على كتف القبطان حمامة الفصل السابع وأربعون 47 - بقلم رُسُل فَهد

التَصويت و المُتابعة لُطفاً
عَلى كتِف القُبطان حَمامة
- رُسل فَهد
...

من الارشيف عام ٢٠١٩ م
أختلاف الحَرب و الحُب بَس " سواتر"
الما يحلها الرادها موجودة المن ؟
كون تنگص الظفاير
يكفُر الگال العشگ مابي ظروف
و تكفُر من تجيب سالوفة جهال ، گبال عاجر
خيبة الاشجار تكتل
من يجيبها الفَاس يركض
أيد ما عدها تكض بيها الخَواصر
الصرخة بالَمغرب تجيني و خايفة لو تطلع اكفر !!
لان أدري بصوتها يعلى إعلى صوت أهل المناير
- أنا اول وحدة ما رادت تعيش
- و أنا أول وحده ما تتمنى بَاچر ..
- رُسل فَهد
...

جوهرة
وحدة منهن تحجي و تتلفت و تگرص بأيد الثانية
انتبهت الها وكفت عدل
جوهرة : راكان مو هنا ؟
- لا لا هسة يجي راح يتسوگ النه

وحدة تأشر للثانية بعيونها و من دخلت امهن سكتن
تالي صاح ابوهن بصوت عالي وهن وحدة لزمت ايد الثانية
امهن انخطف لونها بسرعة
- شكوو
نسيم : يمه يمه حَياة رسمت راكان و حبيبته و ابوي اخذ الدفتر من عندها و احنه كاعدين بالغرفة وكال انزلن ساعدن امجن

لطمت على وجهه و ما ادري شدعوة و شنو هاي المُبالغة بالخوف منه
- ولجن تردن تموتني انتن امشي امشي شوفيلج چذبة امشي
حَياة : والله معليه اني
الام تباوعلي و خجلانه مني

جوهرة : هو ميعرف ؟
ام راكان : شيعرف خالة مسيحية غير يذبحة والله يذبحة
ردت اكوللها حتى اني اذبحة بس شفت الوضع ما يسمح
صعدت الام دكله اسكت هاي البنية هنا وهو و لا يسكت
ابو راكان : ابنج يحب مو اني ادري شاك بي بس اجذب روحي

ام راكان : شو بالله خل اشوف يا هاي هيج بالتلفزيون طلعت
هو يكلهن حلوة و اخته تريد تفرحه رسمتها
ابو راكان : اي اي مَضحك عندج اني مضحك و هاي
الكتابة الجوه شنو شنو تاريخ اللقاء و الاعتراف زعطوط عندج
و عند بناتج اني

انفتح باب المطبخ و دخل راكان بيده المسواك مستغرب الصياح
شافني ابتسم رغم ملامحة الـ واضح عليها القلق و الخوف
ترك كل الهوسة و اجة باسني
راكان : شكو شبي ابوي
حياة : راكان والله اسفة ما ادري ردت افرحك رسمت رسمة انتَ و ميرام و كتبت موعد اللقاء و الاعتراف و اسمائكم و ابوي شافها

صعد فوك و اني گلبي يمه لا يضربه ابو
راكان : شبيك بابا اهدأ اهدأ امي راح تتخربط و هاي
البنية اي صحيح وياي بالكلية و احبها بس تفارقنا و الرسمة قديمه
ابو راكان : هو انتَ كلك مرحلة اولى شوكت تفارگتو
من لزمتك هذاك اليوم تحجي وي بنية جذبتني
عبالك اني غشيم

راكان : يابة ما اجذبك بس انتَ عصبي و متتفاهم
شلون احجي وياك هيج موضوع
حجة بصوت اعلى من نبرته العالية حتى اني الما اخاف خفت
ابو راكان : والله ثُم والله و الكُل يسمعني يا راكان
اني دازك تدرس اذا سمعتك عندك علاقة وي بنية ، اكتلك
صدك هالمرة اكتلك

نزلت الام و بقى راكان يهدأ بـ ابو
ترخصت و طلعت اباوع للام تريد تكتل بناتها بس اني واكفة
بعينها طلعت و اكول بكلبي الله يساعدهم على عصيبته مشكل الهم رُعب حتى اني من الخوف لسة ايدي ترجف

رجعت للبيت و ورا ساعتين اندك الباب و اجاني راكان
راكان : ما شفتج كلت اني اجيج
جوهرة : هلا بيك حبيبي
- همزين ابو الغيرة العراقية ما موجود اريد اكعد اسولف وياج

- ههههه خطية والله حتى من السفر ما ارتاح
راكان : حسرة عليه ابوسج الما دازلي بصمة فشار
على الماسنجر
جوهرة : شنو قصة المسيحية
- شمدريج مسيحية ؟
- امك كالتلي

راكان : جوهرة اني اعشقها تعرفين شنو يعني احبها حُب ما صاير
شفتها اول يوم بالجامعة هي مرحلة ثانية بس اني اكبر منها بالاشهر
لان اني عايد السادس جوهرة اوكفي خل اشوفج صورتها
فتح التليفون. وهو مبتسم و الفرحة واضحة على ملامح وجهه
و هو يحجي بيها

انطاني الجهاز و اباوع لصورتها فتحت عيوني من صدمة جمالها
كأنها لعابة سُبحان الخالق هي تضحك و الشمس ضاربة عيونها
الخُضر و شعرها اشقر قصير و لابسه بدي ربع ردن
و ايد على زندها مال رجال
جوهرة : عزه هاي ايد مَن ؟
- ايدي

بقيت اباوعله بَعد الصوره و هو واكف بصفها بس جان مقرب بس وجهه حتى اني اشوفها
جوهرة : يعني تحبك
راكان : تموت عليه بس جانت تستحي ما تحجي
قسم انكليزي هيَ حتى اللغة العربية لخاطرها كرهتها

جوهرة : و ابوك شلون ؟
راكان : هو بس ابوي حتى اهلها هي اريد تَسلِم علمودي
بس امها ما تقبل ، كالتلي حتى اشرد وياك
جوهرة : يعني ابوك هاي عَصبيتهُ و ما يدري مسيحية
لعد اذا عرف شيسوي
راكان : ميسوي بس يذبحني

جوهرة : شلون صارحتها و هاي
راكان : كلها تعليمات رجلج خلاني اجيبها للطريق
بقيت فاتحة حلگي
- يعني تُراب يعرف ؟

راكان : اي طبعاً او ايام اني اراقب بيها بعد ما صرت اشوف وحده غيرها مادري شسوت و عمت عيوني سولفت لرجلج كال خليها تحبك
بس ما تعرف انتَ منو و وصي ابو الكافتريا شنو تاخذ يكوللها واصل
بقيت اراسلها بالفيس تعرف اكو معجب بيها بس منو متدري

جوهرة : والله هذا تُراب يخوف من صدك
راكان : هي كل يوم تريد تعرف منو اني بالبداية جانت عصبية
النوب صارت تاخذ الموضوع بضحك جانت تحجي وي شباب ويانه
و اني اموت اشتعل
جوهرة : طبعا منو نسيبك

راكان : كلت الها ترى اضوج من تحجين وي احـد
صارت تبتعد عن الكُل و بس اني تتصل وتراسلني بالجامعة و بالبيت
صار عيد ميلادها طبعاً عرفته من نبذة الفيس مالتها
كلت الها باجر اشوفج

اخذت الها هدية و رِحت لان بعد ما اتحمل شهرين اراسلها و ماعرف منو اني من اجيتها من فرحتها حضنتني گدام العالم
وهسة تبجي لان ما كاعد اداوم عبالها عفتها
جوهرة : الله شكد حلو

راكان : لازم اتزوجها حتى انقلها وياي السنه الجاية
جوهرة : لازم تسايس ابوك
راكان : اي بس ابوي هي اهلها بس امها و اخواتها اثنين
يزعلون عليها و يرجعون ما يكدرون عليها
و اني عادي حتى امها اروح الها اقنعها

جوهرة : خلي امك تأثر على ابوك
راكان : هي امي من الخوف من افتح طاريها تخلي ايدي على حلكي
بس خواتي لا اسولف الهن كلشي
جوهرة : مادري والله ان شاء تنجمعون بس سالفتكم تحير

بقيت افكر بي و بقصته لحد ما راح اتصلت على تُراب
و كتله و عن طريق الكلام چفصت و گتله
ابو غير راد يكتله و امه لزمته
تُراب : و شمدريج انتِ ست جوهرة
جوهرة : هو كلي غير

تُراب : زين يا يعني ما رحتي منا منا
سكتت و كلت خاف يعرف بس يريد يستجوبني ماكدر اكذب اكثر
تًُراب : شو سكتي ست جوهراااا

جوهرة : احم اي هو رحت الهم بطريقي ردت اشوف راكان
تُراب : و بدون ما ادري عادي عندج
جوهرة : كلت من ارجع اكلك
تُراب : اه ؟ و اذا رجعتي و كلتلي و كتلج لا شلون بهالحالة
جان يحجي و مبين يشرب چاي بكل برود
واني بس بهاي المواقف احب البرود

جوهرة : مو ادري بيك مدكلي لا
تُراب : لا حبيبتي انتِ حتى لو كلت لا حجايتي و القندرة
انتِ الـ براسج لازم يصير
جوهرة : لا طبعا ماكو هيج كلام اني وياك ما بينا هيج سوالف
انتَ ثاق بيه و منطيني الصلاحية بكلشي
تُراب : بدون جذب لا تقوليني اشياء ما گايلها

جوهرة : هسة دعوف هذا الكلام مشتاقتلك
تُراب : لا تغيرين الموضوع حبيبتي جاوبيني ليش تجذبين
- ما اجذب حياتي لان انتَ اصلاً حافظني يعني
- جوهرة اني مو قشمر عندج

جوهرة : لا تطوخها و تزعل ما يلوكلك الزعل و اني مشتاقتلك
تُراب : عَن جد مشتائتلي ولا بدك انسى الموضوع
جوهرة : حبيبي شينسيك هو انتَ اللبناني لسه ما نسيته

تُراب : جوهرة المَلحة شو ما احسج مرتي و تخافين مني
حتى اصدقائي يخافون مني اكثر منج ماخذج الواهس
ولا جنج متزوجة

جوهرة : حياتي هو اني كضيت عمري افتر تريد من تالي انتَ
تحبسني الطيور ما تنسجن و اني ... ردت احجي وسكتت
خفت لا يتذكر و ينقهر
تُراب : انتِ حمامة طبعاً

جوهرة : اني ما اخاف منك تدري ليش
تُراب : غردي بالله ليش
جوهرة : لان اني من عرفتك صرت ما اخاف من كلشي لان انتَ
مصدر الامان بالنسبة الي فـ شلون واحد يخاف من مصدر امانه

تُراب : علمته الرماية وصَوباني

ضحكت
تُراب : يعني انا اكلج لا تخافين من العالم النوب
حتى انا ما تخافين مني
جوهرة : هسة شوكت تجي باجر مو
تُراب : اشوف
- شنو تشوف عمي مشتاقتلك
- اويلي
جوهرة : اويلييييي

ضحك بصوت عالي و سديته نمت و اني مبتسمة
ثاني يوم الظهر بقيت واكفة انتظر نويرة و امي ماكو
دخلت للبيت و المغرب اجه تُراب جايب ايباد لدعبول
و دعبول من الفرحة يصعد الدرج و ينزل
ما يدري شيسوي

بس تُراب بسرعة طلع من البيت طلعت ورا مديت راسي
شفته يدك بـ باب بيت نويرة
صحت تُراب ما جاوبني بقى يحجي و طلعت اله امي
شوية و اجه متوتر صعد فوك

صعدت ورا
جوهرة : تُراب احجي عاد
تُراب : اختج بَراء شوكت اخر مرة حاجيتيها
- قبل ثلاث ايام هيج هي دكت عليه ليش شبيها
- رجلها راجع للبيت ما لاگيها هم مسولفتلج شيء هيَ ؟

جوهرة : لا بس امي كالتلي رجلها يريد يتزوج و هي منهارة
حتى امي كالت اذا تزوج صدك اجيبها لهنا و يطلكها
تُراب : اني هم شكيت امج و هو هم شاك لان يكول اتصلت عليها الصبح بس امج دكول ما موجودة

جوهرة : يمه وين راحت ، خاف مرته ورا السالفة
تُراب : يكول لا اصلاً مسافرة و متزوجة
بقيت واكفة مصدومة لزمت راسي
- لعد وين راحت هي اصلا تموت على رجلها

تُراب : دكي على رقمها نزلت اركض اخذت التليفون من دعبول و هو محتار بالايباد و صعدت و اني على الدرج اتصل و ايدي ترجف
طلع الجهاز مغلق
اباوع لتُراب وجهه انطعن
تُراب : هسة حتى خوالي انعدموا و ماتت كل ثاراتهم جان كلت
ما كدروا ياخذوج اخذوا اختج

جوهرة : لا قابل حتى لو هم شمدريهم بأختي
تُراب : جا منو السيد يكول بحياتي كلها ما مار بهيج موقف
و البنية حامل
حطيت ايدي على صدري و دموعي تجري دك عليه رقم اميرة
ما جاوبتها صار يدك اكثر من مره خفت من ملحتها جاوب
اجاني صوت الماس

الماس : الو جوهرة اني الماس يم امي ببيتها هي اخذتني
بقيت مصدومه و الجهاز بأيدي
تُراب يباوعلي هستوه ساد المُكالمة
- شكوو. ؟؟؟ شبيج
جوهرة : تُراب الماس اختي بـ بيت نويرة امي ماخذتها بس شوداها ؟

ما جاوبني نزل يركض و اني اركض ورا طَبيت لغرفة عمتي اخذت
عبايتها و طلعت هو يدك الباب بقوة اول ما انفتح دخل و اني دخلت ورا فتحت الباب نويرة و مبين على شكلها ضامة شيء
تُراب : نويرة وين مرت السيد
زفرت نفس قوي
نويرة : جوه فوت

دخلت اني قبله لكيت الماس كاعدة بعبايتها و ربطتها و تبجي
رحاب : ما ترجع كولي لرجلج لا يتدخل
جوهرة : شجابج شوداج و ليش السيد ما يدري
رحاب : يريد يتزوج عليها شعدها باقية يمه

دك الباب تُراب بطرف اصابيعه
اميرة : فوت يمه فوت
تُراب : جا ليش من اكلج هنا دكليلي لا ام جوهراا شنو هالتصرفات
الرجال عباله مرته طالع و خاطفيها

الماس رفعت وجهها بخوف و تمسح بدموعها
الماس : عمو كله الماس ما ترجع بعد راح تبقى هنا
بس هم كله اني وين خطية لا يصعد ضغطة

تُراب : خويه بعد عمج و انتِ شلون تطلعين و رجلج ما يدري
لو هاي الحالة تمشي بدمجن
بَاوعتله بخَزرة
- و ليش السيد يريد يتزوج
الماس : انطوه هدية
تُراب : اويلي

رحاب : كله خل يطلكها و يتزوج براحته و ابنه من تجيبه ندزه اله
تُراب : عمي الرجال خوش الرجال يجوز ما يتزوج
مادري مادري بس عمي عيب و فشلة تاخذين مرته بدون ما يدري
شلون اخذتيها
رحاب : رحت جبتها و اجيت
تُراب : والله عمي تدكين دروب

رحاب : و انتَ شنو و تحاسبني بنتي مو ماعندها اهل و يجيب ويلطش عليها نسوان و حتى هاي جوهرة بيوم الـ تزل وياها احرمك منها
تُراب : حتى احرمجن شم الهوى انتِ وياها غير

طلع و الجهاز بيده طلعت ورا بالشارع و دخل للكراج اتصل
عَلى السيد و كله سيدنا اعتذر اني دزيت واحد من الجهال لان
توني طَبيت للبيت من الدوام بس هسة رحت اني و اختها
مرتك يم امها ، امها جايبتها لان اكو سالفة زواج يمكن سمعت

شوية و سده
جوهرة : شكال ؟
تُراب : انصدم الرجال كله من جوه راس امج حتى البنية تريد رجلها
- اي هي تحبه والله صدمتني امي بس هو ليش يريد يتزوج
- رجال اجته هدية يعني ليش يرجعها قابل احسن من البني محمد
(ص) هو النبي ما رجع الهديه

جوهرة : لا والله وكفت ويا طبعا لان السالفة بيها نسوان تكيف
تُراب : اني يعني تجيني هدية و ارفضها اي ليش شبيج تسودنت
جوهرة : ما بيه حيل اناقشك بس اكلك اذا عاجبك
تلحك خوالك بكيفك

بقى يراسل و كل شويه يسألني شيء
نزلنه يم عمي و خاله بالليل و تُراب احسه شايل هم الماس اكثر مني
سولفت لخاله كالت ما يصير تصرف امج غلط بس هو هم
ليش يريد يتزوج خطيه مرته

ابو تُراب : باجر الصبح جيب النه صوندة طويلة هاي مو كلش
تُراب : اكيد يابة انتَ اذا ياخذك الواهس برش الشارع تريد
تبلل حتى الشارع

اابو تُراب : قابل مثلك اني حياتي بس نوم و جكاير و فشار
تُراب : جا منو صار اله اسبوع بالدوام
ابو تُراب: لا تخبصنا هو ستيرن حركه مشت السفينه ووصلت
لو ترمي على الحدود شسويت
بقى تراب يضحك و يمسح بشواربه

لحد ما صعدت و اني بالي كله يم الماس مبينه خايفة
و بنفس الوقت صايبني شعور فرح من اشوف امي شلون مهتمه
بأمرها توقعت مابيوم ممكن تدافع النا
شوية و دخل تُراب يراسل و يضحك حجيت و اني اعدل الفرشة
جوهرة : والله هي الزلم ما تتأمن حتى السيد يريد يتزوج
لعد ابو النسوان شيسوي

يسوي نفسه ما يسمعني و هو لام شفته لداخل حلگة من الضحك
تمددت و اجه يمي سَد الجهاز
تُراب : ترى انتن ما فاهمات موضوع الزواج عدل الزواج ع كد المحبة
مثلاً السيد يحب اختج جاب الها وحدة تساعدها
اني تدرين بيه شكد احبج اكيد ما اجيب وحدة
جوهرة : شحدك

تُراب : اي اجيبلج اثنين ثلاثة يساعدنج هو اني متزوج متزوج
جوهرة : كل ما زاد عدد الزوجات كل ما جانت جريمة الموت ابشع
حاوط خُصري و هو يضحك
تُراب : اني الاملح مخلي عندي اشباع ما عَيب ادور غيره

جوهرة : عبالك اختي ما تحبة غير تعشق رجلها سولفتلي شلون حبته
حتى بچي كمت ابجي تخيل هي تحبة و هو ميدري و من دره راد يبعدها بس هي ما كدرت تبتعد تالي استسلم الها و حَبها
تُراب : اويلي بس من طريقة كلامه مبين راح يطلعها من عين اختج

جوهرة : هسة ديالله فوگ حگة طگة فوك ما يريد يتزوج هو المان علينه
تُراب : اني مرتي تطلع بدون ما ادري خرب
باوعتله بـأستهزاء بمعنى اذكره
ضحك و جَرني من شعري

تُراب : عمي بنات رحاب انتن صلفات على امجن حتى
السادة ما تكدر الجن
جوهرة : اي والله و يريد شرطي السمج يكدر النه
تُراب : انعل والديجن اني غير مرخيلج الحبل شوية اكول خطية
ما شافت شيء من حياتها

جوهرة: تؤ تؤ تؤ اويلي
سحب ايدي و صار فوگاي
تُراب : شو صايرة مستهترة حتى الـ اويلي من دكوليها تجريها جَر
جوهرة : أويليييي
- اشتعلو خوالي و خوالج
- طبهم طووب

اضحك بصوت عالي و احرك راسي وهو مقيدني
جوهرة : وخر لحيتك تقرقرني تُرااااااب ...

ثاني يوم الصبح كعدت مبتسمة احب الايام الي هو موجود بيها
حتى الشمس احسها تطلع بضوء اقوى و العصافير
تغرد بصوت اعلى و الچاي يخدر بسُرعة مدري كل العوامل الصباحية
تفرح وياي مدري هذا خيالي هيج واصل مرحلة

سويت ريوك لعمي و عَمتي لغرفتهم و دعبول بعده نايم الظاهر سهران
على الايباد و رتبت صينية اله و صعدت
فتحت البردة هو تگلب و دار وجهه
جوهرة : يالله تُراب سويتلك ريوگ گوم
كال بصوت نعسان
تُراب : شبعان من الليل حياتي
شلت الكوشه من الكاع و ضربته بيها

جوهرة : فضها يالله ولو متستاهل
دخل للحمام يغسل و طلع
تُراب : اني ما استاهل ليش ليش مع الاسف
انظف بالغرفة و هو كعد ياكل

تُراب : متاكلين ؟
جوهرة : لا
- جا انتِ الشبعانة مو اني
جوهرة : استغفررررر الله
تُراب : تعاي خلي عسل على الاكل

جوهرة : عسل ؟ ما عندنا عسل ما جايبين
تُراب : عيب عليج والله جا انتِ شنو يالله تعاي اكلي وياي
كعدت اكل و اني مبتسمة

جوهرة : تُراب و شصار بموضوع الماس اختي
تُراب : الماس شنو كولي بَراء اني متعود بَراء
- هسة دكول
- ما ادري والله بس اعتقد اله جَيه

جوهرة : ياخذ الماس ؟ اذا متزوج صدك مترجع
بعدنا نحجي و سمعنا دگة البَاب اني من كد ما خاف من دكة
البيبان بقت اللگمة بحلگي

تُراب راح يم الشباك و دار وجهه مبتسم
تُراب : اويلي هذا السيد لاعبة بأحواله طفلة هههههه
احس صار الم بمعدتي من الخوف
تُراب فتح الكنتور على السريع بدل و نزل
و عمي جوه فتح الباب
نزلت ورا

ابو تُراب: صبي چاي عمي
جوهرة : شكد هم واحد مو ؟
ابو تُراب : لا ثلاثة السيد و أخوانه
التليفون بأيدي اتصلت على امي كالت اي شفتهم ادري بي يجي
دازلها رسالة حتى للشغل ما رحت

اسمع صوت زوج الماس يگول
- ما اريد اطرق باب ما بي رجال ابداً بس يسوولي طريق
عندي كلمتين وي امها
تُراب : هي طفلة سَيد و امها مفتهمة الموضوع غلط لان هُم كالولي
سالفة زواج و هدية ، و امشي وياي هم محسوبين عليه

اجه تُراب يحك بشواربه
اخذ السيد و طلعو و اخوانه بقو كاعدين يم عمي يسولفون
اخذت العبايه و طلعت ورا هم باب البيت مفتوح دخلت للكراج
تُراب ينزع بحذائه شافني بقى مصدوم فاتح عيونه
جوهرة : الفضول وداعتك الفضول
صگعني على راسي و طَبيت

إمي و لا ذرة خوف بعينها عكس الماس حتى وجهها مغطيته بالربطة
اميرة كاعدة بالمطبخ دكول يروح يشور بينه و احنه ما بينه حيل
تُراب كاعد يم السيد و بس يمسح بشواربه و مبتسم
و اني واكفة يم الباب و تُراب يأشرلي وخري وكفت على الحافة
و بس أذاني مبينه
عبد العزيز : لو لم يكُن السلام واجب ما انطقة
كيف تتجرأين و تاخذين زوجتي و هيَ حامل
بدون علمي و بهذا الطريق الطويل و بالاضافة
انُ حتى من وصلتوا غلقتوا الجهاز و ما أنطيتوني خبر

رحاب : خاف ما تدري سيدنا مرتك بنتي تصير
عبد العزيز : بالجديد صارت بنتج هذا عُمر كامل هي تحت أشرافي اني فـ بأي حق انتِ تهدمين ما بنيت ؟
رحاب : شتريد لعد اخليك تتزوج عليها و هي بهذا العمر
و تبقى يمك ساكته و صابرة و متحملة لا والله لو على جنازتي

عبد العزيز : لو أريد اتزوج ما راح اجي أخذ أذن من حضرتج
و هي اكثر شخص يعرف إني موضوع الزواج هذا لخاطرها
شگد عانيت منه لكن هذا الخطأ الي أرتكبته يُستحال اني
بيوم اسامحها بي

رحاب : لا تسامحها لان اصلاً اذا تزوجت هي بعد ما ترجع
عبد العزيز : تعرفين كمية الذنب لمن اخذتي بنتج من غير علم زوجها
مديت راسي لكيت تُراب يباوعلي

رحاب : ذنب بنتي اني احمله الله غفور و يسامحها
بس انتَ شلون تكدر تتزوج عليها شو الي بعمرها عايشات
حياتهن بس هي بكلشي متنازلة لخاطرك
عبد العزيز : متنازلة ؟ بشنو و من شنو حارم بنتج أني
هاي يمج و سأليها

رحاب : تتزوج طلكها تنهي موضوع الزواج تعال و اخذها وياك
عبد العزيز : لا مو لازم خليها يمج احسن
و لمن تريد تولد انطوني خَبر حتى اجي اخذ ابني
حچاها و عدل عبائته و گام

راد يطلع و يم البَاب حچه ويَ تُراب
اجه تُراب و الماس واكفة يم الباب تبجي
تُراب : جوهرة كولي لاختج السيد يريد يحاچيها
طلعت بسرعة اول ما سمعت و تمسح بدموعها
طلع تُراب و بقى السيد وياها يم الباب واگفين

جوهرة : هسة يمه والله سويتي النه سالفة شكبرها
رحاب : اش انتِ اش
جوهرة : كلنه صيري حنينة بس مو هيج
حجيتها و اني اضحك
رحاب : بالله انتِ لو يكطعج هم ادافعلج لا والله لان اني امج وشيبتيني
جوهرة : وينه الشيب شو يومية عصارة صبغ شكل
....

الماس
واكفة يم الباب و اريد بس يبررلي الي سمعته ليش
للان ما ذكر غير خطئي كاعد احس روحي اموت مرتين
مره عليه و مره على المدرسة و بنفس الوقت من اتخيل فكرة زواجة
احس الدنيا كلها تخنگني

عبد العزيز : عتبي عليج انتِ المُشكلة انتِ حافظتني
تطلعين بدون علمي الماس تعرفين شنو من خطأ ارتكبتي
الماس : اني والله ما ردت اطلع بس امي جرتني قوي

عبد العزيز : زين ابقي يم أمج
الماس : سَيد هو انتَ تريد تتزوج خصم الحجي مو ؟
عبد العزيز : ما جانت هاي الفكرة ببالي و حتى الكلام الي نقلته الج بنت هُمام جان يخص الاء مو يم اي موضوع ثاني أخوانها
يردونها تفسخ الخطوبة و يكعدوها بـ بيت هي و امير قريب على بيوتهم

الماس : شنو ؟
عبد العزيز : بَس مدام انتِ رتبتي الموضوع حسب خيالج
فـ تحملي نتيجة غَلطچ
الماس : لا خلي اروح وياك
عبد العزيز : ابداً
حچاها و هَد أيدي
الماس : شراح تسـوي
عبد العزيز : بَس أتزوج ما أسوي شيء

طلع و مَد ايده على الباب سَده بقيت ابچي
و اجتي جوهرة تشوف شبيه و شنو گلي
الماس : راح يتزوج راح يتزوج
جوهرة : خلي يتزوج و انتِ مترجعيله شنو ما عندج احساس
يتزوج عليج و تروحين ويا

دخلت ابجي و صعدت فوك اني و بطني الي بدت تصير ثقيلة
سديت الباب عليه و ابچي و عقلي اخذ راحته بالافكار و المشاهد
يرتب بكيفة كلشي حتى اللحظة الي راح اولد بيها و يجي ياخذ ابنه
لا السَيد مو بهاي القساوة

لحد الليل صعدت نويرة نزلتني يمهن و تنطيني فواكه
نويرة : يا بعد بيتي هذا الجاهل شله غرض بعركات امه و ابو
كاتله الجوع يكول للملائكة انا جوعان بس اني ما تنطيني اكل
بسرعة تأثرت و انقهرت و اخذت من ايدها اكل

رحاب : يعني هو راكب براسة يريد يتزوج هسة لو بعدين
اميرة : هسة هاي سالفة الهدية ما خلصت شوف العالم
وين وصلت للقمر
نويرة : والله انا كلشي اتقبل من الزلم الا هاي ياااااع انا نايمة
و اعاين من يسد الباب عليها و انا بمكاني كاعدة أنشوي
يمااااااا يا يماااا

اميرة : هسة غيرن الموضوع حَبيبات خلنها ترتاح
رحاب : شو صغيرة و حلوة و حامل الك بولد و شايله البيت كله
و هم تريد تتزوج ولكم هاي الزلم شيغزر بعيونها
نويرة : صدك عايني بوجهي دهر فرج رحيبة على هاي الخلفَة كلهم
حلوين

اميرة : شو مبين ما يدرو هاي السوالف خوش رجال
الماس : والله هو خوش رجال و مدللني دلال حتى كتاكيت يجيبلي
ياخذني للمدرسة ويجيبني ويجيبلي الواجب كلشي اريد يسويلي
بس اني مقهورة شلون كلبه ينطي يتزوج عليه
و هو يدري شكد احبه

رحاب : جا هو هذا الرجال من يعرف شگد تحبي يستغلچ
لان يعرف انتِ ما تكدرين عليه و متعلقة بي يكول ما تعوفني
نويرة : أسأل مجرب و لا تسأل حكيم
رحاب : و نَفس الـ سِده إعلى أمي سِدالي

نويرة : شلج بالزواج ابقي يمنه نشبعج ونسه هاي جوهرة اختج تتحسر على عيشتنه شلج بالرجال ما يوكل خبز هذا بيتي
دار الارامل و المطلقات لا اسم الله عليج من الطلاق خل يموت
لا يمه جده رَسول الله دخيل عمامته شلون ما لون هم نستقبلج عادي
الماس : اسم الله الرحمٰن عليه

بقن صافنات بوجهي
رحاب : انا الله باليني بـ بنات يموتن ع الرجولة
غُمزت الها نويرة
- منو امهن
رحاب : لا تجيبين طاريه انسي يالله ماشفتي شلون جاي هداد

الماس : اني احبة يُمه اصلاً مو بس احبه اموت عليه
اصلاً ما احب اكل الا هو يسويلي لفات صغار
و هو ما حارمني من شيء بالعكس شريد يسويلي
اميرة : مبين من عيونج شكد تحبي والله

الماس : والله اصلاً اني حبيته اول شيء لان هو سوالفة حلوة
تخلي كل الناس تحبه يفتر كل المكاتب بنص الليل علمود يجيبلي
جلاد ابو الورد بس الي ما يخافون الله يردون يزوجوه و يعوفني
نويرة : لا يغرج هو لو يحبج ما يتزوج لو تصير مكاتل للركب
لان هو لو يحبج يدري بروحه بعد ما يتقبل غيرج مره

فرشت الي امي و نمت بالكوه و اني اتذكر كل موقف لمن اسحب ايده و انام عليها و بدت تمُر الايام واهس لكلشي ما عندي
بس الصلاة احسها الشيء الي يربطني بي و من اسولف
احس كلامي يوصلهَ

فتحت تليفوني و أتصلت عليه اكثر من مره ما جَاوبني
بعدها حذفت الرقم خاف بيوم من الايام الي نية اتصل بَعد
بكُل ساعة تمُر دموعي تجري على خدي لان كل حياتي متعودة على مكاني و على هذاك البيت ما احس روحي اكدر هنا أتأقلم

يومية لمن تروح امي للشغل و نويرة تجي يمي جوهرة تسولف وياي
و كالت الي زوجها راح يكول للسيد ياخذلي اجازه بين ما تنحل الامور
و كل يوم احسب هسة شكم امتحان و تحضير راحن عليه

اني بنهاية شهر الخامس و اميرة امشي و تصيح اكعدي بس اني متعودة على الحركة اكعد انظف البيت كله و اغسل ملابسهن لان كلهن كبار و اطبخ الغداء قبل لا يجن نويرة دكول لو يموت رجلج ما نطيج
بعد على هذا الدلال

جنت كاعده بالكراج الـ كلش صغير العصر و اباوع للسماء هسة
الوقت الما يروح للجامع ويكلي محتاجة شيء ؟ اني ما كدرت على فراگة و راح اموت هو شلون گدر و عنده عادي ؟
معقول السيد بعد كل هاي العشرة ما حَبني ؟
و حُبي يبقى من طرف واحد !! بس لا
گدامي تحچي و تبتسم و انا المَرض ماكلني ؟
لو حُبي صاير من طرف واحد سَهل
المُشكلة انتَ تحبني

احس صارت حركة بـ بطني بقيت فاتحة عيوني و ما رمشت من الصدمة رجعت الحركة تكررت صعدت بالغرفة الفوك ابجي
شكد تمنيت هاي اللحظة و لمن صارت انتَ ما موجود ليش عفتني
بالليل كلش نزلت سمعت امي دكول الهن خاف جنت شوية متندمة على هاي الخطوة هسة ابد والله راح يتزوج مدري تزوج يمكن

كعدت على الدرج و أبجي بصوت عالي مثل الاطفال و هن ثلاثتهن اجن يسكتن بيه جانت اكثر لليلة حزينة تمر عليه لحد ما راحن امي و نويرة للشغل و اني كاعدة ابجي و انوح بصوت ناصي

اول ما نمت كعدت على صوت جوهرة جايبتلي ريوك
العصر اخذتني امي للدكتورة و كالت الطفل شوية نازل لازم تمتنع
عن الحركة خوفاً من الولادة المُبكرة
بقت امي خايفة عليه و اني خايفة على الي ببطني اكثر
كتبت الي كومه علاجات و امي كلهن جابتهن
انقهرت عليها نص فلوس شغلها راحن

راكان يوميه يجيني يجيبلي حلويات بس اي موضوع مايفتح وياي
رُغم يعرف بكلشي و راد ياخذني لبيتهم بس ما قبلت

اخلص الليل سوالف ويا ابني و أكلة شفت بابا عافنه ؟
و لا سأل علينه ابد شلون گلبه هلگد حجر ؟ و ما يرف علينه
هسة اذا مو عليه على ابنه بنُص الليل و أتصل
عليه رقم و اني الدموع و النعاس مجتمعات بعيني
شفت رقم غريب رَف گلبي عبالي هوَ بس خابت امالي من شفت
نهاية الرقم مو هو

ما جاوبت بس من اتصل مره ثانية فتحت خَط
اجاني صوت مرهَ هِمس
ورقاء : هلو الماس اني ورقاء شلونج
احس شيء من ريحته هَب
الماس : هلو اني زينة و انتو السيد شلونه
ورقاء : زينة اخذت رقمج من تليفون ابوي بدون ما يدري و هذا رقم رجلي ترى ابوي وصل لامج كلام هو تزوج حتى يعاقبج
هو ما تزوج و لا انفتح هذا الموضوع

الماس : صدك عليج النبي ؟
ورقاء : و النبي و ابوي مريض عليج كلش بس ما يقبل يتنازل و يخلي عمي ضُرغام يجيبج قبل شوية جنت يمه حرارته مرتفعة و بس يلهج
بـ اسمج تدرين كاتب اسمج بالجهاز عزيزة الروح ؟

احس مدري شصار بيه موت الفرح و الصدمة دموعي تجري
امسح بيهن و احجي امي كعدت تأشرلي شبيج
الماس : ما بية شيء ، ورقاء صدك صدك بداعةابوج
ورقاء : وداعة ابوي و مَعزته اني ادري بيج عفتي لان عبالج يتزوج
بس هو كلش منتهي عليج تعاليله

الماس : اي اي راح اجي
- يالله مع السلامة
- اوكفي ورقاء ، حلمت بيج حلم والله انتِ و رجلج علي واكفين لازمين
بذرة و تردون تزرعوها زرعتوها و انتو تضحكون و وراكم
قمر و رجلها منتضرين دورهم
الماس : صدك ؟؟؟؟؟ عليج الله الماس احبج ان شاء الله حامل
احنه اثنينه غايبه النه بس ما نقبل نحلل

سديته منها وامي كاعدة كبالي
الماس : يمه السيد ما متزوج ما متزوج يريد يعاقبني بَس
و هسة مريض لازم اروحله لازم
رحاب : شنو انتِ ترحين هو يجي هاي منو
- بنته ورقاء
- يجوز هاي خطة منه حتى ترجعين مبين

تركت امي تحجي و ما صار كبالي غير رجل جوهرة
اتصلت عليها النوب انتبهت للوقت استحيت امي رجعت نامت و هي تستغفر مني نمت و مره ابجي و مره ابتسم و اريد الصبح
يطلع ....
.....

جوهرة
بقيت محتارة مرة بموضوع الماس و مره بموضوع راكان
اجيت لتُراب و هو مخلي كيس المُلاكمة بوسط الصالة الفوگ
و العرگ يصب من جسمي هو يضرب و يحسب عدد الضربات
جوهرة : اخواني دوخوني
تُراب : حتى اني والله حبيبتي لو ما لاگيهم أحسن
ضربته على صدره و كعدت بالارض كباله

يحجي وهو يلهث من السُرعة
تُراب : ليش ابو الجواهر كاعد بالكاع تعال انتَ مكانك چتافي
جوهرة : العب حبيبي العب خليني صافنه

تُراب : سالفة راكان خليها عليه اني مخاوي ابو حالياً
صاير كلش صديقه بس البنيه تِسلم و تقنع امها الوضع كلش تمام
جوهرة : مادري مادري شلون بي و بـ الماس

تُراب : هاي بَراء مرت السيد احس جذب ما يتزوج عليها
وين يكدر الها هو غير جابته من بغداد لهنا بس حتى يتأكد
هي موجودة و زينه
جوهرة : لا والله داز رساله لامي حتى مدري منين جاب رقمها
تُراب : مني حبيبي اني دزيته اله

جوهرة : لعد يجذب قابل
تُراب : ما يجذب بس راد يعاقب مرته بطريقته الخاصة
بس مادري يعني بس حاس هالاحساس ممتأكد
جوهرة : كول متأكد بس تحب توكف ويا
تُراب : عديلي هَذا شلون ما اوكف ويا

تليفون دك بالغرفة كمت اجيبه لكيته راكان جاوبت و اني امشي
تُراب من يمه كال اني مو كايلك الليل كله لاختك لا تزعجنه
و اني اضرب على خدي و اشر لتُراب لا لا
راكان : مشتاق الها اريد اروح لبغداد اشوفها و امر على السيد
اريد اكله مع الاسف بس و ابوي شلون
تُراب : لا تروح خلي روحتنه نروح نُخطب

راكان : نخطب فد مرة نُخطب بعد ابوي المشكلة الجبيرة
تُراب : ابوك يمي اذا ما اخلي بأيده يحسب فلوس مهرها
اني مووووو رَجُل أختك
راكان : ترى اني هم افشر بس غير محترمك اكبر مني

تُراب : غصباً عنك تحترمني اني مخلي اختك مرتاحة
راكان : اي غصباً ما عليك غير منطيك جوهرة
تُراب : اويلي ، تعاي بوسيني اخت راكان
جوهرة : شلونك حياتييي معليك بتُراب لا تخلي يحُرفك

تُراب : بلسانها اختك دكلي احب وكاحتك
راكان : لا اختي مدكول هيج ما تخرب نظرتي لو تموت
و اني الطم على خدي زعلت و رحت للغرفة

شويه و اجه للغرفة دخل يسبح و طلع يضحك
تُراب : زعلان الاسمر اويلييي
جوهرة : شوف تُراب ترى من صدك عيب عليك جان استحيت
اخوي شلون هيج تحجي ويا
تُراب : اني و صاحبي انتِ شعليج

درت وجهي عنه بعصبية و اجه يقرقرني ضليت اضحك بصوت
عالي لحد ما تعبت خله ايده على حلگي
وصار وجهه قريب على وجهي و أنفاسنه أختلطت
تُراب : بس گُلي

جوهرة : شأگلك ؟
تُراب : گلي يا حلو منين الله جابك ؟

جوهرة: اغنيها ؟
تُراب : و بعدچ لَحد يغنيها
كعدت عدل و عدلت تيشيرتي خليت ايدي على عيونه
جوهرة : احم احم لان استحي صراحة من تباوعلي
تُراب : يالله

و اني مبتسمة صرت اغني بكلمات الاغنية و الغُرفة ظَلمه
وهو مسَلطن و لا تحرك
لحد ما وصلت مقطع كال عيدي
- لو چان الهجر مني سجيه
تعال و نصطلح و هاي هيَ
و اني الي جرحت ايدي بـ اديه
هويتك و انتَ مغتر بـ جمالك ..

بسُرعة انسحب ايدي و صرت بحُضنه
تُراب : اويلي يابة شنو هالصوت اشتعلت رحاب على هاي الخلفة
جوهرة : ههههه حلو مو بس ما مقتنعة بي اني
- يا حلو يشگ شگ غير

كعدت الصبح على دگة التليفون صاح تُراب
- ترى اختج طرشتنه طرش نريد ننطمر
فتحت خط بسرعة
- ها حبيبتي بَراء
الماس : جوهرة رجلج كاعد حبابة
اجيت يمه وفتحت سبيكر
جوهرة : اي حياتي هذا ، هاك تُراب الماس تريدك

الماس : حبابة كولي اله
تُراب : الو .. هاااا
الماس : حباب عمو وديني للسيد مريض و ميقبل احد يجيبني
تُراب : شيوديني عمو باجر وراي دوام
- بداعت ابوك و امك عمو بداعت جوهرة بداعت الله

تُراب : عمو مو شعلتن عشيرتي انتِ واختج ساعة السودة
الـ كيتكم بيها هاي حوبة سُمية بيه طلعت
الماس : هسة شگلت عمو
تُراب : حضري روحج عمو الظهر

جوهرة : راح تاخذها ؟
تُراب : اذا أختها تدللني أخذها

ضربته و نزلت لكيت عمي و خالة و دعبول نايمين
طلعت بالكراج مديت راسي و شفت واحد ركض من
يم بيت نويرة احس مگفى هذا الشخص مو غريب
عليه ان شاء الله مو هوَ ...
....

گالو نايم و يفز بأسمج
عندچ شيء يَمه نوصّله ؟
- گلت الهم لَـ يضن أرجعله
- رُسل فَهد

احم احم
نرجع لفقرة فقوري
شنو أغلى شيء ضامي بغراضكم
و شنو قُصة هذا الشيء ؟

اني قطعة ملابس الي من جنت صغيرة
اريد ألبسها لبنتي البعدها ما جايه 😭🤎🎀