟
= قولي
_ مش احنا المفروض نسيب واحد فيهم عشان ناخد منه معلومات؟
= اه المفروض
_ ممكن نسيب احمد؟ يعني نقتل الي من جيش العدو وهو..
= هو كمان من جيش العدو!!
_ أيوة بس هيفيدنا اكتر من اي حد فيهم
= بس كده دا احنا عنينا
_ بجد يا احمد ؟ يعني هتسيبه؟
= هسمي بيه إن شاء الله ، اخفي من قدامي
_ أنا بحاول ألاقي حلول
= انتي طلعتي طيبة اوي بتصدقي أي كلمتين كويسين من حد
_ أنا عمري ما كنت بصدق أي حد ، بس صدقني هو مش زيهم
= وانا الي يهمني الظاهر قدامي وهو عميل ووسطهم وانا هعمل شغلي يا مريم
سابني وراح يتدرب معاهم ، خلصنا وروحنا ال club وقعدت علي طربيزة مع جيجي واحمد
_ جم ولا لسه؟
° لاء لسه ، صحيح ايه أجل المهمة بتاعت امبارح؟
_ منتي شوفتي جالهم تليفون ومشيوا علي طول
° بس انا كنت عارفة أنه احمد مش هيسيب واحد فيهم يخليكي تعملي حاجة غصب عنك
_ انتي عرفاه؟
° اه ، جدع ابن حلال وبيجي هنا من وقت للتاني ، خسارة أنه معاهم والله
_ فعلاً يا خسارة
= نعم يحبيبت قلبي بتقولي حاجة ؟
_ لاء مفيش
جم وقعدوا وهو جه وقف قدام طربيزتي
' ازيك عاملة ايه؟
_ الحمد لله كويسة
' تسمحي؟
_ اه اكيد
قومت معاه وقعدنا لوحدنا _ اممم مشيت ليه مرة واحدة امبارح؟
' كان فيه اجتماع مهم اوي في المعسكر ف لازم كنا نمشي
_ هو انت دخلت أصلا المعسكر دا إزاي ؟
' مش قولتي امبارح ان ساعات الواحد بيعمل حاجات كتير غصب عنه ؟
_ بجد؟ يعني دا غصب عنك؟
' مالك مبسوطة ليه؟
_ لاء مفيش
' هقوم اطلبلنا حاجة نشربها
قام ف احمد قرب من طربيزتي = وحيات امي ما هسيبك ، اتجدعني
ضحكت وبصتله = يلا عشان المفروض هنفذ دلوقتي
' العصير يا مريم
_ امممم ، تيجي نروح مكان تاني نكمل السهرة بتاعتنا؟
' لو مش مرتاحة هنا ف تمام نروح أي مكان عادي
قامت جيجي ووقفت قدامنا ° لاء دا السهرة للرجالة كلها في شقتنا بقي يا مريم
_ ها ؟ اه طبعاً
قاموا كلهم ومشينا ، قربنا من المكان ف وقفت فجأة
' مالك؟
_ أحمد أنا..
' فيه ايه يا مريم؟
صوت الرصاص بدأ!!! _ انت لازم تمشي حالا
' ايه؟؟؟
رواية الكتيبة الفصل الرابع 4 - بقلم مريم سمير
صوت الرصاص بدأ!!! _ انت لازم تمشي حالا
° ايه؟؟؟
نزلنا تحت طربيزة ° فيه ايه؟ ايه الي بيحصل؟
_..
طلع مسدسه ف خدته منه بسرعة _ مش هينفع يا احمد
° دول بلطجية وبيتقتلوا الي معايا! هاتي الي في ايدك
_ مش بلطجية ، أنا.. من الجيش المصري ، واحنا دلوقتي في مهمة عسكرية
° انتي بتقولي ايه!!!
صوت ضرب الرصاص وقف وأحمد نزل بص علينا تحت الطربيزة
= طب ايه ؟ اتنين لمون؟
_ لاء شربنا من شوية
= انتي هتهزري معايا؟ اطلعي
طلعنا من تحت الطربيزة ° انتوا عاوزين ايه ؟
احمد كان موجه المسدس عليه = احنا هناخدك معانا دلوقتي ، لو مجاوبتش أي سؤال هيتسألك هتبقي زي الي علي الارض ، وضحت ؟
° أنا مش هروح في مكان
= أنا مش بخيرك ، انت هتيجي معانا وهناخد منك المعلومات الي عاوزينها ، اهو تبقي عملت حاجة صح في حياتك ، مش هتبقي خاين وعميل وكمان متفيدناش، قدامي
° مش هينفع أمشي ، أنا لو جيت معاكم ورجعت تاني هيشكوا فيا اني ورا كل دا!
= لاء مهو متخافش مش هترجع تاني
كان واقف متخشب مكانه ف وقفت قدامه
_ أحمد ، ممكن تيجي معانا؟
= نسيتي تقوليله عشان خاطري ؟
_ استني انت يا حضرت الظابط ، احمد انت ممكن تتغير وتساعدنا واحنا هنحميك محدش هيعملك حاجة
° انتي بالذات متتكلميش معايا
شده = قولتلك قدامي
ركبنا العربيات ووصلنا المعسكر وروحنا مكتب القائد ، خبطنا ودخلنا = جبتلك واحد يا فندم ، هو مصري بس عميل ، هناخد منه المعلومات
' ايه دا أحمد عصام انت شرفت ؟ عامل ايه ؟
بصيت أنا وأحمد لبعض بعد ما القائد حضنه!!!!
' ها فين العميل يا احمد ؟
= ما قدامك اهو يا فندم!!!
' هو انتوا الي جايبنه مش هو الي جاي لوحده ؟؟؟؟ ، حد شافكم وانتوا جايبينه هنا ؟
= لاء ، خلصنا علي كل الي كانوا معاه وجبنا دا بس معانا ، خير يا فندم انت تعرفه ؟
' دا ظابط سري ومحطوط في جيش العدو
° مش كنت تقولهم بدل المرمطة الي انا فيها دي!!
' معلش يا احمد منتا عارف إن مينفعش حد يعرف عشان اسرار الشغل ، طالما محدش شافك وانت جاي يبقي حصل خير ، وكويس ان محصلكش حاجة ، اقعد بقي قولي الجديد في المعسكر بتاعهم ، احمد مريم امشوا دلوقتي
طلعت أنا وأحمد ووقفنا برا المكتب
= انتي مبسوطة اوي ليه ؟ خدنا الكاس ولا ايه؟
_ عشان قولتلك اني حاسه أنه مش وحش ، اهو طلع ظابط وبيعمل حاجة مهمة اوي للبلد ، مزروع وسطهم ومش خايف وعارف إن الموت والغدر ممكن يجوله في أي لحظة
= وانا هيجيلي شهادة تكريم ؟ طب منا بخرج مش عارف راجع ولا لاء
_ فيه ايه يا احمد ؟
= مفيش ، جهزي نفسك عشان مهمة بكرة
_ هي المهمة دي هتخلص امتي؟
= علي حسب القائد أو لو عشنا
_ هو انت مضايق من حاجة ؟
= لاء ابدا ، بس انتي الي مبسوطة زيادة عن اللزوم
_ كسبنا راجل جدع هيساعدنا في المهمة فيه ايه
= طب اطلعي الأوضة واتمسي وقولي يا مسا
_ ممكن اطلب منك طلب؟
= اطلبي
_ ممكن اقعد شوية علي شط البحر الي برا ؟
= نعم؟ دا مستحيل ، محدش بيخرج من هنا
_ بس انا عاوزة اشم شوية هوا
= علي جثتي بقولك
_ الموج النهارده حلو اوي ، الجو تحفه
= الجو تلج !!!!
سكت شوية وبصتله _ تفتكر هننجح يا احمد؟
= خايفة؟
_ يعني ، شوية ، مخوفتش من وقت ما بابا وماما ماتوا ، بس انا لو منجحتش العيلة كلها هتقولي اني كنت بجري ورا وهم ، واني مكنش ينفع أخالف تقاليدهم وإن مفيش بنت في العيلة تقدر تفكر تعمل الي عملته ، بس انا عملت كده عشان كنت خايفة اموت وانا محستش اني عايشة
= انتي مفيش منك يا مريم
_ نعم؟؟؟
= يمكن أنا كنت معاكي قليل الذوق شوية
بصتله ب طرف عيني = ماشي قليل الذوق اوي ، بس انا مبعرفش اتعامل ولا اتكلم ، ابويا كان ظابط ف رباني ميري ، من صغري وانا شايل المسؤولية ، معرفش غير شغلي وبس ، بس من اول مرة كنت عاوز اقولك انك فعلاً مختلفة ، متخافيش أنا مش هسمح لأي حاجة تحصلك
_ شكراً يا احمد ، مكنتش اعرف انك بتحس
= نعم؟
_ قصدي مكنتش اعرف إن عندك دم
= أفندم ؟
_ طلع عكس الي كنت مفكراه يعني
= انتي بردانة؟
_ شوية اه
= طب تعالي ندخل
_ وتزعل اوي لما اقولك انك مش جنتل مان!
= اه انتي فاكرة اني هقلعلك الجاكت وادهولك؟ متسرحيش ب خيالك كتير
_ متأكد ؟
= دا جاكت من زارا ، دا علي جثتي
دخلنا المعسكر وبصتله _ شكراً علي الجاكت
= خليه معاكي
_ هيجيلك برد!!
= أنا ؟ أنا مناعتي كويسة ، مريم أنا ظابط
_ أيوة مبيجلكش برد يعني ولا ايه؟
أحمد جه ووقف قدامنا ف ابتسمت _ يعني أظن أنك لازم تسامحني ومتزعلش مني
° القائد فهمني كل حاجة ، لاء ما شاء الله تمثيلك مقنع
_ البركة في جيجي ، بقي نقطة ضعفي اللبانة
ضحك ° أنا لازم امشي دلوقتي
= ياريت
بصينا احنا الاتنين ل احمد = قصدي ياريت عشان ميشكوش فينا ونلاقيهم هنا يعني
° هشوفك بكرة مش كده؟
_ اه أكيد إن شاء الله ، خلي بالك من نفسك
° وانتي كمان ، فرصة سعيدة يا احمد
= اه الله يخليك
مشي ف رجعت بصيت ل احمد _ باين اوي أنك مش طايقه!
= ايه خلي بالك من نفسك دي؟ دا انتي عمرك مقولتهالي ، تقولهاله وانتي لسه عرفاه من يومين؟
_ طب أنا هطلع انام دلوقتي
طلعت بسرعة عشان لو كنت وقفت دقيقة كمان كان كسر عليا المعسكر ، هو عصبي لييييه؟
روحنا بليل الclub وقعدت في الطربيزة مع جيجي
° خلصتوا عليهم امبارح؟
_ أيوة
° بس انا شوفت احمد من شوية!
_ أيوة ما احنا سبناه ، هبقي افهمك بعدين لما نخلص ، جاي النهاردة عدد ولا ايه ؟
° أه سمعت انهم عاملين سهرة
بعد ربع ساعة بدأوا يجوا ، كان احمد عصام قاعد معاهم ، روحت أنا وجيجي وقعدنا معاهم ، كانوا بيتكلموا عن اختفاء كتير منهم من المعسكر
' مش غريبة كل الي معاك امبارح يا احمد يختفوا وانت الوحيد الي تيجي؟
° ما قولتلك أني سبتهم وروحت بعدها مشوار ومعرفش حاجة عنهم بعد كده
' وانتي يا جيجي متعرفيش؟
* ابدا يا باشا ، هما اه طلعوا معانا امبارح بس خلصنا سهرتنا وكل واحد راح ل حاله وكانوا مستعجلين
' عموماً كل حاجة هتبان مع الوقت ، الي بيحصل مش طبيعي
* جري أيه يباشا هو انتوا جايين تفكوا ولا تنكدوا علي نفسكم ؟ دا السهرة عندي النهارده أنا ومريم
' الي معاكي دي مريم؟
* أيوة ، جديدة معايا هنا
' لاء ذوقك بقي حلو اوي
* طب ايه احمد باشا مش تقول ل زمايلك علي السهرة؟
° هنمشي دلوقتي عشان مينفعش نسهر عن كده يرجالة ، معانا ساعتين بس ونرجع المعسكر تاني
قومنا كلنا وروحنا المكان الي متفقين عليه ، بدأنا تشابك كان عددهم كبير ف دي اصعب مرة في الهجوم ، احمد عصام كان بيهاجم معانا ، بس احمد التاني كان متشابك مع واحد بالضرب
_ أحمد حاسب
زقيت احمد وقتلت الي كان وراه من ضهره
_ احمد انت كويس؟
= انتي جبتي السلاح منين؟
_ انت ليه ناسي اني ظابط زيك؟
ابتسملي = شكراً يا مريم
خلصنا عليهم كلهم = اخفوا الجثث زي كل مرة عشان نمشي يا رجالة
خلصنا الشغل وركبنا العربيات ، في طريقنا وقفنا صوت بنت بتستغيث وتصوت في منطقة ضلمة ، وقفنا العربيات ونزلنا ، لقينا واحد بيحاول يعترض طريق بنت ، احمد عصام راح ضربة ف بقي علي الارض
° انتي كويسة؟
' أنا.. أنا..
° أهدي طيب ، مفيش حاجة هتحصلك متخافيش
' شكراً يباشا أنا مش عارفة اقولك ايه
همس احمد وهو جمبي = شوفتي؟ بتقوله يا باشا ، وانتي عمرك ما جبرتي ب خاطري حتي وقولتيلي يا ظابط ب نٍفس! بدلة عسكرية دي ولا يونيفورم تالتة إعدادي ؟
_ ما تكن في جمب بقي هو دا وقته!
° انتي راحة فين طيب عشان أوصلك؟
' لاء ملوش داعي اتعب حضرتك
= مريم دي بتقوله حضرتك! ايه حضرتك دي؟ وايه الادب دا؟
_ الصبر يارب ، اكيد مش هتقوله يا زميلي يعني!
= ثواني ، بس انتي بتقولهالي!
° مينفعش اسيبك تمشي لوحدك في ساعة زي دي ، أنا هوصلك ، بقولكم يا رجالة إمشوا انتوا شوية وهحصلكم
' أيوة يا حبيب اخوك الله يسهله
" والعة يا عم محدش قدك يا عريس
* باصي صاحبتها يحييب قلبي متبقالش كده
° حسابي معاكم لما أرجع حاضر
وقفت قدامها _ انتي كويسة؟
' الحمد لله كويسة ، ليلي
_ وانا مريم ، اتطمني انتي في ايد أمنية ، خلي بالك منها يا احمد
مشيوا وفضلت باصة عليهم ، جه احمد وقف جمبي
= اعذريني يوم زفافك مقدرتش افرح زيهم
_ انت دمك واقف يا احمد متستخفش دمك تاني أرجوك ، احمد جنتل موت بجد ما شاء الله عليه
= طب عدي يومك ، عدي يومك
روحنا المعسكر واستنينا احمد يجي ، جه ووقف قدامنا
° عندي حتة خبر
= ايه هو؟
° أقنعت ليلي تشتغل معانا وتساعد مريم وجيجي في المهمة
= مبروك عليك يا حبيبي
° ايه يا احمد دا شغل!
= اه مهي بتبدأ ب شغل اسمع مني
رفعت حاجبي وبصتله _ قصدك ايه؟
= لاء مفيش ، قول طيب للقائد إن ليلي هتبقي معانا
احمد عصام راح ل العنوان الي ليلي ادتهوله وخدها عرفها علي المكان الي المفروض نستدرج فيه العدو وفهمها علي كل حاجة ، رجع هو معسكر العدو ورجعت هي بيتها عشان تجهز ، خرجنا من المعسكر وروحنا ال club ولقينا احمد مستنينا هناك ، قعدنا علي طربيزة انا وجيجي وأحمد جه وقف قدام ليلي
° انتي شكلك..
' مش قولتلي ألبس فستان وأحط ميكب؟ ، أنا عكيت الدنيا ولا ايه؟
° لاء شكلك حلو اوي
' شكراً
= احمممم لو مش هقطع الحوار الجميل دا ، احنا في مهمة عسكرية وقربنا نتقفش ف زق معايا الدنيا
° اه اه ، مريم خدي ليلي تقعد معاكم ، هقعد أنا علي طربيزة استناهم لما يجوا
_ جيجي دي ليلي ، هتشتغل معانا من النهاردة
° أهلا وسهلاً ، أيوة كده الستات الحلوة بتجيب من الآخر
بدءوا يجوا ، كانوا المرادي شكلهم متعصبين اوي ، مبطلوش كلام عن الي بيحصل في معسكرهم وأنها اكيد مآمرة
' أنا هقوم اجيب حاجة أشربها
_ ماشي بس متتأخريش يا ليلي عشان لو قعدنا معاهم دلوقتي
رجعت بصيت ل جيجي _ شكلنا مش هنعرف النهارده
° لاء هو شكلنا مش هنعرف نعمل كده تاني!
طب أنا هطلع اقول ل احمد دلوقتي ولو كده نمشي ، تعالي معايا
قومت أنا وجيجي بس لقينا اتنين وقفوا في طريقنا
' علي فين ؟ مفيش سهرة النهارده ولا ايه؟
° ها؟ ، لاء اصل..
' مش هتخرجوا من هنا يحلوة منك ليها
° ليه يباشا؟
' انتوا الاتنين الحاجة المشتركة في كل مرة بيمشوا معاكم من هنا يبقي انتوا طرف الخيط الي هيوصلنا للحقيقة
° يباشا انت فاهم غلط احنا منعرفش هما فين ولا بيروحوا فين
اتنين طلعوا مسدس حطوا لمسدس علي دماغنا
' يبقي المواجهة الي هتعرفنا الحقيقة
طلعوا بينا علي برا ' لو خايفين عليهم اطلعوا ، بدل ما تخدوهم جثث ، أنا هعد ل عشرة ، لو محدش طلع يبقي انتوا الي جنيتوا عليهم
' واحد..
بدأنا واحنا الاتنين بنبلع ريقنا ب العافية
' تسعة
احمد وأحمد طلعوا ° سيبهم يمشوا ، حسابكم معانا احنا هما ملهومش ذنب
' أهلا أهلا ، احمد عصام؟ طلعت معاهم؟ ، دي كده كملت ، كنت دايما حاسس انك خاين وجاسوس
= نزل السلاح من عليهم ، لو حصلهم حاجة صدقني ه..
' كمان هتهدد؟ انت مفيش في ايدك أي حاجة تعملها ، أنا هنا الي اقول المفروض يحصل ايه
° انت عاوز ايه يا سالم؟
' محدش هيطلع فيكم عايش بس هنأخرها شوية ، احنا مش عاوزكم انتوا الاربعة بس ، أنا عاوزكم كلكم
= محدش اشترك فيها غيري أنا وهو
قرب السلاح مني ' بقولك عاوزكم كلكم مش انتوا الاتنين بس ، يا تقولولهم يجوا ، يا هفرغ المسدس في دماغهم ، اختاروا
_ احمد ، اوعي تعمل كده ، مينفعش نضحي بيهم
= ولا انا هعرف أضحي بيكي ، أنا هجيبهم ومن غير سلاح ، بس الاتنين يمشوا من هنا فوراً
' لما يجوا نبقي نشوف
فجأة سمعنا صوت قوي جاي ' حلو القوي بتاعتنا وصلت ، اصل نسيت اقولكم أنها هتبقي مدبحة النهارده
رواية الكتيبة الفصل الخامس 5 - بقلم مريم سمير
_ احمد ، لاء متعملش كده ، مينفعش نضحي بيهم
= ولا انا هعرف أضحي بيكي ، أنا هجيبهم ومن غير سلاح ، بس الاتنين يمشوا من هنا فوراً
' لما يجوا نبقي نشوف
فجأة سمعنا صوت عساكر جايين ' حلو القوي بتاعتنا وصلت ، اصل نسيت اقولكم أنها هتبقي مدبحة النهارده
صوت جزم رجالة كتير بتقرب ، يمكن بيقرب معاها الموت؟
اول رصاصة صابت الي ماسك جيجي! ، بصينا لقيناهم العساكر بتوعنا! ، المكان فجأة اتحول ل ساحة حرب والفرق اني كنت لسه معاهم ، ممسوكة من واحد من العدو مش عاوز يفلتني ،
الحركة بدأت تزيد وعساكر العدو وصلوا ، صوت رصاص اكتر ، خوف اكتر ، بس الضحايا منهم هما ، غمضت عيني وانا بدعي كل دا يخلص بسرعة ، حاولت أفك نفسي من الي ماسكني بس قبضته كانت اقوي مني .
بعد نص ساعة من الحرب المستمرة مفضلش منهم غير اتنين ، واحد وقف حاطط مسدسه علي دماغي والتاني مقيدني ، وقفوا في وسط المكان
' اظن كده اللعبة دي لازم تنتهي ، رصاصة واحدة كمان وهنبقي احنا التلاتة ميتين ، ف ياريت تعقلوا وتوقفوا ضرب نار
احمد طلع وهو معاه مسدسه وموجهه عليهم
= المكان كله محاصر مش هتعرفوا تخرجوا من هنا
' كان ممكن لو هي مش معانا ، بس طول ما هي معانا ف هي تذكرة خروجنا من هنا
= سيبها وأوعدك محدش هيعترض طريقك ولا هيجي جمبك ، أنا قائد الكتيبة وكلهم بياخدوا أوامر مني ، سيبها وكلمة مني محدش هيقربلك
ضحك ' شوفوا انتوا كام واحنا اتنين بس احنا الاقوي ، الظاهر إن الأمورة غالية عليك أوي
= لو حصلها حاجة هخليك تتمني الموت
عَمر مسدسه وحطه علي دماغي تاني ' انا شايف أننا نتفاهم احسن من جو التهديدات دا
=..
' أنا وهو هنمشي بيها حالا ، حسينا إن حد ورانا مش هسمي عليها ساعتها ، اتفقنا؟
= مش هتمشي معاكم ولا هتاخدوها من هنا
' انت ملكش أي خيار عشان تقعد تحط شروط ، يا إما هضرب كل الرصاص الي معانا فيكم وبعد كده هسيبها أهو يكون عددكم خف شوية
_ أحمد سيبني امشي معاهم ، العساكر ملهومش ذنب يحصلهم حاجة
= مش هعرف اسيبك تمشي
_ أنا هبقي كويسة ، مفيش حاجة هتحصل بس ارجوكٍ متخليش الحرب دي تقوم تاني
كان بيبصلي ، عيونه بتدمع كأنه بيودعني
' حلو ، طلعتي ذكية ومش هتتعبينا ، يلا معايا
بدأنا نتحرك وأحمد أدي امر إن محدش يتحرك من العساكر ، صوت العربيات بدأ يختفي ويختفي معاها كل المشاهد الي فاتت ، مشينا في طريق ضلمة ، كنت بعيط ومش عارفة اعمل ايه ، افتكرت كلام بابا ليا اني هبقي اقوي ست في الدنيا بس انا حاولت! يمكن عيلتي كان عندها حق؟
' خلاص هو احنا الطريق كله هيبقي عياط ؟
بصيتله ب غضب _ العياط الي بجد أنهم خلصوا عليكم وانتوا خايفين وبتهربوا زي الفيران ، انتوا الي خايفين مش انا
' اوصل المعسكر وأقطعلك لسانك الطويل دا
_ هيجي ألف حد غيري عشان يخلصوا البلد منكم
ضحك ' ملوا دماغكم ب شوية شعارات عن البلد والتضحية ، يعني أنا لو قتلتك دلوقتي هتستفادي ايه ؟ بيعملوا كده عشان انتوا الي تضحوا وتموتوا وسيرتكم تروح مع الزمن وهما يفضلوا فوق لا حاسين بيكم ولا حتي بيسألوا ايه الي حصل ، الجنازات بيمشي فيها آلاف بس بعد اسبوع بتتنسي ولا كأنك قدمتي روحك عشان قال ايه؟ البلد والوطن والكلام الفارغ الي مبيأكلش عيش ، هتروحي فشوش عشان مشيتي ورا شعارات فارغة اتقالت قدامك انتي وكل الي معاكي في الجيش
_ الشعارات الفارغة دي انتوا الي بتسمعوها مش احنا ، احنا صحاب الحق وصحاب البلد ، انتوا الي جايين تنهبوا فيها زي الحرامي بيكون فاكر أنه بياخد كل حاجة بس في نفس الوقت مرعوب حد يمسكه أو يشوفه ، كل حاجة بتعملوها في الدري لا عمرنا شوفناكم في النور ولا عمركم كنتوا صحاب قضية ، مصير البلد تنضف منكم وكل الي ماتوا شهدا أنا وأنت عارفين مصيرهم ايه دلوقتي ، لكن الدور والباقي عليك انت والي زيك ، الي بترعب لو جاله دور برد وبيفتكر أخرته السودا
مسكني من شعري ' شكلك مش هتكملي معايا حتي المعسكر ، لو نطقتي كلمة كمان هخليكي تندمي علي كل حرف قولتيه انتي سامعة؟
زعقت _ أنا مش خايفة منك أعمل الي تعمله
وقف وبصلي ° ايه يا عم هتعمل ايه؟ انت اتجننت؟ دي لو جرالها حاجة مش هنلحق نوصل
' وهي جابت أخرها معايا
° سالم انت عاوز تقتلها ف نموت معاها ؟ اعقل وأمسك العقل ، مينفعش يحصلها حاجة
وجه المسدس عليا ' مش هتكمل الطريق معانا
الي كان ماسكني وجه المسدس عليه ° لو حصلها حاجة هخليك تحصلها
' انت بتعمل ايه! ، نزل السلاح دا
° لما تنزل سلاحك الاول ، احنا عاوزين نوصل معسكرنا واعمل فيها الي يريحك بعدها ، لكن دلوقتي ؟ مش هسمحلك تعملها حاجة
كانوا موجهين المسدس علي بعض وعنيهم مليانة شر ، اتطلق رصاصة في الي ماسكني ف صوتت! ، الطلقة مش جاية من مسدس سالم ، جاية من مسدس أحمد الي كان ورانا!
سالم ضرب ب مسدسه علي احمد ، احمد عصام ضربه ب النار ف الاتنين وقعوا علي الارض! ، جريت علي احمد
_ أحمد ؟ أحمد انت سامعني رد عليا؟
= انتي كويسة ، عملك حاجة ؟
_ أنا كويسة ، مش هيحصلك حاجة ، اطلب الإسعاف يا احمد بسرعة بالله عليك
= مش هيلحقوا
_ لاء يا احمد مش هتموت ، فتح عينك
في المستشفى كل الاستف كان بيحاول ، الرصاصة في مكان خطر ونزف دم كتير ، بسببي؟
بعد اربع في المستشفى بين نقل دم وادوية وإنعاش! ، حالته اخيرا استقرت
_ يعني ممكن ادخله دلوقتي يا دكتور؟
' ممكن
دخلت الاوضة وشديت كرسي وقعدت قدامه
_ حمدالله على السلامه يا احمد
= الله يسلمك ، بقالي كتير هنا؟
_ يعني ، اربع ايام
= حصل فيهم ايه؟
_ اترقيت ، القائد مبسوط منك اوي
= العساكر عرفوا منين أننا بنواجههم وسابوا مكان التجميع؟
_ ليلي لما شافتني أنا وجيجي العدو بيعترض طريقنا علي الباب خرجت من الباب الخلفي وراحت بلغتهم في المكان
= الحمد لله إن الكابوس دا خلص ، احمد عصام فين؟
_ برا ، اترقي معاك
= ابقي فكريني أشكره
_ أنا الي محتاجة اشكرك يا احمد
= لو كان حصلك حاجة مكنتش هسامح نفسي
ابتسمتله _ أنا مش عارفة اقولك ايه
= لاء اعرفي ، لاء اسمع معلش ، تقولي فيا قصايد ومدح لحد ما ازهق ، أنا واخد رصاصة تمدد جمل
_ ها؟
= وبعد كل كلمة تقوليها تقولي يا ظابط عشان أنا عامل شوية أكشن محصلوش ولا أحمد عز في مجده
_ يعني بردو ؟ يعني مصمم؟
طلعنا من المستشفى بعد ما بقي كويس ، رجعنا للشغل وكملنا شغل مع بعض ، كويس أننا عارفين بعض عشان كنا بنريح بعض في الشغل جدا وكنا متفاهمين اوي
_ يعني دي قضيه لو واحد في أولي كلية تدبير منزلي كان حلها
= طب انتي بتتكلمي كده ليه؟
_ بقولك الحرامي هرب يا احمد!
= هجيبه والله ، صاحب صاحبي اصلا الي بقعد معاه علي القهوة بليل
_ نعم؟ انت مصاحب ناس مصاحبة حرامية؟
= والله هما حرين ، وبعدين متقوليش حرامية انتي مش عارفة ظروفه ايه
_ يعني ارقع بالصوت يجدعان!
مكنش صعب أحب واحد زي احمد ، كنت فاكرة إن عمري ما هحب بس جالي صفقة راجل وسيم ودمه خفيف و خد رصاصة عشاني اقول لاء يا اخواتي؟ والله ميصحش
= إرحم يا حبيب اخوك ، انت فاتح بيوت شركة الاتصالات يا احمد يا عصام
_ ليلي صح؟ ، بنت حلال وطيبة والله ، ربنا يتمملك علي خير
° لاء يجماعة انتوا فاهمين غلط ، ليلي مجرد..
= مجرد؟ يعني كل دا ومجرد؟ امال لو بقت بقي يصاحبي هتعمل فينا ايه؟
_ طب ما تتعلم منه! ، دا ج..
= لو قولتي جنتل مان هكسر عليكي القسم ، أنا واخد رصاصة مسمعش نفسك جمبي
_ بس مبتنطقش يا احمد ، هفضل في وضع السايلنت دا ؟ دا انت لما ترن عليا بتكون رانن عشان تقولي يلا فيه قضية لو متحلش هنروح في داهية!
= اهم حاجة عندي الشغل وانتي عارفة
_ مهو..
= ومش بحس أيوة عشان اوفر عليكي الكلام
_ مهي..
= احمد يا عصام يا الي جايبلنا الكلام ، عاوزك
دخلوا المكتب ف رجعت المكتب بتاعي ، جه بعد شوية ودخل مكتبي _ هو ايه دا؟ فيه ايه ؟
= لاء مفيش جاي اقولك حاجة بس
_ اقسم بالله ؟ دا دخلتك عليا توحي إن فيه مصيبة
= متدخلنيش في تفاصيل دلوقتي ، عاوز أخرج معاكي بكرة
_ نعم؟
= نخرج بكرة الساعة ٨ في مطعم
_ احمد انت كويس ؟؟
= ممكن توافقي؟
رفعت حاجبي = لاء اخلصي انتي كده كده جاية ، هو انتي بتفكري بجد؟
_ هو ايه الطريقة دي ، طب مش جاية
طلع مسدس وحطه قدامي = قول وسمعني يا نجم النجوم ، كنتي بتقولي ايه؟
_ بكرة الساعة كام قولتلي؟
روحت البيت ، المفروض اعمل ايه بقي؟ دي اول مرة في حياتي أخرج خروجة زي دي ، هو المفروض ألبس فستان؟
= يا مريم لو سمحتي يلا
_ بقولك انا بحط تاتشي الاخير ونازلة
= يا مريم فيديو الميكب في عشر دقايق انتي قاعدة فيه بقالك تلت ساعات!
_ معلش متستعجلنيش ، نازلة
قفلت معاه ولبست الهيلز ، ويقولك حياة البنات سهلة! ، الهيلز دا اقلعه ازاي ؟
وصلت قدام المطعم الي قالي عليه ف لقيت ليلي واقفة
_ ليلي!!!! ، انتي جاية هنا بردو؟
' أيوة ، احمد قالي انزل أقابله ضروري
= ايه دا وأحمد بردو قالي أنزل أقابله
' في نفس المكان ؟ غريبة
بصيت قدامي = هو الغريب فعلا الي شيفاه قدامي!
بصينا احنا الاتنين لقيناهم واقفين لابسين بدلة ، وقفت قدام احمد ، وليلي وقفت قدام احمد عصام
ليلي : هو فيه ايه يا احمد ؟
° لاء بس ايه الحلاوة دي
بصيت ل احمد ب استغراب _ هو فيه ايه يا احمد؟
= لاء بس ايه الحلاوة دي
_ والله؟
= هو الي قالي اقول كده طب اعمل ايه؟
احمد عصام : يسطا مبنقولش كده ، خليها تحس انها طالعة منك انت
= ماشي
غمزلي = مريم ايه الحلاوة دي ، قسمت بالله لو شوفتك لابسة الفستان دا تاني ما هتكملي دقيقة عايشة بعدها
_ ها؟
احمد عصام: ايه الي بتقوله دا يا احمد؟
_ استني انت ، خد الي يخصك وروح طربيزتك لو سمحت
= لاء ثواني ، ليه مناخدش طربيزة لينا كلنا ؟
_ انتي بتتكلمي ليه؟ هو مفيش غيرك؟ ما ليلي واقفة محدش سمع صوتها من اول ما دخلت ، ما تبلعي ريقك
احمد عصام: اسم المدام ميجيش علي لسانك يا صاحبي ، بعد كده لو عاوز تندهلها قولها يا احمد عصام
' م ايه ؟ مدام مين؟
_ مخلاص يا عم الحمش ، وانتي يا ليلي مش وقت استغراب خالص ، خدها وامشوا خليني أحلل تمن الطربيزة الي حاجزها ، تعالي يا مريم
قعدت قدامه علي طربيزة ورفعت حاجبي
_ فيه ايه يا احمد ؟
= احمد هيتقدم ل ليلي دلوقتي
حطيت أيدي علي خدي وبصتلهم وهما قاعدين علي الطربيزة الي جمبنا _ بجد؟ الله ، لايقين علي بعض اوي
= لاء بصيلي احنا مش في السيما
_ انت بتتكلم كده ليه؟
= عاوز اقولك حاجة
_ ماشي قول سمعاك
طلع ورقة من جيبه وبدأ يقرأ فيها
= أنا لما شوفتك حسيت ب حاجة غريبة عمري ما حسيتها ، انتي ارق ست في الدنيا و.. ايه؟ ايه الخط دا ؟ هو كاتب هورغليفي ولا ايه الساقط دا؟
ضحكت _ احمد ، هو انت معرفتش تحفظ الكلمتين الي احمد عصام قايلك تقولهم ف كتبتهم في ورقة؟
= يعني مش بالظبط
_ طب سيب الورقة علي جمب وقول عاوز تقول ايه عشان مش فاهمة حاجة ؟
ساب الورقة وبصلي = بصي يا مريم ، انتي ارجل واحدة شوفتها في حياتي
_ طب بص انت ، امسك الورقة تاني بدل ما اقوم اكسر عليك المطعم اقسم بالله
= قصدي انك حيطة
_ انت كده بتكحلها يعني ؟ احمد أنا ماشية ، ابقي قول عليا مبفهمش لو قعدت معاك تاني بجد
= مريم أنا بحبك
رجعت قعدت علي الكرسي _ وانا من أمتي بفهم يعني؟ ها كمل ؟
ضحك = أنا بحبك وعاوز اتجوزك ، عمري ما حبيت ست غيرك ، كنت فاكر اني هفضل علي طول احب شغلي بس طلع فيه حاجة احلي من السلاح
_ يا وعدي ، شوف لما ركزت قولت كلام حلو ازاي ؟
= يعني موافقة؟
_ مش عارفة الصراحة ، اديني فرصة افكر
طلع مسدس من جيبه وحطه في نص الطربيزة
= اوي اوي اكيد طبعا حقك ، اسمع صلاة النبي حلو؟
_ عليه افضل الصلاه والسلام
= قسمت بالله لو ما سمعت ردك منتي خارجة من هنا
_ موافقة يا احمد هو انت تترفض ؟
= كنت عارف انك هتوافقي من غير اي ضغط عليكي عشان بتحبيني
بصيت علي ليلي الي احمد كان بيلبسها خاتم ومبسوطة
= شوفتي؟ وافقت علي طول من غير ما فرهدت الراجل
_ بس احنا الاتنين عارفين لو حتي كانت قالتله هفكر عمره ما كان هيرفع عليها سلاح يا احمد!
= متدخلنيش في تفاصيل دلوقتي لو سمحتي
احمد عصام غمزله = ايه يحبيب اخوك عنيك مالها؟
° انجز يسطا اعمل الي اتفقنا عليه
= اتفقنا علي ايه؟ اه صح
طلع من جيبه علبة وبص ل احمد تاني = هو انت كنت متفق معايا اقول ايه لما اجي اديها الخاتم؟
بصيت ل احمد عصام الي بصلي وبعد كده بص علي السقف _ حقك الصراحة ، ما دا ملوش في حاجة
= بقولك ايه يا مريم ، ما تلبسي الخاتم عيار ٢٤ دا في ايدك؟
_ افندم؟
= الي دافع فيه دم قلبي عشان انتي توافقي منتي مش غرامة حاجة إلبسي
_ ها؟
احمد عصام جه ووقف قدام الطربيزة
° وحياة امي منا سايبك ماشي
همسله في ودنه ورجع طربيزته ل ليلي تاني
= اه افتكرت هقولك ايه
_ يا راجل!!!
= أنا هبقي اكتر راجل محظوظ لو قبلتي تتجوزيني
_ امممم ، لاء ملعوبة وحلوة أنا أحب أقول ل اللعبة الحلوة دي حلوة
= الواد دا عليه كلام الله يفتح عليه
ضحكت _ انا عارفة انك مش بتعرف تتكلم اوي ، بس أنا متأكدة انك بتحبني ، أنا كمان بحبك يا احمد
= ها؟
خدت الخاتم ولبسته _ حلو اوي ، شكراً
= انتي محظوظة اوي يا مريم علي فكرة
_ اشمعنا ؟
= هتبقي حرم احمد السيد
_ هو انت مش هتتغير أبدا ؟؟؟؟
= ايه انت دي؟ اسمها ظابط