تحميل رواية «عروس البيت الاسود» PDF

......................................

كاعدين بالصف نهايه دوام الدرس السادس

المدرسه تشرح محد بينا مركز طبعا

بنيه تسولف بنيه تاكل جوه الرحله

بنيه تدز مسجات لحبيبها داخل الجنطه

بنيه مريضه بنيه تتحارش بلي كدامها

اني صافنه ع الحلقه البيدي افر بيها افكر بله اني بهالعمر شجاني وافقت عالزواج هياتهن وحدتهن سنه و تدخل كليه تعيش احلى حياه

واذا ابويه اصر عليه جان لازم ما اوافق اي ما اوافق شنو يخنكني يذبحني

رجعت صفنت ابويه من يقرر شي انتهى بعد

نسيتي شسوه بيج يوم الكلتي ماموافقه راد يبطلج من المدرسه يا غبيه بحجه مصاريفي ثكلت عليه

ذوله جيران وعشره عمر ليش يمشي كلمتج عالزلم

اووف شهالعيشه لا الحياه الاتمناها ولا الرجال الاحلم بي شنو هاي

هنا دك الجرس بده الدرس السابع بس مدرستنا ماجايه طلعنا ركض مثل المشايفين

واكفه كبال مرايه الحمام بالمدرسه احط حمره سحريه

انتبهت عالبنيه اليمي خلت حمره غامقه كتلها

- مخايفه تشوفج الاداره ؟

البنيه : اجتماع اولياء الامور ملتهيات بضراطهن عوفيهن

- ع كولتج

طلعت صديقتي المقربه ساره من باب الحمام تعدل بهدومها لابسه ستيان عظم

كتلها : وين جان هذا ولج

ساره : بجنطتج ههههه

- صخام الصخمج حاطه غراض بجنطتي بلا مادري ؟

- اني الاداره لكفتني كذا مره والعين عليه انتي محد خال عقله يمج

البنات اليمنا ضحكن عليه

- هسه زين ضحكتي علينا اليسوه والمايسوه

ساره : معليج بيهن ماشفتي التاتو الجديد مالتي ؟

- عزه اهلج خلوج تحطين تاتو ؟

ساره : واهلي شنو صدري لو صدرهم

- لتكليلي بصدرج ؟

ساره : كلتها ههههه شوفي

فتحت دكمتين من القميص : باعي

مسويه قمر و نجمتين صغار بجانب صدرها اليمنى قريب الفركه

- هشش ضمي يمعوده والله حيلزمونا دعاره فد يوم من وراكم

فضوها خل نطلع

رجعت عدلت شكلي بالمرايه عالسريع شعري رفعته شويه

ساره : صايره انيقه اليوم خطيبج يجي ياخذج ؟

- ضحكتيني واني بالمنتجع ليش ابويه يخليني اشم نفسي وياه

ساره : ياا غير خطيبج

- بالاسم داده بالاسم حته يوم اليجي البيت كله يكعد ويانه

لو عليهم يصيحون الجوارين والشارع كله يكعد ويانه

فضيها امشي بطني قرقرت من الجوع

ساره : خطوبتيش الكشره هاي بابا سويلج كلمه بين اهلج خطيبج هذا و بعد اسبوع يكطع مهر عليج هم تكليله نكعد ويه اهلي مثل الاخوه ؟

- ميوكل خبز ويه ابويه هالحجي نضل مثل ما احنه ليوم الزفه

ساره : شكد ثوله غيرج بعدهم مقارين الفاتحه تكعد بحضنه وتسلمه نفسها

- اكيد مو اني

ساره : عوذه شهالزواجه هاي انتو جوارين و مخطوبين عن حب

- جوارين اي بس مو عن حب شايفني مرتين تلاثه و خطبني ابويه نطاه لان عندهم محلات عقاريه هو و ابو و يأمن بيهم

واساسا جانو رايدين اختي الجبيره بس مشت الايام وشافوها كبرت اخذوني الي

ساره : اختج هاي متخلفه ضلت تلبس مخبخب ومكمكم لما كعدت ع كلبكم وعنست

بس انتي خوفج لا طليقته لخطيبج ترجع تريده بيوم من الايام وحدتهن بس تشوف طليقها ازوج تلوب تكوم تلبط لبط

- لا نطه كلمه لابويه و هو منفصل من سنين طويله شيرجعها هسه حته ابنها متربي عدنا

ساره : هاي من هسه حتربين جهال و تشيلين هم

- فدوه مايطلعله صوت ابنه بعده 5 سنين فقير طينه يوميه يجي يلعب ويه اخواني الصغار احسه عبالك ابني

احنه و نسولف بباب الشارع اجه الخط مالتي بوستها و سلمت عالسريع اني و امشي صحت : لتنسين المهر مالتي يوم الاربعاء مو ماتجين

ساره : اذا اكو زلم اجي

- ههههه ماكو زلم اخوه بديالى هالفتره يله باي

صعدت بالسياره مشت بيه افكر بمهري و الحفله والاجواء

بس شي ناقص بعد اني بعدني ماعرفه لشاهين معرفه كافيه

ابويه اختارلي هالزواجه علمود الشراكه البين صديقه و ابنه شاهين و اختار شاهين شافه مناسب اليه بس الباقي لازم اني ارتبه

ساره كلامها صحيح المفروض اكعد وياه افهمه و يفهمني كبل مانخطي خطوه الزواج

وصلت للبيت اخواني الصغار محمد و علي بالكاع يلعبون رحت بوستهم

- شلونهم الحلوين تغديتو ؟

اخواني : ننتظرج تجين

- فديت الينتظرني دقايق و اصب الغده

ركضت عالغرفه الثانيه اختي الجبيره كاعده تصفط الهدوم

كتلها

- هاي ليش مامغديتهم جوعانين خطيه

زهراء : مارضو نتغده ويه حور و نتغده ويه حور

- الله يعين رجلج و جهالج عليج بالمستقبل حيموتون جوع

زهراء : مستقبليش بعد راحت علينا

- شهالتفائل الي انتي بي واذا صار عمرج 38 خلصت الدنيا ؟

زهراء :  الفرص هيه الي خلصت

- احباط احباط اروح اغدي اخوتي اشرفلي من كعدتج

زهراء : احسن

ركضت عالهول لكيت اختي الوسطانيه جنه كاعده ع الكرسي مال معوقين تتفرج تلفزيون

دنجت يمها بست ايدها : المن شتاقيت اني ؟

ابتسمتلي ابتسامه بسيطه

- اروح فدوه لابتسامتج صارلج شكد تتفرجين تلفزيون ؟

اشرت بايدها 3 .. 4 ساعات

- هذا كلام بله ؟ عيونج تتعب ياكلبي كم مره وصيتج امشي للمطبخ كافي تلفزيون

كمت دفعت الكرسي ويايه للمطبخ صحت البقيه : الكل تجي للمطبخ ماما وين ماماااا

امي : جيت جيت حور لتعيطين

- ست الحبايب يا حبيبه وينج صارلي ساعه من جايه ماحسيتي عليه

امي : سمعت صوتج واصل لراس الشارع كالعاده

- ههههه كلها كم شهر و تخلصون مني

امي : الله ليكولها يمه انتي المهونه عليه ضيم ابوج و اخوتج

اني واصب الغده حجيت : لتكولين هيج اسم الله عليج روحي الج انتي وبابا خطيه هو هم شايل مسؤوليه صعبه و احنه مو شويه 3 بنات و ولد ثنين

امي : غير اختج الجبيره تحس و تزوج عد نضل كاضيها افلام و مسلسلات

جتي مناك زهراء : شبيه ها لو ماكو غيري سيره تعيدون و تعجنون بيها

امي : لا سيره ولا قصه الي بعمرج عدهن بيوت و درزن جهال انتي وين من هالكلام

زهراء :بعد نتفي بكلبي بيدي السالفه ؟ نصيب هذا شوكت ميجي يجي كافي كلما شفتي حور استلمتيها اختج واختج

امي : غير من خوفي عليج

زهراء : محد يخاف عليه اكثر من نفسي طلعو انتو منها

صحت بيهم : خلصصصص لتبدن مسلسل كل يوم

كلولي شلبس اليوم

امي : ليش عيد ؟

اني: بس بالعيد نكشخ احنه يمه شبيج

امي : لعد شنو

اني : شاهين جاي العصر

امي : شنو الجديد خطيبج عايش عدنا ابوج يوميه جايبه بيده يخططون و يشتغلون

اني : قصدي شلبس كدامه

امي : لبسي الموجود و خففي مكياج ابوج سوالي عرس ذاك اليوم من وره حمرتج

اني : ادري اطلع لخطيبي بلا حمره انتو بيا عصر متكلولي

زهراء : تفضلي هذا الزواج الخابصيني علموده حمره ميخلوها تحط لخطيبها

اني : خره بالحمره فضوها شلبس ماعندي هدوم

امي :  اخذي من كنتور زهراء هدومها اكلتها العثه تنتظر زهراء تلبسها

زهراء : ليش اني جسمي مثل بنتج جنها عارضه ازياء عالسجاده الحمراء

اني : سوي ريجيم تصيرين مثلي

زهراء : باع هاي اني اذا مو ويه المسلسل بيبسي دبل و بلم فنكر اموت

اني وامي : ههههههه

اني : وين محمد و علي محد يتحرك من مكانه كبل متخلصون غداكم يله حبايبي حته تكبرون بسرعه

طبعا اني شكلي عادي لا جمال صارخ ولا شي عاديه

ملامحي ناعمه وبسيطه شعري بي كسره مايل للكيرلي  وما يقبلون اصبغه اغير بي ف بقيته و اقتنعت بي اسود فحم

بس جسمي حلو و بيني وبين نفسي احب اعتني بي بدون مااتباهه بهالشي

استحي احد يعرف انو مسويه ريجيم او متقصده العب رياضه تبرز المنطقتين

بس اشوف البنيه بلا جسمها ماتسوه شي ف العب رياضه واكلي قليل كلش

جنت بانيه احلام ثانيه براسي غير الي دا اعيشها اليوم

خلصنا غده اجه ابويه رحنه لغرفنا قريت و قريت الولد

العصر بديت ادور شي البسه ملابسي قليله لان طلعاتي قليله و ابويه ميحب نفرفر خاصه احنه البنات نشوف الشارع بالسنه مره

حته شاهين ماعافني اكعد وياه ولا مره

بهاليوم اجه كعد ويه ابويه شويه و صاحني جيت كعدت يمهم

سوالف عاديه شاهين جاب ابنه وياه بس شافني اجه كعد بحضني

ابويه و شاهين يسولفون عالشغل

حسيت نقاشهم حاد ابويه مامتفق ويه شاهين برأيه ع البيوت و مختلفين بالاسعار

ماهتميت بقيت اسولف والعب ويه الولد

كمت سويت جاي و كليجه جبتها حطيتها كدامهم باوعت لشاهين اني و اقدمله بس ماركز ويايه جان يحجي بالموبايل

شويه و كام ابويه شاهين باوعني من فوك ليجوه مثل اليتفحصني نظرات مدري شلونها

كال :شوكت ينطوج افراج ناخذ فره بالسياره

- انت و شطارتك قنع ابويه

شاهين: مضل شي الاثنين اعقد عليج واخذج ياويلي شكد متحمسلج

ستغربت جملته بحكم كعداتنا التنعد عالاصابع ويه الاهل و حجينا رسميات بعد مابيناتنا ميانه تخلي يكلي هيج كلام

هزيت راسي بابتسامه بسيطه بس بقيت متوتره اريد اكله بودي نطلع كم طلعه كبل العقد نتعرف اكثر بس ستحيت احجيها تمنيت هو يكولها

بليل كلت لامي : شتكولين انتي

امي : ع شنو

- اريد اتعرف عليه بعد مو كتلج

امي : ولد طول بعرض و ابن ناس و كسيب

- شتكفي هالمعلومات اريد اعرفه اكثر

امي : انتي صديقاتج يلعبن بعقلج دائما بنتي كلشي يجي بعد الزواج لتستعجلين

- صديقاتي شنو بالموضوع اني اريد افهمه اريد اعرف المن حزوج مو حقي

امي : كطعي مهر و تعرفي براحتج

- ابويه ختاره و ماعترضت الباقي اني احدده لتصرفون هالتصرفات ويايه  الله يخليج ماما اني مخطوبه و المفروض اتونس بايامي

امي : لازم تطلعين وتتمايعين يله تتونسين ؟ خوش ولد و كافي

اي بالبدايه ماعجبني لان مطلك و عنده ولد يا حضي ماعرفو يخطبوج لاخو مهدي عزابي و بعده بشبابه

يله كلشي نصيب

- ليش نطيتوني اذا مامقتنعين

امي: مرح تبتعدين جيران حايط بحايط تبقين يمي وعيني عليج ليش ماوافق

رجعت اقره بالكتاب مامقتنعه بكلامها

امي : ليش شايله هم بنتي توكلي ع الله شاهين خوش ولد ماعليه حجي

- مامبين شي مامبين اي شي يجي يكظيها سوالف ويه ابويه اكعد وياه دقيقتين عينه تتفحص بجسمي ولا كانو خطيبته و المفروض يتعرف عليها بالاول

امي : كل المخطوبين هيج نظرات و اعجاب لا اذا سكت يعجب ولا اذا باوعلج يعجب حرنا وياج

كلت بكلبي مايتغيرون اهلي ويامن احجي اني

اجه يوم العقد رحنا للمحكمه ننتظر القاضي يسمحلنا ندخل

شاهين واكف يمي يضحك ويسولف ويه و ابويه و ابو

واذا لاف راسه عليه يبتسم بخباثه يعرفني مستحيه و يرجع يسولف وياهم

كعدت عالكرسي بالممر ليغاد منهم اتفرج ع الناس رايحه جايه

البنات اليجن ويه خطيبهن

اخر كشخه و جمال و الولد يباوع ع حلكها ممصدك حيعقد عليها

لازمها بايد و الايد الثانيه يعدل كذلتها هيه مستحيه تتبسم و تضم راسها بجتفه

فرق جبير بينه وبين شاهين الله يسعدهم

اجه سرانا دخلنا للقاضي كتب و حجه ويه اهلنا بعدين بده يسئلنا

كالي بنتي موافقه ع هالزواج

لساني نبلع الكلام وكف ع شفتي حرارتي صعدت

احس ببوخه تطلع من وجهي

ديسئلني شي مصيري ماعرف كلمه موافقه وين حتوديني

القاضي اشرلهم ع شفته هش يعني خلوها تحجي

فكره توديني و فكره تجيبني شي بداخلي يكلي قبلي ماكو خيار ثاني

و شي يكلي ديري بالج

يتبع

.........................

شتاقيتلكم هوايه وافتقدتكم هوايه هوايه

هوايه كلت هوايه 😁

المهم

شكرا ع تفاعلكم بباقي القصص

خاصه قصتي الشخصيه ماتوقعت بيوم الناس تتعلق و تتأثر بيها هلكد

شكرا من كلبي

اليوم بدينا بهاي القصه الجديده من حياتنا العاديه و احداث حقيقيه

حقيقيه لدرجه عميقه بكل تفاصيلها

بيها اخطاء من البطله هوايه

لان شافت معاناه وحدها مده طويله بدون حسيب او قريب

ف عاشت تخبطات و حياه جريئه و متسرعه

اتمنى ماتقسون عليها بالردود لان هيه حابه تفضفض مو اكثر

احداث هوايه حتصير مامتوقعه

اتمنى تنطون القصه حقها بالتصويت والتعليقات

لان تستاهل تنقري و توصل عبرتها للناس❤️

ارجع واكول (القصه حقيقيةةةة)

الي مايصدك هالشي اتمنى يغادر القصه بدون مايتجاوز و يتهمني بالجذب اني مو مؤلفه روايات حته يوميه ألف قصه

ملاحضه صغيره : اذا لكيتو تناقض بالتواريخ او الاعمار عادي اني متقصده اغير بيهن بناء ع طلب صاحبتها

النشر حيكون يوميه

و اذا شفت تفاعل و حماس منكم انزل بارتات مفاجئه

يتبع ....

................................

لساني نبلع الكلام وكف ع شفتي حرارتي صعدت

احس بوخه تطلع من وجهي

ديسئلني شي مصيري ماعرف كلمه موافقه وين حتوديني

القاضي اشرلهم ع شفته هش يعني عوفوها ع راحتها

فكره توديني و فكره تجيبني شي بداخلي يكلي قبلي ماكو خيار ثاني

و شي يكلي ديري بالج

ابويه باوعني بخنزره فضيها

فوضت امري لله و كلت : موافقه

عقدنا و رجعنا اشتغلت الهلاهل من كل صوب لحد ليله المهر

اني بغرفتي كاعده عالتسريحه زهراء يمي تعدل بدلتي

و اختي جنه ورانه عالكرسي المتحرك مالتها تباوعلنا و تتبسم

طبعا كلشي يخص المهر اهل شاهين جابو ماسئلوني عن رايي ولا اخذوني وياهم

جابو و حطو امي ماعلقت واني هم ماهتميت اعتبرته زواج تقليدي شلون مجان ديمشي

امي رايحه جايه تهلهل سمعتها تكولهم تفضلو تفضلو بغرفتها

فتحت الباب دخلو وياها ام شاهين و اخته رغد

هلهلو جوي سلمو عليه بوسوني

ام شاهين تصلي عالنبي كلتلي : انتي من اليوم بعيوني مثلج مثل رغد و شاهين و مهدي

- يحفظج ربي خاله و يخليج اليه انتو هم بعيوني

طلعنا بدت الحفله بين الهلاهل و الاغاني و ركص البنات

رغد كعدت يمي بالحفله نسولف

رغد : متوقعتج هلكد حلوه حور جنت اشوفج بصدريه المدرسه و ضفيره الشعر ماتخيلتج هلكد ناعمه

- حياتي عيونج الحلوه انتي الاحلى و يوم لالج

رغد دارت وجهه مثل النقهرت من كلامي

- اسفه والله كلبي ماقصد قصدي ان شاء الله ترجعين لزوجج

رغد : ليش حضرته سائل عني سافر مارجع بعد ماصدك يخلص مني

- كلمن و ضروفه متعرفين منا لباجر شيصير لازم يجي يوم يشتاق الج

هنا عله صوت الهلاهل النسوان لبسن ربطاتهن

دخل شاهين كعد يمي لبسني النيشان وباس راسي

بقه لازم ايدي و بايده الثانيه السبحه يحرك بيها منا و منا و يتبسم بوجه العالم

كل شويه يباوعني بنضره جانبيه عينه تروح ع صدري يعض شفته

استحيت اشرتله بعيني عيب

قرب راسه يمي شاورني : شيلي العيب بينا انتي مريتي

ابتسمت بخجل و درت راسي عالنسوان اتبسم وياهم

خلصت الحفله ماصدكت اصعد انزع الكعب رجلي ورمت

شوكت يصير البوتين حذاء العروس شبي البوتين

انتضرت توقعته يخابرني بليل بس ماخابر

ثاني يوم رحت للمدرسه عندي امتحان رجعت من الطلعه لكيت ابويه مقرر العرس بعد شهر

تعاركت وياهم كتلهم شهر ششوف من خطيبي يمعودين كولو غيرها

ماكدر ازوج كبل ما اعرفه عدل

ابويه كال انتي مزوجه شهالدلاعه مفارغلج اني

كلامه قهرني كلش

دخلت لغرفتي بجيت ع فراشي امي و زهراء يهدون بيه

- هسه ليش هالبجي شفتي شي مو زين من الولد حته تبجين

لج بابه لتكلبيها مناحه انتي عروسه لحكي تونسي بايامج

تقبلت امر الواقع و كلت الحمدلله ع كل حال

بس بقيت كالبه وجهي عليهم ماحب احد يفرض عليه وضع معاجبني

شاهين خابرني وره يومين حته نطلع كتله بكيفك

كال بليل تحضري اجي اخذج عازمج ع عشه

كشخت و تمكيجت طبعا ابويه سواها سالفه بالباب شهالمكياج و شهالكعب و شنو فاتحه شعرج وين كاعدين بلندن

امي كلتله يله بس هلمره الولد ينتضرها بالباب محلوه

كوه خلاني اطلع صعدت للسياره شاهين لزم ايدي عصرها : شبيها ايدج حاره

-  متوتره شويه

شاهين : ليش التوتر حبيبي رجلج اني

ابتسمتله رفع ايدي باسها وشغل السياره طلعنا

طول الطريق يسولف عن شغله و ابنه و اهله

وصلنا لمكان قريب ع ابو نؤاس نزل كلي هسه اجي

ستغربته شعنده هنا كلت اكيد مواعد صديقه شغل فلوس هالسوالف

رجع وره دقيقتين بيده علاكه صعد السياره

كلي

شاهين : لزمي

- شنو هذا ؟

شاهين : عشه

- عشه !!! حنتعشى بالسياره ؟

شاهين : اي متحبين الفلافل ؟

- فلافل !!!!!!!

شاهين : شبيج حبيبي

- سلامتك مابيه شي

شاهين: نزلي نتمشى شويه و افتهم شنو مضوجج

نزلنا من السياره نمشي عبرنا الشارع كايدني يكلب بموبايله

كتب مسجات و قفل الموبايل

طبينا بابو نؤاس نمشي نمشي هو كايدني

احنه وماشين كرص ع ايدي شاورني : شهالجمال ؟

- تعاركت الف عركه علمود اكشخ هالكشخه

شاهين: محد اله دخل بيج اني رجلج و قابل امشي نكعد ع ذيج المصطبه

رحنا كعدنا بعدني اعدل شعري اجه تقرب يمي لزك جسمه بيه

شاهين: شو اشوف

- شتشوف

شاهين : مرتي الحلوه

- شوفني من مكانك لو نظرك ضعيف

شاهين:  ضعيف تعالي

- شاهين شتسوي؟

شاهين: شبيج حبيبي

-انت شبيك

- اشوف

- شتشوف

- الرمان فديته

يحجي هو و يتلمس بجسمي و صدري

- شيل ايدك دتضوجني

مارد عليه باس خذي

- تره داحاجيك

لاف خدي عليه باس شفتي و ايده لازمه خدي اوخر راسي ماخلاني

اختنكت دفعته بايدي وكفت : بيك شي انت ؟

شاهين: شنو شهالهوسه المسويتها انتي

- مطلع خطيبتك توكلها فلافل بابو نؤاس شايفني بت ملهى ؟

جريت جنطتي مشيت اجه ورايه لزمني

شاهين: تره مرتي انتي مامستاهله تكبريها

- ع اي اساس مرتك لا اعرفك لا اعرف شخصيتك شتحب شتكره

بالك بهالسوالف باول طلعه النا جان استحيت

شاهين: اني اعرفج من زمان انتي المتعرفيني

- انت كلتها ماعرررفك ماعرف اساسا شلون قبلت بهالزواجه شفتهمت منك لا مطلعني و متكلف جايبلي فلافل خرب ببختي

رجعت امشي ضل يمشي ورايه

شاهين :اي وبعدين هالمحاضره شنو نهايتها ترجعين بتكسي خاف

دا اكسر رجلج

- اكيد مو تكسي مثل ما اخذتني رجعني

شاهين : كل هالهوسه ع فلافل لو عازمج ع كنتاكي جان كيفتي

- لا تستفزززني وديني للبيت 

سبقته عبرت الشارع و صعدت السياره

اجه صعد ماحجينا حرف وصلنا لباب بيتهم نزلت ركعت الباب و رحت لبيتنا

من العصبيه طبيت اركع بالبيبان وصلت لغرفتي ركعت جنطتي بالكاع

ركضت زهراء تكلي شكو حجيتلها بعصبيه و حركان دم

ضلت ساكته مجاوبتني جتي امي هم عرفت ضلت تلف و تدور انو شكو بيها و مابيها شي

بس الصبح سمعتها واكفه وياه بالباب تعتب عليه كلتله عيب بناتنا ماتروح هيج اماكن بعدكم شباب روحو مطاعم روحو حدائق محترمه مو هيج اماكن مشبوهه

هو يدخن ويهز براسه معاجبه

سديت البرده انفخ ويه روحي

تندمت ع هالزواجه السوده طلع من نفسي

فلافل بأبو نؤاس ! والله يا الله

غثيثثث

اجه بليل يشوف ابويه كاله اريد احاجيها كتلهم عندي قرايه بعدين اشوفه

خابرني عصبي تعاركنا كالي

- الى متى يضل راسج ناشف

- لما تتغير و عرس ماكو اذا ماتعدل من تفكيرك و تتصرف مثل الاوادم المحترمين باي

سديت وياه لكيت امي ورايه

- انتي عاجبج تخربين بيتج مو تخبلتي

- اي عاجبني اخرب بيتي اكذب اذا اكلج ما عاجبني كلبت معدتي منه ماما

من الاول مامرتاحتله البارحه حسسني كحبه طالعه وياه

- هشششش حسني الفاضج

- يا ناس ماحابته ماطايقته حسو بيه

- صلي عالنبي بنتي العاقله هيج تفكر وحدي الله بنتي توكم ازوجتو بسرعه مليتي لعد اني شكول 50 سنه ويه ابوج شفت الويل والمرار

- مامجبوره اصير مثلج بعدين اني مامليت تصرفاته مقرفه لعبت نفسي

- لان بعدج بنيه مستغربه تصرفات المزوجين و جزت نفسج بعدين تتعودين حبيبتي

- اتعود اتعود ميخالف بس اعرفه كبل ماصير بحظنه ماما فهمي عليه

- صار اني رح افهمه وجهه نضرج و يصير خير بس شيلي الافكار السوده من راسج عمري انتي يله يا حبيبتي الله يهديج

باستني و راحت

بقيت بفراشي افكر بكلامها تخابرت ويه ساره صديقتي تكلي من البدايه نبهتج مرح يعجبج و جبير عليج فصخي و خلصي

بس بداخلي كلت ما استعجل يجوز بمرور الايام يغير تفكيره

تصالحنا بهاليومين اجه هو و ابنه تغدو يمنا اني و بالمطبخ اغسل مواعين

متعوده اسوي معجنات و كيك احطهن ببلم حلويات عالميز

والكيك اطلعه من الفرن اعوفه ع الكاونتر بين مايبرد يله ازينه

علمود اخوتي و امير ابن شاهين من يجوعون يضلون رايحين رادين عالمطبخ ياكلون

ابنه كالي

- خاله انتي حتصيرين ماما ؟

- اكيد حبيبي

سكت بعدين كال

- يعني بعد ماعندي ام ثانيه ؟

سديت البوري نشفت ايدي رحت كعدت يمه

- منو تقصد

- ماما تكلي انت ماعندك غير ام وحده وانتي تكولين حتصيرين امي

منو اختار اني ؟

صفنت عليه كتله

- امك هيه الاصل امير حبيبي تضل تحبها و تحترمها اكثر من اي احد

- واذا سئلتني عليج شكولها؟

- ممم كولها احنه اصدقاء و انتي تبقين امي اتفقنا ؟

- اتفقنا

حضنته وبوسته

حسيته فرح بكلامي من راح بقيت صافنه هاي كل عقلها شاحنته عليه من هسه ششافت مني شسويتلها

مشت الايام .. شاهين يحاول يتقربلي باوقات فراغه

من يكون مشغول مايهتم ولا يدز مسج

ادزله مسجات يجاوبني وره كم ساعه لو بليل يكلي اسف جنت طالع اشوف جماعه بيت بمنطقه بعيده

من يجينا ويكعد تخابره نسوان علمود البيوت احسهن يطولن ويمطن بالحجي علمود تستمر المكالمه

طلعت وياه بره للباب اسولف وياه ابويه صاح من جوه

- حور طبي جوه

سلمت عليه عالسريع و راح

بدينا نطلع اني وامي و زهراء نشوف فساتين الاعراس ناخذ فكره عنهم

اول مادخلت المحل عجبتني بدله تخبل نفس الي ببالي

اختاريتها دخلت اكدرها كدام المرايه

خابرته اكله عجبتني بدله لكيته مشغول دكيت مره ثانيه مايرد

دزيتله صورها عالواتساب و حجزتها من المحل

تونا دنطلع من المحل خابرني يصيح : هاي شنوو بدله لو قميص نوم انسي تلبسيها احسنلج

خابرته : شاهين رح يعدلولي عليها يضيفولها ردن و ....

- لا بكلشي تجادلين ما تلبسيها كلت

- خابرتك الف مره انت ماتجاوب وكتلك تعال ويايه كتلي روحي ويه امج اختاري اني مافارغ شنو ذنبي هسه

- هففف ...  اني اجيبلج شي حلو يلوكلج اسف بس مضغوط شغل و منتهي من التعب ..... من ارجع نتفاهم خوش؟

- بس اني عاجبتني هالبدله شاهين

- لتعاندين حبيبي كتلج اني اجيبلج يله من توصلين كليلي

سديت وياه و نص فرحتي طايره

طبيت للمحل لغيت حجز البدله و رجعنا للبيت

بيومها اجاني للبيت بليل ديصالحني جايب فاكهه علاكتين

سلم وبس شاف ابويه ركض سلم عليه يكله شفت ابو فلان باع بيته الي عينا عليه صدك نغثيت اليوم

طلع جان ضايج الصبح لان البيت الي هو وابويه خالين عينهم عليه

جانو ناوين يشترو و يبيعو ضعف لسعر لتاجر بسوك جميله معروف

مندمج ويه ابويه اني واكفه وراهم اصفي العلاليك ولا كانو خطيبته و جاي يراضيها

صفيتهن بالمصفي غسلتهن ودخلت لغرفتي

وره كم يوم طلعت وياه نتفرج ع غرف النوم

يمشي و يسولف ويه العمال كالهم خلص هذا اللون حلو رح اخذه جهزولي وصل بلي اتفقنا عليه

يروح و يرجع اني واكفه بس اتفرج ما اخذ رايي

تمنيت يلزم ايدي نمشي و يكلي اختاري حبيبتي

الي يعجبج ناخذه ..

الي تردي يصير

جنت محتاجه اسمع كلام حلو منه

اريده احس اني مخطوبه

طلعاتي وياه كانو طالعه ويه واحد من اهلي مو خطيب والمفروض بيناتنا تلاطف و مشاعر

اكو علاقات بالحياه تكون مجرد روتين و اجراء ضروري حته الحياه تستمر

مابيها مشاعر ... مابيها حب.. بارده ثكيله عالمعده

علاقه محد يحسدك عليها

هاي جانت علاقتي بشاهين

صرت امشي وياه اسولف عبالك ويه صديقتي سوالف عاديه

حاول يتقربلي يبوسني يحضني جنت اتحجج بشغلات بايخه بس واضحه حجج مرات افشله ارزله بنشافه هو اخذني ع كد عقلي

الايام مشت ع هالموال يوم عادي و يوم اقل من العادي

فد يوم الضهر دنتغده رجع ابويه من وكت ع غير العاده ركع الباب و دخل بلا سلام

ركضت امي وراه اخواني رادو يلحكوها لزمتهم : كعدو كملو اكل

رحت وكفت يم باب المطبخ احاول اسمع حجيهم

ابويه يصيح : البيت مبيوع من اسبوع والي نسبه 45 بالميه ماخذيها و ميكلولي

امي : ابو شاهين اخذها معقول ؟

ابويه : اي الخره هذا هو شاهين

خلي مايرجعون الفلوس و يشوفون اسويها حرب ع راسهم

امي : استهدي بالرحمن بنتك ع ذمه ابنهم لتسوي عداوات

ايويه : و روح امي وابويه اذا ميرجعون الفلوس اطلكها منهم و ابلغ عالمكتب اسويها ضلمه بعينهم

امي : يممه كول يا الله

ابويه : اسكتي انتي الخ طلعي بره و سدي الباب برره

اني سمعت حجيهم حسيتها فرصه لازم استغلها

اجه وكتها اعوف شاهين

بس لازم ما استعجل خليها بيناتهم لما يوصل سرايه بهالقصه

بليل دا اكلب بالتلفزيون جتي امي تلوب كعدت يمي

- ابوج ناوي نيه سوده لشاهين وابوه جنه مرح يعبرها

مجاوبتها ضليت اكلب

- اني ويامن احجي

نداريت عليها : نعم

- شهالبرود البيج اكلج ابوج حيكبر السالفه

- و تكبر

- و تطلكين ؟

- اي

- وجعي دهر صابكم

بنيه معوقه و الثانيه معنسه والثالثه بعدها 19 سنه مخطوبه

وع وشك تطلك اذا تردون تموتوني قهر كلولي

- وكلامي حيقدم لو ياخر ويه ابويه ؟ الي براسه حيسوي

مثل ما زوجني اله يطلكني منه مرح يسمع لاحد

- خوب انتي منتظرتها جتج من الله السالفه

سكتت بعدين جاوبت :  سوو الي تردو مالي علاقه اني

ابويه بيومها نطاني امر ماحاجي شاهين بعد لما يرجعوله فلوسه

استخدمني ورقه ضغط عليهم

شاهين دك عليه هوايه مارديت سويته صامت و شمرته بالمجر

الصبح داروح للدوام استغربته موكف الخط وواكف يمه رحتله

مشينا ع صفحه

وكفنا نفخ الجكاره بوجهي : ليش مجاوبين ؟

- بابا ....

- مشكلته ويايه ابوج انتي شكو

- كالي ماحاجيك بعد

- ممم وانتي شنو رأيج ؟

- اني طلعوني بره السالفه

- يريد اطلكج

- حلوها بينكم

- مالج راي انتي ؟

- لا

- شو اشوفج موافقه

- الخط ينتظرني شاهين لازم اروح باي

وره كم يوم ابو شاهين تفاهم ويه ابويه و وعده ببيعه جديده يربحون منها ثنينهم ربحه جبيره و من هالكلام

ابويه سكت رجع يشتغل وياهم و ماعرفنا شلون تصافو

ابويه بموضوع البيع و الشراء مال بيوت كلامه بالقطاره منعرف الي داخل بجيبه والي طالع منه

بيوم من الايام جنت فوك يم باب السطح اعزل بالغراض

سوينا حمله تعزيل للبيت صار كله غراض و كراتين

الم المانريدهم واصعدهم بالبيتونه يم باب السطح

بلحضه حسيت البيت انرج رج من الصراخ

اذني راحت بالعيطه مال امي كلبي لزمني باوعت ليجوه من فوك صحت

- شكوووو مامااااااااا

نزلت ركض مثل المخبله نعالي وكع بنص الدرج كملت ركض حافيه

وصلت للمطبخ نشف دمي عالمنظر اخترعت !!!

ا ا امير !!!!!

.........

يتبع ....

..........................

نزلت ركض مثل المخبله نعالي وكع ع الدرج كملت ركض حافيه

وصلت للمطبخ نشف دمي عالمنظر الشفته !!!!

- امير لا يا الله اميررر ماما بابا لحكوني وينكمممم

محد بالبيت كلها بالشارع يتجادلون اسمع صوت ناس تتراكض و تبجي

دخل شاهين يركض مثل المخبل انجبح بالكاع يم امير