رواية عاشق يريد الانتقام — الفصل 22 — بقلم نجاح السيد
رواية عاشق يريد الانتقام – الفصل الثاني والعشرون
قصة..(عاشق يريد الانتقام)..
افتح عيونى يا عمار
عمار:لأ …لسه…هنمشى شوية كمان …وبعدين فتحى
ندى:ها …افتح بقى
عمار:يلا …افتحى عيونك
فتحت ندى عيونها ولقت نفسها موجودة فى شقة فاضية مش فيها اى فرش خالص حتى جدرانها ماكنتش مدهونة
ندى(باستغراب):احنا فين
عمار:احنا فى بيتنا
ندى:بيتنا!!!!
عمار:ايوة …الى هنعيش فيها …انا وانتى وبس
ندى:انا كنت مفكرة اننا هنعيش مع ماما وعمو عزيز
عمار:وهنعيش معاهم ليه…فيلة عمو عزيز دى مش بتاعتى علشان نعيش فيها ..اما الشقة دى بتاعتى
ندى:انت اشترتها امته
عمار:بعد خطوبتنا عالطول
ندى:بس هتلحق تجهز على ميعاد الفرح
عمار:ايوة طبعا…هى بس محتاجة الفرش وبالنسبة للدهان فهى نقصها الوش الاخير بس
مسك عمار ايد ندى وقال :تعالى بقى علشان افرجك عليها
ابتسمت ندى وقالت:يلا
عمار:اولا هفرجك على احلى اوضة فى الشقة كلها
ندى:هى ايه الاوضة دى
عمار:تعالى بس وانتى تعرفى
اخدها عمار ومشيوا وراحوا للاوضة الى قصدها عمار ودخلوها
عمار:اوضة الاطفال
ندى:تعرف انك عندك حق صحيح اوضة الاطفال دى احلى وامتع اوضة فى الشقة كلها
عمار:ولسه بقى لما تتفرش هتبقى احلى ولما بقى حبايب بابهم يشرفوا الدنيا هتبقى اروع
ندى:ان شاء الله يا حبيبى
عمار:تعالى بقى علشان افرجك على اهم اوضة
مسك عمار ايد ندى وجه يمشى ويشدها معاه لقاها وقفت
ندى:عارفاه دى ومش عايزة اشوفها
عمار:اسمعى بس الكلام هتندمى
ندى:لا يا حبيبى …انا عايزة اندم
عمار:محسسانى انها اتفرشت يعنى دى على السيراميك
ندى:برضه مش عايزة اشوفها
عمار:هتيجى معايا بالذوق ولا
ندى:ولا ايه
وفجاة انحنى عمار وحمل ندى بين ذراعيه
هتفت ندى قائلة:نزلنى يا مجنون
عمار:بسسس..مش هنزلك الا لما ندخل الاوضة ..علشان تحرمى بعد كده تعارضى على حاجة اقولها
ندى:خلاص يا باشا اخر مرة
عمار:تؤتؤتؤ …مش هنزلك الا فى الاوضة
وبالفعل ظل عمار حاملها بين ذراعيه وعندما دخلوا الغرفة انزلها من على ذراعيه وجعلها تقف بجانبه مباشرة
ومال عليها وهمس فى اذنها وقال:دى بقى يا ستى اوضة النوم …مش برضه دى اهم اوضة فى الشقة كلها
ضحكت ندى وحطت يدها على صدره و دفعته بعيدا عنها وركضت مسرعه تاركة الغرفة
………………………………………….. …………..
– هنروح فين
– داعب انفها بأصبعه وقال:انتى عايزة تروحى فين
– فجأة انقلب وجهها الى العبوس وقالت:متعملش كده تانى
– ابتسم اسر وقال:بس انا بحب اعمل كده
– وضعت يدها فى خصرها وقالت:حب براحتك …بس متعملهاش ليه تانى
– وضع اسر يده ايضا فى خصره ووقف بمقابلها وقال مقلدا صوت مى:هعملها برضه
– كتمت مى الضحكة رغما عنها وقالت:انا عارفة انى مش هخلص …يستحسن اننا نمشى
همت ان تمشى ولكن مسك اسر يدها وقال:متفقناش… هنروح فين
مى:قول انت المرة دى
اسر(بعد تفكير):ايه رأيك نروح السينما
مى(اعجبت بالفكرة):موافقة
اسر:بتحبى نوع ايه من الافلام
مى:الاكشن
اسر:فى بنت بتحب الاكشن
مى:انا ..انت ناسى انى ظابطة ولا ايه
اسر(برومانسية):قولتلك قبل كده انى مستحيل انسى اى حاجة خاصة بيكى
ارتبكت مى قليلا فابتلعت ريقها وقالت:وانت بقى بتحب نوع ايه من الافلام
اقترب اسر قليلا منها وقال:الرومانسى
ابتعدت عنه وقالت:والعمل
اسر:انتى بتحبى الاكشن وانا بحب الرومانسى يبقى الحل اننا نسمع كوميدى
ضحكت مى وقالت:موافقة
اسر:وانا كمان موافق ….يلا بينا على السينما فورا
………………………………………….. ………………
– هقوم اعملكوا عصير
– ماشى يا لولو
ضحك مراد وصاح قائلا:قشطة يا باشا ..وكمان بتقولها يا لولو…وادامى انا وسارة…طب راعى اننا سناجل برضه …وخاف على مشاعرنا
ضحك عزيز قائلا:اه منك ومن لمضتك
رن هاتف عزيز فى هذا الوقت فقال:هرد على المكالمة دى لانها مهمة وبعدين نكمل لعب
مراد:خد راحتك يا باشا
انصرف عزيز تاركا المكان وذهب الى مكتبه ليرد على مكالمته
اما مراد قال بخباثة:يا سلام لما عمو عزيز يفضل ساعه كده ولا ساعتين يتكلم فى التليفون …والخلاط يعطل وطنط ليلى تفضل تصلح فيه لمدة ساعتين
ضحكت سارة وقالت:وليه كل ده
قام من مكانه وذهب ليجلس بجانبها وقال هامسا:علشان اقولك وحشتينى
هتفت سارة قائلة:متشوفش وحش
مراد:ايه ده يا بنتى مين الى علمك تقولى كده
سارة:محدش علمنى بس انا سمعتها بيقولوها كده
مراد:سمعتى غلط ..عارفة الصح ايه
سارة(ببراءة):ايه
مراد:تقوليلى وانت كمان وحشتنى
ضحكت سارة ضحكتها التى تجعل من امامه يفقد وعيه وقالت:ما انا عارفة انهم بيقولوا كده
مراد:وبدام عارفة مقولتهاش ليه
سارة:بستعبط
مراد:استعبطى براحتك اما انا بقى مش هستعبط وهقولك انك وحشتينى وبحبك وبمووت فيكى كمان
نهضت سارة واقفة من شدة كسوفها وركضت تاركه المكان وذهبت الى المطبخ
تنهد مراد وقال:ااااه …من الى انتى عملتيه فيه يا سارة…خلتينى احبك بجنون
………………………………………….. ………………
– هترجعى المستشفى تانى يا ندى
ندى:ايوة
عمار:لييه
ندى:لازم اروح لان عمو عزيز روح هو كمان بدرى النهاردة فلازم اشوف الوضع عامل ازاى فى الفترة المسائية
عمار:عمو عزيز روح ليه بدرى النهاردة
ندى:حسيت انه مرهق فاصريت عليه يمشى
عمار:بلاش يا ندى مجتش على يوم واحد
ندى:لأ جت طبعا
عمار:مصممة يعنى
ندى:ايوة
عمار:ولو انا قولت لأ مش هتروحى
ندى:انا عارفة ان حبيبى مش هيقولى لأ
عمار:مش حابب تروحى يا ندى
ندى:خلاص بقى هى ساعه واحدة بالكتير هشوف الاوضاع ماشية ازاى دلوقتى وهروح عالطول
عمار:طب انا هاجى معاكى هستناكى فى المكتب ولما تخلصى نروح سوا
ندى:ماشى
غير عمار مساره واتجه الى المستشفى وبعد مرور عدة دقائق وصلوا امامها ونزلوا من العربية وصعدوا
وبالفعل مكث عمار فى مكتب ندى وذهبت ندى تمر على غرف المرضى ومكاتب الاطباء
اول مكتب توجهت اليه كان مكتب الدكتور اشرف
قبل ما تخبط على الباب سمعت اصوات غريبة بالداخل
فقررت انها مش تخبط ودخلت عالطول
الصدمة الى صدمت ندى انها شافت اشرف ده ومعاه ممرضة فى وضع محرج للغاية
ولما انتبهوا لوجودها ابتعدوا عن بعض بس بعد ايه ندى كانت خلاص شافت كل حاجة
هتفت ندى بصوت عالى:اه …يا حقير يا واطى يا سافل
اشرف:ندى احنا ….
ندى:انتوا ايه …انا شوفت كل حاجة ودا مش اول مرة اشوف…انا ياما شوفتك بتعمل كده زمان بس كنت بسكت بس المرة دى انا مش هسكت
اقترب اشرف منها وقبض على ذراعها بقوة وقال وهو ينظر اليها نظرة ارعبتها:انا هخليكى تسكتى برضه المرة دى
كانت لسه ندى هترد عليه بس لقت الى جه من وراها ونزعها من ايده وبعدها عنه واوقفها وراه وقبض على لياقة قميصه وقال والشر بيتطاير من عينه:انت عارف انا ممكن اعمل فيك ايه دلوقتى على الى عملته ده
قالت ندى تترجى عمار:خلاص يا عمار سيبه الله يخليك
لقد وصل غضب عمار الى اعلى قمة لدرجة انه كان يقبض على يديه بقوة ولكن كان الحل لكى يخف هذا الغضب هو ان يعطى اشرف لكمة فى وجهه
وبالفعل فعل ذلك عمار ووقع اشرف على الارض وامسك يد ندى وترك المكان مسرعا وهو يجرها ورائه حتى نزلوا لاسفل وفتح لها باب العربية وركبت واغلق خلفها الباب وفعل هو ذلك ايضا
قبل ان يقود السيارة وضعت ندى يدها على كتفه وقالت:ممكن مش تسوق وانت متعصب كده
عمار(بعصبية):الكلب ازاى يتجرأ و يمسكك كده
ندى:ممكن تهدى شوية ارجوك
نفخ عمار بضيق وفضل ان يصمت حتى يهدأ قليلا
وبعد فترة وضعت ندى يدها على وجهه وقالت:هديت شوية
عمار:تقريبا
ندى:الموقف ماكنش مستدعى الى عملته ده
عمار:عايزانى ادخل الاقيه مسكك من ايدك ومقربك ليه ومافيش بينكوا الا سنتيمترات واعمل ايه اصقف مثلا
ندى:تحاول تكظم غيظك
ضرب عمار مقود السيارة وقال:انتى هتجنينى يا ندى
ندى(بحنيه):سلامتك من الجنان يا حبيبى
هتف عمار قائلا بدون قصد:يا برودك يا ندى
ندى:انا باردة يا عمار
عمار:بصى يستحسن انى اروحك واروح انا كمان …وبعد كده ممنوع تكونى موجودة فى المستشفى وعمو عزيز مش موجود فيها
صمتت ندى ولم تجيبه فهذه هى عادة ندى عندما يقول لها احد ما كلام يغضبها تفضل الصمت ولا تتكلم
غضب عمار من عدم ردها فقال:مش بتردى ليه
ندى:……….
عمار:ندى ردى عليه انا بكلمك
ندى:ممكن تروحنى …ولا انزل واركب تاكسى
قاد عمار السيارة دون ان ينطق بأى كلمة
………………………………………….. ………………
مى:اما كان حته فيلم…. عمرى ما ضحكت بالشكل ده
اسر:وانا كمان
مى:شكلى كده هغير رأى وهحب الكوميدى عن الاكشن
اسر:ياريت …يبقى ارحم شوية…ها نروح ولا لسه فى مكان عايزة تروحيه
مى:ايوة …فى
اسر:عايزة تروحى فين
مى:انت ناسى يا دكتور اننا لسه مش اتعشنا …ولا انت ناوى مش تعشينى النهاردة
ضحك اسر وقال:ودى تيجى برضه انا اقدر اخلى مى حبيبتى تنام من غير عشا
مى:حبيبتك
اسر:دى كمان ممنوع انى اقولها
مى:ايوووووة ممنوع
ضحك اسر وقال:خلاص يا حبيبتى
ضحكت مى ايضا وقالت:هتعشينى بقى فين
اسر:شاورى يا اميرتى على اى مكان عايزة تتعشى فيه وهنروحه فورا
مى:ممممممممم…نتعشى فى الاوتيل
اسر:انا برضه بقول كده
………………………………………….. ………………
– صباح الروقان
– يا صباح الفل يا سارة
سارة:عمار لسه مش صحى يا طنط
ليلى:لأ لسه
سارة:وعمو عزيز
ليلى:عمو عزيز صحى من بدرى وفطر ومشى عالطول
جاء عمار فى هذا الوقت وقال بوجه عابس :صباح الخير
سارة:فى حد يقول صباح الخير وهو مكشر كده
عمار:مش فايقلك يا سارة
ليلى:مالك يا عمار…تعبان ولا حاجة
عمار:مش نمت بس امبارح كويس…وعندى صداع
ليلى:هجبلك مسكن هيخليه يروح عالطول
عمار:اوك
انصرفت ليلى لتحضر المسكن لعمار
سارة:مالك بجد يا ابيه
عمار:اتخنقت انا وندى امبارح
سارة:عادى يعنى يا ابيه كل المخطوبين لازم بتحصل ما بينهم خناقات
عمار: بس انا زعلتها …بس كان غصب عنى
سارة:خلاص روحلها وصالحها
عمار:بعد الشغل
سارة:اوك …ندى طيوبة جدا وهتسامحك عالطول وكمان دى بتحبك اووى والله
عمار:وانا بعشقها يا سارة والله وبحبها اكتر من ما هى بتحبنى كمان …دى هى اول حب فى حياتى
جاءت ليلى فى هذا الوقت واعطته المسكن وقالت:كل الاول وبعدين خده
عمار:لازم امشى دلوقتى علشان متأخرش فى الشغل ..هشترى بقى هناك اى حاجة اكلها وهبقى اخده بعد الاكل
ليلى:ماشى يا حبيبى الى انت عايزه
………………………………………….. ………….
ضربت ندى المكتب بيدها بكل قوة وصاحت قائلة:انا بأمكانى اقولك اتفضل برة ومعتش ليك اى مكان هنا ..بس انا هعمل بأصلى برضه وهعديهالك المرة دى …علشان خاطر ياسيمن الى هى مراتك وصاحبتى فى نفس الوقت …اما بقى قسما عظما لو عملتها تانى لاكون فضحاك فى المستشفى كلها وطرداك من هنا .
ثم التفتت الى تلك الممرضة ونظرت اليها وقالت:اما انتى انا هعرف اتعامل معاكى ازاى ….من هنا ورايح هتكون معايا فى كل الحالات الى بتابعها .. وانا هعرف اخليكى تندمى على الى عملتيه ده ازاى …انا خلصت كلامى اتفضلوا روحوا شوفوا شغلكوا
انصرفوا بالفعل تاركين مكتب ندى وخرجوا ولكنهم وقفوا فى مكان بعيدا عن انظار اى حد
وهتف اشرف قائلا:بنت التييت حسابها تقل اووى عندى
مايسه:ناوى تعمل ايه
اشرف:حكاية انك هتبقى الممرضة الى معاها فى كل الحالات الى هى هتابعها هتفيدنى اوووى
مايسه:هتفيدك ازاى
اشرف:بعدين اقولك ..الموضوع عايز تفكير دقيق اووى
مايسة:ماشى