تحميل رواية «الامارة» PDF

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

━━━━━━ ♛ ━━━━━━

طابور من الرجال الوقورة يقفون على ارجلهم، متزينين بـ هندام عربي عراقي اصيل دشداشة، عگال، شماغ واخيراً البشت يغلف اجسادهم الضخمة، عطور رجالية امتزجت بين المسك والعنبر والبخور تفوح مع احتكاك مصافحة اياديهم دخولاً للديوان الضخم..

-شيخ عثمان: حَي الله النشامة، حَي الله زلام الإمـــارة، حي الله الشيخ وزلام الشــيخ

-شيخ علي: الله يحييّ اصلكم شيخ عثمان

-شيخ عثمان: نورتوا الغربية يا بعد العين.. اللهم صل على محمد والهِ وصحبهِ، على راسي جيتكم اليوم، امارة بَني [اسم الامارة] ترحب بيكم يا هلا يا هلا

اخيراً توزعنا بالديوان كل عشيرة بجهة گاعدين والشيوخ بالوسط، محادثة بسيطة دارت بينهم بالخنسة وهنا اجه دور ابوي "الشيخ علي" يسوي روحه مابي يسولف وأشر لأخوي يبدي الگعدة بـ طريقته بس طبعاً هالدوالغ مو علينا نعرف نية الحجي شنو، جلى اخوي المهيوب صوته وبحنجرة قوية جلجل حِسه بالمكان يجذب انتباه الجميع..

-جمعتنا اليوم على حب فحل الفحول، ابن عم الرسول، بعل البتول، امير المؤمنين، يعسوب الدين، الانزع البطين، الاورع المبين، قائد الغر المحجلين، ازهد الزاهدين، حبل الله المتين ، امام المعصومين، امام المتقين، الضارب بسفينَ، الطاعن برمحين، فارس بدر وحنين، ابو الحسن والحسين، علي ابن ابي طالب..

صمت وبس صوت طگطگة المسابح تنسمع تتداخل ويه نبرة صوته، ابتسمت على نظرة الفخر التنبع من عيون ابوي وهو يعاين ومركز بكل حواسه ويه كلام اخوي "الامــير علي" وسعادته من بدأ المجلس بذكر امير المؤمنين علي ابن ابي طالب (ع)..

جايبينا تراضي بين الطرفين بسبب حالة اعتداء ولد شاب من الغربية على بت يتيمة من محافظتنا وجاية هنا زيارة لبيت عمها، صارت گعدة عدنا وهسة عدهم رادو يلتمون السالفة ويغلسون لولا نخوة عم البت لأخوي الامـير علي، وصلت السالفة لأبوي والشيخ ما تحمل يكض روحه وگلبها گلاب على روسهم ..

-سيف: قرار النفي من المحافظة ظلم يالامير خلي يتزوحها ويستر عليها وفضت راحت ليش كل هالتعقيد

-عم البنية: البت ما تريده شلون؟ نجبرها؟؟

-سيف: هم باعت شرفها وهم ما ترضى تتزوج وتنستر والله خوش حچي هذا

-الشيخ علي: اوزن چلامك سيف لا تخلينا نغلط وياك حگ البت يرجعلها ويرجع شرف عمها مثلما راد الامير وهيچ احنا نتصافى

-سيف: لا تكبرون راسها شيخ چا الوليد گال يعقد عليها شتريد بعد!

ثااار الديوان وعم البت صار يضرب على وجهه وصدره ميت من الحرگة والقهر، وگف بنص الديوان وصاح بعلو صوته..

-اجيتك ونخيتك يا الامير! اجيتك شچاي ومكسور رگبة هاليتيمة امانة عندي وانلعب بيها وبشرفنا ما مرچية منك ترجعني خايب

-الامير علي: وعلي والسماني علي وشيبة ابوي علي وراس اخوتي الثمانية علي وحگ الرباني على حب علي وحگ الله ومحمد وعلي ما تطلع من هالديوان الا وانتَ راضي يا اخوي وعرضك عرضي وبت اخوك خيتي وتاج راس الحثالات...

انلصم الكل على حلگه بعد كلام الامير وانلاصت عليهم بالزايد من تدخلو اخوتي علي الدر و علي البدر وابوي بس ساكت ويتأمل خلفته التشگ شگ وهيچ انكتب تقرير گدام الشيوخ كلها البت متعرضة لاعتداء والولد انكسر ظهره بفصل وشرطوا يتزوجها ويستر عليها بس اهل البت ما رضوا ونفوه هو واهله من المحافظة..

ترحيب، تهليل، تجمهر، ابتسامات لا متناهية تعبنا وانشگت حلوگنا رجعنا بوسنا واحد واحد ورحبوا بينا من جديد، عدلت گعدتي وعيني وگعت على اخواني وزوج المشاكل الحايرين بعگالهم واحد يعدله للثاني ويتناترون..

-علي السور: لك لا مو هيج ابن الاوادم اريد اطلع هيبة نفس علي التقي

-علي النور: خاب گمم هو انتَ چنك سلبوح سيان وينك وين الهيبة

-علي السور: دبرني نور بشرفك يلا خوية شد حيلك انتَ تستطيع انتَ الافضل انتَ الاول انتَ الـ...

-علي الحق: انتَ الراح تنكتل

-علي السور: حق تعال انتَ تعال محتاجك خوية بشاربك انا هذا الشمبانزي ما يفيد

-علي الحق: نعالي وينه نعاليي

-علي النور: لا دخييلك مو گدام الوادم تطيح هيبتنا

-علي الحق: صوتكم لا اشگ حلوگكم لا تفشلونا

-علي التقي: خاب حلگي الي انشگ وتشنج من الابتسامة شوكت يفضوها

-علي الحق: عوفك من حلگك ذولة زوج القنادر شكو جايبيهم خزونا؟

-علي التقي: اسكت خوية غير الشيخ سحلنا من رگابنا چنه طليان هايته زلمة اليعترض وما يجي

-علي السور: اريد اعلق بس اخاف انكتل

-علي الحق: ظل خايف لان راح تنكتل بكل الاحوال

سكتنا كلنا ويه خزرة اخواني الكبار بأختصار معناها "انچبو لا احشي نعال شيخ عثمان الخايس بحلوگكم"..

-شيخ عثمان: وين الغدا وول گم حضرو

-شيخ علي: واصل غداكم شيخ ورانه طريچ نرد گبل لا تظلم الدنيا

-شيخ عثمان: لا شيخ لاا ما مرجية منك هاي.. الاميـر علي اشنو ضريبة اليرد العزيمة عدكم؟

ابتسم الامير واندار على ابوي وگال..

-الاميـر علي: اليرد العزيمة يتحشم مربع

-شيخ عثمان: هااا وهاي طلعت من وليدكم..

ضحك ابوي وسداها وياه نحشمهم مربع والمعنى منها نعزمهم اربع مرات لان ردينا عزيمتهم وخجلنا شيخهم، تفرقنا نطلع ولزم شيخ عثمان ابوي يحچي بصوت ناصي..

-شيخ عثمان: شوكت ناويها شيخ؟

-شيخ علي: بعد بعد ينرادله گعدة الامير

-ما مقتنع؟

-قافل بس مو بكيفه مچانه هذا

عدلت شواربي بأيدي ولميت دشداشتي ومشيت متوجه لأخوتي الكبار، بس شفت الامير علي واگف مغندب ضايج لان ابوي حطه بموقف محرج للمرة المية وخلاه يبدي الگعدة ضحكت وكضيته من معصم ايده وحچيت بيني وبينه بهمس..

-علي الحق: گرب يومك يخوي يعينك الله......

**

"بغداد الساعة 1:10 ظهراً"

جهنم.. وكأن باب من ابواب السعير مفتوح لتبخ السماء شُعلات نار حارقة، شمس ساطعة ملتهبة تضرب بأشعتها الرؤوس.. هواء معدم مليء بـ ثنائي اوكسيد الكاربون تجاهد الرئة تنفسه للصمود..

ذبيت نفس اللهث روحي خارطة من الحر وعيوني انعمت من الشمس، خرب روح اهلك اياد الطينة غير يفضها ويخلينا نروح مو راح اموت هنا!

-اياد: انتِ!! اي اي انتِ ام التراكسود البيجي وين بالچ؟؟

فزيت على صوته يأشر عليَّ ورافع حاجبه السميك، غلست اسوي روحي ما منتبهة ورجع يأشر عليَّ ويحچي بغضب..

-اياد: ام البيجي!! هاي شسمها ام البيجي انتِ بابااا وياچ احچي شبيچ

ضربتني زميلتي بعكسها تنبهني ديحاچيني يبووو ولچ اعرف اعرف ديحچي ويايه اني ماريد اجاوب بس تنازلت ورديت عليه بصوت مسموع..

-تحچي ويايه دكتور؟

-اياد: اي وياچ وين بالج بابا؟ عليمن صافنة؟؟

-عليك

عضيت لسان وره چفصتي والطلاب كلهم گامو يضحكون وهو هم ضحك وخفاها بسرعة، كتف ايده لصدره وگال وهو يراوغ بحچايته..

-اياد: اذا بالچ يمي هسة شنو گلت؟ عيديلي الشرح

بلعت ريگ متوترة وعيون الطلاب كلها عليَّ منتظريني اجاوب عمت عيني ضروري افشل روحي واسرح بعقلي، تنهدت خجلانة وگلت بدون تفكير..

-چنت تشرحلنا على الاصابات من تصير وشلون نعالج الوضع

صفن وباقي حاجبه مرفوع ما نزل، عيوني بعيونه منتظرته يطردني من المحاضرة بس ما سواها! ما سواها والله ما انطردت وانوب هز راسه راضي بجوابي معناها جوابي صح مرحححى..

-اياد: انتبهي عيوني ماريد تصفنين على شي معين بعد

رجعو الطلاب يضحكون بس معليه بيهم ذولة السفيهين زفرت نفس مرتاحة ما اهتميتلهم وبقيت مركزة لنهاية المحاضرة، كملنا لميت اغراضي ولبست الكلاو على راسي الشمس تصگع دمرتني ورحت اهرول للوكر اخذت كتبي وجنطتي وطلعت منا واستوقفني صوته..

-ها عيني وين رايحة؟

اللتفتت وبعدني احط الكتب بجنطتي انخمش گلبي من ابتسم وحط ايده بجيوبه واجه يوگف مقابيلي..

-مو اتفقنا اني اوصلچ؟

-على يا اساس توصلني؟

-على اساس اني گرايبچ

-شكراً دكتور محسن ما احتاج احد يوصلني من رخصتك

عفته اهرول ورجع صاحلي ضايج..

-مو وياچ اني!

انداريتله جزعانة شوكت ناوي يفهم تعبت..

-دكتور محسن گتلك اهلي ميقبلون احد يوصلني وانتَ تعرف وضعي ليش مُصر؟

-اولاً بطلي من هاي "دكتور" صيحيلي بأسمي ثانياً اني مو غريب عليج اصيرلچ من بعيد ليش تتهربين بكل مرة نتشاوف؟!

-لان زوجتك هنا! البنية راح تموت من القهر حرام عليك شوفها شلون تباوعلنا من بعيد

-انعل ابوهاا لا تكفريناا بيها!!

-اشششش صوتك يمعود لا تفضحنا

اضرب على حلگي خفيف حتى يسكت وعينه الصلفة لزگت هناك، تأفأفت مزعوجة وتركته اهرول وهالمرة مو بس صاحلي هالمرة عاط بكل صوته اسمي خله الطلاب تلتفت علينا..

-تَـمني!!

-كافي محسن كافي مرتك تبچي حرام عليك!

-ماروح الا اوصلچ اني

-ماريدك توصلني بابا كافي لا تلززگ

قاطع نقاشنا هجمة مرتدة اجت على ظهري وصوت ضحك عالي معروف، ذبيت نفس مرتاحة من اجت وهي السحبتني بعيد عنه ميحچي شي من تجي هالعوبة..

-نرمين: نقذتچ من هالسايكو مووو

-اي ولج مرته فحطت بچي وهو ولا مهتم

-ههههههه متت ضحك لو تشوفين اشكالكم من بعيد محسن چنه طلي صغيرون يتوسل وانتِ صخلة شرسة

ضحكت وتمشينا نطلع متوجهات لبوابة الجامعة الرئيسية ونسولف سوه..

-نرمين احنه مو اتفقنا نطلع للمول اشتري ملابس حبابة مو تخلفين بوعد....

ما كملت الجملة وشفت رقم طار علينا من مجموعة شباب تمشي گدامنا، اندار الولد شمر الرقم يمشي بالعكس ظهره على جماعته ووجهه علينا، غمز واشر بعيونه على الرقم الي بالگاع..

كشولت لعبانة نفسي واجيت ودست على الورقة الكاتب بيها رقمه بحذائي وعبرته، ضحكو جماعته وهو هم ضحك بصوت مسموع وصاح..

-احب الصععب احبب العصبي احبببه

-نرمين: انتَ شايف روحك بالمراية وليدي؟؟ روح غسل عيونك من الدگن روح

-منو وياچ انتِ اني بالي ويه صديقتج

-تَـمني: بده التمصرن

-شبيك حبيبي ضايج عليَّ

-تَـمني: اييعع عابت هالشكول اي والله

كشيته بيدي متقززة هسة لا خلقة ولا اخلاق من ذولة اهل البناطير البوري اللزگ وطافر لنص رجله طالعات سيقانه المصلبخات والقميص لطش على جسمه وضعيف چنه سلبوح مجاري والحاجب محفحف اخف من حاجبي، استغفر الله اللهم لا شماتة يا ربي اللهم لا اعتراض على خلقك بس همه گوة يحچونه..

-نرمين: اگلچ شنو هالكوكش الذبان الملتم عليچ اليوم شنو سالفتچ انتِ

-دسكتي هم حظي هذا

-شوكت يتوبون تره يلعبون الروح

-تَـمني: خيولي زعطوط امشي نروح

توادعنا واتفقنا باچر نطلع للسوگ، بستها بالهوا وافترقنا هي راحت ويه السايق مالتها واني اخذت فورتات اروح للبيت، حر حر سموم والتراك مالتي شوية بي ثخن انشويت علما وصلت للبيت..

لگيت باب الحوش مفتوح، ركض دخلت ادور على السبلت بس الوطنية طافية وفاتحين مبردة وگفت گبالها مايعة روحي علما استقرت حالتي ياله وخرت ورحت ادورها وگفت بنص الصالة اصيح..

-خالة.. خالة وينج اني اجيت

طلعت من المطبخ لافة الشال على راسها والضحكة تارسة وجهها، رحت عليها احضنها وابوس بيها..

-حنين: هلا يا بعد خالتج شلونچ يالعافية

-اروحلج فدوة حبيبتي بخير اني

وخرت من حضنها اتسائل..

-خالة وينها الخاتون

-بغرفتها بت الاغبر نايمة

-والله صح بت اغبر

-شالعة گلبي بت خالتچ راح انجلط من وراهة

-عوفيها اني اروح اشوفها

صعدت لغرفتها لگيتها نايمة والكتب والملازم مطشرات كل مكان حولها فريت بيدي وصفگتن اعيط..

-ايييي عفية عفية ام السادس عفييية منو الخبصتني عدها امتحان احياء خوش امتحان وانتِ نايمة بين كتبچ

-تالة: تَـمني اشتعل ابوچ طلعيي

-تمني: نچبي لچ تشعلين بأبوية تاج راس ابوچ

دفرت المخدة ضايجة و تعيط، ضحكت وطفرت عليها على الفراش اضرب بيها..

-تالة: ربي ما رايده شي بس رايده معدل تمني بالسادس ربييي

-تَـمني: تجيبي بالحلم لو بقيتي على هالحال

-أمداني اتخيل اجيب معدل ٨٧ واروح كلية تربية رياضة مثلج

-حلمي هذا روحي بالرياضة اني أتنفسها

-دروحي هندسة روحي قانون روحي صخام لطام شجاچ كل يوم صالبيكم بالملعب تموع روحكم من الحر ومحد بحالكم حتى تعيين ما الكم

عفتها تدردم وحدها واني اللملم بغرفتها گاعدة بمزبلة الاكل والگلاصات والمواعين والصواني والملابس الوصخة والنظيفة كلهن مخبوطات سوه، عفتها تنام شوية علما اكمل مكانها وارتبه سريع ونزلت اساعد خالتي بالمطبخ..

-حنين: روحي بنيتي تعبانة انتِ

-لا وينه التعب ترد روحي بشوفتكم اني

-اااخ اااااخ

-سلامتج خالة شبيچ

-مقصرة وياچ يا بنت اختي

-لا گلبي حشاچ من القصور، سولفيلي شلونها تالة وانتِ شلونچ مرتاحة؟

-اني خليني بضيمي بس شلون بـ تالة خاف متجيب معدل وابوها يخزينا

-تجيب تجيب بس على كيفچ وياهة ولا تضغطين عليها

نسولف واطلع بالمواعين حتى نتغدا، فرشت السفرة وجبت الخواشيگ والخضرة والطرشي ونقلت كل الأكل بالسفرة وگعدنا اني وياهة ناكل..

-صدگ خالة شصار على العرس تروحين وياي مو؟

-اي يمة خوما اعوفج وحدج ويه ذني الحياية

-عندي فضول اتعرف عليهن تدرين

-تتعرفين عليهن لو تقهريهن

تحچي ورافعة حاجبها بـ شك، سويت نفسي ما مهتمة واني بالعكس داخلي محترگ، حركت اكتافي بلا مبالاة وگلت..

-هنه يردن يشوفني وكاتلات ارواحهن خليني اروح اتعرف عليهن

-يولون لا تهتمين بيهم

-اهتم خالة اهتم

-تَـمني كافي يمة لا تقهرين بروحچ ما يستاهلن

-ومعقولة اعوف خطافة الزلم تَـمني حسرة بگلبهن؟ عيب خالة ميصير مو من اخلاقي هاي

-لا تحچين على روحچ! ما يوصلن لأظفر من أظافرج ذني الوصخات!!

تنهدت مبتسمة وهزيت راسي ساكتة، محد مصبرني على هالدنيا غيرچ يا خالة صرتيلي الام والاب والسند والاهل كلهم.. ضاجت خالة من كلامي وانزعجت حبيت اغير الموضوع وگلت وعيوني بالماعون..

-نسيت اگلج راح ابات يمكم اليوم

جمدت اللگمة بحلگها وظلت تباوعلي، حكت راسها وضحكت مجاملة تنزع الشال وتذبه بصفها وتگول..

-هاا

نزلت تالة من فوگ تفرك بعيونها گعدت ويانه على السفرة وتغدينا سوه بس خالتي مو طبيعية ومتوترة طول الوقت لحدما صار الليل هي على هالحال واعرف سبب توترها بس ميهمني شي وما راح انحرم منهم بسبب...

-حنين: اجه!! تالة اجه ابووج

مثلت ما مهتمة وبقيت اگلب بموبايلي بينما تالة راحتله تستقبله واسمعه يبوسها ويغنيلها وهي تتنعوص عليه..

-حنين: تَـمني روحي للغرفة ماما

-تَـمني: تمام

هستوني اگوم واشرتلي گعدي بسرعة من دخل عمي بسام وتالة مكمشة بيده، جمدت رجليه بالباب ولمعت ابتسامة على وجهه..

-بسام: يا هلا هاي منو يمنا

-حنين: احم.. اي هاي تَـمني اجت تشوفنا

-بسام: واني اگول ليش البيت منور هلا بـ تَـمني عمو حبيبتي شلونچ مشتاقيلج

نزل نفسه عليَّ وراد يجر وجهي بين ايده ما خليته نصيت جسمي عود دا اشيل الكلينسة مالتي من الگاع، رديت رفعت راسي واشوفه بعده منصي عليَّ مخلي عينه بعيني انزعجت بس شفت نظرات خالتي الخايفة وما ردت ازيد الوضع سوء..

-بسام بهمس: شلونچ

-تَـمني: بخير

-بسام: صايرة ما تجينا

وخرت منه وگمت على حيلي ارجع خطوة ليوره ونزلت القميص يغطيني..

-امتحانات ماعندي وقت

-حنين: يمة تَـمني روحي نامي وراج دوام باچر

-بسام: راح تباتين؟

-حنين: اي تبات اي، روحي لغرفة تالة يله علما اصب لأبوچن عشا

مُرة طلعت منها كلمة "ابوچن" يخسى هذا يصير بمكان أبوية، صح ربيت عندهم وخالتي استقتلت تقنعني بسام صار بحسبة ابوية بس مستحيل اتقبل، صعدت بسرعة بغرفة تالة وطبگت الباب علينا وقفلتها..

-تالة: ليش قفلتي الباب؟

-تَـمني: حتى انام ماعرف بدون ما اقفلها

هزت راسها اي وحطت ملازمها وگعدت تدرس، ساعة مرت وصاحت جوعانة ما خليتها تنزل رجت جبتلها اكل وگلاص حليب وفاكهة وصعدت احطه گدامها..

-تالة: دا اعذبچ

-تَـمني: بس درسي وطلعي معدل كلشي ماريد

-اگلچ اني رايحة لبيت افياء گلت لبابا وقبل هناك ادرس يمها

-هو ياخدچ؟

-اي واقتنع ابات همزين، يله باي

طلعت بالتراك واخذت جنطة كتبها وراحت، قفلت الباب وراهة وتمددت بالفراش عيوني طار منها النوم بالي مشغول.. بين تفكيري غفيت وفزيت الساعة بالـ ٣ الفجر تعبانة ومعدتي تفور..

طلعت اتسحب على اطراف اصابعي، عبرت غرفة خالتي الباب دائماً يعوفوا مفتوح من قبل بس ما لگيت احد بيها يعني گاعدة همزين نزلت بسرعة شربت مي وطلعت حبة مال جالي گرطتها وافتريت بالبيت ادورها..

مالها اثر توترت والافكار بدت تعصف ذهني وماكو غير شي واحد يتردد بعقلي، هرولت لباب الحوش اريد افتحها ولگيتها مقفولة، صعدت للغرفة بسرعة دا اقفلها وانتبهت للمفتاح ما موجود..

نبض گلبي بقوة ادوره مثل المخبلة والتايهة وين راح شلون اختفى هسة چان موجود، ماگدر افتح ضوه لا ينتبهلي گاعدة كل جسمي بده يرجف فقدت الامل اللگاه، فزيت ويه صوت حركة شخص قريب غرفتي عفت كلشي وركضت ادور مكان اتخبه بي ما لگيت غير كنتور تالة المهووس اخذت تلفوني وفتحت الكنتور وطبيت بي..

كنتورها ابو اربع بيبان، بيبان الوسط رف واحد و واسع وبس باب وحدة تنفتح دحست روحي بالطرف كلش وغطيت روحي بالملابس المنثورة وقطعت حتى النفس من انفتحت باب الغرفة وصوت همس تعالى بالمكان..

-بسام: تَـمني.. تَـمني عمو حبيبتي وينج طلعي يا روحي تَـمني..

كممت فمي بأيدي خايفة يطلع صوت تنفسي العالي، بأطراف راعشة فتحت تلفوني وخففت الاضائة كلش ورسلت لخالتي كلمة "تعالي".. ذبيت التلفون بسرعة من تقرب من الكنتور ويضحك..

-شوكت تستسلمين تَـمني تعرفيني احبچ وميت عليج طلعي بابا طلعي كافي تحاولين

ابتعد صوته يكمل بنبرة حقيرة..

-حرام عليج تلعبين بأعصابي طلعييي ولج بنت الكلبب

وبلحظة سريعة خطفت انفاسي فتح باب الكنتور ومد راسه يحچي..

-ابقى وراچ وراچ نهايتج بيدي وبحضني

مغمضة عيوني حييل وكاتمة النفس راح اموت، دعيت من كل گلبي ميمد ايده ويتحسس كومة الملابس الحاطتهن فوگي بس ما سواها لان طلع راسه من الكنتور وين صوت خالة..

-بسام!! شتسوي هنا؟؟

-بسام: انتِ شرجعچ؟؟ مو وديتچ ببيت سالم مرته متخربطة؟؟

-حنين: اجيت اخذ تَـمني وياي شتسوي هنا بسام؟!

-بسام: اهووووو رجعنا على سوالفج المملة وخري لا اطشر وجهچ وخرري

طلع من الغرفة يدردم وخالة طلعت وراه، ذبيت نفس واشكر رب العالمين ستر عليَّ ونجاني من هذا الحيوان، فزيت على رجة تلفوني رسالة من خالتي كاتبتلي..

"وينج يا روح خالتج طلعته من البيت بعد ميرجع ارتاحي"

طلعت من الكنتور انتفض واحس بالتعب زاد عندي، جريت روحي جر للفراش تمددت وحطيت ايدي على گلبي استرجع بذاكرتي كم مرة بسام تحرش بيه وكم مرة مد ايده على جسمي وكم مرة حاول يلعب بكيفه وربي ينجيني منه..

تعبت من التفكير ومن العذاب ومن الخوف تعبت وبعد ماعندي طاقة اتحمل شي، غفيت ليلتي بالخوفة وكل شوية افزفز الى ان طلع الصبح اخذت جنطتي وطلعت گبل للجامعة..

قضيت اليوم شلون مچان ورجعت لبيتي بدون لا اللتقي بـ محسن، فتت للبيت وذبيت جنطتي ورحت احميلي اكل بايت اكلت وتمددت على القنفة اتصفن وحدي لحدما غفيت على وضعي وحسيت على صوت الباب ينفتح..

فتحت عيوني بتثاقل اشوف الساعة بـ 11 بالليل حيييل صارلي شگد نايمة اني، گمت اللم بشعري ولبست الشبشب علما دخل هو ووگف گدامي الحاجب معگود والعيون حمر..

-ماكو الله يساعدك؟؟

بس سمعت صوته ولسانه الثگيل گلت بگلبي يا ستار من هالليلة، وگفت على حيلي وگلت بهدوء..

-شارب؟

-عندج مشكلة؟!!

-لا، نام جوه واني فوگ

فزيت على صوت الطاولة الزجاج تتكسر ضربها برجله رگعها بالقنفة وعاط..

-من احاااچيچ ما تنطيني ظهررچ شني شايفتني طلييي ومالي حشيمة وكراامة

بلا ما ينطيني مجال اجاوب هجم عليَّ يعتني من شعري، صحت موجوعة وادفع بي واضربه بس ويين اگدرله "نعمة" زوجي طوويل كلش وجثل ينگطع نفسي ويه كل راشدي يسطره على وجهي وراسي..

فلتت نفسي من ايده اصيح وارادد وهو متخبل سكران وعقله فصل، دفعته وانطيته راشدي فااار عليَّ ولزم راسي وضربه بتاج القنفة شاغت روحي..

-نعمة: بنتت الكللب السااقطة ال.....

يسب ويفشر عليَّ وعلى امي وخالتي وابوية الميت تخبلت حاربته محاربة يضرب واني اضرب بس قوته غلبتني وضربني بوكس سفطني ويه الگاع..

بألف يا الله گمت من مكاني وهربت اصعد فوگ للغرفة بعدني ما قافلتها عليَّ ودفع الباب ودخل، بچيت بعجز وتعب جسمي تعب من الكتل عيطت اصحي وانبهه بس ماكو فائدة نزع حزامه الرابط بي دشداشته ولفه على ايده..

-تَـمني: نعمةة نعمممة اني تَـمني نعمة والله ارجعلك الكتل والله

ضربني اول حزام على رجلي شاطت روحي تخبلت، شلت المزهرية وشمرتها عليه انجن وصار يضرب بخباال احس بجلدي بده يتشگگ من قوة الحزام..

انحصرت بزاوية الغرفة ابچي بصوت عالي وادعي يارب خلصني يارب نجيني وويه كل "يا رب" انصلخ بالحزام على جسمي وراسي وظهري ورجلي وايدي.. ابچي مفرفحة واضمضم بروحي الى ان خف تنفسي وحسيت راح يغمى عليَّ نزلت ايدي عن وجهي وذبيتهم منا ومنا مأيسة..

-نعمة: حتى ماا تعاندين تااج راسچ بت الكلببب من اريدن احاچيچ توگفينن وتدگين تحية هممم

ذب الحزام من ايده واجه عليَّ يهلس بشعري وينطيني راشديات ماعندي قوة ادافع بيها على نفسي تعبت وتعود جسمي على الكتل وماكو شي بيدي اسوي غير بالبداية احاربه واتعارك وياه وبالنهاية استسلم جوه ايده..

سواني ويه الگاع لطش ودفرني ببطني وظهري وشالني من شعري ينهضني يجبرني اوگف على رجلي مسح وجهي من الدم وباس خدي وشالني على چتفه واخذني للمخزن الي نحط بي گواني الطحين والتمن والفراشات صغير ومظلم شمرني بالگاع وقفل الباب وراه وحاوطني السواد من كل جهة، سواد حظي وروحي وسنيني، بقيت هنا الى ان غبت عن الوعي..

حسيت من جديد على شي يمشي على ايدي، فزيت اطفر من مكاني وصرخت من الوجع رجلي وايدي يوجعوني من ضرب الحزام بس متأكدة اكو شي مشى على ايدي..

گعدت بزاوية المخزن لامة رجلي لصدري وابچي بروح رايحة مهضومة اخاف من الحشرات وهسة مشت على جسمي مردانة لو صرصور وراح يوگف گلبي هنا وحدي شيجيب الصبح ويرجع نعمة لوعيه ويطلعني منا..

ابچي وامسح بدموعي اصبر روحي ميخالف تَـمني ميخالف، هي هاي الدنيا محد مرتاح كل بشر معاناته ومأساته شكل واكيد اكو بنية مكتولة هسة ومنيميهة بالمخزن نفسج لا تخافين.. تخيلي البنية المسكينة وياچ گاعدة وصبريها على ضيمها..

همست بخفوت صوتي مبحوح اضحك على روحي واسولف ويه البنية المكتولة الرسمها خيالي..

-ميخالف حبيبتي الله ميعوفنا كلشي بأجره.. اني تزوجت صار 8 اشهر من رجال همجي رجعي ميشبهني بشي ايده والضرب اذا مرت يومين ما انكتلت استغرب، يسكر تالي الليل ويرجع فاقد مشاعره واحاسيسه ويتونس من يكتلني..

مسحت عيوني ابلع بريگي واكمل اسولف ويه الصرصورات الهنا والبنية الخيالية..

-زوجتني خالتي حتى اخلص من رجلها بسام ومن تحرشاته والكتل بس ذبيت روحي بجحيم اكبر حتى ما اگدر اتطلگ منه يهددني بالطبة والطلعة.. اني مثلچ هم تعبانة وموجوعة ايدي بطبطت من الكتل اخاف ميروح الاثر وانفضح بالدوام

حطيت راسي بين رجلي اتنهد بتعب واسولف ويه صديقتي الخيالية لحدما دخل شوية شمس للمخزن عرفت صار الصبح.. انتظرته يجي وتأخر اليوم من غير العادة صار الظهر ياله اجاني وفتح الباب مصدوم..

-نعمة: تَـمني!

گمت على حيلي ما حاچيته بشي وعبرته اطلع من المخزن اعرج برجلي، رحت لغرفتي شفت الساعة بالـ 11:30 الظهر راح عليَّ الامتحان الله لا يوفقك..

-نعمة: حبيبتي بنيتي انتِ تَـمني گليبي مادري مادري والعباس مادري بروحي

اخذت ملابس وفتت اسبح واسمعه يدگ بباب الحمام ويبررلي ويعتذر احس راح اتقيء من اللعبان نفس، غسلت شعري فروة راسي تموتني وجع شعري متگطع ومتهلس، بعده شعري وجسمي ما استرد عافيته من كتلة اول البارحة ورجع كتلني من جديد..

حطيت دهن على اثار الضرب ولبست ملابسي بالحمام وطلعت لافة المنشفة على شعري، وگفت گبال الميز احط خافي عيوب وهو بصفي واگف ومستمر بالتبرير..

-حبيبتي انتِ گلبي اعشگچ يا راحتي بس گليلي شنو اليرضيچ انا حاضر اطلبي عيونيي يا عيوني ادللي عليَّ يا بعد امي وابوي تَـمني حاچينيي لا تبقين زعلانة

-تريد تعرف شنو يرضيني؟

-اكيد

-طلگني

فك عيونه على وسعهن وتجنح خشمه بعصبية، رفع ايده خفت لا يكتلني وابتعدت اهرول اوگف بعيد بس ما ضربني هالمرة ضرب الميز مالتي ووگع عطوري ومكياجاتي..

-طييف هذا تعرفين شني الطيف؟؟ حلممم اطلگچ بالعباس اجررم بيج واكتل خالتج وبنتها ورووح ابوي انععل الخلفچ لا تستفززيني

-شنو تايهتلك تكتل بكيفك والله اشتكي عليك بالشرطة اخليهم يسحسلوك

-ههههه عيدي بله عيدي المن تشتكين؟

سكتت ابلع بريگي مأيسة، ضحك وبرز سنه البلاتين فر بيده وگال مستهزأ..

-چا ياهي اشتكت عليَّ گبل شهرين وبرشوة سديت الحلوگ وطلعت بليلتها؟ انتِ عبالج هيته هي بوية اذبح واصلخ وانعل ابوچ على امچ واذبحهم جدام عيونج اخبلچ وشرفي اخبلچ وتدرين بيه اسويهاا

سكتت ميتة قهر عافني وطلع من الغرفة واني گعدت على الچرباية اندب حظي المصخم، الف مرة هددني هالتهديد ومرة راد يسويها ودفع لواحد يسحگ تالة وهي راجعة من المدرسة وسجلت صوته وقدمته للشرطة وماعرف شلون طلع منها مثل الشعرة من العجين يضحك ويگول احنه العشاير نحكم بكيفنا والقانون ميتدخل بمشاكلنا..

لملمت روحي اريح نفسي وراسي نمت بالفراش ودموعي على خدي عاجزة اغير شي متأملة فد ضربة تجي من رب العالمين تحذف نعمة واليشبهله من الوجود..

**

"مكان اخر عالم اخر"

-جينا نحنيـك يا ســـباح الگلب.. ورد وهلاهل على طـــول الدرب.. جينا نحنيـك يا ســـباح الگلب.. ورد وهلاهل على طـــول الدرب..

صوت الليل مع اصوات الرجال الخشنة تجلجل في المكان، فرح، سرور، طرب، رقص وهلاهل تمطر من كل حدب وصوب من الديوان الكبير، ابتسمت رافعة راسي اراقب حفيف سعف النخل الذي يتراقص مع بعض بسبب الهواء العالي وكأن حتى الاشجار سعيدة بهذا الزواج..

رتبت الشال على راسي اضم بي شعري ومديت عيوني اراقب شنو ديصير بداخل الديوان بدون لا اخلي احد من الزلم ينتبه عليَّ، ضحكت كاتمة صوتي واني اشوف ابوي يصفگ بيده بحماس وفرح ما مهتم لعگاله والبشت والكشخة فرحان حبيبي على فرح ابنه "علي البدر"..

اليوم زواج اخوي علي البدر اخيراً من بعد سنين طويلة عناء وتعب گدر ياخذ "شمسه" ويعيش الحب جوه اشعتها وحنيتها وجمالها ودلالها، كبرت ابتسامتي من تقرب الرادود على علي البدر وبيده حنة يحطها بكف ايده ويردد بحب..

-جينا نحنيـك يا ســـباح الگلب.. ورد وهلاهل على طـــول الدرب..

يقرا واخواني يشمرون بالورد والچكليت عليه والهلاهل ترگع، كملوا حنته وشاله اخوي علي الحق على چتافه وابوي صاح بفرحة غمرت گلبه..

-انا ناذر لو علي البدر تزوج بنفسي اقراله واهوسله ومثلما طلبتك من علي وزواجك هدية من علي ما ترهم ما نقرا على علي...

ابتسم بدر يحط ايده على راسه ممنون وبده ابوي يقرا بصوت حلو ولحن جميل والكل يردد وياه..

"علي عالي اعلى كـل عالـي ..... علـي موكـل مـن الـرب

علي مـا نصبـك منصـوب ..... لكن بالـنـص امنـصّـب

علي ابساگ العـرش نـورك..... علـي يالعلـمـت جبـريـل

اسمـك نــزل بالـتـوراة..... وزبـور وصحـف وانجيـل

يـا آيـه اعلـه كـل ايــه..... شبه شمس الضحى اعله الليل

يالمـبـدر تـمـام الـتــم ..... وبسـابـع سـمــه کوکب..."

يقرا والكل يقرا وراه والسعادة تنفض من وجوههم، فرحت من اختار مولود يجمع اسمه "علي البدر" و "شمس" سوه عشت الاجواء وياهم وحسيت الرومانسية ترستني ما طلعت من الجو الا من كمل ابوي وعلگو الدي جي وبدو بالردح الشباب، ما تحملت ما اهز وياهم بس ما كملت هز واجتني كرصة بخصري شعلته شعل..

-اااااخ

-واخااخه شتسوين هنا ولج يا البايررة

-اااخ يمة هو هيج شعلتيني شعل

-خلي ابوچ يكضچ تعاينين للزلام بعلي يسويج وصلتين والززهرة

-ما شافني محد بيهم عاينلي والله ملتهين ويه ابوي واخواني

-امشي گدامي امششي انعل امج الغبرة بت الغبرة

تجرني من زندي تسحب بيه ترجعني لداخل البيت، وگفتني بنص المطبخ تزلغ بخدودها من اجت خالتي تسأل شكو يا بووية شيخلصني بعد اليوم..

-ولج تعالي شوفي بت اختج تعاللي تعاين للزلام البرره

-تره محد يهمني بيهم غير اخواني وابوي شسالفة يمة لا تكبرين الموضوع

ضحكت خالتي وضربتني على زندي وتعض بأصابعها..

-ولج "حبيبة" شلون "حبيبة" عدنا بالعباس اسم على مسمى

-حبيبة: خالة بربچ قنعي امي نفتح ردح ونرگص

-چا شون يله نفتح واليوم الرگص صباحي غير علي البدر ماخذ بنيتي ونظر عيني

فرحت ورحت وياهة شمس تصير بنت خالتي وحنتها ببيتنا اليوم البنات بالصالة والزلم بالديوان، رگص وردح واكل وكيك وونسة نسينا ارواحنا ومحد ودت العشا للزلم.. بنص ضحكاتنا سمعنا صوت ابوي القوي يصيح..

-يا الله.. يا الله يا نساووين وين العِشا

زمخن بينا امي وخالاتي وعماتي خلو حتى العروس شمس تگوم ويانه ونحط المفلطح بالصواني وندز للزلم، تعبنا لحتى كملنا وبعد محد بيها حيل لشي كلمن نزعت نفنوفها وگعدنا بالدشدايش ندوس بالمفلطح..

-شمس: حبيبة العظامة على كيفچ لا تخزينا

-حبيبة: خاب طيري ميتة جوع من الصبح ما ماكلة شي

-امي: حبيبة وينها حبييبة

-حبيبة: ماااتت حبيبة صيحن اميين

ضحكن البنات ورحت اشوف شمالها امي شافتني بالدشداشة وشعري رافعته كبة عالية وايدي كلها دهن واللوچ باللگمة دگت صدرها ونترت..

-سودة بوجهچ هذا حال بت هذاا خايبة يردون يشوفوچ النساوين هلبت تصير قسمتچ امشي بسع غسلي وبدلي هدومچ لا تخزينا

اني سمعت نساوين وقسمة واطففر فوگ لغرفتي، قفلت الباب عليَّ اسم الله الرحمن دخيلك علي نجيني منهن ماريد اتزوج وماريد اسمع هالطاري..

ما حسيت على روحي من نمت وصحاني صوت دگ باب غرفتي، گمت اشوف ياهو وهجمن عليَّ بنات عمي وخالتي سوه يرزلن ويحچن ويعتبن ليش عفتهن..

-حبيبة: ما اجيتن بالليل ما حسيت على روحي من غفيت

-ليلة: امچ ما رضت گالت عوفنها تعبانة

تعذرت منهن ونزلنا سوه، شمس راحن وياهة خواتها وامها للصالون واحنه بقينا نرتب وننظف انكربنا بالشغل وكل شوي داخل واحد من اخواني يرعد لان اصوات ضحكنا عالي، طب علينا ابا الحسن علي يلطم ويريد يشگ دشداشته..

-ليلة صوتتچ ليلة طفت ليلتچ ان شاء الله على هالضحكة التجيب التايه

-ليلة: اهوو شبيك وياي حسرة عليَّ الضحكة ودوني لاهلي ماريدكم بعد

-ابا الحسن علي: لا دخيلچ ميت بيج لا ترحين خايبة شلون انامن اليوم وانتِ ماكو

عيبت عليه ليلة مطنگرة ودارت وجهها، غمزلي اگرصها نيابة عنه ما رضيت سوالي اني اعلمج وراح بره..

للظهر صلينا و بدن النسوان يجن العرس هنا ببيتنا ابوي حلف على خالتي ما يسوون العرس ببيتهم ناذر لو شمس صارت لـ علي البدر يزفها من بيتنا ويصعدها غرفتها..

سوينالها كوشة مرتبة وكلشي حسب الاصول ما رضى نخلي شي بنفسها كلنا نعرف ابوي شگد يعز شمس ويحبها وچان يوم منى من علي البدر گاله اريدنها بوية اخطبها گلبي هاويها وميت على طاريها..

صعدت فوگ ويه البنات نتكشخ وحدة تمكيج للخ ووحدة تسوي شعر اللخ ونتبادل بالملابس والاحذية كلنا خوات وكلنا واحد ويا حلو خوتنا..

-ابرار سلسالچ يخبل

-ابرار: هدية من اخوچ هذا هاچ لبسي

-حبيبة: لا ولج ابد والله لابسة گلادة انا

-ابرار: بالعباس ما اللبسها

حطتها برگبتي ابتسمت لبسته ونزلت اشوف امي واعاونها وانرگعت بـ "عبق" تهف ووجهها عرگان..

-شبيچ عبق

-عبق: سودة بوجهي سوودة بوجهي

-شصاير وياچ لا تخرعيني

-عبق: اني اليوم مكتولة مابيها مجال صرنا وجه بوجه اني واخوچ علي التقي و امچ شافتنا وخزرتني تسويلي بيدها اني اعلمچ شسوي برووحي

-حبي انتِ ما متقصدة لا تخافين علي التقي اصلاً ما يعرفچ منو لا تتوترين

-وامج شلون تقتنع شلوون

-معليج بأمي انا احاچيها

راحت للغرفة تلطم المسكينة حتى ما رضت تبدل، شهدت ابرار على الموقف الصار ونزلت توگف بصفي وتگول بحرگة..

-اگص ايديناتي لو ما چانت متقصدة يشوفها تقي

-حبيبة: ابرار ليش تحچين عليها اكيد ما متقصدة وانتِ تعرفين عبق شگد حريصة ما يشوفوها اخواني

-سكتي حبيبة سكتي لا تحرگين بگلبي گبل اسبوع وگفت تغسل مواعين گدام علي الدُر وما لافة نفسها بالشال عدل وهي شحمة ومربرة حرگت دميي

-حرام عليج علي الدُر الوحيد امي ترضى تطلع گدامه عبنه متزوج ونعرفه يحبچ وميفضل وحدة عليج

-ولج حلووة و تجيب التايه بيضة ومتفحة وشاطرة بالشغل حسبالچ الزلام ما يحبون هيچ صح علي الدُر رجلي ويحبني بس ما اأمن بيها گدامه تروش مثل الفراشة

-عبق محترمة ومؤدبة وانسانة بسيطة انتو...

ما كملت كلامي وقاطعتني تنتر ميتة قهر..

-كافي حبيبة كافيي تدافعين عنها تبقى عبق خدامة! صعدت لو نزلت خدامة ولازم تعرف مكانها شنو بهالبيت!

سكتت  ما أجادلها اعرف تفكير ابرار وتخاف من عبق ومن وجودها ببيتنا ورافضته، اللتهيت ويه المعازيم والضيافة هوسة وصوت المسجل عالي والمله منتظرة العروس تجي حتى تبدي العرس وبين كل هالفوضى خنست الاصوات وانقطعت الضحكات واستبدلت بنظرات الكره، توجهت العيون للباب من ظهرت منها عدوة كل الموجودين تَـمني!.....

يتبع 👑....

━━━━━━ ♛ ━━━━━━

عودة حميدة ان شاء الله شباباتي 💜

تركنا اوربا ونزلنا لأراضي العراق الحبيب، ممكن البارت الاول ميكون مفهوم جداً مثلما متعودين، ينرادلنه كم بارت ونگوم نذب ميانة ويه الابطال ونفرش ونگعد ببيتهم 😂

كُلش سعيدة لاني استلمت هالقصة جداً جميلة واحداثها شوقتني وابطالها ينحطون بنص الگلب ♥️ ان شاء الله انتو هم راح تحبوها مثلي واكثر 🙈

أي سؤال، استفسار، فضول ناحية القصة تعالو لحسابي الانستا ودخلو برجلكم اليمين رجاءً 🫣💚