على كتف القبطان حمامة الفصل الثالث وأربعون 43 - بقلم رُسُل فَهد

التَصويت و المُتابعة لُطفاً
عَلى كتِف القُبطان حَمامة
- رُسل فَهد
....

بعيداً عن الفصيح نعود لاول ابيات كتبتها
عام ٢٠٢٠/١٠/٢٣م
هـَلي زحمـة مـن أعاتبكم
هـَلي المفروض حگي أنتم تردونة
هـَلي المفروض من الدنيا تكسرني
اجيكم و اگعد بسدكم
هلي بتكم يبچوها
عليّ مترف شواربكم؟
هلي چا انا مو منكم!
هلي أحلامي الذبحتوهن يغثني
وحگ دمعي الجرة منكم
أموت و ما أسـ ...
أحبكم راح أسامحكم ..
- رُسل فَهد
...

جوهرة
ياخوفي من احساسي الي ما احبة اذا صار يوز بشغلة
احس وشه بأذاني صارت و ايد تُراب صارت على ظهري
فتحت عيوني كل وسعهن على كلامهَا و أهز راسي بـ لا

- يا ماما انتِ عندج تشوه خُلقي بالرحم ما يكدر يحتوي اي
نُطفة لا تتعبين نفسج عند الاطباء عندج فلوس اصرفيهن
على نفسج ، عيشي حياتج
تُراب : دكتورة شنو الموضوع كولي يا الله

جانت هاي اخر كلمات اسمعها و بعدها فقدت الوعي
كعدت و اني بالسيارة و تُراب شكلة ما يتفسر من خوف وقهر و صدمة
جوهرة : اخ يمه گلبي
- اسم الله على گلبج حبيبتي

شغل السيارة و اني متمدده ليوره و دموعي على خدي
تُراب : باجر اخذج لغير دكتورة ارتاحي اليوم و نامي
معليج بكلامها تلكين الاجهزة يمها متشتغل
بقيت ساكتة طول الطريق و هو يقنعني

من وصلت للبيت صعدت اركض و قفلت الباب
اضرب راسي بالحايط واندب حضي ليش ليش ليش
بس اني لازم اعاني و اتعب و انحرم حتى من الاطفال انحرمت
شوكت ارتاح شوكت

تُراب يدك بالباب و صوته عالي و اني ما مهتمه
انهاريت صرت كلشي اشوفه كبالي اكسره نزعت الحلقة و شمرتها
شمرت التراجي كسرت المكياج ما ادري شوكت و شلون كدر يدخل
بس حسيت بأيدة لمن حاوطتني تهديني
تُراب : جوهرة هاي انتِ جوهرة القوية والله عيب

جوهرة : مو قوية مو قوية و ما اريد شيء بعد من الدُنيا
طلكني و عوفني بحالي اني اريد اموت اخواني شفتهم و مرتاحين
خلي اموت و ارتاح تعبت والله تعبت
هزني بقوة حتى اصحى على نفسي
تُراب: و احنه هيج تعودنا ؟ نستسلم
و ننزل الدرج من اول باية ؟

جوهرة: كعدت بالارض و دموعي على خدي سندت راسي على رجله
هو واكف و اني امسح ايدي بفستاني لان تدمرت باودر
بسبب المكياج الي كسرته ضَمني لصدرة و يطبع قُبلاته بشعري
تُراب : و تسوين هيج بنفسج علمود طفل عمي والله ما اريد اهم شيء عندي انتِ يروح يصير بيج شيء يا جهال يا قنادر

جوهرة : اذا تحبني مَوتني
ضغط على شفايفي بقوة
تُراب : تموتين و اموت وراج و تنتهي سُلالتته بدون ذكر
جوهرة : طلكني و تزوج انتَ من حقك تصير اب
تُراب : انا ابني اذا مو انتِ امه ما اريدة

بقيت كاعدة و دموعي على خدي من الي سمعته و من الم رجلي
بسبب الروماتيز اجوي عمي و خاله يهدوني و شكلهم مقهورين اكثر مني ضليت اكل بروحي اكثر و اكثر
تُراب اجه رتب الغرفة و كل الفوضى الي مسببتها اني

خليت راسي على الوسادة و وجهي على الشباك و امسح بكل دمعة تنزل احس اني لسة ما مستوعبة الي سمعته
انطفة الضوة و اجه يمي ايده تمشي على زَندي
تُراب : ترى اني من شكلها ما ارتاحيت الها و هي حتى لو اكو هيج موضوع من باب الانسانية المفروض ما تحجي بهاي القساوة
اني شاك بأمرها تلكيها متعاركة وي رجلها و طلعت الحرگة بيج

جوهرة : تُراب اني ما الي خلگ سوالفك الله يخليك عوفني بحالي
تُراب : مَا عيب ابو الجواهر اني مثل ضلج وين ما ترحين وياج

جوهرة : يعني اني شمسوية و كل هذا القهر يصير بية
اني اكثر شيء جنت اتمنى من الكة اخواني يصير عندي اطفال و تالي حتى الاطفال اتحرك من عندهم شنو وحد من البنات اني
تُراب : طبعاً وحد لان انتِ مو اي وحدة
و بعدين اني وياج لحد بيعة الشَورت بشرفي
مستعد ابقى مصلخ و مضحكة لامة محمد بس اهم شيءٍ انتِ مرتاحة

جوهرة : و انتَ هيج ما هامك الموضوع و كاعد تضحك عليه
بس حقك لان انتَ تكدر تتزوج مابيك شيء
عندك عادي مكيف
تُراب : طاح حظج يا مَلحة لج اني ابدلج
مَا عيب والله ما عيب شنو قحط الجهال و ابدلج بيهم

سحبني و خلاني بحُضنه و هو يلعب بشعري و يهديني
تُراب : باجر اخذج لاحسن دكتورة هنا و نشوف شنو دكول
و كلشي بي امل نسوي لا تمصخيها يعني انتِ هاي السنين
كلها صبرتيها على اخواني و ما تبعتي و على جهالج ما تصبرين
جوهرة : لان تعبت اني بعد ما عندي طاقة
تُراب : اشتريلج تايگر و لا يهمج

صرخت بوجهه بقوة
جوهرة : لا تتمضحك لا تتمضحك كوم من يمي يالله كوم
دفعته و هو حاوطني مبتسم
خَله راسي على كتفة و يمسد بظهري
تُراب : اني ما اضحك عليج بس ما دام انتِ موجودة
كل المواضيع الباقية تافهة

كعدت الفجر توضيت و اجيت اصلي فرشت السجادة و ابجي
بكل قوتي بالصالة طلع عمي من غرفتة
ابو تُراب : كولي يا الله عمو كلشي بي غاية
و رب العالمين رحيم ما يخلي عبادة محتارة ان شاء الله خير

جوهرة : عمو اريد اروح لامي
ابو تُراب: روحي بابا
- تُراب ما يدري
- روحي اني اكلة معليج بي
بچادر الصلاة طلعت و عمي واكفلي بالباب دكيت الباب
ادري بي وقت كعدة نويرة طلعتلي مستغربة شكلي
نويرة : هلا ، زعلانه العروس

طَبيت للاستقبال فراشاتهن ثلاثتهن مفروشة دموعي تجري
فتحت الضوة نويرة و هن رفعن روسهن مستغربات
رحاب : شبيج
اميرة : يمه شبيها جوهرة

خنگتني العبرة و بجيت بصوت عالي وكفن يمي ثلاثتهن
يردن يعرفن شكو
رحاب : تحجين لو اروح استفسر منه و اهججه اني مو كتلج ما مرتاحتله مبين ورا سالفة جبيرة
جوهرة : معليه هو معليه

نويرة :جا شبيج ولج احجي كلبي وكع بين رجلي
جوهرة : الدكتورة دكلي ما تصيرين حامل
حجيت الهن كلشي كالته الدكتوره و اني ابجي بشهگة
وهن ساكتات لطمت امي على خدها
نويرة خلت ايدها على كتف امي
نويرة : اش اش ماكو شيء

اميرة : يمه اسم الله الزهرة ام الحسن و الحسين وين هاي الدكتورة
الله يبعدج شر حجيها ان شاء الله ماكو. شيء
نويرة : يا و تبجين دهر صابج ياما و ياما الدكاترة آيست نسوان من الحبالة و هاي قدرة ربج خلت بزرهن يترس البيوت

جوهرة : اني جان كلبي حاس
نويرة : امداج و امدا احساسج المابي خير
ولج صاحبتي كبل مو هسة تزوجت و بيها سكر كالت الدكتورة اذا تردين تموتين احبلي و العالم تدك و تلطم و حبلت المره و كلها خافت
كالت الها الدكاترة راح يطلع مشوه
و طلع ذاك الطفل هالكبره وهسة رجال

جوهرة : و اني مثل حظها قابل
نويرة : و احسن ان شاء الله ولج بعدج صغيرة يمه و منين اجاج التشوه مابيج شيء انا رايحة اليوم اكول لهذا الوليد يمنه
ياخذنة لكربلاء واشدلج علگ هناك وانذر
و انا الحُسين يحبني دوم ما يخيبني و ينطيني مرادي

بقيت ساكته و ايدي على خدي ونويرة بدلت تريد تروح للشغل
و وواكفة منتظرتني اسكت
نويرة : ترى اذا تصلين تنوحين كلشي ما تحصلين صيري مثل خالتج
الدنيا لعبت بيها طوبة و بعدها تضحك و كاسرة عين الدنيا
انا اخليها تتشمت بيه و تشوفني ابجي لو تموت والله

رحاب : كافي بجي اليوم اخذج لغير دكتورة و نشوف شدكول
هي هاي الدنيا بيها اشكال و الوان موًكلشي نريدة نحصلة
رجلج شيكول
جوهرة : يكول اني حتى جهال ما اريد بس لا تبجين
نويرة راحت و امي ما راحت للشغل وياها
بقت يمي

للعشرة اندك الباب و دخل تُراب
تُراب : اويلي هاي بعدج تبجين لج بابا هاي عود انتِ الجبيرة
رحاب : ناخذها اليوم لغير دكتورة
تُراب : اي هسة مو كلت الها قنعيها بنتج قنعيها
- هو اني بنتي اكدرلها وين اكدرلها

اميرة : والله ماكو شيء ان شاء الله الله ومحمد و علي وياكم
لا تخافون هسة يجون و يترسون البيت و دكولون ياريتنا ما خلفنه
تُراب : كون كلهم عليه يطلعون حتى تبقى المَلحة حايرة بزمانها
تلزم منو و تعوف منو

اميرة : ههههههه لا نريدهم جواهر مثل امهم يكبرون و محد يحس بيهم النملة ما يأذوها و يبجون حتى على الحمامه اذا ماتت
اباوعلة معاني وجهه تغيرت و باوعلي
لزمت ايده و رحت ويا للبيت بقى كاعد بالاستقبال
و صافن

بنص وجعي و كسرتي بس ما اريد اشوفة مكسور و ضايج
نضفت المطبخ و اجيت يمه كعدت يم رِجله
جوهرة : تذكرتهن مو
تُراب : ليش اني ناسيهن ؟احس بيهن زعلانات عليه
من عفت هذاك البيت حتى بأحلامي ما يجن بعد

جوهرة : انتَ بعته ؟
تُراب : شلون ابيعة و هنَ بي ابيع روحي وًما ابيعة
جوهرة : الله يرحمهن
حجيتها و تمددت على رجله خله ايده على راسي

تُراب: بالدنيا هاي ما عندي غير انتِ و امي و ابوي
و اذا واحد منكم مامرتاح حتى روحي اكرها
خليها على الله و هي تصفى من اشوفج هيج مقهورة
اريد بشوية نفط و احرك روحي
اني ما دام يمج ما اريد اشوفج مكسوره

جوهرة : ان شاء الله
حجيتها و سكتت و بقت فكرة تجيبني و فكرة توديني
العصر رحت وياهم هو و امي و نويرة اخذت اميرة وًراحن يزورن
تُراب : اني من اداوم و انزل اخذكم و اخذ امي هم

سولف لامي على دكتورة زوجة صديقة تراجع عندها
دكتوره على مستوى حتى كشفتها اغلى من الكل
المكان جان ازدحام كلش و طول الانتظار اني كلبي يريد يطلع
من سُرع دكته

اصعب فكرة لما يكون هذا اخر خيط امل بحياتك
و مية فكرة و قرار ببالي اذا جان كلام دكتورة البارحة صحيح
و خلاص اني اقتنع لهنا و تنتهي حياتي بهواي امور

من وصل سراي امي بأيدها تسحبني و رجلي ما تعيني اكوم من الوجع نزلت تركض تصيح لتُراب صعد وياها اجه مستغربني و العالم كلها تباوع
تُراب : شبيج حبيبي شو باوعيلي
دموعي تجري و صرت شهگتي عالي اباوع حتى امي كامت تبجي

جوهرة : رجلي توجعني
بدون كلام خلى راسي على صَدرة و مَد ايده على رجلي لحد ما صرت كُلي بحُضنه و من الخجل اتمنى اختفي وهو شكله طبيعي و عنده
الموضوع كلش عادي

كالت الدكتورة سلامات سلامات شبيها
تُراب : مابيها دكتورة بس رجلها توجعها بسبب الروماتيز
- يا عيني تعالي يا حلوة زَوجها انتَ مو ؟
- نَعم وهاي والدتها

انطاها التحاليل الي سويناهن البارحة
سوتلي سونار و بعدها لغرفة الفحص و معاني وجهه ما تبشر بخير
هذا اكثر شيء خوفني بقت تسأل عن يوم زواجنا
ووضعي لمن جنت بنية
- هسة كومي ارتاحي حتى اسولف

اباوع لتُراب و هو للان يباوعلي بنظرة تطمني و مخلي الوضع عادي
رغم اني ادري هو شكد مبين خايف من هالموضوع
مسح جبينه و بِلع ريگة و لزم ايدي
خليت راسي على زَندة و غَمضت عيوني

- زوجتك هنا عندها نسبة تكيُس مُخيفة و ما اعتقد بالعلاج نكدر نتخلص منها تتوجب عملية و بعد العملية بثلاث اشهر تبين النتائج
اباوع لتُراب باوع لامي و امي مثله مصدومة
رحاب : دكتورة احنه البارحة اخذناها ما كالت هيج
كالت عندها تشوه بالرحم

- اسم الله هههههه يا الله منين هذا الاستنتاج شافته
ماكو اي كلام بس الموضوع و ما بي اصلاً شكل الرحم ما واضح
بسبب كمية التكيس القوية وعادي ياما مراجعات اجوني
اجريت الهم عملية و صار عندهم طفل و اثنين و ثلاثة

تُراب : و الا عملية ؟
جوهرة : اي اسوي
- اكو علاج بس مايفيد هاي النسبه يفيد الي نسبة تكيسهم قليل بالعلاج يروح بس مثل هاي النسبه لا ما اعتقد مجرد فلوس على العلاج تنصرف بدون فايدة
جوهرة : بس اصير حامل
- ان شاء الله كلشي بيد رب العالمين

احس تُراب بقى محتار و حتى اني بقيت محتارة بين اصدك هاي الدكتورة لو هذيج كلامها أصح طلعنه منها و من الحيرة ماكو
اي راحة بالموضوع
تُراب : اخذكم لدكتورة ثالثة و اذا كلامها نفس هاي نرجع لهاي
لان انا مرتاح لهاي

طلعنه و طول الطريق هو لازم ايدي بقوة
ينبهني على وجوده بصفي
و جان كلام الدكتورة نفس الثانية و ما جابت اي طاري لتشوه الرحم
و آيستنا مثل ذيج تُراب انرسمت الابتسامه على وجهه
قربني لحُضنه نسى احنه كاعدين كبال الدكتورة

رجعنه للبيت و اكو خيط امل انزرع بقلوب الكُل
و احس هم فرحانين اكثر مني
ابو تُراب: هاي الرحتولها البارحة انطوني اسمها اخليها تعزل
شكم واحد كسرت خاطرة و ركبته بحجيها الغلط

صعدت اسبح و طلعت لكيته واكف يصلي فتحت عيوني من الصدمة
بقيت كاعدة منتظرته يخلص
جوهرة : من شوكت انتَ تصلي ؟
تُراب : من اليوم انا البارحة نذرت اذا يطلع حجيها غلط
و اكو امل التزم بالصلاة للابد

جوهرة : و تسوي روحك ما مهتم !! ليش تكذب
سحب ايدي و تمدد الى ان صرت بحُضنه
وجهي قريب على وجهة سحب تيشيرته الي جان مشمور على الجرباية
و فتح القراصة ينشف بشعري بتيشيرته

تُراب : انا مو همي الجهال اني همي انتِ
والله عسى ما اموت وماعندي ولا طفل بس انتِ يمي عندي احلى من العسل كلشي خلي يصير قابل
و لا اشوف هاي الرموش مذبلتها الدموع

تقرب لخدي طُبع بوسه طويلة
جوهرة : اني اموت على الجهال احبهم و اني ادري بيك هم انتَ شكد تحبهم بس علمودي تسوي نفسك ما تريد

باجر يجوز ما اكدر احمل و انتَ يقنعوك تتزوج و يجوز اني بنفسي
اخليك تروح تتزوج احس اني ما استاهل كل هذا يصير بيه
انتَ اكثر شخص حبيته بهاي الدنيا و ارتاحيت ويا
و ما اريد اشوفك تنحرم من الاطفال بسببي

تُراب : حبيبتي المَلحة. اني متعود عليج انتِدائماً تحبين الدراما
فـ اني عاذرج ، بعدين المَلحة تعاي شو عندج عادي اني اتزوج ؟
جوهرة : طبعاً انت تريد تصير اب و من حقك
تُراب : يعني عادي وحدة تصير بمكانج ؟ عندج الوضع عادي
بقيت صافنه و اتخيل

نزلت دمعتي و مسحتها عضيت شفتي اهدأ نفسي
حسيت روحي راح انهار من صدك
حضنته بقوة بـ اثنين ايدي و غرست وجهي بصَدرة
حاوطتني اديه الاثنين و هو يضحك
تُراب : اويلي يابة اويلي

جوهرة : اني من كد ما احبك اريدك تبقى مرتاح
تُراب : و انا احب التعب وياج خلي هاي المعلومه براسج

جوهرة : رجع الشتاء و رجعت رجلي تأذيني
كعدني عدل و مَد ايده على رجلي يمسدها
- بوسها تطيب
تُراب : شو عايشة اللحظة
جوهرة : يالله على اساس انتَ ما جنت تبوسها
- بيج جني حبيبتي ؟

جوهرة : عود ليش تنكر ترى اني بعيوني شايفتك
تُراب : خايف منج و انكر يالله نامي نامي
لحد ما غَمضت عيوني ما اعترف بالحقيقة

فَزيت بنُص الليل كان حاضن رجلي بأثنين اديه و راسه عليهن و نايم
كعدته حتى يعدل نومته
تُراب : اويلي صار النه شكد نايمين شنو هذا لليل الشتاء
شكد طويل
جوهرة : حتى اني صاحية

تُراب : مرررتي
- ها
- رجلج جوعان
جوهرة : ترى رجلي توجعني
تُراب : سويلنه اكل و اني امرغهن من تخلصين متفقين ؟

لميت شعري و نزلت هو نزل وراي
سويت اكل و صافنه البيت الجديد بي شيء مو حلو هو كل اصدقائي
الحيوانات ماكو اباوع للسكف ماكو اي شيء دخل هو للمطبخ
تُراب : ها تدورين على صاحبج
- ياهوَ ؟ البريعصي ؟
تُراب : صحيح حبيبتي يا هوَ متيهة لان انتِ صحبانج هواي

جوهرة : يالله روح اكعد لا توكف يمي تضل تحجي و تنرفزني
تُراب : مَا عيب والله هسة احنه صرنه مو خوش
- ما كلت مو خوش لا تقولنا بشيء ما كايلته يالله روح بالصالة

دك تليفونه و سند التليفون على الكاونتر و سحب ايدي صرت كبال الجهاز خليت ايدي على وجهي و بعدتها من سمعت صوت راكان
راكان : هلا لك هلا بالعُمر
تُراب : انجب لك مرتي ما اسمحلك
جوهرة : شونك حياتي

تُراب هد ايدي واكف خازرني
راكان : سولفتلي امي عليج و دكيت عليج تليفونج مغلق
حتى الماس طبعاً لان ما تقبل نكول براء رجلها اشترالها
تليفون و تدك عليج ما تحصلج
جوهرة : اي شمرته التليفون

راكان : كولي يا الله حبيبتي كلشي بيد رب العالمين
وشنو فد قنادر الجهال و تبجين عليهم
تُراب : هيوووو لا دكول حبيبتي
راكان : ماشي حبيبتي ؟
تُراب : باع لا تخليني اخليك براسي عوف جوهرة احسن

راكان : اختي حبيبي انتَ ليش ضايج
تُراب : شلون بهذا اني هم نزل و هم يدبج فوك السطح
جوهرة : شبيكم صغار لا تسوون هاي الحركات
راكان : والله حياتي كلنه ما نوصل لعقلج انتِ العقل كله

جوهرة : حياتي انتَ
بسرعة تُراب مَد ايده و سَد المكالمه رجع راكان اتصل انطا رفض
جوهرة : صدك تحجي ؟
تُراب : لا تستفزيني جوهرة لا تستفزيني
شنوحياتي شنو عمري شنو حبيبي انتِ ذني الي ما دكوليهن
- ترى اخوية يعني لتبالغ

تُراب : لا ابالغ والله انا وياج صدك ابالغ
شمر الجهاز و راح للصاله فتحت خط و احجي ويا راكان يضحك
جوهرة : زعل تُراب
راكان : ههههههههه ادري لان هو محذرني ما اتغزل بيج
جوهرة : والله انتو تخوفون

بقيت اسولف ويا شويه و سديته صبيت الاكل لكيته بالصاله متمدد
و ايده على عيونه
جوهرة : يالله تعال اكل
- ماريد

اجيت يمه مديت ايدي على بطنه اقرقرة مثل ما هو يسويلي كل مره
بس هو ما يضحك بس مبتسم و يوخر بأيدي
تقربت و طُبعت بوسه برگبته
سحبني اله اقوى ..
تُراب : اويلي

جوهرة : يالله كوم و بطل هاي الكلمه لان حتى اني لزكت بحلكي
تُراب : شبيها بشرفي جانن الحبايب يموتن عليها
مديت ايدي على زنده گرصته
- اويلي

جوهرة : عيب عليك هسة انتَ رجال متزوج
تُراب : مره اثنين تعاركن هههههه اويلي هن صديقات
اني عندي علاقة بوحدة ف هاي مسولفة لصديقتها
فـ هذيج هم اجتني كلت الها يابة انتِ مو صديقة فلانه ؟
كالت اي و من كد ما تسولف عنك دخلت بدماغي
هههههههه ،، يعني لا تضوجين بس شوفي شكد جنت ابو نسوان
بس وفيت للملحة

اني مخليه ايدي على خدي و صافنه و مصدومه بماضيّه
تُراب : انا مشيت الامور طبيعية مالي خلك مشاكل
فـ بيوم الاولى كاعدة و دكت صاحبتها انا ضحكت اخذت التليفون
دخلت للمحادثات كالت هسة دكللها تجي

هن فري و بكيفهن يطلعن و يطبن كلت الها تعاي
اجت لكت صاحبتها موجودة حركت السيارة و شردت
وذيج راحت الها للبيت صارت بيناتهن عركة من العيار الثقيل

جوهرة : تكدر تطرد الثانية
تُراب : هو انا ما منطيها مجال بس هي فد وحدة تلح ما تنطاق اصلاً
عفتها لحد ما تتعب و تمل بس ما ملت
اخر شيء اجيتي انتِ شبعتج دعاوي
جوهرة : متشوف حياتي ما مستقرة
و انتَ والله عيب عليك تحجي كدامي

تُراب : مو انتِ ام عقل الجبير
حجاها و غُمز
جوهرة : يعني اخوي اني احجي وي اخو مو وي واحد
تُراب: اي وي واحد اي ، شو النجف و بعدها جبيرة تكفي

سكتنا حتى ناكل و اني افكر اذا هاي هيج مواضيع عادية لعد شكد جانت عندة نسوان و هل يا ترى راح يوفيلي للابد لو ابو طبع ما يغير
طبعة ؟؟ نويرة الظهر اجتني بيدها علگ
نويرة: شفتي شلون يحبني بعدني ما واصلة وانطاني مرادي

العَصر رحنه للدكتوره الثانية الي اقترحت العملية
بس اني و تُراب
جوهرة : اذا كالت باجر اسويها هم اسويها
تُراب : بس أنچبي حبيبتي المَلحة

وصدمنا كلام الدكتوره لمن كالت راح تروح امتحان
بالهند و ما معلوم شوكت ترجع
تُراب : كولي يا الله دكتوره سويها و روحي
- والله حتى هنا اني مو كادره لان المستشفى مالتي تحت الصيانه
تكدرون ترحون لايران انطيكم اسم دكتورة عراقية نسائية جداً شاطرة
و شرط كل نتائجها مضمونه

احس بكل يوم ينسد بوجهي باب ثاني
طلعت و القهر كله بعيني
تُراب : و لا تضوجين والله حتى لو للهند هم اخذج
جوهرة : و منيلك فلوس انتَ
- كتلج حدي وياج للشورت هم ابيعة لخاطرج

رجعنه للبيت و هو كبل صعد يحضر جنطته
و اني خالة تهدي بية و تطمني
ابو تُراب: اخذلكم خيرة بالقرآن
تُراب : لا يابة راح اسأل عن هاي الدكتورة بأيران واشوف اذا مو زينه
اخذها للهند
سُعاد : يمه شيوديكم

اني عفت كل الموضوع و افكر اذا رحت للهند راح اشوف رشا و لارا
واكوللها حتى اني لكيت اخواني مو بس انتِ لكيتي اختج
تليفون تُراب كل شوية يدك و يرفضة
بعدهم يحجون و انضرب باب البيت قوي
وصار صياح زِلم عالي

سُعاد : يمه هذا هذا صوت طلقة
تُراب بدون تفكير سحب اقسام و طلع
عمي لزم ايد تُراب يرجف
ابو تُراب: اوكف يابة اوكف انا افتح الباب
تُراب : يااااااابة دعوفني اني متحلفلة هذا عوووفني

و من فرزنت واحد من الاصوات احس كل حيلي انتهى
....

الماس
كعدت الصبح اليوم جُمعة السيد رايح للجامع
والبنات اليوم يجن كلش مشتاقة الهن جانت عمتهن مريضة
و ما يطلعن بسبب الخطار بديت اتفنن بالطبخ
و نظفت الغُرفة تذكرت لما جنت بالختله اجي ابوس العمامة
الصبح اجن البنات سولفت الهن عن اخواني
مامصدكات

ورقاء : سُبحان الله شلون يعني وين صاير هيج وهم يحبوج
الماس : يموتون عليه
ورقاء : اني شكد جنت اتمنى اصير حامل
هسة نسيت نفسي و متحمسة شوكت يجي اخونة

قمر : هو اني جنت ما طايقتج بس لان راح تجيبين النه اخو حبيتج
الماس : ولجن يجوز بنية النوب السيد يكول هذا السيد الصغير
ورقاء : هسة اذا طلعت علوية خير و بركة يجي وراها سيد
كثري نسلنا كثري

بقينه نسولف و نضحك و لاحظت على قمر اسلوبها متغير
و صاير حلو كلش
الماس : ورقاء رجلج يكلي مرت عمي
ورقاء : يا ههههههههههه غير اجاني كالي يكول بقيت صافن بوجهه
شكوللها كلت الها مرت عمي من طالعين خالي كايلة
وين كاعدين بـ باب الحارة

الماس : هههههه ولج هم غير صارو على اخوية دائرة
قمر : خلي اكلجن الصراحة فضل جنت ما اطيقة ابد
تالي بنت خالته تموت عليه و لكيتها تحجي لعمتي شلون
تحبة كلت هسة عمتي تقنعة و يتزوجها و ابوي يكلي ماكو طلاق
و انتِ مثل امج ما حافظتي عليه عدل

ورقاء : منية بس لا سارة ؟ عزة بعينج شو مدكليلي
قمر : نسيت و النوب احنه تعاركنه نسيت اكثر
خطية لمن كمت اعاملة حلو عباله ناصبتله كمين
الماس : عزة
ورقاء : هههههههه اي اجه كال لفضل والله بوقتها
حتى فضل سألني امج هم عندها تواصل وي قَمر كتله لا

الماس : ترى هو يحبج مبين
قمر : اي حتى اني احبة اكثر بعد يعني من عاشرته و شفته شلون يخاف عليه من اتمرض وحتى ملابسي يجيبهن من السطح من يصعد يجيب ملابسة ركزن على هاي النقطة كلش حابتها

ورقاء : ههههههه لا اني احب علي من يطلع وياكل بي طبع لو تذبحي
ما يخلص اللفة فـ يطلعون هو و خالي و اصدقائهم
يشتري وياهم ياكل و يضمها الي
يكلوله يعني فد يوم انساها و اكل اللفة يكلهم ما اكدر توكفلي
بالزردوم

الماس : خطية فدوة
ورقاء : و انتِ ؟ شنو احلى شيء بأبوي ترى ادري ابوي رومانسي
ولطيف وهاي بس جان الوضع مو مثل ميريد
- اني ها لا يعني ماكو هو روتين طبيعي و عادي طبخ و دراسة وًتنظيف
قمر : اكو جذب بالموضوع
ورقاء : اني هم احس

الماس : ترى السيد ذاك اليوم كلي من يجن البنات اخذكم ازوركم
يمكن نخلي ياخذنه اليوم جهزنه الغداء و خلصت صلاة الظهر
هو اجه جايب مسواگ ما وكفت بالباب خليت البنات براحتهن يسلمن عليه و لمن دخل كال السلام و جاوبته

راح للغرفة و اني وياهن تراب بالمسواك شوية و صاحني بالغرفة
عبد العزيز : جاهز الحمام عيني
الماس : اكيد جاهز
- الظاهر شبعتي بَعد ما توكفين بالباب تنتظرين اشبگج لو لا

استحييييت و احس خدودي صارن دمً
الماس : لا طبعاً بس يعني كبرت وهاي صرت افتهم
عبد العزيز : ام .. ام خوش كلام

دخل للحمام وهو ما مقتنع و طريقة كلامه احسها جافة وياي حتى من تغدينه بقينه كاعدين ويَ البنات لحد العصر هو ما نام الظهر
عبد العزيز : اليوم راح اجي قبل المُغرب حتى نصلي
صلاة المُغرب بالضريح

البنات كلش فرحن و اني على فرحتهن فرحانه
و اتمنيت لو جوهرة هنا و اخليهن يتعرفن عليها و يشوفن شگد أختي
تحبني و تعبت حتى تلكاني
اخذت دشداشته اكويها و هو بالغرفة منتظرني
انطيتها اله و اني مبتسمه ابتسامه خفيفة
عبد العزيز : اي يابة اي

الماس : شبيك سيدنا ؟؟؟؟
ضحك لمن كلت سيدنا
عبد العزيز : حتى السلام انلغى
الماس : اذا ما تطلع ضايج لان ما شبگتك اني والله ما افتهم
عبد العزيز : صحيح والله و تفتهمين

الماس : البس عبايتك خلي اشبگك
عبد العزيز : لا بعد خلَاص منريد
الماس : ابداً ابداً البس يالله
يلبس العباية و هو مبتسم وكف يخلي عُطر
حُضنته مثل كل يوم لمن يجي بالليل
الماس : شونك سيد ؟
عبد العزيز : كلنه مثلي بس مو لهاي الدرجة تضبطيها

ضحكت و هو راح قفلت الباب ورا و اني و البنات نتجهز للزيارة
ورقاء : نسولف؟
قمر : بس مو دكول لابوية
الماس : شنو شكو
ورقاء : خلي تسولفلج على عمتي شلون شادة ويانه هههههه
بس لا تجيبين طاري لابوية كلشي يصير
قمر : كليلها على مال التوصيل هههههه
هن يحجن و خربانات ضحك

ورقاء : ههههههه باعي هاي ذاك اليوم عجبتنا تيبلامات
من الفيس بالكوة قنع علي و قمر قنعت فضل بسرعة
و طلبهن النه علي عادي يعني شبيها
الماس : اي يعني شنو بالفيس ؟
ورقاء : اني اكلج يعني تعجبج شغله بالتليفون
تطلبيها يجيبوها بيد سايق للبيت

الماس : اي ؟
ورقاء : اي تالي جابها علي اني واكفتله بالكراج انطانياهن و طب للاستقبال يم فضل و عمتي كالت جيبي هاي شنو
انطيته الها بقت تسأل شنو و وين يتخلى
وهي تشكلً بي كسرت واحد من مالتي كالت يا ما ادري هذا مالمن
كلت الها يالله فدوه طبعا اني انجلطت ، هذا مالتي و هذاك مال قمر
هي منا شلون تطيق قمر لزمت مال قمر هم كسرت واحد منه
الماس : عزه

قمر وكعت بالارض من الضحك
ورقاء : تالي قمر اجتي انجلطت شافت مالتها مكسور
كالتلها ليش عمه ليش انتِ راح تشتريلنه ببداله
كالتلها اشتريلج قُز القرط انتن مضاحك ضالين يضحكون عليجن
النوب عليه التوصيل هو مو صوجن صوج الكاعدين يلعبون
و مخليجن براحتجن
الماس : عزه عزه

قمر : ههههههه مو هنا المشكلة النوب سوت روحها عصبية
شالت الاثنين الباقيات و شمرتهن بالكاع
و ورقاء كامت تضحك الا شويه تنكتل
ورقاء : ولج والله لا ارادي شر البلية ما يضحك خاني التعبير
كمت اضحك و هي دكول لعلي مرتك تضحك و ما تكتلها
قمر : يكلها يمه فوك اكتلها فوك منا الجهال عيب
ههههههههه

ورقاء : و قمر زعلت على فضل و ما رضت الا وصالها من جديد
و هم شافتهن عمي فضحت الدنيا عود حجتها شنو يجون
اهل التوصيل للباب
الماس : اي عادي غير رجلها يطلع للرجال
قمر : اي طبعا و بوكتها علي اخذ ورقاء يونسها و اشترت مناك
اسبوع هي ما تحاجينه

الماس : عزة و اني اكول ليش ما تجن هواي
ورقاء : يمة ولج هي غير حارس بالباب كاعدة هي و بنتها الصغيرة
خوب هاي السوسه كل البلاوي منها يربي اليوم شكد اخذنه غيبة
قمر : هاي فضفضة مو غيبة على كولت فضل
الماس : هههههه

ورقاء : هاي اني وقمر مو نتعارك مرات على الشغل هي عمتي تكيف طبعاً نتعارك اي فـ من نتصالح نكعد نسولف كل الحچي الضامي
يشوفنه فضل رجل قمر نسكت يكول كملن كملن
هاي فضفضة اسمها مو غيبة

الماس : يعني بس اهم شيء ازواجچن وياجن
ورقاء : اي خطية هم يدفعون ضريبة سوالف امهم يعني اني اذا
امه صيحت عليه اكلب وجهي عليه اكيد لان هي امه
الماس : مو جانت تحبج و فضل يسولف للسيد
ورقاء : يا ولج فرة عرس و منا لان اثنينه ما حبلنه بعد كلش شادتها
الماس : قابل بكيفجن شنو مدري شبيها الناس

اجه السيد لكانه جاهزات
عبد العزيز : هاي بابًا هو انتن بوكت الطلعة ماكو اندر منجن
ورقاء : لا تظلمنا يابة من كاعنه احنه نادرات
ضحك بقوة و طلعنا

زرنا و صلينه و تعشينه و اشترينه من السوگ بنص السوگ و لكيت
الاء واكفه تأشر الهن باوعت بصدمه و باوعتلهن ما مصدومات
دارن وجهن عنها بعصبية و مشن
الماس : شوفيها يجوز تريد شيء
ورقاء : امشي الماس لا ينتبه ابوي

يستحن البنات يشترن و السيد الا ياخذن واكفلهن لمن
خلصنه ردنه نصعد بالسيارة قبل لا يفتح الباب الي بجهته حجيت يمه
بصوت ناصي
الماس : اريد شاميه وعليها كجب
عبد العزيز : شنوووووووو ؟؟؟؟؟ لِج الماس

فتحتله ايده بمعنى شعليه
عبد العزيز : اصعدن اصعدن اني هسة اجي
راح يم ابو العربانة جابلي شاميه و اجه و بقى يدور على اسواق
وكف و نزل جايب النه كل وحده علاكة حلويات وَحد
و لازم الكچب وحد

ما تحملت مسافة الطريق فتحت كيس الشامية و درت الكجب و ضليت اكل البنات اخذو شويه كالن حشى نعمة الله بس ابد مو طيب
و آني اكله مستمتعة جداً

رجعنه للبيت شويه و البنات اجه علي اخذهن
السيد باوع لقمر
عبد العزيز : الحمدلله علي لو فضل جان كلت قمر شو من
مصيبة مسوية
قمر : لا يابة صرت حبابة
عبد العزيز : عفية يابة

راحن البنات و هالمرة اكثر مره استمتع بجيتهن
دخل السيد و اني كاعدة على القنفة بالصاله
مَد ايده قريب شِفتي و مِسحة
عبد العزيز : شلون اني بالاطفال الي ما ياكلون عدل
كمت متنرفزة لازم يفشل لازم رحت غسلت ايدي و وجهي و رجعت يمه

الماس : هسة لو يصير يعني لو يصير
عبد العزيز : شيصير ؟
الماس : اني و الطفل الي ببطني مو نقرأ سوه ؟
- اي ؟؟؟؟
الماس ظي ليش ما يصير من اني انسى هو يذكرني ؟
لو بعدة مصايرله عقل

عبد العزيز : ما شاء الله حبيبتي على ذكائج شلون
وصلج للرابع ما اعرف
الماس : يعني اني ترى كلامي معقول
- هو انتِ الماسة لو تعقلين لو احنه نتخبل بالنهاية

الماس : زين اني بعد عندي سؤال ليش هو الطفل ما ينحسب من عمر امه يعني من يجي هو عمره عشر اشهر و هيج يعني ثلاث اشهر و يصير سَنة ليش من يجي ينعاد الحساب من البداية
عبد العزيز : كومي نامي طبعاً انتِ طفيتي

الماس : جاوب سَيد ليش تتهرب
عبد العزيز : امشي لِج امشي
رحت للغرفة مبتسمة و هو اجه وراي مبتسم
تمدد و اني كاعدة منتظرة ينام عدل و يفتح ايده
و لا فتح ايده و اني كاعدة انتظر

باوعلي مبتسم كأن منتظرني احجي باوعتله بعصبية
الماس : يعني هي ايد ايد ما راح تنگطم راسي مو منشار
عبد العزيز : هااااا تريدين ايدي نسيت نسيت
تعالي عيني تعالي

الماس : ماريد حتى ما اريد
عبد العزيز : لا تردين ابني يريد
خليت راسي على ايده و اني معصبة قربني اكثر
الماس : هي ايد ذليتنا عليها
عبد العزيز : ما عاش الي يذلچ ام السَادة
تعالي نامي عيوني

راسي علَى زَندة و غَمضت عيوني
الماس : اتمنى تبقى هيج تعاملني للابد لان اذا متعاملني هيج
ما اكدر اعيش
عبد العزيز : تدللين طبعاً شعندي غيرج

الماس : تحبني يعني ؟
عبد العزيز : شگد انتِ كلبج شايل اليه حُب ؟
- مادري بس هواي يعني هواااااي ما ينوصف بكد الدنيا
عبد العزيز : و اني اكثر منه
باوعتله و عيوني صافنه بعيونه انرسمت الابتسامه على وجهي
عبد العزيز : احلى ذكرى من أمي انتِ

بيومها حتى الصبح من كعدت احس الفراشات لاعبة لعب بيه
وًبدون طلب مني الظهر لما اجه جايبلي تليفون و فرحتي بوقتها ما تنوصف دخل الي اربع ارقام هو و امي و راكان و جوهرة
راكان صاير ما يجي فـ اتصلت عليه اول واحد

و بكد فرحتي بالجهاز راحت لمن سمعت شصاير بجوهرة
و اتصل عليها ماكو
لحد الليل هو راح عنده عزيمه مثل كل
مره و بكل عزيمه يجي مبتسم
و حتى لو نايمة يكعدني نمت و ما كعدني ابداً
فَزيت بُنص الليل لكيته كاعد
ردته يحجي وياي ويسولفلي رِجع نيمني
عبد العزيز : نامي وراج دوام

مَرن يومين و هو احس شايل على كلبة حمل ما يقبل يحجي لاحد
و لمن صار يتردد علينه عمي ضرغام عرفت الموضوع مو خالي
لحد ما صرت مثل خياله اتصنت ورا بكل مكان و زمان
باليوم الرابع الظهر و احنه نايمين طلع من الغُرفة
على دگة الاتصال

وكفت قريب حافة الباب و هو بالاستقبال يحجي بتعب
بالبداية ما فهمت الموضوع الى نهاية الحديث
احس بطني صار بيها وجع مو طبيعي مثل التقلصات
بسرعة سحبت نفسي للسرير تمددت
و الكلام يرن بأذني ..
....

- رُسل فَهد
*الكاتب تعبان ماكدر يكتب شِعر