تحميل رواية «عشقت مجنونة (الجزء الأخير )» PDF

الحلقة التاسعه ..⁦♥️⁩

وحشتوني يا عيااااال عاملين ايه 😍😍

كل ما افتح الكومنتات بتاعتكم بتفاجئوني بكلام حلو شبهكم والله بموت فيكم بجد شكرا لكل واحدة كاتبتلي كومنت قمر شبهها ⁦♥️⁩⁦♥️⁩

وفي ناس تانيه مبفتحش الكومنتات الا على الكلمتين دول 😂😂👇

الشخص بغضب ...: في ايه يا آنسه انتي لو عاوزة فلوسه هديكي اكتر من فلوسه بزيادة لكن متعليش صوتك كدا ....

ليلي بغضب ...: يعني بجح وكمان بتعلي صوتك ...! وبعدين ايه فلوسه دي واكتر من فلوسه تطلع مين يعني عشان تتكلم معايا كدا ولا تقولي كدا ..؟؟

الشخص بغضب ...: انا عمار راسل نيروز صاحب اكبر شركات الملاحه في اسكندرية ومصر كلها ... يعني لما تتكلمي معايا تتكلمي عِدل ...

ليلي بغضب ...: نعم ...!! طب وانا مالي عمار راسل نيروز ولا غيره انت تتكلم معايا بإحترام أحسنلك يا عديم التربية والزوق ...

عمار وهو ينظر إليها بغضب شديد ...: انتي عشان بنت مش هرد عليكي ...

قال جملته بغضب واتجه الي سيارته قادها وانطلق بعيداً وهو يرمقها بنظرات غاضبه ....

أما ليلي نظرت إلي تجمهر الناس حولها بغضب ... لتردف بسخرية ...: ما دا اللي انتو فالحين فيه ... تتفرجو علي اي زيطه وخلاص لكن متتدخلوش الا لو بنت حلوة ....

قالت جملتها بسخرية وغضب واتجهت الي سيارتها هي الأخري لتقودها وتنتطلق بعيداً الي وجهتها ...

وعلي الناحيه الأخري ...

وصلت ندي الي جامعتها لتردف بغضب ...: ليه منتنيلش نقدم بحث ونخلص زي بقيه الناس لازم يعني نمتحن لا وكمان عشان جامعه خاصه لازم نحضر اوووف انا كان مالي ومال التعليم يا ربي منه لله قاسم آمين اللي نادي بتعليم المرأة واحنا ملناش الا المطبخ .... والله انا راحه اتهان في الجامعه دي كإني راحه اتطلق وراجعه ...

صعدت ندي الي الدور العلوي لتحضر محاضراتها وكانت أول محاضرة لها هي محاضرة المعيد عز الدين ...

نظر عز الدين لها طوال المحاضرة بحزن وهو يتمني أن تعود ندي تعامله كما الماضي ولكنها لم تهتم بنظراته المصوبه نحوها ... بل نظرت إليه بقسوة وغضب للمرة الأولى والأخيرة لأنها لم يعد بقلبها ذرة إعجاب له كما كان من قبل ...

خرجت من المحاضرة وهي تتأفف بغضب متجه الي خارج الجامعه ولكن قبل أن تنزل السلالم سمعت صوتاً تعرفه جيداً ينادي عليها بخبث ...

اسلام بخبث وهو يرسم ابتسامه مزيفه علي شفتيه ...: ازيك يا ندي عامله ايه انهاردة ...

ندي وهي تنظر في كل اتجاه حولها لتتأكد أنه يكلمها هي بهذا اللطافه ...!

ندي بإستغراب ...: حضرتك بتكلمني انا ...!

اسلام بخبث وإيماء ...: أيوة هو في غيريك اسمها ندي انا اعرفها ...!

ندي بمرح ...: ايتا ايتا مالك يا دكتور انت عندك كورونا وجاي تطلب مني السماح ولا ايه ...!!

اسلام بغضب ...: بطلي لماضه وتعالي معايا علي المكتب عشان عاوزك في موضوع مهم ...

ندي بنفي واستغراب ...: انا مبروحش مكاتب حد علفكرة لو عاوز حاجه قولها هنا ...

اسلام وهو يحاول التحكم بأعصابه ليردف بإبتسامه خبيثه ...: حاضر يا ندي ... علي الاقل خلينا نقعد ...

أومأت ندي واتجهو ليجلسو علي الكراسي الموضوعه في الطرقه ...

ندي بإستغراب ...: خير يا دكتور ...؟! حد داسلك علي طرف ...!! ياسمين صبري مش عاوزة تديك فرصه تانيه ...؟؟ خير انطق قلقتني ...

اسلام بضحك رغماً عنه ...: هههههههه علفكرة انا مبحبش اللماضه خليكي جد شوية ...

ندي بمرح ...: ما بصراحه انت خضتني انا مش فاهمه في ايه ...!!

اسلام بجدية ...: بصراحه كدا يا آنسه ندي ... انا كنت عاوز اطلب ايديكي ...

ندي بضحك شديد ...: هههههههههههه حلوة النكته دي قولي واحدة تانيه هههههههههه

اسلام بغضب ...: انا مبهزرش علفكرة ...

ندي بمرح وهي تضحك ...: ههههههههه يا عم اقعد دا فتحي اللي في مسلسل البرنس بيضحكني عنك هههههههههه

اسلام بغضب شديد ...: ندددددي انا بتكلم جدددد ....

ندي بخضه ...: ياااماااععع ...

اسلام وهو يحاول التقاط أنفاسه ...: انا بتكلم جد يا ندي ... انا طالب ايديكي ...

ندي بسخرية ...: دا علي اساس اني هقولك موافقه ...!

اسلام بإستغراب ...: وترفضي ليه اصلا ...!!

ندي بسخرية ...: لا مفيش أصل حضرتك لو مش فاكر احنا مبنطقش بعض اصلا لا انا ولا انت شوفنا بعض مرة واحدة وممسكناش في رقبه بعض ... المفروض اني اقولك اه يلا تعالي اتقدملي ...!!

اسلام بجدية وهدوء وخبث ...: بصي خدي وقتك وفكري انا يمكن كنت بتعامل معاكي وحش فعلاً بس صدقيني مشاعر جوايا اتحركت لما شوفتك اول مرة واتكلمت معاكي .... يا ريت تفكري وتبقي تردي عليا بعدين ...

ندي بغضب ...: لا بعدين ولا بعدتلاته ريح نفسك انا مش موافقه ...

اسلام بهدوء وخبث ...: وانا مبضغطش عليكي ... بس صدقيني هتوافقي ...

ندي بسخرية ...: ليه مثلا حضرتك هتجبرني ...!

اسلام بخبث وهو يقف ليتجه بعيداً ...: فكري يا ندي عشان كدا كدا هتوافقي ...

قال جملته بخبث واتجه بعيداً الي مكتبه وهو ينوي فعل شيئ ما ...

أما ندي وقفت مكانها بغضب وهي تنظر الي أثره بغضب شديد ...

ندي بغضب ...: والله إنك بارد يا دكتور الحمير انت ... ايه دا لحظه ... هو انا كدا شتمته ولا شتمت نفسي ودفعتي ...!! مش مهم المهم أنه حمار وفاكر نفسه عايش في روايه وعاوز يتجوزني بالعافيه و ...

صمتت ندي لتتابع بمرح وفرحه ... تصدقي فعلا زي الروايات ... ياااه لو يخطفني ويتجوزني بالعافيه وبعدها يجبرني احبه زي مسلسل اصلي وفرحات يااااه ... اسلام ... سولي ... استني يا حبيبي انا موافقه ....

قالت جملتها بمرح وهي تنادي عليه بتمثيل .... ثواني وخرجت وهي تضحك خارج الجامعه غير منتبه لأي شيئ واي شخص يراقبها .... او بالتحديد ... اسلام السيوفي بحد ذاته ... فقد كان مركزاً النظر عليها وبداخله نار الانتقام تتعالي شيئا فشيئاً ...

~~~~~~~~~~~~~~~~~~~

وعشقي هو لكِ فقط أينما كنتي وأينما تكونين ♡

اسراء بإنتباه لحديث جده وليد ...: اتفضلي يا تيته ...

الجدة بشرود ...: بصي يا بنتي آدم باشا ووليد ولاد عم وكانو أصحاب طول عمرهم ... لحد ما في يوم لقيت وليد جايلي البيت وبيقولي أنه حب واحدة معاهم في الشركه ... انا ساعتها استغربت لأن وليد معروف عنه أنه بتاع احم ... كان بتاع بنات وصايع عكس آدم ابن عمه تماماً بس دا مش موضوعي ... المهم لقيته جاي وبيقولي اخطبهاله ... انا ساعتها فرحت جدا وقولت اخيرا هفرح بيه ... وبالفعل خطبتهاله ...

شهقت اسراء بصدمه وهي تستمع لهذا الكلام لأول مرة ... لتنتبه بصدمه لبقيه حديث الجدة ...

الجدة بمتابعه وهي تأخذ نفساً عميقاً ...: وبعدها بشهر لقيت آدم ابن عمه بيقولي أنها واحدة قذرة واني لازم ابعد وليد عنها ... لإني الوحيدة اللي بتعرف تأثر علي وليد ولما معرفتش يا بنتي اضطريت اقول لادم يتصرف ... بس هو عمل حاجة بعدتهم عن بعض العمر كله ...

اسراء بعدم فهم ...: عمل ايه ..!!

الجدة بحزن ...: خطفها وخطبها يا بنتي ... غصبن عنها وعن وليد ابني وعن اي حد ...

اسراء بشهقة شديدة وهي لا تستطيع الاستيعاب أنها تتحدث عن زوج اختها ... !!!

اسراء بصدمة ...: انتي قصدك علي مين بالظبط ... علي روان بنت خالتي ولا ...

الجدة بنفي ...: لا مش مراته ... انا قصدي علي دارين الاسيوطي اللي كانت خطيبه وليد ... للاسف آدم اتصرف غلط عشان ينقذ وليد ... وبعد ما وليد دور كتير عليها وعلي آدم ... لقي رساله مبعوتاله علي التليفون بعنوان ... ولما راح هناك .... لقي آدم ابن عمه ودارين في وضع مش كويس ... ساعتها وليد اتصدم واتكسر ... ومن بعدها وهو مبيثقش في اي حد تاني ...

اسراء بصدمة شديدة وعيون متسعه بشدة من هول ما تسمع ...: معقول ...!!!! آدم الكيلاني ...!!!

الجدة بإيماء ...: أيوة يا بنتي آدم الكيلاني ... عشان كدا بقولك تعذريه ... هو شاف كتير من كل الناس حتي القريبين منه ...

اسراء بغضب ...: بس دا مش مبرر للي عمله معايا ومش مبرر لجوازي منه بالعافيه ومش مبرر لحاجات كتير ...

الجدة بحزن ...: بصي يا اسراء ... اوعدك انك لو عاوزة تتطلقي انا هطلقك منه ... بس ارجوكي يا بنتي إدي لنفسك فرصه شهر واحد بس ... انا مش طالبه منك غير شهر واحد تقعديه مع وليد ... وبعدها انا بنفسي هطلقك منه إذا كنتي مُصره ...

اسراء بإستغراب ...: اشمعنا شهر ...!!

الجدة بخبث ...: صدقيني انتي بنفسك هتعرفي ليه ... بس ارجوكي توافقي يا بنتي دا اول طلب اطلبه منك ...

اسراء بإيماء وحزن ...: حاضر ... رغم اني مش فاهمه ليه بس حاضر انا برضه قعدت معاه اكتر من شهر ... ميهمش شهر كمان وأطلق منه بعدها ...

الجدة بإيماء وخبث ...: طبعا يا بنتي ... اهم حاجه راحتك ...

اتجهت الجدة واسراء ليضعو الطعام علي السفره وبداخل اسراء شوق كبير لإنتهاء هذا الشهر لتعود الي حياتها الطبيعيه مرة أخري ...

اما وليد كان ينظر لإسراء بحزن وهو ينوي بالفعل تطليقها بمجرد أن يرحلو من منزل الجدة ... ولكن لا أحد يعلم ما يخبئه له القدر ...

اتجه وليد واسراء بعد الطعام الي قصر وليد العمري ...

دلفت اسراء الي داخل القصر لتردف بإبتسامة كبيرة لأول مرة ...: تصدق انا مفرحتش كدا من زمان ... لأول مرة احس إني فرحانه ...

وليد بإبتسامه حزينه ...: لا ولسه هتفرحي اكتر لما تعرفي انا ناوي علي ايه ...

اسراء بإستغراب ...: ايه ...!!

وليد بحزن ...: انا ناوي اطلقك دلوقتي يا اسراء وارجعك لعيلتك ...

شهقت اسراء بصدمة شديدة لما تسمع ... ما هذا الذي يحدث ...؟؟

اسراء بصدمة ...: انت ... انت بتقول ايه ...!!

وليد بحزن ...: أيوة يا اسراء انا ناوي اطلقك ... انا اكتشفت انك ارق واجمل من اني اكسرك أو اعاملك المعامله اللي بعاملهالك دي ... انتي احسن مني بكتير انك استحملتي كل دا وانا شايف انك متستاهليش اللي حصلك دا ...

اسراء بحزن شديد وقوة ...: لسه شايف اني مستاهلش كل دا دلوقتي ...!! طب وكسرك فيا قبل كدا وكسرتك ليا قدام ابن خالتي وتهديدك اني لو مقولتش اني مراتك قدامه هتقتله ...!! كل دا عادي بالنسبالك ... لسه شايف دلوقتي اني مستاهلش كل دا ...!

وليد بحزن وقوة ...: يا ريت تسامحيني ... انا فعلا لأول مرة احس اني ظلمت حد ميستاهلش ظلمي ... سامحيني يا اسراء ... انتي طا...

اسراء بصراخ ...: اوعاااا تقووووولهااااا اوعااااااا....

وليد بإستغراب ...: ليه ... مش دا اللي انتي عاوزاه من الاول ...!!

اسراء بتوتر لا تعلم لما نطقت بهذا ولكنها أردفت بسرعه وتوتر ...: احم بصراحه انا مليش مكان اروحله أو اقعد فيه غير هنا ... عيلتي والبلد في الشرقيه مش هيسيبوني وهيقطعو في سيرتي اني عروسه واطلقت بعد شهر واحد دا هيخلي اللي يسوي واللي ميسواش يتكلم عليا وخصوصا اني عايشه في قرية والكل عارف بعضه ... وعشان كدة ...احم ... ارجوك يا وليد باشا خليني هنا شهر كمان وبعدها ابقي طلقني ...

نظر وليد لها بإقتناع ... ثواني وأومأ بموافقه ...

وليد بإيماء وحزن ....: تمام يا اسراء ... اللي تشوفيه انا معاكي فيه بس اتمني تسامحيني علي اللي عملته .

قال لها هذا بحزن واتجه الي غرفته ليشرد بزكرياته مع دارين التي يكرهها بشدة وكذلك ابن عمه الذي أصبح عدوه الأول ...

أما اسراء نظرت في أثره بحزن شديد ... ثواني واردفت في نفسها بغضب وإصرار ...: انا بقي هربيك الشهر دا يا وليد باشا ... أن ما عرفتك ازاي تعمل كدا فيا مبقاش انا اسراء ...

~~~~~~~~~~~~~

وجدت الحب نيران تلظي

قلوب العاشقين لها وقود

فلو كانت إذا احترقت تفانت

ولكن كلما احترقت تعود

كأهل النار إذا نضجت جلود

أعيدت للشقاء لهم جلود ...⁦⁦✯

آدم وهو يجلس علي مكتبه بغضب وخوف بعدما بحث عن والدته في كل مكان ولكن دون جدوي لم يجدها في اي مكان ... بدء القلق والخوف يدخلان الي قلبه بشدة لأول مرة بعد روان ... كان يعتقد أنه يكره والدته كثيراً ولكن اختفائها هذا اثبت له أنه يحبها كثيراً رغم كل ما فعلته بحقه ...

اتجه علي الي مكتبه بحزن ليردف بجدية ..: احنا دورنا علي فريدة هانم في كل مكان يا آدم .. وللاسف احنا مش لاقينها ...

آدم وهو يمسك رأسه بقوة وغضب وعدم القدرة علي التفكير ...: هتكوووون راااحت فييييين يا علييي ...

علي بخوف شديد منه ...: معرفش والله يا صاحبي ... بس هندور عليها تاني وان شاء الله هنلاقيها احنا بلغنا الشرطه من امبارح وهي بتدور في كل حته علي فريدة هانم ...

لم يفت دقيقه حتي رن هاتف مكتب آدم الكيلاني ...

ليرد آدم بغضب شديد ...: ميييين ..!!

شخص ما علي الناحيه الأخري ...: آدم باشا ... انا الرائد وحيد يا باشا ... حضرتك احم ... حضرتك كنت بلغت من امبارح عن اختفاء والده حضرتك و ...

آدم بغضب شديد ...: انططططق لقتووووها ...!!

الرائد بخوف فهذا آدم الكيلاني من يتحدث معه ...

ليردف بخوف شديد وتوتر ...: ا ... البقاء لله يا باشا ... والده حضرتك اتقتلت وادفنت في فيلا مجدي الزناتي زوجها وحضرتك لازم تيجي تستلم الجثه من المشرحه ...

وقع الخبر علي آدم كما الصاعقه ... صُدم بشدة لدرجه انه ظن أنه يحلم وان هذا مجرد حلم وليس حقيقه ... وقع الهاتف من يده بينما هو لم يتحرك قيد انمله من الصدمه التي وقعت عليه وقوع الصاعقه ...

نظر علي له بإستغراب ليردف بعدم فهم ...: مالك يا آدم ايه اللي حصل ...!!

نظر آدم الي علي بصدمه شديدة ثواني وأردف بصوت متقطع ...: أمي ماتت يا علي ... أ ... أمي اتقلت ...

علي بصدمه شديدة ...: ايييييييية ...!!!

اتجه علي بسرعه الي سماعه الهاتف ليردف بسرعه ...: العنواااان فيييييين يا حضره الظابط ومين اللي عمل كدا انت بتقوووول ايييييييية ...!!

الظابط بحذر علي الناحيه الأخري ...: حضرتك احنا دورنا كتير علي فريدة هانم لحد ما لاحظنا شيئ غريب امبارح في فيلا جوزها مجدي الزناتي ... لاحظنا أن ارتفاع النجيله في الجنينه مش طبيعي في منطقه معينه ولما حفرنا لقينا جثتها وودينها المشرحه عشان نعرف تقرير الطب الشرعي إيه لأن جوزها بينكر ...

علي بغضب شديد ...: ومقووولتش ليييييية امبارح أن دا حصل ليييييية مقووولتش ...!!

الظابط بحزم ...: انا بنفذ التعليمات يا فندم ... مجدي دلوقتي محبوس ٣ ايام علي ذمه التحقيق وكان لازم الخبر يوصل لحضراتكم بعد تشريح الجثة عشان نعرف ايه الي حصل ...

اغلق علي الخط في وجه الظابط ... ونظر بحذر وخوف شديد الي آدم الكيلاني والذي كان ينظر أمامه بصدمه وحزن دون بكاء ... ثواني وقام آدم من مكانه بهدوء شديد ...

ليردف بتوعد أشبه بتوعد النمر لفريسته التي سيأكلها ...: عنوان القسم اللي محبوس فيه مجدي فين يا علي ...!!

علي بسرعه وخوف شديد ...: آدم باشا ابوس ايديك ااا...

نظرة واحدة من آدم الكيلاني كانت كفيله بإخراسه الي الابد من الخوف الشديد منه ...

ليردف علي بخوف وإيماء ...: حاضر يا آدم باشا .... اتفضل معايا ...

اتجه علي وآدم خارج الشركه ليقود علي السيارة الي وجهته حيث السجن الذي به مجدي ...

وصل علي وآدم أمام السجن ليدلفا الي الداخل بعد ترحيب كبير من الضباط والذين يعرفون آدم باشا النمر ... ومن لا يعرفه فإنه صاحب اكبر شركات بالعالم ...

دلف آدم الي غرفه مكتب أحد الظباط ليردف بأمر وهدوء ما قبل العاصفه ...: انا عاوز اشوف مجدي الزناتي دلوقتي حالا ...

الظابط بإيماء وخوف ...: حاضر يا آدم باشا ...

اتجه الضابط ليحضر مجدي من الزنزانة ... ثواني واوقفه أمام آدم ...

نظر مجدي بخبث وغضب الي آدم ليردف بخبث ...: ابن مراتي الله يرحمها ... عامل ايه يا آدم باشا ...

كان آدم جالساً يضع قدماً فوق الأخري وهو ينظر إليه نظرات غير مفهومه ولكن مرعبه ...

نظر آدم الي الظابط ليردف بأمر ...: أطلع بره ومشوفش وش حد فيكم السعادي ...

أومأ الظابط بخوف وكذلك علي بخوف أكبر علي صديقه من أن يقتل مجدي ... ثواني وخرجا خارج المكتب تاركين آدم ومجدي ...

آدم وهو يقوم من مكانه وينظر الي مجدي بهدوء ما قبل العاصفه ...: قتلتها ليه يا مجدي ..؟

مجدي بخبث ونفي ...: انا مقتلتش حد ...

آدم بإيماء وهدوء وهو يتجه إليه ليقف أمامه ...: تمام ... وانا مصدقك ...

قال جملته بهدوء وباغته بضربه في رأسه ليقع مجدي علي الأرض متألماً يصرخ بشدة كما النساء ..

آدم بهدوء شديد وهو يشمر عن كتفيه وعضلاته الصلبه ...: بتصرخ زي النسوان من دلوقتي يا مجدي ... انا لسه معملتش حاجه ...

قال جملته بهدوء واتجه إليه ليمسكه ويضربه بشدة في كل مكان في جسده ونيران آدم تشتعل غيظاً وغضباً منه يريد قتله بأبشع الطرق ولا يبالي ...

ضربه آدم بشدة في كل مكان في جسده ووجهه لينزف مجدي الدماء من كل مكان في جسده بألم وصراخ وعويل .....

لم يفق آدم إلا علي صوت فتح باب المكتب وإبعاد علي والظابط له بعيداً عن المسجون ...

علي بغضب وسرعه ...: هتقتلللله يا ادددم ابعددد ...

أبعده علي بسرعه وخوف ...

امسك الظابط مجدي بحذر وقد كادت أن تخرج روحه علي يد آدم ودفعه الي المأمور ليذهب به الي المستشفي ومن ثم السجن مره اخري ...

الظابط بخوف ...: آدم باشا هو هياخد جزائه بس بلاش توسخ ايديك عشانه ...

آدم بغضب شديد ...: انا لسه معملتش حاجه دا كدا البدايه ... هو لسه هيعرف انا هعمل ايه لو متعدمش ...

قال آدم جملته بغضب شديد واتجه خارج السجن بمفرده يقود السيارة بغضب شديد وصدمة وبكاء الي حيث المشرحه ...

استلم آدم جثه والدته وهو يبكي بشدة وارتجاف علي من تحجر قلبها عليه منذ الصغر وهو لم يستطع أن يكرهها بعد كل شيئ ... بكي بشدة وهو يدفن والدته بمفرده هو وعلي وبكي بشدة وهو يودعها ويذهب ...

آدم ببكاء شديد أمام صديقه ...: ماتت يا علي خلاص ماتت ...

علي بحزن ...: البقاء لله يا آدم ... كلنا هنموت بس ابوس ايديك انت النمر بلاش تضعف كدا عشان كلنا بنستقوي بيك ...

آدم ببكاء لم يستطع منعه ....: انا اكتشفت اني مش بكرهها زي ما هي كانت بتكرهني يا علي ... انا كنت كنت بحبها ...

علي بحزن وهو يمسح دموعه هو الآخر ...: ربنا يرحمها يا رب ... ربنا يرحمها ...

آدم وهو يمسح دموعه هو الآخر ...: امين يا رب ...

ثواني وأخرج آدم هاتفه ليردف بأمر لحراسه أمام منزل روان ...: دقيقتين وتكون روان في القصر ...

أغلق هاتفه ومسح دموعه بألم شديد وهو شارد فيما سيحدث ...

أما علي نظر إليه بعدم اطمئنان واتجه في طريقه ليوصل آدم الي قصره ...

وصل آدم الي القصر لينزل من السياره دون اهتمام بأي شيئ واتجه في طريقه ليدلف الي القصر ...

علي بخوف وهو ينظر في أثره ..: ربنا يسترها عليكي يا روان ... آدم شكله ناوي يرجع تاني اسوء من الاول ...

قال علي جملته واتجه في طريقه خارج القصر بسيارته الي الشركه مجدداً ...

أما آدم دلف الي القصر ليجد حراسه قد سبقوه وأتو بها كما أمر وتركوها وذهبو ...

دلف آدم الي القصر ليجدها متكوره علي نفسها يدها وقدمها مربوطتين وكذلك فمها عليه لاصق يمنعها من الكلام ...

آدم وهو يتجه إليها بإبتسامه ليفك وثاقها بينما هي كانت تضرب الأرض بقدمها ويدها عندما رأته وهي تنظر له بغيظ وغضب فقد خطفها حراسه ليأتو بها اليه ...

فك آدم وثاقها وأزال اللاصق من علي فمها لتصرخ روان بغضب بمجرد أن أزال اللاصق ...

روان بغضب ....: ممكن افهم انا بعمل ايه هنا دي تاني مره تخطفني فيها يا آدم باشا ... انت ايييييييية يا اخي ما تسبني في حالي بقي ....

آدم بخبث ....: انا حالك ... ومش هتمشي من هنا يا روان انتي مراتي يا حببتي ولا نسيتي ...

روان بغضب ....: انت شكلك بتسمع مسلسلات كتير صح ...!! أصل حضرتك تقريباً نسيت انك طلقتني يا آدم واننا خلاص م ...

آدم بمقاطعة وهو ينظر لها بغضب ...: منستش يا روان بس انتي اللي مش فاهمه اي حاجه ...

روان بغضب شديد ...: وانا مش عاوزة افهم حاجه غير انك بره حياتي يا ريت انت تفهم كدا ...

نظر لها آدم بغضب ... ثواني وشد زراعها إليه ليجذبها بغضب لتقف أمامه ...

آدم بغضب شديد ...: إيااااااكي يا روااااان اياااااكي تقولي كدا تاني .... وأقسم بالله انتي لو مش ليا لهتكوني ميته ... هقتتتلللك يا روان لو حسيت في يوم انك هتسيبيني ...

روان بهدوء وهي تنظر إليه بإنكسار ...: لو حسيت ..!! حضرتك انا فعلا سبتك ومش عاوزة اعرفك تاني ...

آدم وهو ينظر لها بغضب ...: دا بالنسبالك انتي ... وانا لسه هعاقبك علي كل اللي قولتيه دلوقتي ... لكن بالنسبالي انا انتي هتفضلي حرم آدم باشا طول حياتك ...

روان بغضب وهي تبعده بعيداً عنها ...: دا في أحلامك يا باشا ... انا ماشيه ومش عاوزة اشوفك تاني ...

قالت جملتها بغضب واتجهت لتخرج خارج القصر ...

آدم بغضب شديد ...: روااااان استني عندددددك ...

وقفت روان في مكانها بخوف شديد من صوته ... استدارت إليه لتردف بخوف ...: ن ... نعم ... عاوز مني ايه ...!!

نظر لها آدم بغضب شديد .... ثواني واتجه إليها ليسحبها بشدة من يدها لتسير خلفه وهو يصعد الي الغرفه بغضب شديد وهي خلفه تنظر إليه بخوف كبير ...

آدم وهو ينظر إليها وهي تسير بخوف ...: وربي وما أعبد يا روان لهربيكي من اول وجديد ...

قال جملته بغضب واتجه بها الي الغرفه ليغلق الباب بغضب وتوعد شديد بالعقاب ... بينما هي وقفت ترتجف من الخوف الشديد وهي لا تعلم مصيرها علي يد من عادت قسوته بعدما اختفت ... وعاد النمر الي سابق عصره ...

ماذا سيحدث لروان علي يد آدم يا تُرى ... لا احد يعلم ما يخبئه له قدرها الذي سيوقعها في براثنه مجدداً ولكن بشكل جديد لم يتوقعه أحد ... !

متخيله ردة فعلكم بعد كلمه لا احد يعلم ما يخبئه له القدر 😂👇👇

~~~~~~~~~~~~~

فتحت هدي عيونها بصدمه وخوف وهي لا تدري اين هي ...

نظرت حولها لتجد نفسها في مكان يشبه غرفه الفنادق الفخمه ...

نظرت بجانبها لتشهق بشدة وخوف وهي تري معتز ينظر لها بخبث وهي نائمه ...

قامت من مكانها بسرعه لتردف بخوف ...: انا بعمل ايه هنا وانت ... وانت عملتتت فيااا ايييييييية ...؟!

معتز بخبث ...: متقلقيش كدا انا معملتش فيكي حاجه يا هدي هانم .... بس ممكن افكر اعمل بعدين ...

هدي بغضب ...: انا ايه اللي جابني هنا وليه مش فاكره حاجه ...!!

معتز بخبث وهو يقوم من مكانه ...: اللي جابك هنا انا ... اما بقي ليه فدا هتعرفيه بعدين ...

ضحك بسخرية ليردف بخبث ...: أصل اختك يارا بصراحه تستاهل اني اعمل كدا عشانها ... هو انا مقولتلكيش ... صمت ليتابع بخبث وهو يري خوفها واستغرابها ... أصل انا ناوي اتجوز اختك بدالك ... هي عرضت عليا الفكره وبصراحه عجبتني وخصوصا أن اختك عنيده وهتسليني اكتر منك ...

قال جملته بخبث وسخرية ... لتشهق هدي بصدمة شديدة وهي تسمع هذا الكلام ....

هدي وهي هي تقوم مسرعه ...: يا حقيييير يا زبااااله ...

اتجهت إليه لتضربه ولكن يده كانت أسرع منها ليرميها بعيداً علي السرير ...

معتز بغضب ....: لمي نفسك يا روح امك ... هو اسبوع واحد وهتتنيلي ترجعي بيتك تاني دا لو قبلوكي اصلا ...

قال جملته بغضب واتجه خارج الغرفه ليغلق عليها الباب من الخارج وهي تصرخ بالدخل بخوف شديد وبكاء كبير ...

خرج معتز من الفندق التابع لعائلته ... ليرفع هاتفه وهو يرن علي يارا التي كانت مشغوله هي وعائلتها بالبحث عن هدي التي تأخرت بالخارج ليقلقو عليها جميعاً ...

يارا وهي ترد بغضب ...: خير عاوز ايه ...!!

معتز بخبث ...: اهدي علي نفسك يا عروسه وخلي عيلتك تهدي عشان هدي معايا ...

يارا بصدمة وشهقة ...: ايييييييية ...!!

معتز بخبث ...: ماهو مكنش ينفع اتجوزك من غير ما اختك تختفي ... جهزي نفسك يا يارا عشان بكره هتكوني مرااتي ...

يارا بصدمة كبيرة وخوف شديد ...: حرام عليك يا اخي انت أيييه ...! طب رجع هدي وبعدها نتجوز ...

معتز بخبث ...: انتي مفكراني عبيط ... هدي مش هترجع الا لما تقولي قبلت زواجك يا حرمي العزيز ...

قال جملته بخبث واغلق الخط في وجهها وهو يتوعد بالكثير والكثير ... بينما هي جلست تبكي في مكانها بخوف وقله حيله لا تدري ماذا تفعل ... ثواني وخطر ببالها شيئ ما ...

لتقوم بسرعه وهي ترتدي ملابسها وتتجه خارج المنزل في الخفاء بسرعه شديدة الي مكان ما ... فما هو يا تري ...!!

~~~~~~~~~~~~~

انا متخيله رده فعلكم بعد الحلقه دي 😂😂😂👇

لما آدم يأذي روان للمرة التانيه ويكسرها تاني بس هي متخلفه عقلياً ولسه بتحبه 👇😂😂

يارا لما اتفاجئت أن معتز خطف اختها من غير ما يعرفها خطته وتسأله ليه عملت كدا ومقولتليش

_معتز😂😂👇

~~~~

انتظروني اول يوم العيد أن شاء الله انا بس حبيت انزل البارت دا عشان متوهوش في الأحداث والي جاي احلي بكتير وأصعب بكتير برضه في حاجات هتقلب الموازين في الروايه وأحداث كتير هتشوفوها ⁦♥️⁩

وبرضه اعذروني الفترة دي لو اتأخرت عشان انا لسه بدرس وللاسف عندي أبحاث لازم تتسلم وانا اصلا لسه مبدأتش فيها 😂💔