تحميل رواية «على كتف القبطان حمامة» PDF

التَصويت و المُتابعة لُطفاً

عَلى كتِف القُبطان حَمامة

- رُسل فَهد

...

فصيحاً:

لا مَرحُباً بـ صوت طرقة بابٍ

لم تكُن يدك هي الطارقة

شعبياً :

اذا مو ايدك تدگها

فلا نهواها دَكةّ الباب

رد النه

ميلوگ النه نتزاعل

تَرى احنه أحباب .. 🤎

- رُسل فَهد

...

جوهرة

يم بيت نويرة احس مگفى هذا الشخص مو غريب

عليه ان شاء الله مو هوَ ... اخ يا امي تعبتيني

بقيت طول الوقت ضايجة و راح تُراب اخذ الماس

بعدها حاجيت امي نكرت و من ملامح وجهها

و توترها تأكدت من الجواب

و هو فعلاً احمد ..

جوهرة : يمه جاييج خطابة و اني قابلة تتزوجين روحي عيشي حياتج

و أتركي الشغل ان شاء الله تنسعدين و هو متمكن و زوجته متوفية

بس عنده بنية و ولد كبار يعني متتعبين

رحاب : يا و منو هذا

جوهرة : اخو الي متبني راكان هذا الي اجه وياهم ابو

قميص الزيتوني

رحاب : هههههههه لا يمه ما اريد خليني كاعدة بمكاني و مرتاحة

جوهرة : يمة ما مرتاحة بس انتِ لسة تردين احمد و احمد

ما يتزوجج لو شتسوين

- لا يتزوجني

بقيت واكفة محتارة اباوع الها

جوهرة : يمة يعني بعد السوا كله بعد السوا ؟ و انتِ بعدج تردي

رحاب : اي اريدة لان اني احبة و هذا الشيء مو بيدي

و اني مسامحته على كلشي سواا

جوهرة : اذا هيج الحجي تزوجي يالله روحي تزوجي

و انسينا و لا بيوم تدكين بابنه بعد

رحاب : و انتٍ شنو و تتحكمين بية ترى اني امج مو انتِ امي

شفتج اخذتي رأي من رحتي عقدتي وي هذاك ابو النسوان

شو بين يوم و لليلة اجيتيني متزوجة و هسة تردين تتحكمين بيه

جوهرة : لج يمه والله مو هيج بس اني ادري بي قذر و عار

يعني الي يحب يسوي هيج ؟ لا والله ميسوي لو يحبج

جان ما سوه كل هذا و جان من زمان اجاج و تزوجج

بس يمكن مسويلج سحر يخليج متشوفين عيوبة

رحاب : اي يجوز

شفت النقاش ويَ امي ما يجيب نتيجة

بـ ١٢ بالليل اني انتظر تُراب وهو بَعدة مجاي اهله ناموا و بقيت انتظرة بالصالة دخل يعد و يصُف علينه

تُراب : ابوكم انا ابوكم مبتلي بيكم

حضرتله ملابس و اكل و كعد ياكل

جوهرة : اكيد تبتلي بينه لعد شعندنا غيرك

تُراب : طبعاً حبيبتي عندج قشمر بـ حچايتين منج يقتنع

جوهرة : اويلي لو هيج القشامر لو خلي يولون

تُراب : اويلي بِت رحوبة الظاهر مشتاقة تريد الها كتله

جوهرة : كتله ؟ خاف انتَ تريد تنكتل حياتي ؟

تُراب : هسة نشوف منو يفوز

جوهرة. : هسة اسكت بس شوف اليوم كلت لامي على هذا الخطبها

بس ما تقبل تكول احمد يريد يتزوجني

تُراب : امج قافلة يعني هذا احمد شمسوي لامج وهيج تحبة اويلي

جوهرة : شمسوي هو اصلاً فكر و ابو سوالف مكسرة

اخوان مرته جانو كل مره يكتلوه ، مرته دكول لامي من يتعاركن

تُراب : اي ادري ساقط غير اني موجود من حَققو ويا

و گتله اذا تدليني على مكان اهل رحاب اطلعك و دلاني

يعني هم لو ما هو بحياة امج ما لكيت اخوانج

جوهرة : يعني هو زين ؟

تُراب : اسقط من السقوط يا زين

جوهرة : اي مبين والله

تُراب : هو غير يريد ياخذ ثاره مني بس جبان ما يعرف بيا طريقة

گلي اذا ما ادفعك الثمن على كل ضربة حصلتها بالسجن

اني مو احمد كتله اي انتَ عار مو احمد صحيح

و وراها رفعت عليهم دعوة رجعت كل الفلوس زاد الحقد بيناتنا

جوهرة : و شسوه ؟

تُراب : ميسوي يعني شيسوي اكسر ظهره و ظهر الخلفوه

لا مراقب كل تحركاته و اليوم اجه لامج صالحها جابلها

هدية جانو متزاعلين

جوهرة : اي شفته ، تُراب يعني هو يعوف بغداد و يجي علمودها

هنا و و ميتزوجها كل هاي السنين عجيب امره

خلص اكل و بعد الصينية راح يغسل و هو ساكت لمن رجع نُطق

تُراب : بس هاي الفترة مستقتل عليها لان شام ريحة خبر لـ شيء

جوهرة : شيء مثل شنو ؟

تُراب : اخذت حُصة امج من خوالج و كاعد اكمل الاوراق

من اكمل اگللها لان شنو فوك كلشي سوو بيها يحرموها من حصتها

انعل والديهم حشى جدج يكولون خوش رجال

جوهرة : يعني امي طلعت انتَ ورثها ؟

تُراب : اي و لان هو علاقته بخوالج بعدها فـ شم ريحة خبر وبي فلوس

و هو اكبر قفاص و حرامي اكيد يستقتل على امج

و الا يمتى جان بحالها

جوهرة : الله ياخده عزه بعينه اوكف خلي استوعب

مديت ايدي على راسي افكر و مصدومه اجيت كعدت يمه و خليت عيني بـ عينه

جوهرة : تُراب انتَ ليش هيج كاعد تسوي ؟

- شمسوي حبيبي لا ترمشين هواي راح اسكر

جوهرة : يعني انتَ ليش هيج مهتم بـ امرنه شلون طلعت ورث امي

تُراب : كتلج انتِ ما دام وياي نامي رَغد كلشي ممكن يفرحج انا اسوي انا الجندي الخَفي المخلوق حتى يحقق أحلامج

جوهرة : انتَ مهتم بينا كلنه

تُراب : لان انتِ تخصيني و الـ تحبيهم هم يخصوني و بعدين امج ترى

اعزها اني بعيداً عن سالفة هي تشك شك و تستاهل واحد يتعبلها

بس هي ترى ما عندها احد غيرج كل الي تعرفهم كسروها

جوهرة : اكيد امي راح تفرح و تكوم تحبك كلش اذا عرفت

تُراب : مَا عيب يعني هي تكرهني ؟ مع الاسف هو المرتاح بهاي الدنيا

بس احمد الكلب

جوهرة : لا تحجي هيج

تُراب : اضوجك اني حبيبي الاملح

بقيت ساكته و احس كل الكلمات ما تكد توصف حبي و امتناني

لـ رب العالمين على هذا العوض و لا اكدر حتى اوصف حبي لتُراب

و اني صافنه حسيت بـ ايدين حاوطتني

تُراب : ها حبيبتي المَلحة

جوهرة : تُراب انتَ ما تدري اني شكد احبك والله

بطرف اصبعة السبابة ضرب خشمي

تُراب : يكولون اكو وحده ملحة جانت تريد تنتقم حتى توهمني بالحُب

شصار بيها

جوهرة : صار الوهم حقيقة و راح تبقى تنتقم منك بالحب

لحد اخر نفس بيها

تُراب : اويلي يابة لو هيج الانتقام لو ما اريدة

طُبع بوسة قريب شِفتي غَمضت عيوني .. و صار هدوء

فتحت عيوني بـ بُطىء لكيته صافن على عيوني

تُراب : بَهذلني

جوهرة : شنو

تُراب : رموشج جوهرااا

اجيت ابوس خده حرك وجهه و صارت البوسة على شواربه

جوهرة : لا تغشش

تُراب : هو اني غشاش حبيبتي خلصت المدرسة انفصل من

ورا الغش

جوهرة : شو مَرات لحيتك ناعمة و مرات خشنه تجرحني

تُراب : مو اذا اسويها بالموس هستوني تبقى ناعمة اكيد

و من يطلع الشعر تصير خشنة يعني حبيبتي ما ينراد الها روحة للقاضي

جوهرة : يحاسبوكم شنو ؟

تُراب : لا احنه ما نتحاسب مو مثل البقية يعني من هاي الناحية

ذولاك خطية يتلمسون وجههم اذا بي شعراية يطكوهم عقوبة

جوهرة : شدعوة

تُراب : هاي بعد العالم تتحاسب على اغلاطها

الزلم الزينة تتحاسب على لحيتها

جوهرة : لعد اذا ميحاسبوكم ليش متربي لحية

تُراب : شنو اربي ابني هيَ ، لا حبيبتي مو بعد تعودت على

شكل اذا اطولها تكبرني و اني ما اريد اكبر

جوهرة : ها ليش متريد تكبر خاف يرحن الحلوات

تُراب : يا حلوات انا غيرج حلوة ما شوف كمت احس النسوان

كلها فاهية بس انتِ مملوحة

- امممم

تُراب : شوفي الوفاء لعندي و انتِ هناك تدورين لبنانيين

شبيج ما شايفة تفاح تاخذيها منه

جوهرة : يوووووووه حتى التفاح كرهته و من اشوفة صرت اتنرفز من وراك

تُراب : ليه حبيبتي هايدي ذكرى من الاعزاززز

تكلم بطريقة لبنانية و من وصل لاخر كلمة حجاها بلهجة بصراوية

الله شُمر عليه الضحك و هو ضحك على ضحكتي

جوهرة : الاعزازززززز وين يكولون الاعزاز

تُراب : جا شيكولن ها اوكفي احباب الئلب مو

جوهرة : ههههههه لا من الاعزاززز

تُراب : تعاي باجر وراي دوام

- و شتريد ؟

- نيميني امي نيمت ابوي جا انتِ شبيج

جوهرة : اسويلك ممه ؟

- لا گمطيني بت رحااب ، تعاااي لج

بقيت اضحك و اتلاوه ويا لحد ما أستسلمت

تُراب : بشررفي انتِ تموتين عليه بس المستحى لازمج

جوهرة : يا مستحى ؟

- صحيح حبيبتي انتِ وينج و وين المستحى ...

ثاني يوم راح للدوام و بقيت وحدي اهوجم يومية هو ساتر عليه

ومتحمل سوالفي رحت العصر يم الحبايب و لكيت راكان

واكف بالباب منتظرني اطلع يالله يدخل وياي و ولا يدك الباب عليه

و اني يمهن

جوهرة : شبيك حياتي

راكان : مشتاقلج والله ، تعاي لبيتنا خواتي مستحيات منج يكولن

هذاك اليوم من اجتي صارت العركة

ابتسمت و رحت ويا الهم

بقينه نسولف و شفت علاقته وي اخواته مثل ما چان يعاملنه و احنه صغار بالضبط و بيناتهم ميانه يتشاقون

راكان : لج حياة ليش لابسة تيشيرتي الجديد

حياة : والله حلو و لونه حلو و اني اغار عليك اكثر من ميرام

لا النوب البنات كلها تجلب بيك

راكان : اي مهند اني مهند كول عجبج التيشيرت و فضيها

نسيم : اي هي كالت خل ابوكة شو حلو

راكان : هو اني الله باليني بـ خماطات درجة اولى

عبالجن ما احس الصبح من تسلتن فلوس من المحفظة

هن وحدة باوعت للثانية و طكنها ضحكة

جوهرة : ليش متداومن

حياة : مو من وره استاذ راكان اجينه لهنا و السنه الجاية راح نعيد الخامس بالمدرسة الجديدة هنا

راكان : يالله هسة انتن لبلبان همزين الخامس صارلج سنتين بي

نسيم : يمه منو الشاطر اليحجي يمه

همزين ابوي يكطعك يالله تقرا و يدفع فلوس يالله ينجحوك

راكان : باعي جوهرة شنو مشكلتهن

هاي تقرا الثانية تقرا هاي متقرا الثانية مثلها

نسيم رسبت بالخامس و حياة لحكتها صارن اثنينهن نفس الصف

جانت حياة شوية شاطرة شو هاي صارت ويَ نسيم

امي كالت بلكي نسيم تصير شاطرة تالي حياة صارت كسولة

حياة : اني طالعة على اخوية الحب كسولة كلت من شاطرة ما كعد حظي وي ابوي خلي اصير كسولة بلكي يدللني مثله

نسيم : ديالله هو شلون مدلل راكان شو ايده و الضرب

حياة : وينطي فلوس شكد

راكان : بس انجبن ترى هو ينطيني لان اطلع انتن وين طالعات

شتسون بالفلوس

نسيم : ذاك اليوم كتلة اريد عشرة انطاني عشرة مكيفة

كال انتِ واختج خرب امالي و مشاعري

راكان : اي كافي شتسون بيها هو ميريد يعلمجن ع الصرف

حياة : هاها شو اليوم لوكي خاف تريد منه فلوس

ضحكت و امهم كاعدة تضحك و عينها على راكان تتأمله

ام راكان : ماما سألت على جامعتك اكعد اقرا شبقى

للامتحانات ابوك كال يدزك لبيت عمك تكمل الامتحانات و ترجع

راكان : يمه يا امتحانات مشتاق الها

ام راكان: يمه چفيني شرك اني ازوجك من تكمل

كلية هسة بعدك صغير

راكان : يمه شنو صغير اني اريد اتزوج و هي امها شوية بدت تقنع

لان كالت الها اذا متخليني اتزوج انتحر و امها خايفة عليها

ام راكان: و ابوك انتَ شنو تغشم نفسك عن ابوك ولك يمه استر عليه

ما عولت نستقر هنا و نكعد و اخلص من عمامك و تحشيهم عليك

راكان : اخذها و اشرد يمه والله اني وياها قررنه اذا كل الابواب

انسدت بوجهنا نهج من العراق كله

.. اني خليت و ترخصت ما اريد كل ما اجي تصير مصيبة

بقيت طول فترة دوام تُراب اروح يم امي و اميرة

و مرات اروح لبيت راكان لان البنات كلش لطيفات و راكان هم جابهن يمنه تعلقن بـ دعبول صرت اخذه و اروح و هو حتى نسانه

من كد ما متعلق بـآي باده

من نزل تُراب هالمرة ضايج و امي كل ما اروح الها تفتح موضوع زواجها من احمد و اني اشيل روحي و ارگعها لان ماكدر اكول الها عن سالفة الورث تُراب كال الا تكمل

رحت للدكتورة وي أمي و كالت كل وضعج حالياً طبيعي و تمام

فتحت الباب مال الغُرفة لكيت تُراب مقرب الجهاز يسمع بَصمات

و من دخلت سَد الصوت و عدل كعدته

جوهرة : شبيك ؟

تُراب : مابية حُبي

عقدت حواجبي وما تناقشت ويا اكثر لان حركته لمن سَد البصمة صدك

نرفزتني بقت كلمات امي ترن بأذني ابو طبع ما يغير طبعة

معقول تُراب رجع للعلاقات ؟

غطيت راسي و نمت اجه يتحارش بيه صرخت بوجهه و غطيت راسي

كفخني على راسي

تُراب : هو انتِ مو صوجج صوج الـ يجي يمج

تركني و طلع من الغرفة هنا صدك انهاريت و احترگ دمي حرگ

بقيت اكثر من ساعة الوب بالغرفة لحد ما تعبت و نمت

ثاني يوم ما احجي ويا و لا حتى هو يحجي ويا

اهله حَسوّ علينه و حتى دعبول لمن يريد شغله تُراب مني يدز دعبول

وكف بوسط البيت و كام يصيح

- عود متزاعلين عود عيع تخرعووووون

العصر ردت اروح يمهن هو جان كاعد بالغرفة لكيته بأيده الاساور

يبوس بيهن طبع اخر بوسة لمن دخلت و ضمهن بالمَجر

اجيت جريت الربطة والفستان و اريد اطلع

تُراب : اذا تعتبين باب الشارع بعد لتجين

جوهرة : بعدد احسسسسسن

اخذت الملابس بعصبية و طلعت راكان واكف بالشارع بـ بابهم

اشرلي بأيدة جابج

راكان : انتِ مو رجلج هنا شعندج طالعة

جوهرة : ها راكان النوب انتَ تريد تحاسبني ما احجي ويا

- اويلي ، ليش

- هيج مشكلة

راكان : تعاي يمنه البنات ضايجات و بعدين يم امي حتى ترجعين كبل

ما كلت لا رحت ويا هنَ يسولفن الي ابوهن شكد معقد و متشدد

حياة : للمدرسة مسجلين خط حتى الاسواق نتحسر نشوفها

جوهرة : عزه شدعوة ماكو هيج ترى

اني بقيت مصدومة لان الي يشوف حالتهم الماديه يكول هذوله ماكو اسعد منهم بالدنيا بس فعلاً الفلوس مو كلشي

دخل راكان يسولف وي تُراب اشرتله لا دكله اني هنا

لمن سَده كالي بدون ما اكول هو يدري اصلاً

جوهرة : ليش متاخذ اخواتك يشترن ترى ميصير

راكان : تردن احصل كتله شنو ما رايد روحي

حياة : حتى نتمنى نشتري بكيفنا والله الا هو يجيب النه

و كلهن مو طيبات

راكان : ابوي وين

نسيم : يمكن نايم و امي تسبح

- بدلن بساع

هن واكفات ما مصدكات و اني مبتسمة على فرحتهن اجن بدقيقة لابسات صايات و شالات

طلعن و رحت وياهم اشترينا وَهْنّ ما مصدكات

دكلها شوفي الحلويات شوفي و يكول مخلص

اشترن و راكان دفع الحساب و واكف يقنع بيه اشتري كتله والله ما اريد لحد ما أيس اشترالي على ذوقة.

رجعنه هو يمشي قبلنه و شايل العلاليگ

و احنه نسولف

حياة : بلكي ابوي يتغير من شلنه هنا لان هناك جانو عمامي

اربعة و عشرين ساعة واكفين ببابنه يسولفون ويا دخلنه للفرع

هو بيتهم قبل الركن بـ بيتين

دار وجهه راكان بصَدمة

- ولجن هذاك ابوي

بقينه واكفات و اباوع للبنات يرجفن عاد راكان دز رساله لُتُراب

و هو مال راسة يباوع الهم

شوية و كال راكان يالله بس امشن على كيف

تُراب لازم ظهر ابو راكان و يأشرله على نهاية بيت

دخلن البنات و اني وراهن انطاني المسواك راكان و طلع يمهم

و الام واكفة بباب المطبخ تلطم و هن من الخوف وحده تفتح شال الثانية شوية و دخلو ابوهن و راكان

راكان : جوهرة حبيبتي تُراب يريدج

ابو راكان : اني قبل شوية ليش صوتي راح من

الصياح و محد دكول ها

ام راكان : صعدت الهن جانن يصلن اليوم اعمال مباركة

هن و البنية

عاد شوية رخى عقدة حاجبة سلمت عليهم و طلعت

تُراب : ضلي ضلي سايبة بالبيوت

جَوهرة: لا تتدخل لا تتدخل

- يالله لامج امشي

مشيت سريع ردت اعبره لزم ايدي بقوة

تُراب : شعندج رايحة للاسواق شو بكيفج انتِ و بعدين هاي منو اشترالج

جوهرة : اخوي اشترالي

تُراب : اي مو رجلج ميت و اخوج يشتريلي

- اني اصلا ما ردت لان مو زين عليه

- اي اكلي تفاح زين

جوهرة : هسة الواحد من ميحجي وياك المفروض تستوعب

مو تسوي هيج و هيج حتى ينسى الزعل

تُراب : شبيها المَلحة جايشة علينه بكيفي اني رجلج تمشين حسب ما اريد و انتِ الممنونه اكلج حركي روحج تحركيها

جوهرة : اي احرك روحي يعني احرگك لان انتَ روحي

- اويلي المَلحة حتى بالزعل و القصف تنكطين عسل

وكفت كباب بيت نويرة و رفعت ايدي

جوهرة : يلا باي راح ابقى يم امي

تُراب : دتعاي لج افهمج

جوهرة : روح روح لحبيباتك روح خل يدزن الك صوتيات

تُراب : تعاي بالسيارة اسمعج الصوتية

- اذاانتَ رجال

- جا امشي للبيت وياي اثبتلج و اسمعج

صعد بالسيارة و اني بقيت واكفة اباوعله شغلها و فتح الجامه

تُراب : هسة اروح ؟

اجيت بعصبية فتحت باب السيارة و صعدت

جوهرة : لا تحرك قبل ما اسمع

تليفونه بأيده و فتح الجهاز و دخل على محادثة اسم

و باعثله تسجيل شاشه ما انتبهت للمحادثة بكد ما ركزت للصوت

جان صوت احمد و المحادثة اسم احمد

فتحت التسجيل و إني مستغربة

- لك شبيك حبيبي اخذها وراها فلوس فلوس بيت بـ بغداد

و وورث من اخوتها اخليها تسجلهن بأسمي و أديحها

فتحت عيوني مصدومة

جوهرة : هذا شنو تُراب

تُراب : هذا حبيب امج يريد يضحك عليها

بقيت ساكته و بلعت ريگي شلون يا اللهي وي امي اني تعبتني

حرك السيارة و عم الصمت احد ما هو نطق

تُراب : تردين اني احاجي امج على طريقتي و افهمها لو متقبلين

جوهرة : لا اقبل بس خلي تقتنع هذا النذل ما يحبها ويريدها على مصلحة

اخذني اشترالي وَرد و فنكر

تُراب : بيمن يذكرج الفنكر

جوهرة : بأخر لليلة دللتني بيها و عفتني شسويت بيه متت بوقتها

تُراب : شو موت ما موت حبيبتي لا تئولي هيك

ضربته على زنده

جوهرة : ترى والله تلح و تنرفز

و رجع تُراب التحق و من نزل راكان كل شوية جاي يَمه و تُراب رايح ويا من اجه استفسرت منه

تُراب : هذا اخوج عاف الدنيا كلها راح على اصعب شيء بالدنيا

جوهرة : اني حتى ما مقتنعة ترى

تُراب : يعني البنية ناطقة الشهاددة كبال امها و مخلية امها ياخذوها

للمستشفى و هذا اجه لابو يكله اريد اتزوج وياي بنية بالكلية

و ابو كاتله

جوهرة: وهسة ليش يكتله شنو تايهلة

ما دام تريدة هي هيج وًهو يريدها بعد شكو

تُراب : جاي اقنعة غير يقتنع

يومين و سمعت بي شارد من امي و امي شايله همهَ اكثر شيء

و تُراب يتصل عليه و ما يجاوب و احنه داخلين حالة انذار

و تُراب دَز صديقة لبيت البنية يشوفها شاردة لو لا

بس طلعت موجودة ، و صار التوتر يزيد ما ينقص ..

مر اسبوع و راكان مختفي و احنه حالتنه حاله

اجه ابو لتُراب يبجي .. يكله خلي يرجع قابل أزوجه اني اروح بأيدي

اخطب الـه بس خلي يرجع نتصل عليه و غالق جهازة

اني دموعي تجري اكول يا اللهي لا تفجعني بواحد منهم بعد ما لكيتهم الماس على اتصال اني وياها و كل شوية دكلي صليت

و دعيت يرجع من يرجع كلولي

امه مريضة ما تحرك لا ايد و لا رجل و اخواته بس يبجن

اروحلهم كل يوم ابو لازم الباب و كاعد حتى العالم مقهورة عليه

بنص الليل تُراب نام و اني التفكير ذابحني نزلت

افتر بالبيت و ادعي يرجع سالم احس كلبي بي

عالم بشيء بس ما اعرف شنو

بقيت كاعدة على القنفة و اسمع الباب يدك دكة مو قوية

بدون اي تفكير عرفت هذا هوَ و لا فكرت بشخص ثاني غيرة طلعت بسرعة فتحت الباب حتى منو ما كلت و اشوفه دخل

وهو يتلفت شُمر روحة بحُضني

راكان : ضميني يمج اني تعبان

سديت الباب وصار حمله ثكيل كعدت بالارض وهو بحضني و اني

اضرب خده .. شبيك راكان حبيبي منو وياك

راكان : تعارك ويَ خال ميرام و ضربته و يمكن مات

ضربت وجهي بقوة و اسمع خطوات على الدرج

اجه تُراب وهو يدور عني من شاف راكان بقى مصدوم

تُراب : انتِ وين و راكان شجابة و شبيج

من الصدمه بقيت ساكته لحد ما تُراب اخذه مني يحاچي شبي وضعة

هو سولف اله و تُراب باوعلي بصَدمة

سحبة من ايده بقوة و هو يصحي على زمانه

اخذه مني و صعده فوك اني واكفة يم الباب و ما اسمع غير

صياح تُراب العالي و هو عصبي و منهار

ويسولفله بالعواقب الي تصير اذا مات

راكان شُمر نفسه على السرير و نام و للفجر اني كاعدة و اعض بأصابيعي من التوتر و تُراب كاعد و ايده على جبينه

اول ما طَر الصبح لزم راكان من تيشيرته بقوة يكعدة

تُراب : كوم لك كوم ساقط احجيلي شنو اسمه خالها دك عليها دك

راكان : تليفوني ما بي شحن و حتى السيمكارت كسرته

بس حافظ رقمها تُراب اخذ تليفونه و اباوع لايده ترجف

من العصبية و التوتر

تُراب : رد رقمها رد

كتبه و باوعلي

تُراب : تعاي لج احجي وياها اذا جاوبت سوي نفسج صديقتها بالجامعة و اني اكلج شتحجين

دك و التليفون بأيدي متوترة اكثر منهم اني

ما جاوبت

بقى تُراب كل شوية يتصل و موگفني يمه اهل تُراب عرفو براكان هنا

و شمسوي و حسيت عمي من نضراته ما قابل على كلشي كاعد يصير و حتى تُراب كلش عصبي و ميتحاچة

اردد الصبر يا اللهي صَبرني

لحد الظهر صاحني تُراب كال محاولة اخيرة اذا ما جاوبت

لازم اروح لبغداد اتصل اول مره ماكو بالثانيه جاوبت

كلت الو و اني متوترة

اجاني صوتها ناااعم و هي خايفة

- الووو منو انتِ

- اني صديقتج بالمدرسة

كفخني تُراب على راسي

- بالكلية بالكلية

- منو انتِ شسمج

جوهرة : اباوع لتُراب ما حچة كأن مركز بنبرة صوتها

كلت الها جوهرة

ما كال الي ليش كلتي اسمج كأن مطاوعني

- انتِ اخت راكان مووو راكان وين عفية جاوبيني

جوهرة : خالج مات ؟

- لاااااا لاااا كلشي مابي والله بس كوليلي راكان وين

اشرلي تُراب بـ لا كلت الها ما ادري

سَده تُراب و احسه هسة يالله استنشق الهواء

تُراب : جوهراااا

- ها

- ساعة السَودة بيوم الاجيتي بيها يم السفينة

راح تُراب طمن ابو بس ما طمن راكان

كال خلي يعيش تأنيب الضمير حتى يحس بالغلط الي غلطه

و الدوامه الي دخل نفسه بيها بس اني ما تحملت اشوف حالته

خليت راسه على رجلي و امسد راسه

جوهرة : لا تخاف حبيبي ما مات

راكان : جوهرة احبها

اباوعله دموعة تنزل و يبجي مثل الاطفال

انفتح الباب و دخل تُراب هو غطى راسه و خفى صوت البچي

بقى ثواني تُراب واكف متخوصر يباوعله

اجه عليه سحبة من ايده

تُراب : كوم كوم تبجي طاح حض الزلم

جوهرة : خلي يبجي واذا البجي مو بس للبنات

تُراب : دموع الزلم ما تطيح الا بخسارة وًهو ما خسران شيء

- هل دمع الرجال عادياً ؟

كافي نركض

ما مش من الشوگ اجازة ؟

الزلمة لو من يبچي فد شيء عادي كلش

ما تلَثم بالجنازة ..

حُضنه تُراب و گاله كتلك تاخذها و اسأل اختك اني كد الكلام لو لا

جوهرة : عمي دولة و علم

تُراب : اااااه ؟

جوهرة : شنو دولة قارة كاملة

ضحكوا و عفتهم و نزلت

بقى يومين راكان يمنه بدون ما احد يعرف و تُراب يحجي ويَ ابو راكان يرتب الوضع قطعت فواكه بالليل ودخلت للاستقبال

متمددين على نفس المُخدة يتصفحون بالاجهزة

راكان : لعبي بشعري حياتي

مديت ايدي بشعره مبتسمة و مستغربة ليش تُراب ما رفع راسة

شوية و حسيت راكان انضرب راشدي و ايدي

انسحب من شعره صارت على شَعر تُراب

تُراب : مرغي زين لج المَلحة

ضحكت و كعدت عدل بدون ما يدري تُراب مديت ايدي الثانية

على شعر راكان وامسد الهم اثنينهم بس من احس تُراب تحرك

اسحب ايدي

ثاني يوم تُراب اخذ راكان و راح للبيت من الصبح و قبل الغداء بشوية يالله اجه جنت اريد اصب

جوهرة : كلت ما راح تجي

تُراب : لا اني ما استلذ الا بطبخ المَلحة

جوهرة : خو ما سواله شيء

تُراب : والله لو ما اني حاجوز جان اكله بين سنونه

اخوج عار و يستاهل

تغدو و صعد هوَ صعدت ورا و صار البيت هدوء لكيته يسبح و جهازة يدك تقربت للصورة بنيه اسمها مُزخرف دلوعة ..

فتحت خط اجاني صوتها خشن مال كبار اكبر مني

جوهرة : منو انتِ

- انتِ منو

جوهرة : مرته منين تعرفين تُراب انتِ

- هاااا بالخير كوليله اسو دكت عليك حچتها و طكتها ضحكة

طلع و اني كاعدة بمكاني

تُراب : اويلي شكد مشتاق بشرفي اخوتج يومية طالعيلي

بمصيبة باعديني عنج

ما جاوبته و اني العب بالتليفون

اجه يمي باس خدي مسحت البوسة بسرعة بأشمئزاز

تُراب : ااااه ؟ تمسحين بوستي يعني السالفة مو خالية

مَد ايده و حرك فكي لحد ما صار وجهي بأتجاهه

تُراب : غَرد يا بُلبل

دفعته و طلعت من الغُرفة ردت انزل و استوقفني كيس الملاكمة

لميت شعري و بقيت اضرب بي لحد ما انفتح باب الغُرفة

تُراب : هاي علمود الي اتصلت

ما جاوبته بقيت اضرب

من ورا حسيت بأيد حاوطت خُصري و رفعتني من الارض

بقيت ادفر بي و هو دخلني للغرفة

تُراب : جا انتن النسوان شيغزر بعيونجن اذا هذا كله الـ سويته وًبعدج تشكين بيه مَا عيب والله جان استحيتي

نزلت من عنده و رفعت اصبعي بوجهه للتهديد

جوهرة : تُراب اني ما احب اتعارك مثل الزعاطيط بهيج امور و انتَ تعرفني كلش زين هسة تفتح جهازك و وروح زهراء اذا شفت شيء

ما يعجبني تطلگني

تُراب : مادعيت والله ابو الجواهر مو تدرين بينه ما عندنا نسوان تتطلگ

فتح جهازه و خلاه بأيدي

- خلي يمج فتشي براحتج اني رايح اشرب بروتين

نزل جوه و الجهاز بأيدي افتش بي دخلت بكد كمية البنات الي شفتها بس ارتاحيت من شفت هو ما يرد على اي وحدة ابد و اخر الي راد عليهن نصورة و الي وياها ام شعر الاحمر

و كله مكالمات

دخلت على كل البرامج ما شفت شيء ثاني

دخل هو بأيده يشرب البروتين جرعة كله شَربه وحدة

و باوعلي

تُراب : ها شحصلتي

جوهرة : تكدر تحضرهن

تُراب : زعطوط اني ما عندي شغل و عمل اكعد احضر بالوادم

بعدين شو هذا البروتين يمكن مغشوش

جوهرة : رجعة اذا مغشوش

تُراب : هو اني هم زوج

- ليش ؟

اخذ الجهاز من ايدي شمره و قرب راسه لرگبتي

تُراب : عايف الاصلي و اخذ مغشوش

نزلنه العصر و هو فتح باب الغُرفة على اهله

تُراب : ليش منطي ظهرك لامي اشبكها يالله

امه تضحك و ابو يكله عيب استحي

- شنو استحي عمي اني اريد اخو شنو عايفيني وحدي

اجه يم امه يبوس بيها و ابو يكله احترم نفسك و صير رجال

مره بحياتك اندك الباب و دعبول بالكوه قبل يفتحه

شوية و دخل راكان الفرحة ما واسعته طلعت من الغرفة و حسيت بحضنه قوية

راكان : لج جوهررررة ابوي قبل جوهرررررة

تُراب : تعال لك تعال الزعطوط

راح لتُراب حُضنه و راد يحضن خالة بس وكف

- خاف اشبكج خالة و تگاوموني عشائرياً

بقينه نسولف و نضحك و ابو تُراب طايح الهم دك رزايل

و هم يضحكون راكان ارتاحله و سولفله حتى من اخذته للاسواق

و تُراب ستر النه

ابو تُراب : بابًا هو انتو الغيرة منزوعة منكم هم لو تنباع

جان اشتريتها الكم

تُراب : يابة ترى الزمن تغير يعني بس انتَ ما تقتنع

ابو تُراب : انتَ حبيبي من يوم الـ توكف خواتك بالباب ينتظرنك اني غسلت ايدي منك ما عندك غيرة

ضحك بس احس معاني الحزن أنرسمت بوجه تُراب

قبل لا يلتحق بيوم راح لامي للبيت صعدها بالسيارة و راحوا

و اني بقيت الفضول ياكل بيه شوكت يجي و يسولفلي

اكثر من ساعتين اني انتظرهم لحد ما أيست صعدت

اباوع من الشباك نزلو وهو كبل باوع للشباك يضحك

نزلت البردة و اجيت تمددت

انفتح الباب و دخل مبتسم

تُراب : كومي تعشي حبيبتي جبتلج اكل لان ادري الفضول حتى اكل ما يخليج تاكلين

فتحت الاكل و اني اباوعله منتظرته يحجي

تُراب : اكلي هسة لاحكة على السوالف

جوهرة : دتعال احجي

كعد كبالي يضحك

تُراب : اويلي لو تحبيني بكد ما امج احمد الا انا ملك

جوهرة : هسة لتضل تسوي ذني

- شلون طلعة وي امج اويلي

ضربته راشدي عَض شفته مبتسم

جوهرة : تأدب كتلك الف مرة تأدب

تُراب : ههههههه اويلي رحوبة بشرفي تستاهل واحد يدلعها ما يعذبها

عفت الاكل و اجه يضحك لزم ايدي

- يالله تعاي اسولفلج اخذتها بالبداية مستغربة دكلي

انا مو مرتك حتى تقشمرني وتبيع ذهبي حتى ذهب ما عندي

اخذتها عشيتها و هناك سولفنـه جيبيها منا وديها منا

ما تقتنع سولفت الها على غايته ما صدكت فتحت الها التسجيلات انصدمت

جوهرة : اي

- بس قهرتني يعني و شكد حجيت عليه ما دافعت اله

ثاني يوم رحت الها و اول مره يكسرني حال امي و مابيدي الها شيء

كعدت اغير جو و اسولفلها عن حبيبة راكان بلكي تفكر بغير شغله

و ترتاح و قررن هذا الشهر يسافرن

جوهرة : خاف ترحن فارغات و تجن بيدجن رجوله

نويرة : والله كلشي يصير بكرة القدم ما اضمنلج

احاااا اجي جايبتلج الاشكر ابو كذلة صفح

رحاب : خلي نسافر لتركيا

صفكت ايدي الهن و تخوصرت

جوهرة : خوش عمي والله خوش النوب حتى تبقن هنـاك ما نرجع

نويرة : اكو واحد خطية راح تموت يالله لا تضوجين نصورلج

بدينه تجهيزات لعرس راكان و ما مصدكين

البنية بس امها وياها و راح تجي لهنا يعقدون و يتزوجون گبل

و ابو راكان كلشي يصير على اعصابة بس حتى مايخسر

راكان و امه

اجتي البنية و بقت يم نويرة و امي اني كلت لنويرة خليها يمج

لان اذا مو يم نويرة راح تجي يمنه و اني ادري ابو تُراب

ما يقبل بكل هاي الاشياء و يطلع عصبيته بـ تُراب

ايام حلوة بيها الفرح سَير على بيوتنا

عقدنا لميرام و راكان خطوبة عراقية جداً

تترأسها گولات نويرة و هلاهل امهاته

و اني يومية رايحة ويَاهن يجهزن لميرام و ميرام صار جمالها

حديثنا كلنا شكد ما شفتها حلوة بالصور طلعت احلى

ملامحها كأن لعابه

راكان و يا فرحة راكان ما تنوصف و لا تنحچي

بوقتها رحت مراجعة ثانية و كالت كل وضعج تمام خليها

على الله بَعد و كتبتلي علاج بسيط

رجعت و اني احس روحي تفور من الداخل يارب

شوكت تجبرني ولو اني صرت طماعة بطلباتي

فلوس ابو راكان هواي ما صارت اي عرقلة بالتجهيز و بمدة قصيرة كملو كلشي و باجر الحنه و بعدها العرس

و صار الفرح احلى لمن اجتي الماسه و ابنها و السيد وفى بكلامة

من كال اجيبها

الماس : جوهرة مو باجر تشغلون اغاني ترى حرام

جوهرة : تربية السيد عيني سدي اذانج باجر يشعلوها اكيد

سوينه حنة البنات بـ استقبال بيتنه اجني بس بنات خالاتها

و نسوان عمام راكان و بناتهن كلهم صارت حنه تجنن

و ميرام ما قبلت الا بالعرس تروح للصالون طلعت تجنن

رحاب : لعد هاي باجر شنو من جمال تطلع

لبست فُستان ابيض و حليت شعري

و خليت الاضاءة عَظمة رقبتي و مكياج هادىء

و جان اول فرح احضرة بحياتي و احلى فرح يمر عليه

حبيبي الي خلصت العمر انتظر شوفته

اليوم حنته صارت بـ بيتي دخل حَناها و من فرحته يرگص وياها

و احنه وياهم امه الفرحه ما سايعتها ابد

طگينا صور و تُراب صاحلة يگله شنو جلبت فضها لك

وحدة بصفي صغيرة من جماعة عمام راكان كالت

- الله هذا صوته شكد حلو عاد وجهه هم حلو

جوهرة : ما يفيدج حبي هذا رجلي

من خلصت حفلتنه لـ العشرة بالليل حنة الزلم ما خلصت و ابو

حتى مطرب جاب و العالم كلها تركص و تاكل بالليل

كلش دخل تُراب و عمي و خالة نامو بالاستقبال

لان الماسة و زوجها ناموا بغرفتهم

بدون ما تحجي كال تُراب اليوم شلبستي سِت

بقيت اوصفله

تُراب : وليش ما صحتيلي اشوف

جوهرة : خفت عليك تنجلط حبيبي

- صورتي ؟

اخذت الجهاز فتحته اشوفة بقى فاتح عيونه مصدوم

تُراب : لك هاي منو هاي

- مرتك حبيبي

تُراب اشتعلووو لَك اويلي يابة اويلي

سحب ايدي وكعت على السرير

جوهرة : صدك شوف

- شكو لج

- حضر روحك تسوي تحليل و تروح لطبيب شيء لان صرت

زينة والله يجوز يطلع منك السبب

فتح عيونه بصَدمة

تُراب : مني ؟؟؟ لج مني خرب إنه النوب انداريتي عليه

جوهرة : اي والله معليه سوي تحليل يالله

تُراب : اي الله كريم دتعاي

يقرقرني و اني صوتي عالي بالضحك بقى يسكت بية

تُراب : دسكتي لا يصعد النه السيد

بشرفي اليوم من ورا الاغاني خزرني خزرة خلاني اعيد ماضيّ كله

بقينه نضحك و كل شوية يكول اش كافي ...

طلعت من الحمام اخلي مُرطب

جوهرة : سوي عند دكتور زين

تُراب : بالله هسة دركعي راسج بذاك الحايط

بقيت اضرب رجلي بالكاع و متنرفزة

تُراب : بس لتضلين تنگين بموضوع يصير شكد تنگن النسوان شكد

و عافني و نام

ثاني يوم مخبوصين بالعرس

و اباوع لتُراب واكف يم السيد و شايل ابنه

ويناغي بي و كل شوية يبوسة ويسويله حركات يضحكة

من بعيد رفع نظرة يدورني كأن حتى افكارنا متشابهة

انطى لابو و اجاني

تُراب : هذا ابن اختج نسيبي لوحدة من بناتج الملحات

و أبو زَفه بوقتها باوعت لنظرة امي كسرتني من شافت الي ربته

صعدت بالصدر عاد صعدنا وي تُراب اني وياها و خالة

و نويرة و اميرة وي السَيد جانت الزفة تجنن

و تُراب يسوق و سيارة العرسان ورا

لان ابو مو كلش يندل

و لمن رجعنا الموسيقى مال الاعراس هرجت الدنيا

و هو و تُراب تكابلو يرگصون و حتى ابو الي محد شايف ضحكته

رگص وياهم و حتى نويرة دكول شكد شايفه اعراس حلوة

بس مثل هذا العرس ما شفت

لهنـا و بدأ الهدوء يغمر حياتنه

امي من شفتها شمرت كلشي يخص احمد بالزبل

بس ضمت صورته و هي تبچي

يا ترى لو احمد النذل حَب امي مثل ما حبته ؟

مرت الايام و امي و الحبايب سافرن رادت تسافر خالة وياهم و عمي ما قبل كال الها نروح للعمرة بعد كم اسبوع وًما بيج حيل هلكد تسافرين

تُراب : كول ما اكدر انام و انتِ ما موجودة و فضها

ابو تُراب: طبعا ما اكدر شعندي غيرها هاي الحب

الاول و الاخير

باوعتله بنظرة شووف الحُب

ابو تُراب : شبي لازم عنده غيرج ؟ كليلي حتى ظَهرة اكسره

كتله لا عمي و من كمت تقربت عليه

جوهرة : بس دلوعة و فد اربعين وحدة وياها

تُراب : يئبرني الغيران

قرب موعد الشهرية و لمن ما اجتني خفت بس لا رجعت

تخربط بسبب التكيس ابد ما خليت ببالي حامل من كد ما آيست

رحت للدكتورة و هو اخذني و اني ضايجة

سوتلي سونار

- جوهرة انتِ سويتي تحليل حمل ؟

- لا دكتورة

- كاعد يبين عندي كيس كومي بالله سوي تحليل

طلعت و من فرحتي كالت لتوكعين نسيت اكو حتى نسوان موجودة هو واكف يم الباب ينتظرني

جوهرة : تُررراب يمكن حامل

تُراب : لا ؟ ان شاء الله يارب

اجينه للمختبر نسوي تحليل و ننتظر و جان هذا اصعب انتظار

من بعد انتظاري لاخواني هو لازم ايدي و يهدأني

تُراب : كافي شبيج راح تموتين وحتى لو مو حامل

كلش عادي رب العالمين لسه ما كتب

و اني اردد بداخلي يا رب لا تخيب فرحتي

ام التحليل طول الوقت تباوعلي من جابولها الورقة

كالت اني تحمست اكثر منج

فتحتها وهي مبتسمة

- مبروك حامل

اباوع لتُراب و فرحته و لا كأن هو الي يصبرني كل هاي الفترة

رجعت للدكتورة و من فرحتي احس كل العالم عرفت الي بالورقة شنو

خاني التعبير و صارت دموعي من الفرح ما اسيطر عليها

و يا فرحة عمي و خالة اكثر حتى من عندنا

خابرت امي وًهي بالسفر و اسمع هلاهل

نويرة و اميرة الماس فرحتها ما تنوصف اصلاً ، اركان

و كل الي يحبوني فرحولي

تُراب مبتسم و كاعد على القنفة يتأملني

جوهرة : ما مصدكة تُراب ما مصدكة

تُراب : اني تردين مني تحليل مو ؟

بقيت اضحك و خالة كل ما تشوفني امشي تكول اكعدي

خلي الطفل يركد و حرموني حتى من روحتي لبيت نويرة

ما الومهم لان كلنه تعبنا نفسياً يالله سمعنا بهالخبر

صارن هن يجني و اميرة من السفر مجهزة كلشي اله

دكول انتِ بنتي الما جبتها

جانن يسولفن على البطولات و هن صغار

و اني اسولف الهن لحد ما اخذني الواهس بالكلام

سولفت الهن على عماد بقن مصدومات

سُعاد : اسكتي لا يسمع دعبول ولج هذا فتان و نصي صوتج

لا يكعد رجلج

نويرة : جا لوما صايرة سباعية جان اغتصبج

يا يا يمه فلك ولجن اسكتن

اميرة : بوكتها سدت عليه لليلة كلت ما اصبح الصبح

تالي اخذتها و شلت

بعدني اريد احجي و اسمع

اسم جوهراااااااااا

طلع بنبرة بكل حياتي ما سامعتها نبرة مُخيفة

.....

ضميتك حرز للدنيا خاف تعيل

تميل الگاع بيه و انتَ ابد متميل

شوصفك يا مسچ يا هيل ؟

بوكت هدنه الوكت انتَ النه صرت " الحَيل "

-رُسل فَهد

طلعتو حابين الفقرة مثلي

شنو الـ كلمة الي نگالت الكم و خلت دموعكم تنزل ؟

ما راح اسأل منو كايلها لان اكيد عزيز

ما تطيح دمعات العين غَير أعزازها