تحميل رواية «الفخ الأحمر» PDF
بقلم دعاء دفيع
جارٍ تجهيز التحميل... برجاء الانتظار
سيظهر زر التحميل خلال 10 ثانية
جارٍ توليد الملف...
التحويل يتم بالكامل داخل متصفحك — لا يُرفع أي شيء للسيرفر.
عن الرواية
اقرأ الفخ الأحمر بقلم دعاء دفيع.
رواية الفخ الأحمر الفصل الأول 1 - بقلم دعاء دفيع
قايمة بمليون ونص ليه ياحاج منصور!
ـ بضمن حق بنتي، متنساش إننا مجهزين البيت كله لوحدنا، ولو عايز تتأكد من الحاجة اتفضل.
المأذون: يا جماعة حاجة إيه اللي يتأكد منها دلوقتي! انتوا جايين يوم الفرح تختلفوا؟ كان من الأول الاتفاق ده!
_ وأنت إيه رأيك يا عريس؟
حسام: هسألك سؤال يا عمي.
منصور: خير يا بني؟
حسام: هو أنا ينفع أتكتب ضمن القايمة دي علشان لو حبت تمشي تاخدني معاها؟
الحاج صلاح أبو حسام وهو يضرب كفًا بكف: متزعلش على الراجل لو مات.. ازعل عليه لو خاب!
حسام: يا بابا دي حتة ورقة لا راحت ولا جت، وبعدين أنا واثق في اختياري.
ثم أكمل وهو يمد يده:
هات يا شيخنا أمضي. نظر بجانبه ليجد عروسته وهمس في أذنها: _ كله لأجل عيونك يا سوسو.
_ ادخلي يا روح قلبي برجلك اليمين.
قالها وهما يقفان أمام باب الشقة، فلاحظ ترددها:
_ مالك واقفة ليه؟
كيان بدلع: يا خضر!
حسام بضحكة: قلب خضر يا سعدية!
كيان: شيلني!
حسام: كان بودي صدقيني بس وسطي هينقسم نصين.
كيان: بس خضر شال سعدية يوم فرحها!
حسام: دي سعدية.. إنما أنتِ كيان، وبعدين متقارنيش خضر بيا بقى.
كيان دبدبت في الأرض: خلاص مش داخلة.. فركشنا!
حسام: تعالي وأمري لله.. شيل يا عم خضر.
_ مالك يا حسام، ليه صاحي لحد دلوقتي؟
_ ماليش، نامي أنتِ بس.
_ لا قولي مالك! فيه حاجة زعلتك مني؟
قام بعصبية من على السرير وبدأ يعلي صوته:
_ أبوكي! خلي شكلي وحش قدام أهلي والناس لما مضاني على قايمة بمليون ونص وكأنه مش واثق فيا!
_ لا هو الموضوع مالهوش علاقة بالثقة، بس أنت مضيت على الحاجات اللي أهلي جايبينها في بيتك.
_ خايف على شوية كراكيب ومش خايف عليكي؟ منظري إيه قدام أبويا وهو شايفني عريس لا أؤتمن؟ أنا لا أؤتمن يا كيان؟
_ لا مش كده، ومتخليش أي كلمة تأثر عليك.
_ أنتِ لو بتحبيني بجد تقفي جنبي ومتهزّيش كرامتي.. أنا عايزك ترديلي كرامتي اللي أبوكي بهدلها دي.
_ مش فاهمة.. أعمل إيه يعني؟
حسام بنبرة هادئة خبيثة:
_ تمضيلي على ورقة تنازل عن القايمة.. دي مجرد ورقة واحنا كده كده مش هنطلق أصلاً، ولا أنتِ ناوية على طلاق؟
_ يا حبيبي تغور كل حاجة، بس أبويا هيزعل لو عرف إن عملت كده.
قاطعها بحدة أدهشتها:
_ ومين هيقوله؟ وبعدين أنتِ دلوقتي على ذمتي يعني مالهوش دعوة بيكي.. بصي، أنا بحبك أوي بس لو الحب هييجي على حساب كرامتي مش عايزه! لو معملتيش اللي يرجعلي هيبتي، فـ أنا آسف.. المأذون اللي كتب كتابنا يطلقنا الصبح.
كيان بخضة شديدة: أنت بتقول إيه؟!
حسام ببرود: زي ما سمعتي، أبوكي هيكون السبب في كلام الناس لما بنته تطلق يوم فرحها.. شوفتي أبوكي بيكرهك وبيدمر بيتك إزاي؟
أخرج ورقة مطوية من جيبه وقلمًا، ووضعهما أمامها بجمود:
_ امضي علشان نعيش حياتنا بدون نقط سودا.. أنا خايف عليكي من لقب مطلقة يوم فرحك، وأنتِ مش خايفة على كرامة جوزك؟
أمسكت القلم برعشة وتوتر، والدموع تحجب رؤيتها، وتحت ضغط خوفها وهيبته.. مضت على التنازل.
حسام ابتسم بفرحة خطفت ملامحه القاسية، وقبّل خدها: _ أحبك وأنتِ مطيعة وأصيلة كده!
في الصباح، طُرق جرس الباب بعنف.. استيقظت كيان بوجل وفتحت الباب لتجد حماها صلاح وعلى وجهه علامات القلق.
_ صباح الخير يا بنتي.
_ صباح الخير يا عمي.. اتفضل.
صلاح: عمي إيه بقى، أنا في مقام أبوكي.. خليها بابا.
كيان : يشرفني يا بابا.
خرج حسام من الغرفة وهو يفرك عينيه: خير يا بابا حصل حاجة؟
صلاح بنبرة متباكية: للأسف يا ابني، أنا مكنتش عايز أقلقك يوم صباحيتك.. بس المقاول اللي شطب الشقة واقف تحت مع أصحابه وعاملين فضيحة، وبيهدد يرفع الشيكات اللي عليك ويحبسك حالا لو مخدش فلوسه!
حسام بصدمة مصطنعة: لا حول ولا قوة إلا بالله! ألاقيها منين ولا منين بس؟
صلاح: أنا يا ابني لو معايا مكنتش أبخل عليك، أنت عارف.. حتى دهب أمك الله يرحمها بعته عشان القاعة والزفة.
حسام: ربنا يبارك فيك يا حاج.. خلاص انزله وأنا هحاول أتصرف.
انصرف صلاح، والتفت حسام إلى كيان وعلامات الهم تكسو وجهه.. في تلك اللحظة، انقبض قلب كيان، وشعرت أن السيناريو يتكرر وأن دور الذهب قد جاء بعد القايمة.
كيان بحذر: هتعمل إيه دلوقتي؟
حسام: مش عارف.. سدّت في وشي.
كيان: شوف حد من أصحابك يسلفك.
حسام وهو يقترب منها ويجلس بجانبها: عارفة يا كيان.. أمي الله يرحمها عشان ست أصيلة وبتحب أبويا، لما لقته واقع في مشكلة زي دي، وقفت وقالت محدش ينقذ جوزي غيري.
كيان (وفهمت غرضه): الله يبارك لها.. ست أصيلة.
حسام وهو يضع يده حول كتفها ويضمها بتملق: طب مش ناوية تبقي أصيلة زيها ولا إيه؟ المفروض من غير ما أطلب تقفي معايا يا سوسو.. عايزة رضاي عشان ندخل الجنة سوا.
كيان وعيونها دمعت: بس أنا مش معايا فلوس!
حسام: بس معاكي دهب.. الشبكة اللي أبوكي جابهالك ودهب أهلك.
كيان بنبرة هادئة متقطعة: بس أنا لسه متهنتش بيه يا حسام.. ملحقتش ألبسه!
حسام بنبرة عتاب حزينة: بكره أعوضك وأجيبلك ألماس مش دهب بس.. يرضيكي جوزك يتسجن يوم صباحيته بسببك؟
كيان بصدمة: بسببي أنا؟!
حسام: أيوا.. ما أنا اتداينت وعملت الفرح الأسطوري ده عشان تكوني معايا!
كيان: ما أنا قولتلك نأجل الجوازة ونمشي براحتنا!
حسام (يمثل الانكسار): مكنتش أقدر أستحمل بُعدك.. يبقى هو ده جزاتي؟ هنت عليكي؟
ارتبكت كيان، وبقلب مقبوض وتحت تأثير مشاعر الذنب الزائفة التي زرعها داخلها، تحركت نحو علبة قطيفتها، وفتحتها.. سحبت الذهب ببطء وسلمته له.
أخذه حسام بلهفة واضحة لم يستطع إخفاءها، وقبّل يدها: _ تسلمي يا سوسو يا أصيلة.. هطير أنا ألحق أبويا وادفع للمقاول.
خرج حسام وظلت كيان جالسة مكانها، تتأمل الشقة الفارغة من حولها.. تراجع شريط الأحداث السريعة وتلعن سوء اختيارها.
قطع تفكيرها صوت طرقات على الباب مجددًا.. ظنت أنه حسام نسى شيئًا، فتحت الباب بلهفة، لتجد أمامها فتاة ترتدي عباءة سوداء، تنظر إليها بابتسامة حزينة للغاية.
كيان باستغراب: مين حضرتك؟
الفتاة وهي تخطو داخل الشقة دون إذن: أنتِ كيان العروسة الجديدة؟
كيان: آه أنا.. اتفضلي، بس مين حضرتك؟
الفتاة زغردت فجأة بصوت هز أرجاء الشقة: لولولولولولولولولي! ألف مبروك يا حبيبتي.. أنا ضرتك!
رواية الفخ الأحمر الفصل الثاني 2 - بقلم دعاء دفيع
لولولولولي، ألف مبروك يا حبيبتي.. أنا ضرتك!
_ قولي إنك بتهزري!
_ لا مبهزرش، وأدي القسيمة.. يالهوي، البت ماتت!
سقطت كيان على الأرض مغشياً عليها من أثر الصدمة، بل الصدمات المتتالية. هرعت آلاء (ضرتها) نحو الغرفة، وأحضرت زجاجة عطر وحاولت إفاقتها وهي ترش برفق على وجهها.
كيان بوهن ونبرة متقطعة: أنتِ متأكدة إن جوزك حسام صلاح نور الدين؟
آلاء: آه وأدي صورنا كمان، هو بنفسه جوزك.. أنا كنت فاكراكي تعرفي، أصل قال لي إنه اتجوز ست الستات وإنك عارفة وموافقة!
نهضت كيان عن ركبتي آلاء فجأة، وانفجرت في ضحك هستيري: يابن اللعيبة.. هههههههه!
آلاء باستغراب وعقدت حاجبيها: هم يضحك وهم يبكي!
كيان وما زالت الضحكات تفلت منها: طب.. هههه.. هو.. هههه.. ساكنة فين؟
آلاء بقلة حيلة: مش فاهمة حاجة من ضحكك ده!
كيان: أنتِ ساكنة فين يا بنتي؟
آلاء: المفروض إن دي شقتي، وعفشي مش عارفة راح فين ولا نقله فين!
كيان بهستيرية: أنتم السابقون ونحن اللاحقون!
آلاء: ممكن نتكلم جد شوية؟
كيان وقد تحول ضحكها فجأة إلى بكاء مرير: أنا حاسة نفسي في كابوس، كل أحلامي دمرها.. أحلى أيام حياتي خلاها أتعسها.
آلاء بنبرة حزينة: الحال من بعضه، على العموم حسام لو عرف إني هنا مش هيحصل خير أبدًا.
كيان: هو محذرك متجيش عندي؟
آلاء: لا، إحنا في طريقنا للطلاق أصلاً، بس أنا جيت بسرعة لما شفته خارج ونازل.. عايزة أقولك على المهم قبل ما..
فجأة، دوت طرقات عنيفة على الباب. انتفضتا معاً برعب، وهمت كيان بإخفاء آلاء في غرفة الأطفال: تعالي ادخلي هنا بسرعة، واقفي ورا الباب!
جففت كيان دموعها بسرعة وفتحت الباب بملامح حاولت جعلها هادئة.
_ إيه يا كيان؟ كل ده عشان تفتحي؟
_ معلش يا حبيبي، كنت في الحمام.
قالتها وهي تحاول جاهدة تثبيت انفعالها الرعديد وصدمتها الحارقة.
_ طب استني متقفليش الباب، أبوكي جاي ورايا على السلم.
لمعت عينا كيان وكأنها وجدت طوق نجاة يحميها من الغرق: أبويا!!!
فتحت الباب على مصراعيه، وبمجرد أن ظهر الحاج منصور، ارتمت في أحضانه وتبثت به ممتنعة عن تركه لوقت طويل.
حسام متحنحناً بابتسامة صفراء: احم.. أنا كده هبدأ أغير يا حاج.
سحبت كيان أباها نحو الصالون وهي تتشبث بذراعه: يا بابا أنت وحشتني أوي.. أوي فوق ما تتخيل.
الحاج منصور بابتسامة حنونة: دول مكنوش يومين يا كيان، لازم تتأقلمي على بيت جوزك يا بنتي.
حسام مؤكداً: أيوا يا عمي، قول لها وانصحها بالله عليك.
الحاج منصور: وأنت يا بني متزعلهاش، ده أنت واخد حتة من قلبي.
حسام وهو يضع يده على صدره: دي في عنينا يا حاج، اطمن.
كيان مقاطعة بنبرة غريبة: صح يا بابا.. هو أنت سألت على حسام فين قبل الجواز؟
منصور: طبعاً، بعت معارفي وأهل الثقة يسألوا عليه في كل حتة.
كيان وعيناها مثبتتان على حسام: وقالوا إيه؟
منصور: قالوا إنه محترم، وابن ناس، وخدوم، وصاحب صاحبه، وصادق وأمين.
لم تستطع كيان كبح جماح نفسها، فخرجت منها ضحكة مجلجلة: صديقي الصادوووووق! وظلت تضحك بقهقهة عالية لفتت انتباه الجميع.
حسام بنبرة حازمة ومحذرة: مالك يا كيان؟ أنتِ طافحة إيه على الصبح؟
كيان وسط نوبة الضحك الهستيري: عثيييير.. تفووفاااح!
منصور بحدة خفيفة: خلاص يا بت مالك؟ جرى لك إيه؟
عندما نهرها أباها، انفرط عقد تماسكها وانفجرت في البكاء مجدداً. تلاطمت الأفكار في رأسها؛ هل تخبر أباها وتواجه هذا الثعلب أم تصمت؟ همست بنحيب: بابا.. أنا تعبانة أوي.
حنّ قلب منصور على ابنته واقترب منها: معلش يا بنتي، طبيعي يحصل كده لما تغيري مكانك وتنتقلي لبيت جديد، دلوقتي جوزك بقى في مقام أبوكي، هيحبك ويخاف عليكي أكتر مني.
جلس حسام بجانب كيان، ولف ذراعه حول كتفها بقوة خفية، ثم قبّل رأسها : دي في عيوني يا عمي اطمن، بس هي متوترة شوية، أنت عارف دلع البنات الخايب.
فجأة.. رن هاتف آلاء بصوت مرتفع من داخل غرفة الأطفال. انتفضت كيان من مكانها وقالت بتلعثم وتوتر بدا واضحاً: ده.. ده تليفوني.. هروح أقفله بسرعة.
حسام بخبث شديد، مد يده والتقط هاتفها المستلقي أمامهم على الطاولة: أهو تليفونك قدامنا اهو يا كيان!
شعرت كيان بأن الأرض تدور بها، والأنظار كلها معلقة عليها: لا.. ما أنا.. أنا معايا تليفون تاني.
تحركت سريعاً نحو غرفة الأطفال، ولكن قبل أن تصل، انقطع صوت الهاتف فجأة.
التفتت كيان بابتسامة باهتة وسخيفة: شكل اللي بيتصل ماعندهوش رصيد وفصل!
ودعت أباها بحضن طويل وكأنها تستمد منه طاقة مفقودة، وبمجرد أن أُغلق الباب خلف الحاج منصور، تبدلت ملامح حسام تماماً.
حسام بنبرة هادئة ومرعبة: عارفة يا كيان أكتر صفة بكرها في الست هي إيه؟
كيان بخوف حقيقي: إيه؟
توجه حسام بخطوات واسعة ونوايا مظلمة نحو غرفة الأطفال، وفتح الباب بعنف، ثم سحب آلاء من معصمها بقوة لتخرج معترضة: الكدب.. والخيانة!
آلاء وهي تتلوى ألمًا: آآآه.. إيدي سيبني !
حسام وهو يضغط على ذراعها بقسوة: عايزة تخربي بيتي الجديد زي ما خربتي بيتك وعيشتك؟
كيان وهي تستجمع بقايا قوتها وكرامتها: مقولتليش ليه إنك متجوز يا حسام؟ ليه غشيتني؟
حسام وهو يجر آلاء بعنف نحو باب الشقة: تعالي ورايا وأنتِ هتعرفي كل حاجة.. البسي إسدالك وانزلي!
آلاء وهي تقاوم: سيبني يا أخي واتقي الله فيا… طلقني وريحني!
التفت إليها وهوى بكفه على وجهها بصفعة قوية: ما كنتِ روحي اخلعي يا ختي! ولا عايزة تكوشي على سبوبة الطلاق وتطلعي بمصلحة يا ناشز؟
سحبها على الدرج بعنف وهو يصرخ في كيان: اخلصي البسي وتعالي ورايا!
ارتدت كيان إسدالها بيدين ترتعشان، ونزلت خلفهما لتجد حسام يدفع آلاء داخل السيارة بالقوة، ثم انطلق ب سرعة جنونية حتى وقف أسفل البناية التي تسكن بها آلاء.
ترجل حسام من السيارة، وبدأ يصرخ بأعلى صوته ليجمع المارة في وسط الشارع: قولولي بأمانة يارجالة الحارة، الست اللي تخون جوزها المفروض يحصل فيها ايه؟