تحميل رواية «الغريبة» PDF

الجزء الحادي عشر

ريم : يلا يا مها عاد ترى مسختيها عندنا وعندكم واحد

مها : طيب تعالوا انتو بيتنا مافيه أحد من العيال

ريم : الحين يوم شفت امي وخالاتي بيرحون لبيت حمد و قلت خلاص ابي البنات يجتمعون عندي قلت تعالوا طيب انا اول من عزم

مها بضحكة : اووف خلاص زين زين بنجي وش بتسوين لنا

ريم تبي تقهرها : اذا جيتو بتشوفون وش بقدم لكم اخرتيني بتصل على البنات الباقين ساره وروان ودانه

مها : يعني افهما طرده

ريم : مالت عليك هذا تفكيرك يلا سي يو

ريم بعد ما عزمت البنات الباقين وقفلت الخط راحت لمها ولقتها قاعده بالصاله وتسمع إذاعة القران : يمه

التفت عليها امها وابتسمت لها أبتسامه خلت ريم تجي وتحط راسها بحضن أمها : سمي يمه وش بغيتي

ريم : البنات يمه بيجون الليلة وبيتعشون عندي ودي اسوي شغلات حلى والخرابيط الي تعرفينها

ام سعود : خلاص اتصلي على سعود واطلبي طلباتك

ريم : لا يمه اخاف أكلف على سعود دايم وحنا ضاغطين عليه

وسمعت صوت من وراها : انا اشتكيت واذا بنتي ما كلفت علي من بيكلف علي

التفتت ريم وشافت سعود لابس لبس رياضي جت يمه وضمته حيل : الله لا يخليني منك وادري انك مراح تقصر بس مابي اعذبك وامي عندها فلوس ابيها تعطيني اياها بس داريه تبي تعطيها دلوعها عبودي

ام سعودي وهي تسوي نفسها مصدومة وتضرب على صدرها بخفيف : انا افضل عبودي عليتس شوف كيف البنت تجحد ياما وياما دسيت لك فلوس وهو يجي يطلبني وقول ماعندي عشان ما تصيرين اقل من صديقاتك

تأثرت ريم من كلام امها ودمعت عيونها وجت لمها وجلست عند رجولها ولمتها بيديها: يمه تكفين امزح معك لا تخليني مقصره بحقك انتي اغلى من في عيني والله يشهد لا انتي ولا سعود قصروا بحقي يوم

ام سعود وهي تبتسم : قومي يمه الله يرضى عليم انا عارفه انك ما قصرتي بحقي بس ابي اخوفك عشان ما تحاولين تخليني ام تفرق بين عيالها

سعود وهو يضحك : الا يمه تفرقين صح أنا أغلاهم عندك

ريم وبصوت عالي : أنت مو بس غالي عند أمي أنت أغلى من حياتي أنا و بعد أغلى من في الدنيا

سعود وهو يضحك : شوي شوي لا تخليني اصدق ويوصل راسي للسقف

ريم : وليش ما تصدق مافيه اغلى عندي في الكون من البشر غيرك ومن يزعل خله يشرب من البحر

سعود : حتى زوجك

ريم بضحكه وفيها خجل : والله ما يجي في غلاك

مسكها سعود مع اطراف يدها وسحبها له وحب خشمها : الله يخليك لي يارب

وجلس معاهم شوي في الصالة وقعد يتقهوى : سمعت كان فيه طاري عزيمة

ريم : مو عزيمه عزيمة بس البنات يبون يجتمعون عندي الليلة

سعود : كلهم بيجون

ريم استغربت سؤاله : شلون كلهم

سعود يحاول يصرف السالفه : يعني الكل بيحضر عزيمتك او يمكن يروحون العزيمة الليلة

ريم ببراءة : لالا كلهم راح يجوني ومها بتمر ساره وتجيبها معها

سعود : لا انا وانتي بنروح نجيبها

ريم ومانتبهت لهتمام سعود : الي تبي

سعود : يلا تجهزي اوديك تاخذين الي تبين من بنده ونمر ساره بالطريق

ريم تقوم بسرعه : الله لا يحرمني منك

ريم في غرفتها تكلم مها بسرعه بجوالها والعباية في يدها الثانية : لا تمرين ساره بروح اجيبها معي

مها : إلي تشوفينه بس ترى انا قايله بنجيها بعد نص ساعه تقريبا

ريم : مو مشكله لا تتصلين عليها أنا بروح لها بعد نص ساعة تقريبا

نزلت ريم لسعود وراحو للبنده واشترت أغراضها الي تبيها من الكاكاوات وتبي تصلح بعد تشيز كيك وأغراض الحلى والعشاء بتطلب لهم وجبات من برى

سعود مخليها على راحتها وهو واقف مو بعيد منها عشان تاخذ راحتها وتتنقى الي تبي وجت تمشي له

سعود : خلاص ماتبين شي ثاني

ريم : لا خلاااص كل شي معاي

سعود : يلا مشينا

في السياره ريم تكلم سعود : يوه ساره ماتدري ان حنا إلي بنجيها على بالها مها الي بتوصلها

سعود ابتسم : هذا افضل شي

ما نتبهت ريم لكلمته وماعلقت عليها

وصلوا لبيت ام محمد وجت ريم بتنزل تناديها بس سعود وقفها وقال يحاول يبرر : اذا نزلتي راح تتأخرين اتصلي على امي منيره وقولي لها تطلع

على طول ريم سوت مثل مايبي أخوها وبالصدفه ردت عليها ام محمد : أن شاءلله بقولها تطلع لكم

سارة وهي جالسه جنب ام محمد وتسمع مكالمتها : برى يمه مها

ام محمد : أي برى وما نتبهت أنها قالت مها

سارة وجت وحبت ام محمد على رأسها : يلا يمه تبين شي

أم محمد : لا يمه الله يرضى عليك انبسطي انتي بس

طلعت سارة بعد ما نزلت نقابها ومغطيه عيونها تمشي ودخلت

ساره بحيويه وبصوت مو عالي متعوده على ماجد : السلااااااااام عليكم

التفت سعود ببتسامة واستغرب جراءتها : وعليكم السلااام ورحمة الله وبركاته

ساره سكنت كل جوارحها وماقدرت ترمش لو لحظة ناظرت في المرايه شافته مبتسم وحست بمغص بطنها وشوي قهر ما تدري وش سببه

التفتت عليها ريم : اهلين سارونه شلونك بشريني عنك

ساره تحاول تسيطر على صوتها : بخير انتي اخبارك

ريم : منيحه اجل توقعتي الي راح يجيك مها صح

ساره اكتفت بكلمة : ايه

ريم بدفاشتها المعتاده : كانت بتجيبك بس سعود اصر حنا الي نجيبك

تكلمت وكان سعود بيوقفها بس نطقت قبل لا يغير السالفه

ساره حست بشي غريب وقلبها تزيد دقاته : ليش عاد

ريم : كيف ليش

ساره طلع منها السؤال الي تتسائل فيه في خاطرها ليش عاد يبي يوصلني اهو

ريم بدفاشه اكثر من أول: هذا اهو اسئليه

سعود رفع درجة المكيف وفتح زرار الفوقي للثوب حس نفسه مخنوق ويتحسب على ريم في سره حاول يسيطر على نفسه : مافيها شي كنا رايحين للبنده وانتو على طريقنا قلنا نمرك بدل ما يتعنون لك ماجد ومها ما اتوقع فيها شي آنسة ساره الا عاد اذا انتي راح تفكيرك للبعيد

ساره بقهر واضح : ومن قالك ان تفكيري راح بعيد

سعود ببتسامة واضحة : تصرفاتك الي تقول شوفي صوتك كيف شوي وبتنطين علي وتقتليني

ريم : هههههههههههههههههه حرام عليك ترى ما ارضى على سعود حبيب قلبي

ساره بتسرع وما حسبت لكمتها حساب : حبيب قلبك انتي مو حبيب قلبي انا

وانتبهت لكلمتها بعد ما سمعت صوت سعود وهو يضحك انقهرت اكثر وصارت تفرك يدينها

سعود : شوي شوي راح تتكسر ايدينك وش فيك

ريم بضحكه : سعود وش فيك على سوسو ترى ما ارضى عليها

سعود بعفويه : ولا أنا

حس سعود على نفسه وسكت

وساره تجمدت اطراف يدينها ونزلت راسها وما عاد نطقت ولا بحرف واحد لحد ما وصلوا للبيت

.................................................. ...................

ام سعود هاه يمه جهزت أغراضك

عبد الله وهو يقفل شنطته : أي كلها جاهزه

ام سعود : بحفظ الله ولا تشغل اغاني بالطريق واذكر دعاء السفر واستغفر يمه بالطريق

عبد الله : ابشري ابشري يمه لا تحاتين بس وكل يوم بتصل عليك

ام سعود وترفع يدينها ونزلت دموعها : الله يوفقك ويخليك لي يارب ويستر عليك

جا عبد الله وحب خشم امة واخذ اغراضه ونزل بسرعه مع الدرج يبي يطلع برى ما تحمل يشوف دموع امه وهو سبب فيها طلع للشارع ونزل الشنطه وقد يتلفت في شوارع حارته الي تربى فيها من يومه صغير وما طلع منها الا فتره ويرجع لها حس بحنين وهو توه مابعد سافر قعد يناظر كل ركن ويحمل فيه ذكرى له ياما لعب ويما تطاقوا اشياء مهما كبر الانسان الا انه ما يستغني عنها جزء منه جزء من حياته وقف لحظات وشاف سياره واقفه جنبه التفت عليها شاف ماجد ينزل وتنزل معه وحده زادت نبضات قلبه وهو بس شاف زولها حس أنها أكثر وحده راح يشتاق لها مشاعره لها تتوقد كل يوم وتزيد مع الأيام فأصر على الي في قلبه واذا كون نفسه راح يخطبها

شافته وما قدرت تنزل عيونها نغزها قلبها وهي تشوف الشنطه بيده ما تحملت تشرق الشمس وتغيب وهو مو معهم حتى ولو كان بيتهم بعيد عنهم بس يكفي انه قريب

مشتاق لك ما تدري شكثر مشتاق

مشتاق لك أكثر من الشوق فيني

كثر المحبه والغلا كثر الأشواق

كثر الغرام اللي فضحني بعيني

أدري مقدر أننا نصير عشّاق

وأدري كثر ما أبيك قلبك يبيني

مثل الحبر ماهو مقدر للاوراق

ماتشوفني سلمت كل سنيني

وأدري عيونك تنتظر لحظة عناق

مع عيوني بالوصل لو تجيني

يارب لا تكتب على عاشق فراق

يارب وانت الي تحس بحنيني

ماجد وهو يجي يسلم على عبد الله : هلا والله شكل نويت تروح

عبد الله : أي بباشر بعد بكره ولازم ارتب اموري هناك

التفت على مها الي جت تمشي وتبي تتعداهم ما منع نفسه الا ونطق لسانه : شلونك يا مها

مها وبدت أنفاسها ترتفع وتحس بنقص في الهوا حولها بصوت واطي : بخير وش اخبارك انت

عبد الله ابتسم لها : بخير ولله الحمد

مها راحت ما قدرت تقعد اكثر حست ان رجولها ما تساعدها مشت بخطوات ثقيلة ووصلت للباب وقبل ما تدخل ناظرت فيه لقته يطالعها حست بنغزه قويه في قلبها دخلت داخل وجها صار احمر وجلست على الدرج الداخلي لبيت خالتها تحاول تسيطر على مشاعرها

دخلت لقت خالتها جالسه وتمسح دموعها

مها : سلامتك ياخاله عسى ماشر

ام سعود : ماشر إن شاءلله عبد الله بيروح للشرقية طلع تعيينه هناك

مها وهي تضايقت مره بس ماتبي تزود على خالتها : الله يوفقه ياخاله بس لا تشيلين هم هو رجال وما عليه خوف ان شاءلله

ام سعود : يمه ادري انه رجال بس بفقد حسه بالبيت

تنهدت مها وقالت في خاطرها انا الي بفقده هذا حبيب قلبي من وعيت على الدنيا ومافي قلبي غيره ومراح احد يسكن فيه الا اهو

ام سعود : يلا يابنتي بروح اتجهز بروح مع ام خالد للعزيمه ملزمين علينا

مها : اخذي راحتك يا خاله

جلست مها على الكرسي وغمضت عيونها وسمعت صوت خلاها تفز من أحلامها وترجع الغطى على وجهها

عبد الله : آسف يا مها بس نسيت شغله وجيت اخذها

مها تحاول تسيطر على نفسها ويالله لقت حروف تجمعها : لا عادي هذا بيتك

عبد الله بتردد وده يقول لها مها انا أحبك وابيك لي وعاهديني ما تاخذين غيري بس خانته الحروف والحرج وما يرضى يخون عيال عمه وخالته بنفس الوقت حاول يسيطر على نفسه بس قال كلمه وحده لازم ينطقها لو ما قالها يحس بيموت : يالله مع السلامه راح اشتاق لكم

سكتت مها ما قدرت تنطق بكلمة بس عيونها مليانه دموع وتنزل بدون توقف تبي تقول انا كل نبضه بقلبي كل ذره صغيره فيني بتشتاق لك بس ما قدرت طلع عبدالله وشاف سعود وريم ساره عند البوابه في الحوش شافته ريم وركضت له وحضنته وجلست تبكي مع انها دايم تتطاق معه بس ما قدرت على فرقاه حست انها راح تفقد حسه بالبيت

سعود : ريم خلاص خلي لي شوي بسلم عليه وبعدين لا تتفاولين عليه متى ما شتقتو له راح يجيكم ولا حنا راح نجيه

عبد الله يبتسم لها : يعني راح تشتاقين لي يا ريموه

ريم وهي تمسح دموعها : أي بشتاق لك تصدق ريم بقدرها راح تشتاقلك افرح ياعم

عبد الله : ههههههههههههههههههههه أي الاميره ريم راح تشتاق لي لازم اكتب عنه في الصحف

سعود وهو يسحب يد اخوه ويلفه كأنه طفل مو رجال ويحب خشمه ويضمه : الله الله في عمرك ولا تصادق الي يتتن وحرص على الصلاه وتذكرنا وراك وقبل كل شي تذكر ربك

عبد الله وشوي وتدمع عيونه : ابشر يا سعود مافيه اغلى منكم وان شاءلله اني اخاف ربي وبكون مثل ماتبي ومثل ما امي وابوي الله يرحمه يبينا

ساره تراقبهم من بعيد وحست بعطف سعود على قسوته يحمل حنان مثل الام على أطفالها

دخلت داخل شافت شنطة مها موجوده لكن هي مو فيه

عبد الله : ريم تاخرتي على ضيوفك داخل ومها موجوده لها ربع ساعة

ريم بضحكة مختلطة معها دموع : يعني تصرفني

عبد الله : ههههههههههه يعني وانتي بعد تودعيني لازم ننطاق

ريم وهي ترجع تبكي : شفت كيف بفقدك

عبد الله بتأثر واضح : خلاص عاد انتو حسستوني كاني بسافر خارج المملكة

ريم : ههههههههههههههههههههههههههه وش نسوي اول مره واحد من العايله يروح بعيد عنا

دخلت ريم على البنات داخل وسعود راح يوصل اخوه للسيارة

ريم لقت ساره جالسه في مجلس الحريم الداخلي : وين مها

ساره : ما شفت الا شنطتها وهي ما لقيتها

ريم درت ان مها فيها شي واكيد شافت عبد الله : ساره عن اذنك بروح ادورها

ساره : اخذي راحتك

جلست ساره تشوف المجلس وكيف ديكوره والتحف الي فيه تلهي نفسها بأي شي لحد ما يجون البنات

سمعت سعود وهو يتنحنح خافت وغطت وجهها ما بغت تجي عند الباب ويضحك عليها تقولفي خاطرها ما يقدر يسوي فيني شي وانا في بيتهم يوه ساره وش ذا الافكار الي تجيك سعود ماهو من ذا النوع

سعود يبتسم لان مافي المجلس الا اهي وباين من جلستها الخوف : وين ريم ومها عنك

ساره تحاول تكون طبيعيه : بيجون الحين

سعود وكتف ايدينه واستند على الباب : اخبارك الحين داومتي على العلاج

ساره تتنهد ت تحس بحراره فضيعه في وجهها وبرودة اطرافها ومثل الضباب ما تقدر تميز الي واقف قدامها : الحمدلله

سعود رجع يكرر سؤاله بضحكة : تداومين على العلاج ولا مثل الأطفال لازم نجبرك

ساره رجع لها قهرها وتنرفزت : لا والله تعال بس عطني اياه بنفسك كل لليله

سعود وحب يحرجها اكثر : صدق ابشري لك الي تبين

ساره وفتحت عيونها على الاخر : شكلك صدقت

سعود : ههههههههههههههههههههههههههههه وش اسوي فيك انتي ما تستغنين عني وتبيني اعطيك الدوى بنفسي بعد

ساره : لا خلك بعيد وخلني بعيده ترتاح وتريح

حزت الكلمه هذي في خاطر سعود : يالله عن اذنك

تندمت ساره انها قالتها بس ما تدري ليش انطقتها ....

ريم لقت مها تبكي ومقطعه نفسها بالبكي على سريرها

ريم : مها بسم الله عليك وش فيك

مها كأنها شافت منقذها قامت وضمت ريم وقعدت تبكي : راح ياريم راح

ريم وه تبكي معها : مها حرام عليك هدي نفسك وين راح يعني كل أربعاء عندنا يعني من بعد الشرقية

مها وهي تبكي بكى يقطع القلب : ريم انا راح افقد عبدالله للابد هذا حساسي مدري كيف اوصفلك

ريم : حرام عليك يا مها لا تفاولين على اخوي ويلا اذكري ربك وساره بروحها تحت بروح لها وانتي غسلي وصلي لك ركعتين وتعالي

نزلت ريم لساره وقعدو يسولفون ونزلت لهم مها وباين عليها انها تبكي

ساره : وش فيك يا مها سلامتك

مها ببتسامة : الله يسلمك مافيني شي بس تعب وما نمت زين وحاولت ارقد في غرفة ريم لحد ما تجون بس ما قدرت ومواصل من البارح تعرفين انتي

ساره بضحكه : وش الي يحدك تسهرين بلحالك

مها تببتسم مجامله لساره : وش اسوي مثلكم دجاج انام من العشا

ريم وهي تبي تفرفش الجو : انا ما اصدق على الله ياذن العشا الا وروح لغرفتي وقفل الانوار واذا جت ثمان ونص وقول يالله تالي الليل هههههههههههههه

البنات : ههههههههههههههههههههههههه

ريم : يلا انا مسويه حلاى خلونا نفرش في الحديقه لحد ما تجي دانه وروان

راحو البنات كل واحده شايله معها غرض الي شايله الترامس والي شايله الحلى وفرشو فرشتهم برى وقعدو البنات يتقهون

دانه بصوت عالي من ورآهم : خيآآآآآآآآآآآآآآآآآآآآآآآآآنه كليتو الحلى من دوني

البنات بصوت عالي : هلا وغلا بالعرووووس

دانه انحرجت وصار وجها الوان : مالت عليكم يارب كلكم تتملكون وتذقون مني مثل ما ذوقتوني

ريم بصوت عالي : ااااااااااامين

دانه غريبة : روان مالها حس بينكم وينها دايم صوت ضحكها واصل لاخر الحاره

ساره : فديتها يارب ذيك البنت

ريم : تقول بتحضر محاضره لداعية وبتجي

ساره : بسم الله عليها كل يوم اكتشف فيها شي جديد

مها : الله يخلي لها فهد الي يوديها لك محاظره لو جالسه على طلال كان لقيتها مشاركة في نجوم الخليج

البنات : ههههههههههههههههههههههههههههههههههههههههه

.... من الي يحش في طلال اجهز عدتي وعتادي احش معه

ساره بصرخه : روانوه

وتجي روان تمشي بسرعه : حلفت حلفت محد فيكم يوقف بسلم عليكم وانتو جالسين

مها : مسويه فيني خير رجولي ما تساعدني اوقف

روان : أي انتي عجوزنا

البنات : ههههههههههههههههههههههههههههههه

دانه : هاه زينه المحاظره

روان : زينه وربي اني امسح دموعي مابي البنات يشوفوني رهيبه يابنات فاتتكم شي شي ترى بتعيدها في جمعية البر اذا بتحضرون تدرون وش تقول تقول احتسبو الاجر اذا انتو جالسين هنا تدرون ان الملائكه تحفكم وانها من كثرتها تتراكم فوق بعض لحد ما توصل للسماء وتذكركم عند ربكم ويصبح اسماءكم تلجلج في السماء أي شرف غير هذا الشرف ان يقال فلانه بنت فلان جلست في مجلس ذكر تذكرك يارب العالمين

والبنات اندمجوا معاها : وش كانت محاضرتها عنه

روان : كانت عن الأمل قالت لنا قصص روعه ومؤثره بنفس الوقت

دانه : قولي لنا أي قصه من قصصها

روان : قالت قصة عن امريكيه بداية القصه ايام ازمة الخليج تقول كانت فيه امريكيه تشوف واحد باكستاني مدري افغاني واقف عند باب قائدهم الامريكي ولا دخل له تقول اروح واجي واشوفه واقف نفس وقفته تقول جيته قلت له ليش واقف قال انتظر القائد يسمح لي ان ادخل عليه ستغربت ودخلت على القائد وقالت فلان بالخارج يريد مقابلتك قال لا تدعوه يدخل قالت لماذا قال لها الا تعلمين انه مسلم قالت عجباً لك اذا زارك في البيت فلا تستقبله لكن هو في العمل واخذ منه واعطة وفي الاخير دخل الجندي على القائد وخرج وشاف الامريكية في طريقة وعطاها كرته وقال انا وعائلتي نسكن هنا قومي بزيارتنا المهم ذهبت الاسابيع ونسى الجندي الافغاني تلك الامريكية ولكن هي لم تنسه واتصلت له وقالت انني متفرغه ولدي وقت ولم يدعني شخص غيرك واذا سمحت لي فسوف اتيك لزيارتك فرحب بها الافغاني واتت له وكانوا على وجبة العشاء واطفالهم ملتمين معهم وتمتو ببسم الله الرحمن الرحيم عند البدء في العشاء وهي لم تراقب الكبار بل كان مراقبتهم للصغار وعندما انتهوا من العشاء قال الاطفال الحمدلله الذي رزقنا هذا من غير لا حول ولا قوة لنا

استغربت وسئلت والدهم مما استمدو فاني قرئت كتب كثيرة عن ادب الاكل لكن لم ارى مثل هذا من قبل قال انه الاسلام قالت لا هذا ليس الاسلام الاسلام قتل وقتال فقال نعم وبجواره هذا ادابنا الاسلامية قالت ان كان ما تقول صحيح فارني شي من اسلامكم فأتى لها بمطويات قديمة عنده واخذتها معها وبعد ايام اتصلت عليه وقالت اريد كتب فتلك المطويات مقتصرة فشترى لها كتب بلغتهم واعطى اياها فأتته بعد عدة ايام وقالت اريد ان اسلم فقال يجب ان نذهب إلى الجاليات لتعلني اسلامك وعندما ذهبت للجاليات قالت لداعية اخبرني عن الاشياء المهمه في الاسلام وقال عن الاركان الخمسة قالت فقط فتمتم خاف ان يكثر عليها فتردد عن الاسلام فقالت سوف تكون المسئول امام الله يوم القيامة فقال بما انكي قلتي انني سوف اكون مسئول امام الله يوم القيامة فيجب عليك الحجاب وان تغطي شعرك ولا يظهر منك أي شي من الراس لأخمص القدمين

فاقلت وبعد انا متوظفه في مكان اختلاط فتمتم فاصرت عليه فقال لا يجوز ان تخالطي الرجال فقالت من الآن سوف استقيل فقالت له ان لي خطيب في امريكا فهل يجوز ان اتجوز به فتمتم وفاصرت عليه ان يقول لها فقال لا يجوز هو كافر وانتي مسلمة فارسلت له رساله وكان مضمونها اني احبك واقدرك لكن انا اسلمت وديني يحتم علي ان لا اتجوز كافر وارسلتها بالفاكس ولم تاخذ بضع دقائق الا وجا الرد وكانت ورقة بيضاء يوجد فيها سطر واحد اشهد ان لا اله الا الله وان محمد رسول الله يقول وبعد عدة ايام أتت بمال حقوقها في وظيفتها واعطته للداعية وقالت له لقد علمت انك المسئول عن الدعوه لله في الخارج وخذ اموال حقوقي وانفقها في الدعوه في الله وقال انتي الان بلى وظيفة فدعيها تعينك على مصاريفك فاقلت لا اريد ان يرو النور كما رئيته انا ثم قالت اريد أن ارى بنات مسلمات منكم واريد ان اجتمع بهن واعلن الداعية اعلان بان هناك امريكية تريد ان تجتمع بفتيات مسلمات فجتمعن معها بكل الاعمار المختلفة وعندما رئن ان هناك امريكية تفنن في اللبس وكل واحده ابدعت بلبس البنطال والقصير وما إلى ذلك ودخلت الامريكية لذالك الاجتماع بخمارها الساتر من راسها لاخمص قدميها ولم ترفع الغطاء عن وجهها إلى عندما جلست والتفت لترى هل هناك رجال فرفعته وانكشف نور وجهها وجمالها ونور الايمان ينبعث منه وعندما شاهدت الفتيات تعجبت واندهشت ووقفت وامسكت القران بيدها اليمنى وكتاب اخضر بيدها اليسرى وقالت الحمد لله انني اسلمت من الكتاب والسنة وانكن لم تكن قدوتي للأسلام

ساره : سبحان الله انك لا تهدي من حببت ولكن الله يهدي من يشاء

ريم : مشاءلله عليك يا روان شكلك انبسطتي

روان : مره ورحت وسلمت عليها ومن يوم ركبت مع فهد وانا اقص عليه القصص الي روتها لنا

مها : الله يهدينا على طاعته يارب

البنات : امين

.................................................. ........................

في مجلس حمد كان الكل موجود الشباب كلهم وابو خالد وحمد كل شوي يناظر في ابو خالد ويتمنى يلقى فرصة يقوله المهم شاف الي جنبه راح جا وجلس جنبة

حمد : الله يحيك ياعم وتو ما انور البيت

ابو خالد بهيبته : الله يبقيك ياولدي والبيت منور بهله وعساك على القوه

حمد : والله ياعم في خاطري شي وعندك انت الحل

ابو خالد : سم ياولدي واذا عندي مراح اقصر معك

حمد : ما يصلح هنا بس ابي تحدد لي وقت وزورك في البيت او في الدوام اذا تحب

ابو خالد : الا في البيت ابرك وازين والله يعيني ان شاءلله واقضي الي تبي

حمد : الله يعين و ان شاءلله ما تقصر معي باذن الله

ابو خالد : باذن الله