تحميل رواية «الاطلس "دمليج أسود"» PDF

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

لا لـگينه بنادم يحبنه اعله گـدنه

ولا لـگينه گـلوب تستاهل صدگـنه..

• ━━━━━━❪♣❫━━━━━━ •

باوعت للرسالة والابتسامة الشيطانية شاگة وجهي هيهيهيهي اني اعلمك ابو ريحة، حمحمت وكعدت على حيلي اشوف محتوى الرسالة وجان انصدم!!

"الاطلس: مريم حوليلي صور حسابات هذا الاسبوع اذا مصورتهم"

گمت اللطم بصمت احوو احاا احووو واني عبالي شو شنوو يمة يا گلبي فتيته لگلبي شنو من بشر شنو من گلب عبارة عن كتلة من الجليد!!

شفت الرسالة وغلست ما جاوبت ذبيت تلفوني متنرفزة وتمددت بمكاني، اويلي منك اويليي شلعت باب گلبي عفيه راس ما يلين شويه..

نهضت روحي من اجت فكرة براسي هو منيله رقمي ومنين جابه؟ لك هلااا يمكن البالي صح.. اخذت تلفوني اشوف من دزلي رسالة ثانية عبارة عن...

"؟"

انوب يخلي علامات استفهام ابو راس، جاوبته ببساطة..

"اعتذر استاذ ما صورتهم اليوم نسيت"

جاوبني..

"لطيف"

واختفى دعوف اللطافة الك ماريدهه كلما يكولهه گلبي يكوم يوجعني، ركض رحت اراسل لهيب الي تشتغل ويانه بالجديد اريد افتهم فد سالفة..

"اكلج لهوب الاستاذ راسلج اليوم؟"

بقيت انتظرهه تجاوب وماكو يمكن نايمة ذبيت جهازي وقررت انام عود باجر اشوف سالفته، كعدت الصبح متأخر ويه الاذان كمت اصلي الظهر كملت وبقيت بالچادر ورحت على تلفوني..

شفت لهيب مجاوبتني وكاتبة...

"لهيب: اي البارحة راسلني طلب حسابات هذا الاسبوع"

خابت آمالي حريمة، رجعت راسلتهه اسئلهه منين جاب رقمنه جاوبتني وره دقايق دزت ضحكات كومة وكتبت..

"لهيب: من اول ما تعينت اخذ رقمي من الفايل لازم هالشي مريم شبيچ"

ضربت جبيني بغباء وشمرت الموبايل متنرفزة اهوو وين راح عقلي اني لعد وبنيت آمال واوهام بس الظاهر هالبشر مو سهل..

كملت صلاتي ورحت لـ نانا كاعدة تحضر الغده سولفت وياهه شويه ومشى الوقت واحنه ويه بعض قررت اخذهه ونطلع للسوك ونتعشى بره ونرجع..

تونست كلش ونانا مريحة بالطلعة شنو تشوف تشتريلي ومتقبل ادفع كله منهه خطية بس اني ماكدرت ارجع وايدي فارغة جنت ناوية من اول ما تخرجت اول راتب استلمه اذا اشتغل اشتري بي قطعة ذهب واهديهه لأمي..

رحت لمحل الذهب واختاريت محبس حلو كلش نانا اختارته وكالت ضمي من تلتقين بأمج فرحيهه بي..

اخذت لـ نانا سوار فضه لان فلوسي خلصت وهديته الهه من رجعنه للبيت طارت من الفرح وبقت هواي تدعيلي وتكول..

-من صدك فرحتيني مرايم ما شفتج من اشتريتي

-مو من مستواج نانا انتِ مال ذهب لو اللماس بس اعذريني تعرفين هذا اول راتب الي ان شاء الله على الجايات اجيبلج

-ما جان اكو داعي تشتريلي يا امي اطلس مغرگني سودة عليه كل مناسبة تمر لازم يجيبلي هدية

-صدك؟

هزت راسهه بحماس وكامت لغرفتهه طلعت وبيدهه علبه چبيرة قدمتهه ناحيتي وكالت وعيونهه تسولف الفرحة الغامرتهه..

-نانا: هذا بعيد الام جابه الي

فتحته شفتهه كلاده تجننن ومبينه ثكيله كالت هذا ذهب ابيض ومرصعة اللماس فرحت على فرحتهه وهي تگلبهه بيدهه وتكول..

-لبسته بعرسكم بس يمكن ما انتبهتي عليه

-لا والله مانتبهت

-كتله اللبسه بعرسك وفعلاً ضميته وطلعته بيوم زواجكم لبسته حتى لو ما جان فرحان بس اني متأكدة من يتعرف عليج ويعرفج راح يحبج ويهيم بيج

-مادري والله نانا

-اني ادري ابني الربيته واعرفه زين هو حنون بس ما يبين هالشي ويحب ويحترم للي يهتم بي والي يحبه ويداري

-شلون اشرحيلي اكثر

-يميز الي يحبه ويسأله من كل خاطره ومن الي يسأل مجاملة وهاا تره المحيط الاطلسي مالتج بسرعة يتعلق ههههه

-والله؟ شو ممبين هالشي عليه

-اي كتلج يتعلق بلي يهتم بي بدون مصالح

-وهذا السبب هيج متعلق بجماعته

-يوووه كلش يشوفهم اخوته حمزة ومسلم يصيرون ولد خالته وعلي وعمر ولد عمته بس تكولين اخوان كلهم نفس الگصة والعمر

-بس حمزة المتزوج بينهم صح؟

-اي ماخذ اخت الاطلس الجبيرة غدير

-تدرين نانا احسهم ما راهمين ماقصد اساءة او شي بس احس شخصياتهم مختلفة

-نانا: شمعرفج بشخصية حمزة انتِ؟

-انتِ تذكري هواي معقولة ممنتبهه

-نانا: لا منتبهه بس ماتوقعتج تنتبهين، اي اذكره هواي لان كلنه نحبه وردة حمزة وكلش صاحب همة وواجب

-شلون تزوجو هو وغدير

-زواج تقليدي امه خطبتله

-مو اكول معقولة هو حبهه

-امه المرحومة كلش تحب غدير وصارت قسمتهم بعد

-هي صدك كلش حلوة مو بس حلوة جميلة بشكل تنطي شبه لعمو محمد بس اخلاقهه نانا بطرف خشمهه وشايفة روحهه على العالم

-اي هي الوحيدة من خواتهه هيج الباقيات اطيب من كلبهن ماكو

-مشايفتهن

-ان شاء الله يجي يوم وتتعرفين عليهن

هزيت راسي وحطيته بحضنهه وهي تمسح على شعري وتهمهم صوتهه كلش حلو اخذني لغير عالم..

**

"رقية"

كاعدات ننتظر غدير تكمل فحصهه، سارة وامي كاعدات على نار هاي لحظة الحقيقة.. هذا اخر فحص حتى الدكتورة تقرر غدير تكدر تسوي اطفال انابيب لو لا..

-سارة: گلبي يرعد مدا اطيق الانتظار

-حصة: الله ما يسوي الا الصالح

-رقية: شلون بينه اذا الدكتورة تكول متكدر ومراح تنجح

-سارة: فال الله ولا فالج رقية لا ان شاء الله تكدر وراح تنجح هالمرة

-رقية: والله مادري يا سارة لتنسين هاي المرة الثالثة راح تسويهه

-حصة: سودة عليه عليج يا بنيتي

اخيراً طلعت غدير من غرفة الدكتورة، بس ياريتهه ما طلعت بهذا الحال.. مدلغمة والعيون تصب دموع والشهكة ذابحتهه ركضت عليهه امي وصارت تصبر بيهه وغدير منهارة متخبلة..

-غدير: الا اسوويهه الا اسوووي

-سارة: غدير كافي لا تتعبين نفسج يا حبيبتي

-حصة: شنو كالت الدكتورة غدير؟

بقت تبجي نحيبهه وصوتهه رج قاعة الانتظار رج الناس كامو يباوعولنه..

-سارة: ماما مو وكتهه امشو بالبيت نحجي

كوة اخذنه غدير شلعناهه شلع من الدكتورة رجعت تسئلهه وتتوسل بيهه وتكوللهة جسمي يتحمل وحتى لو اموت ميخالف والدكتورة قافلة..

الطريق كله هي تبجي كسرت گلبي ماتحمل اشوفهه بهذا الشكل، تبجي وتهذي بأسم حمزة وتكول..

-يعوفني ما يبقى وياي يعوفني

-حصة: يا يمة بسچ عاد ما يجوز الي جاي تسوينه بروحج

وصلناهه لبيتهه ودخلناهه لغرفتهه وهي شافت مكان حمزة على الفراش لو كامت تدك وتلطم كوة لزمتهه امي وقيدنه ايديهه حتى متملخ روحهه هاي اختي تخبلت على الاخر..

-غدير: لا تكلوله عليكم الله لحدد يكوووول ممنوووع ممنوووع احد يكول ما يصير عندي جهال والله اموت روحي انتحر والله

-سارة: منكول والله محد يحجي مو رقية؟؟ محد يحجي موو

-رقية: اي اي اكيد محد يحجي وعد

-حصة: بسچ غدير كافي يمة ولج راح تموتين

-عساانيي اموت واخلص عسااانييي

تعيط وتبجي ووكعت على صدر امي وتنوح مثل الطير المذبوح، دموعي ما وكفت واني اشوف اختي الجبيرة بهذا الوضع.. عجزنه اني وسارة نكول لأمي غدير مريضة وتحتاج دكتور نفسي يراقب حالتهه الغريبة وتعلقهه المخيف بزوجهه..

بقت على وضعهه تبجي وتحجي شنو كالت الدكتورة..

-غدير: ماتحمل وما راح يثبت الحمل حتى لو سويت انابيب كالت.. الدكتورة.. كالت يشيلون رحمي اذا صار اسقاط.. و.. واكيد راح يصير و..

-حصة: وتموتيننن ولج تموتيننن غدير بطلي من هالسالفة يمة عوفيهه على ربج

-غدير: حتى لو اموت ميهمني اريد جهال حمزة يحب الجهال ويتمنى يصير عدنه بنية لو ولد

رجعت تون وتكول حتى اساميهم مختارتهن بچت الى ان غفت على صدر امي، كامت امي عنهه وكالت نعوفهه ونطلع مجرد كمنه من الفراش هي حست ورجعت تبجي اخذت مخدة حمزة حضنتهه حيييل وتبجي عليهه..

-حصة بهمس: امشو عوفوهه براحتهه

هزينه روسنه وطلعنه من الغرفة توزعنه على القنفات الي بالصالة وحدة تباوع للثانية..

-رقية: شلون نبقى بهالوضع احنه

-حصة: شتبين انتِ

-سارة: نلگه حل لازم نلگه حل تره تموت روحهه هاي ماما

-رقية: كل خوفي حمزة صدك يعوفهه لو يتزوج عليهه تنجن والله

-حصة: لا بسم الله عليهه حمزة خوش ريال ما يسويهه

اللتزمنه الصمت وبعد محد علقت، مشت الساعة واحنه على كعدتنه كامت امي تشوفهه لكتهه كاعده وصافنه بالفضاء رجعتلنه تلطم على رجليهه وتكول..

-حصة: يارب منك الصبر يارب

تسائلنه عنهه وسولفت امي غدير على وضعهه من تركناهه لسه، ذبيت نفس متعب وكملت صفنتي دقايق وانفتح باب البيت وطل علينه حمزة..

-حمزة: هاا هاي شنو الحبايب يمنه

-حصة: هلا وليدي شلونك

راح عليهه يسلم ويبوس براسهه اللتفت علينه ورحب بينه بحرارة نفس عادته وصار يتلفت بالبيت..

-حمزة: وين غدورة؟

-حصة: نايمة تعبانة شوي

عكد حاجبه متسائل راد يكوم وجرته امي من ايده وصارت تشرحله كلشي فكيت حلكي وانداريت على سارة الي ماخذه نفس وضعيتي المصدومة غدير مو كالت لحد يحجيله شو امي خرطتله الاول والتالي؟!!

يسمعلهه حمزة وساكت ما علق على كلمة سولفتله امي ان الدكتورة أيستهه وكالت مستحيل بيوم من الايام راح تحمل لا انابيب ولا أي طريقة تنجح وياهه..

-حصة: عليك الله على كيفك وياهه لا تأذيهه حمزة

-حمزة: شنو أذيهه عمة ليش يا يوم اذيتهه اني

-سارة: امي تقصد لا تبينلهه انتَ زعلان انتَ تعرف غدير شتسوي بروحهه

هز راسه وعافنه وراح لغرفتهم، لحكتهم امي وسارة راحت وراهه كلت بگلبي بقت عليه ورحت اركض وياهن، وكفنه بالبوابة وهو دخل عليهه سلم وهي نايمة على الفراش لا كامت ولا تلگته مثل كل مرة..

-حمزة: افاا الحلو زعلان عليه اليوم

بچت ودارت وجهها عنه من الجهة الثانية كعد على السرير ومسد على شعرهه المنثور حچه كلمات ما كدرنه نسمعهه بس واضح اثرت بيهه فوراً كعدت على حيلهه وحضنته بكل قوتهه وانفجرت تبجي..

يمسح على راسهه ويبوس بي ويهمس بأذانهه وهي على بچية الوحدة فحطت وطلعت روحهه، مسحت امي دموعهه على المشهد الرومانسي وانتبهت لوجودنه..

-حصة: ولچن امشن ولن هناك شكو جايات

-سارة بهمس: ماما نريد نشوف

-رقية: يوم انتِ هم شكو واكفة هنا لو عندج جفاف عاطفي

-حصة: امشو عوفوهم عيب امشو

جرتنه وسدت الباب عليهم ورجعنه على كعدتنه المملة عاد لو شايفين شنو راح يصير احسن من كعدتنه هنا والله ضوجة..

شويه وطلع حمزة من الغرفة وجهه معفوس واضح عليه شكد زعلان على وضعهه، اجه كعد ويانه وكال..

-غدير تريدج سارة

هزت راسهه وكامت بسرعة تشوف شبيهه، امي كعدت تسولف وياه عود شويه تغيرله جو بس باله سارح وكل شويه يخلي امي تكرر الكالته اخيراً ختمهه من سألنه..

-ما تعشيتو مو؟ شنو حابين نوصي

-رقية: اريد بيتزا

ابتسم وفوراً اتصل يطلب من بره بعدما كمل ذب الموبايل وعيونه لزكت على باب الغرفة حسيت يريد يخترقهه ويشوف شنو ديصير جوه..

-حصة: ماعرفت غدير شتريد من سارة؟

-لا والله

-حصة: خير ان شاء الله

هذا التوقعناه لكن جان ابد مو خير من طلعت سارة من الغرفة وجهها يتلاطم وصاير اصففر كركم، اطرافهه ترجف وكأن احد هددهه راح يسرق روحهه ويقتلهه....

**

-تينا ضحى كلش مزعوجة اني

-تينا: ليش حبي

-مريم: مادري احس گلبي ما مرتاح

-ضحى: يا ربي شنو شصاير مريم

ماتحملت اسكت اكثر الحسرة ذبحتني صارت دموعي تنزل غطيت وجهي وانفجرت بنص الكافتيريا..

-ضحى: يااا ولج شنو تبجين ليش مرايم منو وياچ

-تينا: سودة عليه مريومة شو باعيلي شبيچ

حسيت بالفشلة بعدما سمعت الهمسات الجايه من كل الجوانب تتسائل عن سبب بكائي بقيت مغطية وجهي مستحية ابعد ايديناتي شجاني ماكدرت اصبر وبجيت هنا..

جرت ايدي ضحى وكشفت عن وجهي مسحت دموعي وعيوني بسرعة وعدلت حجابي، حجيت بحسرة متعوبة..

-مشتاقة لأهلي راح اموت

-ضحى: شنو؟ يا اهل

-تينا: ليش انتِ مو عايشة ويه امج؟

-مريم: اي بس بعيدة عن خواتي مشتاقتلهن كلش اريد اشوفهن

-تينا: ميخالف حبي بعد مشاغل الدنيا بعدتكم عن بعض على عطلة راس السنة رتبولكم جدول حتى تتشاوفون

هزيت راسي ساكتة بدون لا انطق، اخذت قهوتي وكمت اروح اكمل شغلي المتراكم عسى انسى شويه واللتهي..

فعلاً ماحسيت الا على صوت ريتاج تكول خلص الدوام وراح تطلع، كمت وياهه وباوعت لمكتب منار تسائلت اذا استاذ اطلس بعده موجود وكالت اي هو يطلع قريب العشرة..

-شعجب يبقى اخر واحد؟

-منار: متعود ماخذ نمط مسيو محمد

تركتهه ورحت للبيت واليأس والقهر ماخذ من حيلي حصة، گلبي يوجعني مدا اتحمل فراق اهلي صرت اتخايلهم كل مكان واسمع صوت بسملة ونور يجلجل بأذني عيوني تصب وامسح دموعي وارجع اتخايل دعاء تحط راسهه بحضني واللعب بشعرهه الناعم..

وامي.. اوف يا امي مشتاقة لدفو حضنج مشتاقة لروحج الحلوة، مشتاقة لصوت ضحكتج وهي تطبطب على جروحي وتعبي.. مشتاقة اصيح يمة واسمعج تكولين ها بنيتي..

ذبيت راسي على المخدة وصرت انحب وابجي لثانية تمنيت اهلي ميتين على الاقل اعرف ماتو وابتعدو عني خلص بعد ما اشوفهم بس هسة القهر قهرين همه موجودين وعايشين بس ماعرف شي عنهم ولا همه يعرفون شي عني..

احس بجزع وتذكرت الجزع حرام وما يجوز هالشي، مسحت دموعي وكمت توجهت للقبلة حطيت ايدي على قلبي وبلحظة غريبة اجه ببالي ابا الفضل العباس (ع) رجعت دموعي تنهمر ورفعت راسي وكلت بحسرة شگت صدري..

-يا كاشف الكرب عن وجه اخيك الحسين اكشف عن كربي بحق اخيك الحسين..

ذبيت نفس ومسحت دموعي وكملت اشكي لربي..

-يارب اني ماعندي احد هنا اني تعبانة وغريبة لا الناس ناسي ولا الحياة حياتي دا احاول ابقى قوية واكمل بس الجزع واليأس جاي يغلبني.. ربي اريدك انتَ تفرجهه عليه وتسهل كل اموري..

بقيت ابجي هواي وادعي هواي كله بالهمسة والخفية ماريد اقلق نانا عليه، بعد فترة طويلة من البكاء والدعاء تذكرت شي امي جانت تسوي النه هواي..

كمت بسرعة طلعت للمطبخ وجبت كلاص مي لزمت عداد موبايلي وصرت اهمس بحس خافت اسم من اسماء الله الحسنى "يا شكور" على كاسة المي 40 مرة وشربتهه دفعة وحدة..

اتذكر هذا الشي العجيب امي كلما حست بضيق او احنه حسينه بكآبة او هم او غم او ضوجة تكوم تسوي وتشربنه المي وسبحان الله نتغير للافضل وطبعاً هاي رواية من الامام علي ابن موسى الرضا (ع) وحافظتهه على غيبي ما انساهه..

رحت فرشت اسناني ونمت بفراشي غفيت بسرعة وكعدت الصبح مرتاحة كلش ابتسمت منتعشة روحي حالي افضل بهواي من البارحة..

طلعت من الغرفة شفت نانا هستوهه كاعدة كالت رايحة لبيت عمو محمد وراح تبقى لليل، تريكت بسرعة وبدلت وطلعت للدوام..

الشركة اليوم مخبوصة خبص الايفنت مادري شيسمو باجر والكل مشغول بي طبعاً حسب ما شرحتلي تينا هذا يكون مثل الحفل ويعرضون بي المجموعة الجديدة الي تخص الشركة..

اجتمع بينه استاذ حمزة وشرحلنه هذا الحفل شكد مهم وشلون يهم الشركة والعمل وراح يفيدنه هسة وبالمستقبل..

-تينا: فهمنه استاذ شكراً لجهودك

ابتسملهه وهز راسه وراح توقعت راح تتسرسح بس والله بقت صامدة اندارت علينه وكالت..

-تينا: هو صح اني متت من ابتسملي بس لا بعد كافي راح اثگل حتى ما يتحول الموضوع لشي سيء واني الوحيدة الي اتأذه وانجرح

-ضحى: ولج كفووووو هاي تينا الاعرفهه

فرحت وصفكت بيدهه متت ضحك على سوالفهه شكد محبوبة هاي البنية، مشى الوقت سريع واحنه مشغولين منا ومناك شغل مكثف ومتعب بس بداخلي مرتاحة واحس بطمأنينه مريحة..

كملت شغلي ورجعت للبيت نانا هستوهه راجعة من بيت عمو محمد بس شنو لو اطخهه تنفجر چانت مفولة عصبية وراح تطگ من القهر..

-نانا شبيچ شصاير

-ولا شي ما صاير شي

حجتهه كوة وراحت للمطبخ واستلمته جلف ومسح، رحت اباوعلهه وجهها مكلوب والحاجب معكود..

-نانا هدي الشغل من ايدج البارحة نظفتي كله شلحگ يتوصخ

-ميخالف

-نانا.. نانا شو بله باوعيلي

-هاااا مريم هاااا شترديييين شكووووو

رفعت راسهه ونترتهه حيل، مازعلت وانما قلقت عليهه عيونهه راح تطلع من محجرهه ومليانات دموع شفايفهه ترجف مال وحدة حاصرة البچية ومتقبل تطلع..

-مريم: سلامتج بس كلت اسأل اذا محتاجة مساعدة مني لو لا

-لا روحي نامي

همستهه ورجعت تشتغل تشيل وتركع بالجدورة تطلع من الكاونتر وتطبب، عافتهن وكامت تعزل الكاونتر وهي تعزل كسرت ماعونين وكلاص رحت اريد اشيلهن وما خلتني..

-نانا: روحي يمكن الاطلس راح يجي اليوم

هزيت راسي ورحت للغرفة، ماطلعت منهه حتى من اجه الاطلس رغم اصواتهم وعياطهم شدني بس كلت لازم ياخذون راحتهم ميصير اتجسس عيب..

ثاني يوم جان عبارة عن تعاسة بتعاسة كلشي عكس ويانه بالشركة والاطلس ما شفناه واستاذ حمزة لو احد يطخه يلزمه ويشبعه كتل ومسلم نفس الحالة..

تسائلت ريتاج عن الوضع وكالت منار الحفل تأجل لاسباب شخصية تخص عائلة الاطلس محد عرف السبب الرئيسي شنو بس واضح سبب جبير وتعيس هم..

تأجل الحفل لبعد اربعة ايام وطبعاً هالشي چان خسارة للشركة بسبب كثرة المصاريف وهمه حاجزين ومرتبين كلشي بس ما خلو هالشي يأثر عليهم وانطلقت المجموعة الجديدة واخيراً اجه يوم الحفل المنحوس!!

حرت شنو اللبس نانا مو بالبيت وحدي كاعدة اللبس وانزع اكدر بالملابس اخير شي استقريت على قفطان ثكيل لونه وردي طوخ ومرصع بكرستالات لونهن اخضر اشتريته بالجديد نانا اختارته الي وفعلاً من لبسته انبهرتت بشكلي شكد ثكيل ومرتب وفخم..

لبست شال نيود وردي يناسب لون القفطان وحذاء كعب هم نيود، تعطرت بعطر ناعم هادئ واخذت جنطتي وطلعت متوجهه للحفل..

اول مادخلت استقبلوني صديقاتي اللطيفات تينا وضحى اثنوا هواي على ملابسي وكشختي واني هم عجبوني ملابسهن..

حاضرين كم شخص مطشرين بالمكان تينا كالت خلونه نكعد بمكاننه قبل لا يصير ازدحام وبعد كلشي منشوف..

دورنه على طاولتنه وفعلاً شفنه اسمائنه ثلاثتنه سوه ولهيب وريتاج وبعد وحدة هم ويانه.. كعدت على الكرسي ودورت عيوني بالمكان شكد حلو ومرتب وراقي ومنظم..

-تينا: كلش احسنو بأختيار المكان يخبل

-ضحى: بعد ذوق استاذ حمزة لا يعلى عليه

-تينا: مقهورة عليه وضعه مو تمام هالفترة

-مريم: ليش شبي

-ضحى: منعرف بس كلنه ملاحظين شروده وعصبيته الغريبة

-مريم: الله يجبر بخاطره ويريحه

-تينا: امين

بدو الوفود يوصلون والكراسي شبه قبطت بقو عائلة الاطلس لسه ما دخلو حسب ما كالت ضحى همه واكفين بره يستقبلون الناس بالبوابة..

دقايق معدودة ودخل الاطلس، عيوني تعلكت بي ماكدرت اشلعهه هاي اول مرة راح اعترف طالع خيااااال، بدلته الرسمية تخبل جاكيتهه اخضر قاتم مقدف والبنطرون اسود، والاكسسوار الي بجيب السترة والرباط الاسود مرصع بحجر اسود محاوط رقبته چان مثالي..

ايده مليانه خواتم مرصعة بأحجار تجذب العين رغم هواي ولابس بكل الاصابع تقريباً بس المنظر مريح للعين وجذاب كلش وفخم بنفس الوقت..

سحر الانظار بجماله وجاذبيته المعهودة الكل انبهر بي وبكل اصدقائه الي متأنقين ببدلات رسمية واضحة فخامتهه ومتخذين نفس الستايل بالخواتم مليانه ايديهم خواتم تأسر العيون..

ابتسامته ناصعة البياض الي مزينة وجهه الازرك تخبل، عيونه الخضر يلمعن ويه الاضوية وانفه الاسباني الطويل مادري شنو احجي عنه يعني هو خشم مابي مميزات بس يخبل انتو فهموني بعد..

اثناء تأملي لزوجي المكروه نززني صوت تينا وهي تكول..

-اجت الحية

درت عيوني على الجهة الي دتأشر عليهه واذا اشوف حمزة ديدخل للقاعة وبيده غدير، فزيت من مكاني مصروعة انتبهو البنات بس ماكو مجال للتبرير فلتت من المكان بسرعة وصرت اتختل اخاف تشوفني وتعرفني..

وكفت وره عامود عريض وصرت اراقبهم من بعيد كمت اللطم من شفت خالة حصة وعمو محمد يدخلون سوه ووياهم بنات ثلاثة ماعرفهن يبوو يبووو عليج يا مريم جاية العائلة الكريمة كلهه اليوم..

-كضيتج

فزيت مرعوبة بلعت العافية وياهه صوتي، ضحك وكال..

-اسم الله

ذبيت نفس وحطيت ايدي على گلبي ومعدتي احس راح اتقيء..

-علي: چا هو هيج تخرع العالم شبيك

-عمر: شمدريني الآنسة هيج تخترع بسرعة

-علي: ديلا يلا

-عمر: شلونچ مريم، شنو وينهم جماعتج شو واكفة على صفحتنه تره ما نرضى

-علي: اي ما يصير شكو جايه يمنه

-مريم: لا العفو ماقصد والله مادري هذا مكانكم

-عمر: وما تشوفين اسمائنه على الطاولة لو صار عندج ضعف بصر فجائي

-مريم: لا والله مانتبهت صدكني جنت...

-علي: خربتي الاول والتالي مريم خربتي دخوليتنه المميزة شلون هسة اخوي شلون نحل السالفة

-عمر: نركص سلو بوية بلكت الله الناس تنتبه لوجودنه

-علي: كون انتَ تسألني وتجرني للقاعة استحي وحدي افوت

-عمر: بس مو تعوف خصري عليك علي

-علي: لا شنو اعوف خصرك بس مو تعثر وتفضحنه بين الوادم

يسولفون ويتناقشون واني صافنه عليهم، يمكن ما منتبهه على كلامهم بقدر انتباهي لشبههم الفضيع!!

-مريم: اني اسفة أساتذة صدكوني مو قصدي اخرب اجوائكم

-عمر: بعد خربتيهه راح نروح لخطة باء ونركص سوه

ضحكت وضميت وجهي مدا اتخيل الموقف، ضحك علي وكال بلطافة..

-علي: نشاقيچ يابة نركص سلو شنو دخولية شنو، المكان مكانج اخذي راحتج وتونسي

-مريم: يعني هذا مو مكانكم؟

-عمر: اي مكاننه بس اخذي راحتج اذا تحبين تشاركينه بالكعدة هلا بيج ندفر مسلم وانتِ اخذي مكانه

بنفس اللحظة دخل مسلم على الخط سمعهم غمهم مثل النسوان وكال..

-مسلم: گبوور ما تلف شكولاتكم ونخلص

-عمر: مسلم اخيك هذا هم قاط لابسه طالع چنك بطل عصير

-علي: عود هو يريد يصير غير وجاي ينسق خاب طير

ابتعدت عنهم شويه استحيت شكو حاطه روحي بنصهم، بقيت واكفة واسمع لسوالفهم وفاطسة ضحك مسلم لابس بدلة رسمية لونهه بحري كلش حلوة وواضح الشباب غيرانين منه لان طالع حلو..

-علي: مسلم تعال شو اشوف هذا شنو القميص يا لون بنزركي؟

-عمر: برتغالي هذا چنه

-مسلم: شباب مو وكتهه غطو عليه اريد افلت

-علي: اهه بدينه بسوالف المكسرة خوية عيببب لا تخزينه كدام العالم

-عمر: بشرفك امي جايه لا تخليهه تشرنه على الحبال وتشهرنه بصوتهه اليليعلع

-مسلم: بس هالمرة بداعة الهوهو

-علي: لا ماطول حلفتني بالغالي اله اغطيلك روح والهوا بظهرك

-مسلم: بشرفكم مو احد يحس

-عمر: دروح منو بحالك چنك بريعصي لابسلي ازرك يخاف من الحسد

مانتبهت لباقي كلامهم وضليت مركزة ويه الطركاعة الي لفت فوك راسي وهي دخول نانا للحفل!!

ماتحملت ابقى اكثر هذا هو قربت نهايتي راح تعرف كلشي قررت اشيل چوالاتي وارجع للبيت، لبست جنطتي وردت اطلع وصاحتني جميلة..

-جميلة: هاا هاي وينج شو ماكو ما تبينين

-مريم: هلو جميلة اني طالعة هسة من رخصتج

-جميلة: ياا وين مسيو حمزة كال راح يعرضون الكولكشن الجديد ميصير احد يطلع

-مريم: اذا احد سأل عني كوليلهم مرضت فجأة وراحت للطبيب

-جميلة: منيلج مريضة شنو هذا الكذب

-جميلة!! لازم اطلع ضروري حبابه لتحجين لاحدد

-ماكدر اني اذا يسألوني اگلهم الحقيقة ماكذب

-مريم: جميلة لا تموتيني الحالة ضرورية وطارئة صدكيني اني مطالعة اتونس عندي شغل مهم!

-اي روحي بكيفج بس ماغطي عليج اكلهم مريم طلعت

دكيت رجل بالكاع راح تموتني هالبنية، بقيت واكفة بالبوابة وعيوني تتابع نانا وخالة حصة واكفين قريب الستيج.. قررت اتقرب وابقى اتختل لعد شسوي هاي الحية جميلة هسة تفتن وتنفتح العيون عليه..

تقربت وكعدت بطاولة بالاخير صايرة استبعد احد يكدر يلمحني او يميزني، حطيت ايدي على خدي واخذت اتأمل الجمال والابداع.. بدو يعرضون المجموعة الجديدة خاطفة للانفاس..

الاطلس شركة تبدع بصنع مجوهراتها شكل مميز ومغري وجودة عالية، عدهم مختلف انواع الذهب ومختلف الاحجار الكريمة والغير كريمة.. عندهم ورشات عمل صايره بالسوك المغربي الجبير ومعامل لصنع هاي المجوهرات واكيد عدهم شركة الي تهتم بالشغل الاداري..

كل الحاضرين مدندشين بالمجوهرات بعد هذا شغلهم وترويجهم يكون بهذي الطريقة.. سحرني الجمال واخذني الوقت واني اتفرج على الشاشة الي دتعرض بشكل مباشر شنو ديسوون امام المنصة..

طارت عيني على مكان كعدت غدير وواضح ذني خواتهه لان يشبهوهه بس الثالثة الي اجت وياهم ماعرفتهه منو وهسة اساساً اختفت بس وين يا ترى...؟

-شو كاعدة وحدج

ابتسمت ورفعت عيوني اباوعله..

-مريم: هوسة كدام كلت اكعد هنا واشوف براحتي

-عمر: راح تفوتج رقصة السلو لحكي حصليلج احد يراقصچ

-مريم: لا لا لا شكراً

ضحك وهز براسه بقه يباوع للشاشة وواكف بصف طاولتي، شتت تركيزي صوت ضحكات عاليه من ورايه ماهتميت بس واضح عمر اهتم.. اللتفت يشوف شنو وعكد حاجبه مستنكر الموضوع وبشدة..

بدون لا احجي انداريت اشوف شكو واذا اشوف استاذ مسلم واكف بزاوية قريبة من عدنه ويه وحدة ويضحك بصوت عالي ورايح لغير عالم هاي الوحدة شايفتهه.. اي نعم طلع تحليلي صح...

-عمر: مسلم!!!

انتبهو للصوت وثنينهم ركزو انظارهم علينه، راح عمر معصب الهم مادريت شنو السالفة لحدما بدو بالمناقشة الحادة..

-عمر: شكو شجاي يصير هنا؟؟ اسيل انتِ ليش هنا؟؟؟

-مسلم: على كيفك ابني شبيك تخبلت ثانياً شعليك بـ اسيل انتَ؟؟!

-عمر: اسيل شعندج هنا شنو مناسبة وگفتكم؟!!

-اسيل: اني.. اني اجيت..

صارت تبلعم ومتعرف شتحجي لا ارادي كمت من مكاني رجليه اخذتني قريب منهم صراحة خفت على البنية لان عمر مخنزر ومسلم متوتر وصاير اعصاب..

-عمر: امشي روحي هناك يله بسررعة

ركضت بسرعة تريد تروح ولزم ايدهه مسلم وجرهه لصدره، كممت حلكي واضح راح تصير مجزرة هنا..

-عمر: عود انتَ على شنو ناوي ولك فهمنييي

-مسلم: وانتَ شعليك

-اسيل: حبابين الله يخليكم لحد يتعارك ويجذب الانظار علينه

-عمر: امشي وياي انتِ

-اسيل: عمر لا كافي فدوة، مسلم هدني خليني ارجع عند البنات

-مسلم: ماكو ما اهدج وشتردون تسوون سووا ما يهمني شي

-عمر: تعرف لو ابوك افتهم بهذا الموضوع ينحلط!!

-مسلم: شكو ينجلط ليش تكبر المواضيع انتَ

-عمر: اترك بنت العالم مسلم لا تورطهه وياك اذا ابوك عافك حمزة ما يخليك وتصير بالنعل مسلممم

-مسلم: اخوي اني اعرف شلون افهمه لا تدخل عمرر روح حير بمشاكلك

-عمر: تعرف هو صوچي شايل همك بس والله انتَ ما تنمس بكلمة هاي المسكينة راح توكع بيهه

تركهم وراح وهمه بقو على وگفتهم البنية تبجي ومسلم يمسح بدموعهه ويسكت بيهه، افتهمت مسلم وهاي البنية على علاقة وهالشي ميهمني ولا ثار فضولي بس الي اريد اعرفه هاي البنية شتصير منهم وليش عمر هيج تخبل من شافهم سوه؟!..

ما احتاجيت وقت جبير لحتى افتهمت البنية اسيل رجعت عند غدير والبنات وكعدت وياهم على الطاولة يجوز تصير بنت عمهم او اقاربهم ما طخ ببالي ولا اجه ببالي غير هيج بس الحقيقة ابد ما جانت هالشي..

جريت كلاص عصير اشرب واكل من المقبلات المحطوطة على الطاولة متت جوع، اخذني الوقت وكملت الماعون كله واني انتظر يخلص هالحفل التافه..

طلعت موبايلي واجه ببالي اتصل بأبوية اعرف هو حاضرني بس عسى ولعل احصله والصدمة جانت فاتح الحضر عني..

-الو الو بابا؟؟

-هلو مريم

-مريم: بابا بابا هذا انتَ ابوبه احمد؟؟

-احمد: اي، شلونچ شلونه رجلچ

-مريم: انتو شلونكم بابا امي خواتي شلونهن؟؟

-زينات يسلمن عليج

-خليني احاجي وحدة منهن فدوة مشتاقتلكم كلش

-اني بالشغل عود من ارجع اتصل بيج

-اي عليك الله مو تنسى بابا فدوة اني ادك عليك حتى اذكرك مو تحضرني الله يخليك

-اني اتصل بيج بالوقت المناسب لا تتصلين عليه ابد

-ماشي تمام بس مو تنساني حباب

-ما انسى

سد الاتصال وره هالكلمتين متت من البچي كلني ارجف واتذكر نبرة صوته اتذكر ابوية القديم وابجي مو هذا الي هسة يحجي وياي مشتاقة لاهلي ومتمنية شوفتهم اكثر من أي شي بهاي الدنيا..

قاطع بكائي الصامت صوت بلبلة صارت قريب البوابة مسحت عيوني وشفت جايين مجموعة من الرجال والحماية مدا يقبلون يدخلوهم ماهتميت هواي ورحت اريد ارجع لمكاني القديم حتى لو يشوفوني اهل الاطلس ميهمني..

-شبيچ؟؟

رفعت عيوني وتفاجأت من شفته الاطلس گبالي وعيونه تراقب ملامحي بحيرة..

-الاطلس: جاي تبجين؟ منو وياچ اكو احد زعجچ هنا؟؟

-لا لا استاذ محد زعجني

-چا ليش تبجين

-الاجواء حلوة

-اذا الاجواء حلوة تبجين؟!

-اي

-خاب مو عيون عندج بواري كل ساعة وفاتحتهن

-هههه استاذ

ابتسم وصار يدور بعيونه بالمكان تقرب مني وانطاني الكاسة الي بيده وكال بهمس..

-هذا الج

-الي؟

-اي انتِ مو ما تشربين كحول؟

-عزه بعينيي ليش المشروبات كلهن بيهن كحول هنا!!

-اي ليش ما تدرين؟

-صخاام الصخمج يمصخمةة استااذ اني شربت كلاص كامل عصير بس ماحست بشيي

-واني اكول شبيهه البت تطوطح

-لا عليك القران صدك شربت؟؟ يعني شفتني اتطوطح حباب احجي الحقيقة

-يا يوم مجذب اني

اخذت الكلاص من ايده وشربتهه دفعة وحدة آملة يروح مفعول ذاك العصير عيوني مدمعة شنو هالاثم الي ارتكبته اليوم..

-الاطلس: هم رجعت تبجي

-مجنت اعرف بي كحول

-ولج ليش تبجين

-مريم: (لعن الله الخمر وغارسها وعاصرها وشاربها وساقيها وبايعها ومشتريها واَكل ثمنها وحاملها والمحمولة اليه)

-مافهمت شنو هذا

-هذا حديث ورواية معروفة استاذ ميصير هيج والله ميصير

-ههههه

نظرتله مزعوجة كلش شكد گلبه بارد هذا وممهتم ثانياً شلون يقدمون خمر هنا ميستحون بعد عيني مسلمين طمو روحكم احسن..

-الاطلس: شبيچ شبيچ راح تاكليني

-مريم: اكلك؟

-ما تشوفين نظراتج الحاقدة حرگتيتي حرگ

-من رخصتك استاذ

تركته اريد اروح ورجع صاحني..

-اشاقيچ مريم يعني تتخيلين صدك نحط كحول بكل المشروبات

-والله؟؟؟؟

-اي

-يعني هسة جنت تجذب عليه

-ماجذبت مجرد داهرتچ

-مداهرة مو حلوة استاذ اني اخاف من هاي الشغلات

-ادري بيج منتبه عليج شكد ملتزمة

-انتَ مو ملتزم ومتشرب عادي

-منو كلج اني مو ملتزم

-هههاهاهاها ضحكتني

-ههه غير ضحكة هاي

انتبهت لنفسي وكممت فمي ومتت ضحك هو يضحك واني اضحك وناسية روحي، عدل جاكيته وكال..

-اني مو ملتزم بس اسوي الواجبات

-شنو الواحبات بنظرك؟

-صلاة، صوم وغيرهه من الواجبات

كلت بثقة واني احط الكاسة على الطاولة..

-حريمة الي يسوي واجبات ويرتكب محرم يحرگ الاخضر واليابس

-مافهمت؟

-مو عليك دا احجي كشكل عام

-الاطلس: اها

-مريم: استاذ

-نعم

-ليش واكف هنا روح شوف الناس

بهت يمكن ماتوقعني اطرده بهالطريقة حك لحيته وكال..

-شفتج تبجين وكلت لازم اسأل عنج

-مريم: شكراً لسؤالك

-الاطلس: سولفت ويه الكل مو عبالج اجيتج بس الج

-مريم: اي كلش زين

-اي

بلع ريگه وسكت شكله مزعوج من ردي او يمكن توقعني اموت روحي وادگهه بالصوندة وانقهر، ردت اسأله عن شي بس قاطعتنه دارسين المقرفة..

-وينك عيني ادورك ما لكيتك

-الاطلس: هنا اسولف ويه الموظفين

-نورسين: ها.. هلو حبي

ابتسمت ومدتلي ايدهه تصافحني، بادلتهه المصافحة وتعارفنه، كالت..

-نورسين: شكد لطيفة، اطلس كلش حلو وظفتو محجبة وياكم

-مريم: ليش محسسيني المحجبة بريعصي ووظفو؟

فرط ضحك الاطلس وهي صفنت بوجهي ماعرف شبيه وليش حجيت بهالاسلوب الرديء بس كرهت هالجملة ونار اشتعلت بصدري واني اشوفهه شلون تتماوع وتتمايل بفستانهه المفضوح..

-مريم: اعتذر چنت اتشاقة وياچ

-نورسين: هاا ههه هه اي، يله بيب نروح

-الاطلس: اي امي هناك ترديج

-نورسين: تريدني؟ شعجب؟

-الاطلس: مادري سألتني عنج كالت ليش ما اجت ام نورسين وياهه

-نورسين: يله لعد اروح اشوفهه باي مريم سعيدة لان اللتقيت بيج

صوتهه مايععع ومتصنع لدرجة تزهگ، هي مبينه حبابة بس ماحبهه ماحبهه..

-الاطلس: طالعة جميلة اليوم

-مريم: شكراً استاذ

-الاطلس: انتِ كل يوم جميلة بس اقصد ملابسج حلوة اليوم

-ادري فهمت عليك شكراً

هز راسه وبقى صافن بوجهي ماعرف شبي بادلته نظرة مستفهمة ابتسم وكال..

-الاطلس: مهما كان الموضوع اتمنى ما تبچين مرة ثانية

مجاوبت بقيت ساكتة وهو كمل..

-محد يستاهل تبچيله

-فعلاً

-شلون راح نكدر نغير مزاجچ

-استاذ صدكني اني بخير

-اتمنى تكونين بخير

ابتسم وترخص مني بقيت اتابعه بعيوني شكد كلاس على كولة تينا ماعرف شنو القصد منهه بس يمكن قصدهه حباب او وقور مادري المهم هو كلاس..

كعدت على طاولتي القديمة بعدما تسائلن البنات وين رحت شويه وصارت هوسة تشتت نظرات الاطلس وانتبه للبوابة راحلهم وعيون الكل تركض وراه..

-تينا: شصاير مريم عرفتي شي؟

-مريم: لا والله

كذلك ما استغرقنا وقت طويل حتى نعرف منو اجه چانو جايين المصخمين الطرگاعة..

-تينا: عزززه ذولة شركة شمسون!!

-ضحى: اجو جماعة معجون شكد مكروهين عوووع

-تينا: يعني هيج صلافة بحياتي ما شفت شنو هاللعبان نفس شكو جايين حتى يبوگون ويشمشمون افكار لمجموعتهم الجديدة!

-مريم: ليش دخلوهم همه مو شركة منافسة شكو جابوهم للحفل؟!

-تينا: تطفل حبي محد عزمهم بس هذا الاجرب ابو فاهد لازم يجي ويمد بوزه يشوف شكو ماكو

تأفأفت ضحى ضايجة ومزعوجة منهم وتينا وياهه، بقيت اراقب الوضع كله تخربط وتوترت الاجواء كلش الاطلس وجهه تغير لونه وحتى عمو محمد واضح بصعوبة كاتم عصبيته..

-تينا: اني ضجت رايحة اكوم افتر بالحديقة الوره تجون وياي بنات

-مريم: لا ماروح اني تعبانة اريد ارجع للبيت

-ضحى: هلوو منو يخليج ترجعين حبي تعالي ويانه تعالي

جروني وياهن حتى نروح للحديقة الخلفية حلوة وجبيرة..

-مريم: والله زين جبتينه هنا تينا عندج ذوق

كعدنه على مسطبة وهسوني فاتحة چيس حب الشمس الي جايبته ضحى وقاطعنه صوت صفير..

-متطورين يابة

خزرته تينا متعصبة اما اني استغربت من وجوده هنا شجابه هذا؟..

-متطورين صاير محمد يوظف محجبات وياهم

-تينا: مسيو محتاج شي؟؟

-سلامتج يحلوة بس يمكن انتِ الي رگعتي واحد من رجالي بالحذاء مالتج مو؟

-تينا: اي اني عندك مانع

ضحك فاهد وصار يضفك بيده يحييهه، ضجت منه هذا شعنده هنا وشكو جاي ورانه مجنت اعرف مخطط وعنده نية ثانية..

-فاهد: احم.. شنو اسمج انتِ آنستي

-ضحى: مسيو فاهد شتريد من البنية؟!

-فاهد: ابد بس شفت الاطلس واكف يحجي وياهه وعيونه هاااايمة بيهه

اللتفتو عليه البنات ثنينهم بنفس الوقت، حركت راسي نافية لكلامه هنه افتهمن عليه ورجعت تينا تكول..

-شتريد مسيو فاهد ممكن تختصر

-فاهد: انتو ليش شاديهه عادي اجيت اسأل على اسم صديقتكم المهمة جداً لو تغارون على صديقتكم

-تينا: اسمهه مريم اكو شي بعد؟

-فاهد: بالجديد متوظفة انتِ مشايفج من قبل

-مريم: راح يصير 3 اشهر

-فاهد: حلو حلوو قوية جابت راسه

-ضحى بهمس: بنات امشو نكوم منا

أيدت الفكرة وكمت واذا اسمعه يضحك بأستهتار مقرف اللتفتنه عليه ثلاثتنه من كال..

-ههههههههه ليش كل اليشتغل بشركتكم جبان ياخي اريد ناس تونس ماكو كلهه مبومة وتتلاطم

-تينا: احترم نفسك رجاءً انتَ منو شايف روحك؟!!

-مريم: عوفي تينا مالنه خلك نتناقش ويه هاي النماذج

-فاهد: ليش ليش يا ام عيون حراگة ليش تجرحين مشاعري

-ضحى: كافي ياخي ابتعد عنه وخرر

جرتني وجرت تينا ومشت بينه ونسمع ضحكاته تجلجل بالمكان هذا مو طبيعي يضحك ويه روحه يخرع..

قبل لا نرجع للقاعة اللتفتت تينا تباوعله وتصنمت بمكانهه فتحت عيونهه ممصدكة الي دتشوفه عكدت حاجبي متسائلة وانداريت على ضحى شفتهه ماخذه نفس وضع تينا المصدوم الغريب.....

**

-خواتي طالعات كلش حلوات اليوم مو بله

-حمزة: اي صح

-غدير: هههه باوع الصرصور رقية عود كاشخة كوة اخذتهه للصالون هي وسارة اسحل بيهن

ابتسم وهو يباوع لـ رقية وكال بلطافة..

-حمزة: لطيفات البنيات

-غدير: تحبهن حمزة

-حمزة: چا شلون

-غدير: تخاف عليهن هواي وهالشي مريح بابا يكول عدهن ظهر يحتمن بي من الاطلس يغيب

-بعيوني انتِ والبنات

ابتسمت ومالت براسهه على كتفه، همست بصوت واهن كسر قلبهه..

-غدير: سارة تخبل

-حمزة: من يومهه

-غدير: بس ماعدهه ثقة بنفسهه شكد احجي وياهه واكوللهه مابيج عيب بس جيب اليقنعهه

-حمزة: الاصهب مو عيب غدير لازم تقتنع بهذا الشي انتِ اختهه حاچيهه خليهه تحب روحهه وتحب شكلهه

-غدير: هواي حجيت ومن اكلهه شبيچ وشعرج احمر يخبل تكول اي رموشي هم حمر وحواحبي هم حمر صابغيني صبغ

-حمزة: تؤ تؤ ما يصير هذا الحجي والله ماشوف بيهه عيب بالعكس جميلة وشكلهه مميز

-غدير: صدك

-حمزة: اي والله

-غدير: تعجبك؟

-شنو

-سارة اختي تعجبك؟

-شلون يعني تعجبني

-حمزة صارلنه سبع سنين متزوجين

-اي؟

-غدير: وما نسيتهه

جفل وملامحه جمدت النفس صار گوة يصعد وينزل عنده، عدل گعدته وهو يبعد راسهه عن كتفه..

-غدير: متزوج اختهه سبع سنين ولسه عيونك وگلبك يركضون وراهه

-حمزة: شنو؟؟ شنو هذا الحجي غدير شبيچ انتِ شنو حلمانة!

-لا تخجل من الموضوع انتَ ما غلطان هاي مشاعر ومتكدر تسيطر عليهه

-اشش اششش لا تحجين زايد شبيچ انتِ ما تكليلي شبيچ!!

-حمزة صوتك نصي احنه بمكان عام

-انصي صوتي من يرجع عقلج براسج وتحجين حجي بي خير

لزمته من ياخة قميصه بطريقة حنونة كدام الناس وهمست وعيونهه تقطر دم مو دموع..

-اعرفك تحبهه، واعرف تتمناهه، واعرف تشوفهه احلى البنات، واعرف تتخيلهه بمكاني، واعرف سنين وسنين انتَ تعشقهه وهي ببالك، واعرف تتكطع الف وصلة من يجيهه خاطب تظل سهران الليل كله وتبقى بـ هم وغم الى ان ترفض سارة، مدا تكدر تنساهه ولا تكدر تتخيل يجي يوم واحد يكون وياهه غيرك ولا تكدر تواجهني ولا تواجه نفسك بهذا الشي..

-غدير

-حمزة طلگني

-تخبلتي انتِ!

-غدير: اخذهه بدالي واني اضمنلك موافقتهه....

يتبع ♠️💸.....

• ━━━━━━❪♣❫━━━━━━ •

هالمرة اني اكتبلكم توقعاتي كـ متابعة وقارئة ♥️

حسيت بأحساس غريب ماعرف شنو شعور غدير وهي تكول لزوجهه تزوج اختي؟ 😬 انتو شنو رأيكم

بالنسبة لـ مريم والاطلس احس الاطلس ممتأكد من مشاعره او عنده تردد ناحية مريم.. ممكن انعجب بيهه او جذبته شخصيتهه المرحة ولسانهه الطويل 😂 وما اللومه صراحة كُلش محبوبة مريم بس ماعرف شلون راح تصفى بيناتهم وشنو راح يصير.. (رأيي كـ قارئة)

نانا 😀 ماحجي شي اريدكم انتو تستنتجون شنو سالفتهه..

مسلم واسيل.... 🥲🥲🥲🥲🥲🥲🥲

احبكم كُلشششش هواية وشكراً لتفاعلكم وحبكم وحماسكم وتصاميمكم لتنسون التصويت منكم استمد الطاقة والواهس للكتابة 😻💋